Laerskool Jan van Riebeeck bied voldag asook halfdag nasorg aan.
Hoof: Madri Greyling
Aansoekvorm 2023: KLIEK HIER
Nasorg bekendstelling:
Ek wil jou verseker dat jou kind(ers) in goeie hande is en dat dit vir ons span lekker is om jou kind(ers) by ons te hê.
Vir die wat my nog nie ken nie, my naam is Madri Greyling en ek is die hoof van die nasorg by Laerskool Jan van Riebeeck. Net ‘n bietjie van my: ek het ‘n groot liefde vir kinders en is baie jonk van gees en vol energie, so dit maak my verseker die regte persoon op die regte plek. In 2021 het ek my nagraadse onderwyskwalifikasie voltooi en ek het alreeds baie ondervinding met kinders van alle onderdomsgroepe.
Ek kan dit wel nie alleen doen nie. Saam met my wonderlike span staan ons reg vir die 2de helfte van jou kind(ers) se dag.
Diegene wat al ‘n pad saam met ons stap, sal weet dat die leerders baie van die nasorg hou. Ons maak seker dat ons kinders gelukkig is, bied speletjies en aktiwiteite aan, maak seker dat alle leerders se huiswerk gedoen word en ons bied hulp aan om hulle by hul regte sportaktiwiteite te kry.
Neem asseblief kennis van die volgende:
Nasorg tye
- Voldag Nasorg is tot en met 17:15
- Halfdag Nasorg is tot en met 15:00
Huiswerk
Huiswerk word direk na skool gedoen, maar dit bly steeds hoofsaaklik die verantwoordlikheid van die ouer om seker te maak dit word gedoen.
Huiswerkklasse vind in twee groepe plaas:
Groep 1 (graad 1 & 2): Direk na skool soos leerders verdaag word
Groep 2 (graad 3 - 7): Tussen 15:00 en 16:00 vir leerders wat na skool aan sport deelneem
Hierdie diens dien bloot as hulp vir die werkende ouer, maar vervang nie die ouer se hulp en leiding tuis nie.
Insidente
Alle insidente word aangeteken. Leerders is nooit sonder toesig nie en ons probeer voorkomend optree om enige insidente te verhoed. Indien jou kind iets by die huis noem waaroor jy bekommerd is, vra ek dat jy dit asseblief onder my aandag sal bring deur met my te kom praat of ‘n e-pos na nasorg@jvrprim.co.za te stuur.
Optel van leerders
Alle leerders word op die agterste veld by Nuwe Kerkstraat opgetel. Ons is in noue kommunikasie met die terreinpersoneel wat ons sal laat weet wanneer ouers by die skool is om hul kind(ers) op te tel.
Die agterste hek sluit wel om 17:00, so enige leerders wat na 17:00 gehaal word, word by die Kloofstraathek opgetel.
My deur staan altyd oop en ek gesels en help graag. Hou asseblief die nuusbrief dop vir belangrike inligting en vra gerus indien daar enige onsekerhede is.
Madri Greyling
071 287 6579
nasorg@jvrprim.co.za
