Skrywer: Megan Zondagh

Moeder Natuur het die afgelope paar weke die heerlikste weer gestuur en kon ons verskeie wintersportwedstryde en -oefeninge buitemuurs terdeë geniet. Sy het egter die afgelope week besluit, genoeg is genoeg, en vir ons tipiese Kaapse winterweer gestuur. Hierdie skielike veranderinge in weersomstandighede en temperature lei ongelukkig dikwels tot wintersiektes onder leerders, en dit kan maklik die hele gesin plattrek. Maak dus seker jou kind/ers is gepantser vir die koue weer deur onder andere reg aan te trek om die koue weer buite te trotseer terwyl hulle buite sport beoefen en/of kerjakker. Gesonde eetgewoontes en die neem van ‘n multivitamien kan ook moontlik help om jou kind/ers se immuunstelsel te versterk. Gelukkig word die winterseisoen nie net met siekword geassosieer nie, want winter het tog sy eie bekoring. Die kraakvars oggende en wintergeure is vir baie mense idillies. Die winter bied haar eie knusheid en bring dikwels mense bymekaar om heerlik saam te kuier met ‘n kaggelvuur wat die vertrek warmhou. Mag ons almal warm en gesond bly die komende wintermaande, veral met die eksamens om die draai. Die afgelope naweek het ons tuis vanaf 16–17 Mei nog ‘n suksesvolle sportnaweek suksesvol by ons skool aangebied. Hokkiewedstryde is op Vrydagmiddag, 16 Mei, afgelê en die volgende dag is al die rugby- en netbalwedstryde voltooi. Ons sportspanne het puik gevaar en graag sonder ek ons eerstespanne (o/13A’s) uit met hul...

Dit is twee weke na die lekker meevallertjie van ’n ekstra vakansieweek en alles by die skool en Huppelland loop alweer klopdisselboom. Die tempo het egter drasties toegeneem met skoolwerk, kultuur en sport wat spreekwoordelik hul pond vleis eis. Vir seker is besige kinders nie ’n nuwe tendens nie. Vir generasies neem kinders aan verskeie aktiwiteite deel. Ek glo waar daar geleenthede deur ’n skool vir sy leerders geskep word, sal daar altyd ’n groepie leerders wees wat elke moontlike geleentheid aangryp. In ons geval laat ’n Jannie nie sommer toe om enige geleentheid by die skool mis te loop nie. Dit is vir my ’n riem onder die hart, want nie net ondersteun hulle hul skool nie, maar ek weet dat leerders wat konstruktief met skoolaktiwiteite besig gehou word, waardevolle vaardighede aanleer wat hulle nie altyd tussen die vier mure van ’n klaskamer geleer kan word nie. Die voordele van emosionele en fisiese ontwikkeling wat daarmee gepaardgaan, is ook kardinaal. Dus sien ek buitemuurse aktiwiteite as verrykingsgeleenthede. Dit moedig leerders aan om onafhanklik te dink. Ouers/voogde moet dus self besluit wat die balans vir jou spesifieke kind/ers is, m.a.w. aan hoeveel van die aktiwiteite jou kind/ers moet/kan deelneem. As skool gaan ons voort om geleenthede vir ons leerders te ondersoek en te skep, sodat hul potensiaal ontsluit kan word. Op Vrydag, 09 Mei, was ons as onderwysers baie...

Ek glo dat almal die meevallertjie van ‘n ekstra vakansieweek (week 4 van kwartaal 2) terdeë geniet het en almal is slaggereed dat ons weer na ‘n normale skoolprogram en –roetine kan terugkeer. Na al die vakansiedae het week 5 skielik weer 5 volle werksdae, propvol aktiwiteite. Dus het die afgelope week vanaf Maandag, 05 Mei op ‘n hoë noot afgeskop met sportwedstryde (05 & 06 Mei) teen Curro Durbanville, netbal (05 & 09 Mei)- en rugbyproewe (06 & 08 Mei), grondslagfase besoek Kunstekaap (5 – 7 Mei) vir die Woordedief-produksie, netbalwedstryde teen Laerskool St. George (07 Mei) en die kore wat gisteraand by Hoërskool Jan van Riebeeck se musiekkonsert opgetree het as deel van hul Massa-Reünienaweek die komende naweek. April-maand was beslis vreemd en rustig, maar vanaf Mei gaan ons spreekwoordelik van 0 – 100 km/h binne 5 sekondes. Dus moet jy seker maak jou kwartaalgordel is styf vasgegespe vir die opwindende en besige kwartaal wat voorlê. Die kunsgrasprojek agter op die mini-sportveld loop volgens plan en gedurende die vakansieweek het die meeste grond- en siviele werk plaasgevind. Gerhard Conradie se span het heelwat grond uitgegrawe, nuwe grond en spesiale gruis is aangery, gegooi sodat daar ‘n behoorlike onderbasis vir die nuwe veeldoelige oppervlakte gelê kan word. Ek sal julle op hoogte hou rakende die vordering van die projek. Op Maandagoggend, 05 Mei vanaf 06:30, het heelwat van...