Skrywer: Megan Zondagh

Dit is my groot voorreg om ons leerders, ouers/voogde en personeel die week hartlik na ‘n welverdiende wintervakansie te verwelkom. Ek glo dat almal die drie weke van lekker rus behoorlik gebruik het om die spreekwoordelike battery sommer ten volle te herlaai, en dat julle slaggereed is vir nog ‘n besige kwartaal, propvol opwindende aktiwiteite. Op Dinsdag, 22 Julie, het ons Jannies en onderwysers met groot opwinding terug skool toe gekeer. Die eerste dag van Kwartaal 3 is tradisioneel met ‘n saalbyeenkoms begin, waartydens ek almal amptelik na die heerlike vakansie kon terug verwelkom. Mnr. Ben het die saal met ‘n puik boodskap geopen. Daar is verder heelwat sport- en kultuurgeleenthede (Koortoer & Eisteddfod) om na uit te sien – veral die jaarlikse interskole, wat vanjaar weg tydens die naweek van 15 en 16 Augustus te Moorreesburg plaasvind – asook die Senior Koortoer wat vanaf 9–11 Augustus aan die gewilde Cantamus Koorkompetisie te George gaan deelneem. Die Suid-Kaap Sporttoer, wat vanaf 23–27 Junie 2025 plaasgevind het, was weereens ‘n reuse sukses, en die leerders wat die toer meegemaak het, praat nog steeds met lof oor die wonderlike ervaring – veral om teen ander skole buite ons onmiddellike area te speel, asook die ongelooflike besienswaardighede wat hulle besoek het. Ons het vanjaar weer nie toegelaat dat die leerders hul selfone saam op toer kon neem nie. Hulle het dus saans...

So breek die einde van ‘n lang en besige, maar tog ‘n opwindende kwartaal propvol hoogtepunte aan. Vandag ontvang elke leerder sy/haar rapport en julle as ouers/voogde ook ‘n elektroniese weergawe via e-pos om erkenning te gee vir hul harde werk, toewyding en deursettingsvermoë die afgelope kwartaal. Ek wil graag die leerders hartlik gelukwens en komplimenteer met hul spograpporte. Spograpporte behels nie net altyd uitmuntende punte nie, maar sluit ook in waar positiewe vordering deur middel van toewyding, deursettingsvermoë en harde werk getoon word. Ons is saam met julle as ouers/voogde baie trots op jul kinders se akademiese vordering en -prestasies. Geniet ‘n welverdiende wintervakansie saam met jul kinders om sommer alles te doen wat julle as gesinne nie die afgelope tyd as gevolg van die eksamen en/of assesserings voor tyd gehad het nie. Dit is dan my eer en voorreg om amptelik in die nuusbrief die Hoofseun en Hoofdogter vir 2025, wat op 20 Junie aangewys is — naamlik Nils le Roux en Katryn Silvis — bekend te maak en geluk te wens. My beste wense vergesel hulle met hul nuwe rol as die hoofleerderleiers by ons skool. Mag dit vir hulle ‘n groot eer en ‘n verrykende ervaring wees. Katryn volg in die spore van haar broer, Jan-Willem, wat gedurende 2023 ons hoofseun was. Ons is baie trots op Nils en Katryn! Die Intersen (Gr. 4–7) se...

So kom die tweede laaste week van die lang kwartaal asook die Junie-eksamen tot ‘n einde. Ek glo dat al ons wonderlike pa’s in die skoolgemeenskap behoorlik op Sondag, 15 Junie, tydens Vadersdag tot in die afgrond bederf was. Baie dankie aan al ons pa’s vir die belangrike rol wat julle binne gesinsverband en in die gemeenskap speel – ons het groot waardering. Ek is seker ons ouers/voogde het saam met hul kinders ‘n groot sug van verligting gegee toe die laaste vak van die Junie-eksamen op Woensdag, 18 Junie, geskryf is. Die antwoordstelle is amper klaar gemerk, ‘n deeglike modereringsproses is tans aan die gang en punte word verwerk sodat ons op Vrydag, 27 Junie, – die dag wat die skole sluit – vir elke leerder sy/haar rapport kan gee. Julle as ouers/voogde sal vir die eerste keer ‘n elektroniese rapport op die dag ontvang. Graag wil ek van die geleentheid gebruik maak om vir Marié Cruywagen saam met mnr. Leon en juf. Megan hartlik te bedank vir die nuwe IKT-verwikkeling, sodat integrasie van tegnologie nie net in die klaskamer by ons skool plaasvind nie, maar ook weereens bewys dat ons voortuitgang onomwonde omhels. Graag wil ek spesifiek die leerders bedank en gelukwens met hul deeglike voorbereiding vir die assesserings asook die besonderse werketiek wat hulle dwarsdeur die kwartaal gehandhaaf het. Hartlike dank ook aan ons ouers/voogde wat...