Kategorie: Algemeen

Moeder natuur het haar spreekwoordelike winterkloue behoorlik vir die Wes-Kaap en veral vir ons pragtige Moederstad ingeslaan. Selfs die weervoorspelling-toeps se akkuraatheid word die afgelope tyd bevraagteken, want dit voorspel nie reën nie, maar tog word ons geseën. Presies 5 jaar gelede het ons almal gedink Dag Zero gaan aanbreek aangesien ons damme en reservoirs dolleeg was. Ons mag beslis nie weer oor al die wonderlike reën wat aanhoudend oor die stad val, kla nie. Die ongure weer beïnvloed beslis al ons buitemuurse aktiwiteite. Daarom is ons en ander skole in die stad se sport verlede naweek afgestel. Die watertafel van beide die Conradieveld en die junior veld (agter die skool) het met al die baie reën die afgelope tyd baie gestyg en maak dit selfs moeilik om te oefen. Ons vra vir begrip indien oefeninge ook nie kan plaasvind nie.

Beide ons junior en senior kore het op Dinsdagaand, 01 Augustus, saam met die bekende sanger, Jak de Priester, by die ikoniese Groote Kerk opgetree. Die merkwaardige kerk is Suid-Afrika se oudste plek van Christelike aanbidding, gebou deur Herman Schuette in 1841. Ons kore het hulle puik van hul taak gekwyt en het ons baie trots gemaak. Baie dankie juf. Helecia en mnr. Ben vir hul leeue-aandeel in die verband asook juf. Heidré vir die toesig. Graag wil ek al ons ouers/voogde bedank wat die spesiale optrede bygewoon het om ons kore te ondersteun en in die dieselfde asem wil ek Hoërskool Jan van Riebeeck gelukwens met die puik reëlings en ‘n baie suksesvolle aand saam met Jak de Priester.

Groen Vrydag wat op 28 Julie by die skool plaasgevind het, is georganiseer om die afskop van die Vroue Netbal Wêreldbeker te vier. Dit was ‘n reuse sukses. Ons leerders en personeel het lekker geesgevang deur groen en goud aan te trek om ons nasionale netbalspan vir die toernooi, wat op ons voorstoep plaasvind, te ondersteun. Volg hierdie skakel vir ‘n video van die doelgooikompetisie. Ek doen ‘n beroep dat ons as skoolgemeenskap aanhou om die Proteas te ondersteun. Hulle gelykop telling teen New Zealand op Woensdagaand, 02 Augustus, was beslis ‘n hoogtepunt vir ons nasie. Kom ons hou styf duimvas dat hulle goed sal vaar in die res van die toernooi en 5de sal eindig. 

Graag sluit ek af met die volgende stelling deur Joel Randymar oor die lewe en wens ek vir al die mini-sportspanne (o.7 & 0.8-netbal en rugby) wat môreoggend aan ons eie mini-rugby en -netbaldag gaan deelneem, sterkte toe. Mag almal ‘n wonderlike naweek saam met jul gesinne geniet.

“Life is not about having everything
It is about finding meaning in everything.’’

Vriendelike groete

Naas Beets
SKOOLHOOF

*Plakkers gaan van volgende week af op Karri beskikbaar wees.

Vrydag, 1 September 2023, is Loslitdag!

• Tema: Share a smile
• Trek bont en kleurvol aan!
• Betaal R20 vir ‘n loslitdagplakker om Vrydag, 1 September, sivvies aan te trek!

Die einde van week 2 het so skielik sy verskyning gemaak en laat ‘n mens weereens besef hoe vinnig tyd verby snel. Dit voel skaars of die skool na die lekker wintervakansie heropen het, en hier staan ons aan die einde van week 2. Die anderkant van die munt is dat tyd nog vinniger verby gaan wanneer jy pret het, en dit is presies wat by ons wonderlike skool gebeur. Ons jannies leer, speel sport en beoefen kultuur terwyl hulle pret het om net hulself te wees. Baie dankie aan al die personeel wat help dat ons die spesiale etos en kultuur by ons skool omhels sodat ons in die proses seker maak dat ons Jannies hul skoollewe terdeë geniet.

Verlede naweek het ons o.10 – o.13-hokkiespanne (seuns en dogters) suksesvol aan die LS Stellenbosch se hokkietoernooi deelgeneem. Die week begin die netbal-, hokkie- en rugby ligawedstryde. Die sportkalendar vir die kwartaal is vol gepak met sportwedstryde, toernooie asook die jaarlikse interskole wat weg teen LS Dirkie Uys te Moorreesburg vanaf 18 – 19 Augustus plaasvind. Ek versoek dus die ouers/voogde om gereeld ons kalender te raadpleeg om sodoende nie op die opwindende sport- en kultuuraktiwiteite uit te mis nie.

Gisteroggend met die aanvang van die skooldag het ek die voorreg gehad om na die senior koor te luister terwyl hulle oefen vir hul optrede saam met Jak de Priester op Dinsdagaand, 01 Augustus, by die Groote Kerk. Hulle het ongelooflik mooi gesing en my dag kon nie op ‘n beter noot begin het nie. Baie dankie en geluk aan juf. Helecia en mnr. Ben met die kore wat dag-na-dag net beter en beter sing soos hulle meer gereeld oefen en optree. Maak dus seker dat julle nie die spesiale optrede volgende week mis nie.

Op Vrydag, 21 Julie, het Stephanie le Roux gereël dat 13 van ons behoeftige leerders se oë by Tomlinson Oogkundiges getoets word. Esna van der Walt en Suna Karsten (almal oud-ouers) het die oogtoetse behartig. Ons was baie verbaas om te hoor hoeveel van die leerders ‘n brilvoorskrif benodig – 9 van die 13 leerders benodig ‘n bril. Party van die leerders het regtig hoë brilvoorskrifte nodig en ons hoop om ‘n verbetering in hul skoolwerk te sien. Tomlinson oogkundiges spesialiseer in kindervisie en doen jaarliks oogsiftingstoetse by verskeie skole in Kaapstad. Hiemee wil ons vir Esna en Suna vir die oogtoetse asook Stephanie wat al die rame en lense gerëel het, hartlik bedank vir die pragtige gebaar om ons behoeftige leerders te help.

Vandag is dit Groendag by die skool, ons vier die afskop van die Vroue Netbal Wêreldbeker wat in die Moederstad plaasvind. Hiermee wil ons, ons nasionale netbalspan voluit vir die hele toernooi ondersteun. Ons ondersteun ook graag die Bokke wat môre teen Argentinië in Johannesburg rugby speel. Daarom nooi ons ons ouers/voogde/au pairs uit om vandag Groen te dra ter ondersteuning van ons nasionale netbal- en rugbyspanne en sommer in die proses lekker gees te vang en nasie te bou!

Laat my ook toe om onderskeidelik vir Beulah (Snoepiebestuurder) en haar man Andrew Magerman hartlik geluk te wens met hul troue wat op 08 Julie plaasgevind het asook Suzaan en Gerrit wat verlede naweek verloof geraak het. Ons beste wense en ‘n wonderlike toekoms saam vergesel hulle.

Graag sluit ek dan af met die volgende stelling oor dankbaarheid en wens vir al die sportspanne wat oor die naweek gaan deelneem sterkte toe. Mag almal ‘n wonderlike naweek saam met jul gesinne geniet.

“Dankbaarheid is die kortste weg na Geluk.’’

Vriendelike groete

Naas Beets
SKOOLHOOF

Dit is dan my groot eer en voorreg om ons leerders, ouers/voogde en personeel hartlik terug by die skool na ‘n heerlike wintervakansie te verwelkom. Ek glo dat almal die 3 weke van lekker rus behoorlik gebruik het om die spreekwoordelike battery sommer ten volle te herlaai en is slaggereed vir nog ‘n opwindende kwartaal propvol aktiwiteite wat voorlê. Daar is heelwat sport, kultuur (Koor & Eisteddfod) en akademiese aktiwiteite om na uit te sien, veral die interskole wat weg tydens die naweek van 18 en 19 Augustus te Moorreesburg plaasvind asook die akademiese week vanaf 25 Augustus tot 02 September. Meer inligting sal binnekort volg.

Die Suid-Kaap Sporttoer vanaf 19 – 23 Junie 2023 was ‘n reuse sukses en die leerders wat die toer meegemaak het, kan nie ophou praat oor die wonderlike ervaring om teen skole buite ons area te speel asook die ongelooflike besienswaardighede wat hulle besoek het nie. Ons het nie toegelaat dat die leerders hulle selfone saam op toer neem nie. Hulle het saans na die sportwedstryde bordspeletjies gespeel en lekker met mekaar gesels. Dit is juis die samesyn, sosialisering en kameraadskap wat die leerders vir ‘n baie lang tyd gaan onthou en waardeer. Weereens baie dankie aan die onderwysers (Leon, Ischké, Shahneé, Sharon, Erick, Suné Swanepoel en Rashard) wat die leerders op toer vergesel het en so mooi na hulle omgesien het. Mnr. Leon, baie dankie en geluk met die reël van die puik sporttoer. Hierdie Suid-Kaap Sporttoer vir die o.13A-Netbal-, o.13A-Rugby-, o.13A-Hokkie- (seuns en dogters) asook die o.12A-Netbalspan word nou ‘n jaarlikse instelling en daar word reeds aan die 2024 sporttoer beplan.

Op Dinsdag, 18 Julie, het al ons Jannies en onderwysers terug skool toe gekeer. Die eerste dag van kwartaal 3 is tradisioneel met ‘n saalbyeenkoms begin waartydens ek almal amptelik na die heerlike vakansie kon verwelkom. Die saalboodskap is deur ons 2023 Hoofseun en Hoofdogter gelewer. Jan-Willem Silvis en Mieke Huysamen het hul puik van hul taak gekwyt met hul eerste amptelik optrede as die nuwe hoofseun en –dogter. Baie dankie aan Jan en Karlien Silvis (Jan-Willem se ouers) en André en Tanya Huysamen (Mieke se ouers) wat die simboliese aansteek van die hoofleierbalkies behartig het. Verder het ons ook saam met die res van die wêreld Nelson Mandela Internasionale Dag gevier. Ek verwys graag na een van Madiba se legendariese stellings wat so gepas is vir onderwys, naamlik “Education is the most powerful weapon which you can use to change the world’’.

Dit is dan ook my eer en voorreg om met julle te deel dat juf. Ischké (netbalhoof) gedurende die Junie-vakansie haar Protea-kleure as nasionale netbalskeidsregter verwerf het. Welgedaan Ischké! Ons is baie trots op jou en dankbaar vir alles wat jy vir netbal by ons skool tot voordeel van ons netbaldogters doen.

Die buitemuurse program het ook die week volstoom afgeskop terwyl die gure weer vir ons verskeie uitdagings gebied het om met die sportoefeninge voort te gaan. Sterkte aan die o.9 – o.13 hokkiespanne wat vanaf vanmiddag en môre aan Laerskool Stellenbosch se hokkietoernooi deelneem.

Graag sluit ek dan af met die volgende stelling van Andy Andrews rakende die lewe en wens vir julle ‘n wonderlike naweek toe.

“Life itself is a privilege
But to live life to the fullest, well that is a choice.’’

Vriendelike groete

Naas Beets
SKOOLHOOF

So breek die einde van ‘n lang en besige, maar opwindende kwartaal aan. Vandag ontvang elke leerder sy/haar rapport om erkenning te ontvang vir hul harde werk, toewyding en deursettingsvermoë die afgelope kwartaal. Ek wil graag die leerders gelukwens en komplimenteer met hul spograpporte. Ons is saam met julle as ouers/voogde baie trots op jul kinders se akademiese vordering en –prestasies. Geniet nou die welverdiende vakansie om sommer alles te doen wat jy die afgelope tyd as gevolg van die eksamen nie voor tyd gehad het nie.

Ons sporttoerspanne het op Maandag, 19 Junie, so net na 08:00 op ‘n luukse bus na die Suid-Kaap vir ‘n weeklange sporttoer vertrek. Die eerste stop en wedstryde het op dieselfde dag teen LS Swellendam geskied waar die hokkiespanne hul eerste toerwedstryde gespeel het. Die o.13A-seunshokkiespan het ongelukkig 1 – 2 verloor, maar die o.13A-dogterspan het daarvoor opgemaak en 1 – 0 gewen. Die toer het dus op ‘n goeie noot afgeskop en nie eers die gure weer kon hul geesdrif demp nie.

Laat my asseblief toe om ons personeel hartlik te bedank vir hul harde werk en toewyding die afgelope kwartaal om te verseker dat ons Jannies hul volle potensiaal bereik. Dit was ‘n besige kwartaal vol sportaktiwiteite en lekker geleenthede soos die kleiduifskiet, kaperjolle en die suksesvolle veiling. Indien jy refleksie rakende die afgelope kwartaal sou wou neem, staan daar een ding soos die spreekwoordelike paal bo water uit en dit is SUKSES. Daarvoor is ons baie dankbaar en wil graag ons dinamiese Beheerraad hartlik bedank vir hul effektiewe leiding en kosbare tyd om saam met die EXCO (bestuurspan) Laerskool Jan van Riebeeck na hoër hoogtes te lei sodat ons trotse skool as een van die voortreflikste skole in die land kan vestig. ‘n Skool kan slegs suksesvol wees indien sy ouers/voogde aktief betrokke is, en dit is waarvoor ons skool staan – betrokke ouers/voogde wat net die beste vir hul kinders en die skoolgemeenskap wil hê. Mag ons die spesiale etos by die skool asook die unieke band tussen leerders, ouers/voogde en personeel vir nog baie lank koester! Solank ons onsself kan wees, sal die Laerskool Jan van Riebeeck van krag-tot-krag gaan. Laastens, maar nie die minste nie, baie dankie aan Louise en haar wonderlike span by Huppelland wat ongelooflike werk doen om die Huppellanders so mooi vir die laerskool voor te berei.

Baie dankie aan die musiekdepartement (Helecia, Ben en Estelle) vir die pragtige musiekkonserte wat op Dinsdag, 20 Junie, in skooltyd aangebied is. Baie dankie en geluk aan die musiekleerders wat ons met hul talente trakteer het. Julle maak ons baie trots! Baie dankie ook aan die ouers/voogde asook oumas en oupas wat die geleentheid kom ondersteun het.

Graag sluit ek af met die volgende stelling van Arianna Huffington rakende dankbaarheid en wens vir julle ‘n wonderlike en welverdiende vakansie toe. Wees veilig. Ons kan nie wag om al die Jannies op 18 Julie terug by die skool te verwelkom nie:

“Living in a state of gratitude is
the gate way to grace.’’

Vriendelike groete

Naas Beets
SKOOLHOOF

Die Hoër- en Laerskool Jan van Riebeeck word hierdie jaar omtrent bederf met ‘n eerste. Adrian en Mieke Huysamen verteenwoordig hul gesin deur hierdie jaar elkeen ‘n hoofleierrol in hul onderskeie skole te vertolk. Adrian, die Hoofseun vir 2023 (HS JvR), en sy sussie, Mieke, as Hoofdogter vir 2023 (LS JvR). Hoe kosbaar is dit nie vir ons Jan van Riebeeck-span om dit saam met die Huysamen-gesin te vier nie!

So kom die 2de laaste week van die kwartaal asook die eksamen tot ‘n einde. Ek glo dat heelwat ouers/voogde saam met hul kinders ‘n sug van verligting gegee het toe die laaste vak op Woensdag, 14 Junie, geskryf is. Die antwoordstelle is amper klaar gemerk, deeglike moderering geskied en punte word verwerk sodat ons op Vrydag, 23 Junie, die dag wat die skole sluit, vir elke leerder sy/haar rapport kan gee.

Graag wil ek spesifiek die leerders bedank en gelukwens met hul deeglike voorbereiding vir die eksamen asook die besonderse werketiek wat hulle dwarsdeur die jaar handhaaf. Hartlike dank aan ons ouers/voogde wat hul kinders so mooi en lojaal die afgelope twee weke tydens die eksamen/assessering ondersteun het om net hul beste te doen.

Vanaf Maandag, 05 Junie, het die interim buitemuurse sportprogram in skooltyd, net na die aflê van die daaglikse eksamens plaasgevind. Die doel om nog steeds met sportoefeninge gedurende die eksamentyd voort te gaan, was tweeledig: eerstens geniet die leerders dit terdeë om direk na ‘n lang eksamensessie uit die klas te kom, die vars lug te geniet en aktief te wees wat sommer ook help met hul algemene geestelike welsyn. Tweedens help die program om hulle fiks te hou asook om hul spelpeil langer te handhaaf veral met ‘n welverdiende 3 weke-vakansie wat voorlê. Daar is die afgelope kwartaal so hard gewerk om fiksheidsvlakke te verbeter, effektiewe spelpatrone te implementeer en indien ons sportoefeninge vanaf die begin van die eksamens sou stop plus die vakansie wat voorlê, beteken dit dat daar amper 7 weke van geen oefeninge sou plaasvind nie. Dit is vir my belangrik dat ons leerders veral tydens die eksamen aktief bly, want dit hou hulle besig en neem hul aandag weg van die stres en angstigheid wat tydens formele assesserings ervaar word.

Op Dinsdag, 13 Junie, het die gr. 4’s Engels Eerste Addisionele Taal geskryf en om sommer ‘n bietjie pret te hê en die eksamenangs in bedwang te hou, kon die leerders soos hul gunsteling Roald Dahl-karakter aantrek en op die dag eksamen skryf. Hulle het pragtig gelyk en die Engelse vraestel sommer maklik kaf gedraf.

Op Donderdag, 15 Junie, is die sportklere vir die Suid-Kaap Sporttoer in die saal oorhandig. Groot was die verrassing toe Scarra Ntubeni (Stormers rugbyspeler) die toerklere aan die toerspelers kom oorhandig het. Dit het die geleentheid baie spesiaal gemaak. Verder het die o.12A-Netbalspan wat ook die toer gaan mee maak hul eie gelukbringer vir die toer bekend gestel, naamlik Janneke. Baie dankie aan Ria Hertzog wat die spesiale gelukbringer se klere in ‘n japtrap aan mekaar geslaan het. Die toergroep is baie opgewonde oor die 5-dae toer na die Suid-Kaap. Hulle vertrek Maandag, 19 Junie, en keer op Vrydag, 23 Junie, terug. Baie dankie aan die toerorganiseerder, Leon Hanekom, wat die fantastiese toer beplan en gereël het. Die toer sluit ook die besoek aan heelwat bekende toeriste-attraksies in die Suid-Kaap in. Verseker gaan ons leerders hul gate uit geniet. Ek wens vir hulle ‘n voorspoedige en genotvolle toer toe.

Dit is dan my voorreg om die 2023 Hoofdogter en Hoofseun bekend te maak na afloop van die verkiesing op Woensdag, 14 Junie. Baie geluk aan Mieke Huysamen en Jan-Willem Silvis.

Graag sluit ek af met die volgende ware stelling van Henri Frederic Amiel rakende dankbaarheid en wens vir julle ‘n wonderlike langnaweek toe.

“Thankfulness is the beginning of gratitude.
Gratitude is the completion of thankfulness.
Thankfulness may consist merely of words.
Gratitude is shown in acts.”

Vriendelike groete
Naas Beets

• Markdag vind Donderdag, 22 Junie, plaas.
• Dit is die grondslagfase se beurt vir verkope.
• Tafelbesprekings sluit Dinsdag om 13:00.
• Geen kontant word aanvaar vir die bespreek van tafels nie, betalings kan slegs op die Karri-toep gemaak word.
• Markdag sal van 11:30 – 12:15 geskied.
• Geen klappers of lewende hawe mag verkoop word nie.

Week 9 het afgeskop met die graad 4 – 6-leerders wat ook met die Junie-eksamens begin het. Die grondslagfase leerders is reeds besig met hul tweede en finale week van formele assesserings. Baie dankie aan al die ouers/voogde en onderwysers wat so mooi help om die stresvlakke en spanning tydens die eksamen in toom te hou sodat dit nie die oorhand kry nie. Ons woon en leef in ‘n land waar ons daagliks bewustelik en onbewustelik stres en angs as gevolg van beurtkrag, misdaad, verkeer, korrupsie en uitdagende ekonomiese tye ervaar. Ons kinders word ongelukkig hieraan blootgestel en daarom is dit belangrik dat ons kollektief seker maak dat ons kinders nie addisionele angs en stres ervaar nie.

Vanaf Maandag, 05 Junie, het die buitemuurse sportprogram in skooltyd net na die aflê van die daaglikse eksamens plaasgevind. Die doel daarvan om nog steeds met sportoefeninge gedurende die eksamentyd voort te gaan is tweeledig: eerstens geniet die leerders dit terdeë om direk na ‘n lang eksamensessie uit die klas te kom, die vars lug te geniet en aktief te wees wat sommer ook help met hul algemene geestelike welsyn. Tweedens help die program om hulle fiks te hou asook om hul spelpeil langer te handhaaf, veral met ‘n 3 weke vakansie wat voorlê. Daar is die afgelope kwartaal so hard gewerk om fiksheidsvlakke te verbeter en effektiewe spelpatrone te implementeer en indien ons sportoefeninge vanaf die begin van die eksamens sou stop plus die vakansie wat voorlê, beteken dit dat daar amper 7 weke van geen oefeninge sal plaasvind nie. Dit is vir my belangrik dat ons leerders veral tydens die eksamens aktief bly, want dit hou hulle besig en neem hul aandag weg van die stres en angtigheid wat tydens formele assesserings ervaar word.

So tussen die eksamen en die leer het ons o.13A-netbalspanne op Saterdag, 03 Junie, as B-Liga wenners uit die stryd getree. Ons het in die finale teen Laerskool Totius gespeel. Dit was ‘n spanningsvolle wedstryd en na halftyd het ons slegs met 5 – 4 voorgeloop. Ons o.13A-dogters speel ‘n titaniese tweede helfte en stap 12 –7 met die louere weg. Baie geluk aan hul toegewyde afrigter, juf Ischké, wat al vir ‘n geruime tydperk baie ekstra tyd met haar span spandeer. Hierdie selfde span was ook die B-liga wenners vir o.12A gedurende 2022. Dit is werklik ‘n merkwaardige prestasie en graag wil ons ook juff. Shahneé en Sharon hartlik bedank wat haar en die dogters so getrou as deel van die afrigterspan ondersteun het. Baie dankie aan al die o.13A-netbalouers wat wedstryd na wedstryd selfs in baie koue en ongure weer hul dogters so lojaal ondersteun en aangemoedig het.

Die afgelope twee weke het die graad 7’s spoggerig hul tegnologietake vir my in my kantoor kom voorlê. Hulle het in groepe gewerk en moes ‘n selfoontoring bou wat esteties in ‘n woonbuurt opgerig kan word. Die kreatiwiteit van ons graad 7’s het my weereens stom geslaan. Baie geluk en dankie aan hul juf. Suné Alberts met die kreatiewe projek. Ons graad 1’s het beslis nie vir die graad 7’s terug gestaan nie en aangedring om hul pragtige robotte wat hul tydens robotika gebou het, met trots vir my te kom wys. Wonderlik om te sien dat selfs ons graad 1’s die vrymoedigheid het om hul spogwerk met my te kom deel. Die dae dat kinders bang was vir die skoolhoof se kantoor is lankal verby en dit is vir my belangrik dat ons leerders moet weet dat hulle belangrik is en altyd welkom in my kantoor is.

Verder wil ek net om verskoning vra vir enige moontlike ongerief wat ouers/voogde tans ervaar met die aankope van die nuwe skooldrag. Daar is egter geldige redes waarom die voorrade nie altyd beskikbaar of vinnig genoeg beskikbaar is nie. Wees verseker dat ons saam met die klerebank werk om die probeem aan te spreek.

Graag sluit ek af met die volgende stelling van Amy Weatherly en wens vir julle ‘n wonderlike naweek toe.

“Some people could be given an entire field of roses and only see the thorns in it,
Others could be given a single weed and only see the beautiful wildflower in it.
Perception is a key component to gratitude and gratitude is a key component to joy!’’

Vriendelike groete

Naas Beets
SKOOLHOOF

Sien gerus die beskrywing en foto’s hier onder vir ‘n voorbeeld van die leerders se winterdrag (grondslagfase se foto’s sal binnekort gepubliseer word). Volg hierdie skakel vir die die kleredrag webblad op ons webtuiste.  Sweetpakke is in produksieproses.  Hierdie jaar mag leerders nog meer informele skooldrag dra a.g.v. infasering van skooldrag.  Vanaf 2024 sal korrekte skooldrag verpligtend vir almal wees.

Mei-maand, ‘n baie besige maand by ons trotse skool het skielik die trekpas gekry met Junie wat so stilletjies haar opwagting gemaak het. Junie-maand bring ook die koue en nat weer soos die seisoene draai en ons is so dankbaar vir die wonderlike reën wat die afgelope tyd wyd verspreid oor ons land val.

Saterdagaand, 27 Mei, het ons jaarlikse veilingsdinee by die ikoniese Pienk Dame, naamlik die Mt. Nelson Hotel plaasgevind. Al die kaartjies was vir die glans- en fondsinsamelingsgeleentheid uitverkoop. Die gaste was elegant en deftig vir die spesiale geleentheid getooi. MC du Toit, een van ons ouers, het soos in die verlede as afslaer opgetree. Hy het die 41 lotte binne ‘n kort tydjie verkoop en nie eens die Stormers se misrabele vertoning teen Munster kon sy en die gaste se geesdrif demp nie. Dit is dan my eer en voorreg om bekend te maak dat daar tydens die veiling ‘n enorme R1,25m ingesamel is. Dit het al ons verwagtinge oortref, veral met die huidige ekonomiese toestande in ag geneem. Graag wil ek ook die geleentheid gebruik om al ons gaste en veral ons ouers wat op die aand ‘n finansiële bydrae gemaak het, hartlik te bedank vir hul finansiële hulp om LS Jan van Riebeeck na nog hoër hoogtes te neem. Daar is darem nie net ‘n spogveiling gehou nie, maar ook lekker saam gekuier en gedans. Die onthaalsaal van die Mt. Nelson was uiters stylvol voorberei. Die samesyn was kosbaar en die spreekwoordelikge goeie gevoel van die skoolgemeenskap was feitlik tasbaar. Baie dankie aan ons Voorsitter van die Opvoedingstrust en die Beheerraad, naamlik Merwe Scholtz vir sy dinamiese leiding en puik toespraak wat die doel van die spesiale aand mooi in konteks geplaas het. Laat my ook toe om die reëlingskomitee bestaande uit Odette Faling, Freda Theron, Mari Kushner, Martie Viljoen en Joanita du Toit weereens hartlik te bedank en geluk te wens met ‘n onvergeetlike aand. Groot dankie ook aan ons afslaer, MC du Toit, wat hom puik van sy taak gekwyt het. Sien gerus later vandag die foto’s, geneem deur Annene van Eeden, op die Kiek.

Hierdie week het die Junie-eksamen vir die gr. 7’s begin asook die assesserings vir die Grondslagfase. Volgende week begin die Gr. 4 – 6 ook met hul eksamen en wens ek al ons leerders en personeel voorspoed toe. Eksamen verhoog ongelukkig stresvlakke by leerders en dit filter ook deur na die gesinne. Graag versoek ek julle as ouers/voogde om ons as personeel te help om die stresvlakke en spanning tydens die eksamen te beheer sodat dit nie die oorhand kry nie. Stres tot ‘n eksamen is ‘n natuurlike reaksie en as dit reg aangewend en bestuur word, kan dit ook voordelig wees. Probeer gerus die volgende wenke om jou kind/ers se eksamenstres en jou moontlike eie angstigheid daaroor hok te slaan:

• Berei betyds voor. Help jou kind/ers om ‘n studierooster op te stel wat jou kind/ers genoeg tyd gee om ook te ontspan en vroeg saans in die bed te spring sodat hulle genoeg slaap inkry.
• Skep ‘n rustige en ontspanne atmosfeer vry van enige stressors by die huis vir jou kind/ers om te leer.
• Skep ‘n toegewyde studieruimte met behoorlike beligting en vry van geraas.
• Skep ‘n emosionele band met jou kind/ers dat hulle nie voel dat hulle die eksamenpad alleen stap nie. Vra vir hulle hoe die eksamen was en spreek positiewe woorde uit. Laat hulle verstaan dat julle vir hulle nog steeds baie lief sal wees, ongeag die uitslae en hulle beslis nie op grond daarvan sal beoordeel nie.
• Help jou kind/ers om ‘n gewoonte aan te kweek dat hulle die regte skryfbehoeftes en die regte toerusting vir die dag in pak.
• Vermy gejaagdheid en om hulle op die nippertjie soggens voor die eksamen by die skool af te laai, want dit maak leerders angstig.

So tussen die eksamen en die leer speel ons o.13A-netbalspanne op Vrydagmiddag, 02 Junie, in die liga-uitspeeltoernooi te LS Gene Louw. Ons wens ons dogters en hul afrigter, juf. Ischké, alle voorspoed toe en ons hou styf duimvas. Ons o.10A- en o.11A-netbalspanne se uitspeel is na kwartaal 3 verskuif.

Baie geluk aan die Skoolhoof van HS Jan van Riebeeck, Pieter Rademeyer, en sy vrou Jana met die geboorte van hul pragtige seun op 31 Mei. Dit gaan baie goed met beide ma en seun. Mag Nikolaas vir julle sommer hope vreugde bring en mag God sy lewe ryklik seën!

Baie geluk aan die volgende leerders en hul ouers met hul onderskeie merkwaardige prestasies:

• Emma van Biljon – WP-Kleure o.13 Netbal
• Cara Stoltz – WP-Kleure o.11 Netbal
• Abigail Fourie – Sy is gekies om deel van die opera Tosca te wees wat later vanjaar by die Kunstekaap aangebied gaan word.
• Pieter Rademeyer – behaal 8ste plek tydens die ATKV semi-finale uitdunne vir die Wes-Kaap Gr. 4 – 5 leerders. Sy onderwerp was die volgende: “Kinders kan nie meer behoorlik luister nie”
• Jacques du Toit – behaal 4de plek tydens die ATKV semi-finale uitdunne vir die Wes-Kaap Gr. 4 – 5 leerders. Sy onderwerp was die volgende: “‘n Mens hoef nie altyd na reëls te luister nie”

Graag sluit ek af met die volgende stelling en wens vir julle ‘n wonderlike naweek en sterkte met die eksamens toe.

“Wees jy die rede dat iemand vandag glimlag.’’

Vriendelike groete

Naas Beets
SKOOLHOOF

Daar is ongelukkig weer kopluise onder enkele leerders gewaar. Kyk asb. by die huis in jou kind se hare vir enige ongewenste gaste. 

Indien daar tydens skooltyd luise in jou kind se hare gewaar word, sal ons jou kontak sodat jy jou kind kan kom haal. Leerders wat kopluise het, mag eers weer skool toe kom nadat die luise heeltemal verwyder is.

Wenke:

• Indien jy wil voorkom dat jou kind kopluise kry, kan jy voorkomende sjampoe by bv. Dischem of Clicks koop.
• Indien jy luise in jou kind se kop gewaar, koop ‘n sjampoe wat spesifiek luise en nete doodmaak.
• Maak seker jy lees die instruksies van die luissjampoe.
• Dit help ook om ‘n luiskammetjie te koop om nete en luise uit te kam.
• Was jou kind se beddegoed om ontslae te raak van nete en luise wat moontlik daarop agtergebly het.

Hiermee ‘n vriendelike versoek dat ons ouers/voogde en au pairs asseblief vir ons sal help om die gemerkte aflaaisones (drop & go) agter by die skool te eerbiedig. Ons het geglo dat die nuwe padverflyne en afgebakende parkeerareas die vloei van verkeer sou vergemaklik, maar dit kan net werk as almal hul samewerking in die verband gee en mekaar respekteer.

By voorbaat dankie

Naas Beets
SKOOLHOOF

• 11 Augustus 2023
• Stuur ‘n e-pos aan karienzulch@gmail.com en bespreek ‘n tafel vir ‘n span van 8 spanlede teen R1800 per tafel.

Die wintersportprogram vir kwartaal 2 begin so stadig maar seker einde se kant toe staan met ‘n besige sportprogram agter die rug. Verlede naweek het ons o.7 – o.13 netbal- en rugbyspanne aan die jaarlikse driehoekige wintersportdag by Hoërskool Goudini te Rawsonville deelgeneem. Dit was ‘n prentjiemooi, sonnige herfsdag en ons is heerlik met plattelandse gasvryheid bederf. Ons spanne het weereens puik gevaar en waar ons tradisioneel jaar in en jaar uit redelik swaar teen veral Laerskool F.D. Conradie getrek het, het ons vanjaar die spreekwoordelike bordjies behoorlik verhang. Ek is besonders trots op ons spelers en afrigters se onberispelike gedrag op en af van die veld en baie dankbaar vir ouers wat ons so getrou ondersteun. Ek glo dat elke gesin nou na afloop van al die baie wedstryde en toernooie kan begin asem skep en ook in die proses gereedmaak vir die eksamen en assesserings wat voorlê. Sportoefeninge eindig volgende week, maar ons beplan om weer sportoefeninge gedurende skooltyd net na afloop van die eksamens/assesserings te hê om seker te maak ons leerders bly fiks en gereed vir kwartaal 3 se sport wat voorlê.

Ek glo julle het al opgelet dat ons sportpersoneel die afgelope jaar soveel meer tyd aan sport spandeer het. Die resultate spreek vanself. Ongelukkig het ons skool nie ‘n eenvormige sportdrag vir die afrigters soos wat ander skole se afrigters tydens westryde en toernooie dra nie. Ons is besig om dringend hieraan aandag te skenk. Ons benodig egter hulp in hierdie verband veral met die borgskap vir die sportdrag van afrigters. Die borgskap(pe) is onderhandelbaar, maar dit behels gewoonlik ‘n twee jaar kontrak en die borg(e) kan dan saam met ons besluit hoe hy/sy/hulle hul firma se embleem op die sportdrag wil aanbring. Indien julle kan help, kontak my gerus.

Op Woensdagaand, 24 Mei, bied ons skool ‘n suksesvolle Ma-dogteraand aan. Die Ma en Dogter-kombinasie gassprekers, naamlik Karin van Wyk (voormalige mev. SA-finalis en Mrs Africa Global asook voorkomskonsultant en motiveringspreker) en Mienke Koegelenberg (mediese dokter en ‘fellow’ van dr. Izolde Heydenrich (dermatologie) was ongelooflik inspirerend. Hulle het behoorlik die gehoor geboei met die onderwerp ‘Ons Storie’. Die opkoms van ma’s en dogters was baie goed en ‘n heerlike aand van samesyn was kosbaar vir ons Ma-dogter verhoudings. Baie dankie aan Marinda en haar span wat die spesiale geleentheid gereël het. Ek het die voorreg gehad om dit vir ‘n baie klein rukkie by te woon, maar kon nie langer bly, want soos die dogters vir my vra: “Meneer, wat soek jy hier? Dit is dan ‘n ‘girls night only’.”
Saterdag, 27 Mei, geskied natuurlik ons jaarlikse veilingsdinee by die ikoniese Pienk Dame, naamlik die Mt. Nelson Hotel. Hierdie geskiedkundige hotel boei al gaste sedert 1899 en sodra jy die perseel binnegaan, ervaar jy die gevoel van glans en ontspanning wat dit die perfekte venue vir ons veilingsdinee maak. Ek wil al die gaste by voorbaat hartlik bedank wat die glansgeleentheid gaan bywoon asook hul bereidwilligheid om hul hande diep in hul sakke te steek om ons skool finansieel te ondersteun. Fondse geïn word direk in projekte geploeg om onder andere die infrastrukture by die skool asook die IKT-leer en onderrig aan te spreek. Volg gerus die volgende skakel wat uitbeeld watter projekte reeds afgehandel is. Hierdie projekte is d.m.v. die veilingsfondse en ouerbydraes befonds. Fondse sal ook vir toekomstige projekte aangewend word. Laat my ook toe om die reëlingskomitee bestaande uit Odette Faling, Freda Theron, Mari Kushner, Martie Viljoen en Joanita du Toit hartlik te bedank vir al hul deeglike beplanning en harde werk om die sukses van die veilingsdinee te verseker. Daar is 41 lotte wat opgeveil gaan word. Gelukkig is ons baie bevoorreg om MC du Toit aan die stuur van sake te hê wat as afslaer gaan optree.

Graag sluit ek af met die volgende stelling en wens ek vir julle ‘n wonderlike naweek toe.

“As die lewe jou ‘n honderd redes gee om te huil,
wys die lewe jy het ‘n 101 redes om te glimlag.’’

Vriendelike groete

Naas Beets
SKOOLHOOF