Kategorie: Algemeen

Op kort kennisgewing het ons besluit om ‘n foto vir ons Feesboek te neem met leerders, ouers en onderwysers wat tans by LS JvR en Huppelland betrokke is wie se kinders, ouers en/of grootouers ‘n familieverbintenis met hierdie mooi skool het – iets wat ons voorwaar op ‘n foto moet vasvang. Ons moet darem die mooi van generasies by LS JvR op hierdie manier vier! Ons neem die foto op Donderdagoggend, 23 September 2021, om 07:30 agter op die skool se veld. Versprei gerus die woord!

So kom ons aan die einde van week 7 van kwartaal 3. Week 6 is spesiaal afgesluit met vrolike Loslitdagvieringe. Loslitdag word jaarliks gehou op die eerste Vrydag van September en dit is lekker om deel van ‘n klomp Suid-Afrikaners te wees wat wil bewys dat ‘n klein gebaar van welwillendheid ‘n groot verskil in die lewe van mense met gestremdhede kan maak. Die tema vir 2021 is ‘Durf en Deernis’ en dit is spesifiek geïnspireer deur Disney se onlangse bekendstelling van The Ultimate Disney Princess Celebration wat dan die eienskappe vervat van die treffende tema. Ons Jannies kon hul ondersteuning toon deur geklee as Disney-karakters na die skool te kom. Die spesiale dag het ‘n wonderlike gees van kameraderie en lighartigheid by die skool geskep. Baie dankie aan al ons ouers/voogde wat die dag en mense in nood ondersteun het deur die spesiale loslitdag-plakkers te koop. Ons opvoeders het behoorlik die dag met pragtige kostuums uitgehang en was instrumenteel om die gees van welwillenheid te ontsluit.

Op Saterdag, 4 September, het Meneer Leon en Juffrou Andri die jaarliks Wiskundekamp vir Gr. 6- en 7-leerders vanaf 08:00 tot 17:00 in die saal onder streng Covid-protokol aangebied. Ons is baie dankbaar vir die twee opvoeders se opoffering en passie om Wiskunde by Laerskool Jan van Riebeeck te promoveer en na hoër hoogtes te lei. Hierdie inisiatief is een van die redes waarom ons Jannies juis so puik tydens Wiskunde-olimpiades of kompetisies vaar en ons leerders hulself van ander laerskoolleerders kan onderskei as dit by wiskundige vermoëns kom. Ek glo almal sal saam stem dat Wiskunde beslis kritiese denke en probleemoplossingsvaardighede ontwikkel, het praktiese toepassings en kan amper as die taal van die heelal gesien word. Ons kry dit beslis by ons skool reg om die opwinding in Wiskunde as vak te ontsluit. Die formule is eintlik maar eenvoudig, naamlik passievolle en toegewyde opvoeders wat die vak terdeë saam met hul onderskeie leerders geniet en elke dag na geleenthede soek om nog iets te leer, en in die proses vlerke aan ons Jannies se toekoms te gee. Mag ons almal daarna streef om lewenslange leerders te word en sodoende ‘n leerkultuur in ons skoolgemeenskap te skep.

Opvallend is die opwinding wat die afgelope 3 weke onder die leerders en afrigters heers weens die feit dat ons vir die eerste keer in ‘n baie lang tyd wintersportwedstryde teen ander skole en/of sportklubs kon speel. Kosbaar is die stralende gesiggies op die sportveld veral toe ons dogtershokkiespanne by St. Cyprians hulle voete vir die eerste keer op Astro-oppervlakte kon sit. Wen of verloor is vir ons leerders irrelevant, net om te kan kompeteer is vir hulle die beste ding ooit. Nie net het ons skool die ekstra myl geloop om sportoefeninge en wedstryde te verseker nie, maar ook terselfde tyd het die koor, redenaars en Eisteddfod voortgegaan met verskeie uitdagings wat deur die pandemie na ons kant gegooi is. Ek is baie dankbaar vir ons passievolle personeel en afrigters wat verstaan dat kinders aan buitemuurse aktiwiteite moet en wil deelneem. Ons poog regtig om iets ‘normaal’ vir ons leerders te skep en min laerskole kan in terme hiervan saam met ons praat. Welgedaan, Personeel! Ek is baie trots op julle. Hartlike dank aan ons beheerraad vir hul ondersteuning in die verband.

Vandag en môre sluit ons dan wintersport af met ons interne wedstryde. Ek weet die Jannies gaan dit baie geniet! Ons o/13A-netbalspan neem ook môre aan die Wes-Kaap Top Skole Netbaltoernooi te Laerskool Bastion deel asook ons o/12-span wat te Paarl Gimnasium aan ‘n o/12-Netbaltoernooi deelneem. Sterkte en geniet hierdie wonderlike geleenthede!

Ek is ongelukkig nie vandag by die skool nie, aangesien my Pa se troosdiens vandag te Oudtshoorn plaasvind. Ons moes dit as gevolg van Covid al twee keer uitstel.

Mag julle ‘n wonderlike naweek geniet, wees veilig en graag sluit ek af met die volgende aanhaling deur die bekende Mahatma Gandhi:

“Happiness is when
what you think,
what you say,
and what you do
are in harmony.”

Ons skool is op soek na ‘n Finansiële Bestuurder. Indien jy van iemand weet wat belangstel, KLIEK HIER om die advertensie op die skool se webtuiste te sien.

Selfbeheersing is bv. wanneer jy die keuse kan maak, om te weet wat die regte besluit is. Kom ons moedig ons leerders aan om selfbeheersing te toon. Kliek HIER vir ‘n video van onderwysers se insette en HIER vir ‘n video waarin die leerders meer oor selfbeheersing vertel.

‘n Allemintige vier van ons oud-leerders is verkies tot Wilgenhof (US) se HK van 2022! V.l.n.r. Patrick Kilbourn, Thomas Winter, Emil van der Walt en Theodore Pauw. Julle maak ons trots, Manne!

Ons is baie trots op ons oud-leerders, Sima en Daniël, wat verlede week as mnr. en mej. Hoërskool Jan van Riebeeck gekroon is!

Woensdag, 1 September, was amptelik Lentedag en dit op ‘n koue dag! Moontlik het die boodskap nie duidelik by Moeder Natuur uitgekom nie, want die winter is baie astrant om terug noordwaarts te beweeg. Vanuit ‘n meteorologiese oogpunt is die temperature darem net te laag en mag ‘n mens dalk net wonder, is somer nog om die draai? Simbolies is lente die natuur se teken van nuwe lewe soos plante weer begin groei en bloeisels hul welkome opwagting maak. Dalk ook vir ons ‘n nuwe “begin” om al die slegte ervaringe van die pandemie opsy te skuif en die figuurlike dankbaarheidsbril op te sit. Dit was ook wonderlik om te sien hoe ons Jannies en onderwysers lentedag gevier het met onder andere pragtige blommevlegsels in die hare, blommekranse op die kop en inmekaargevlegte blommeringe om die nek. Dit het ons almal sommer lekker geïnspireer en weer hoop gegee.

Die afgelope naweek het die tweede rondte van die Eisteddfod (musiek) onder streng Covid-protokol in die skoolsaal geskied. Ons Jannies het hul puik van hul taak gekwyt en ons is dankbaar vir die ondersteuning en leiding van Juffrouens Helecia, Estelle en meneer Ben. Ons bekwame musiekdepartement beskik oor soveel ervaring en ons kon nie vir beter musiekopvoeders vra nie, aangesien hulle hul daaglikse take met passie, toegewydheid en omgee uitoefen. Ko-kurrikulêre aktiwiteite by ons skool sal altyd hoog geag word aangesien dit instrumenteel is in terme van persoonlikheidsontwikkeling, kulturele vorming en om die Jannies se talente te ontgin. Dalk het julle gewonder waar kom die woord Eisteddfod vandaan? Soos ons dit ken is dit ‘n kunsfees met wedstryde in musiek, digkuns en kunswerke. Die term ‘’eisteddfod’’ wat reeds in die agtiende eeu in gebruik was, is afgelei van ‘n Walliese woord ‘’eistedd’’ wat sit of sitting beteken m.a.w. mense het ‘n kompeterende fees gehou wat hoofsaaklik op musiek en literatuur gekonsentreer het. Die ontstaan en groei van Eisteddfod in Suid-Afrika vanaf 1899 is hoofsaaklik te danke aan Walliese setlaars (meestal mynwerkers) en Afrikaners. Die Eisteddfod is ‘n voorbeeld van gesonde kompetisie met geen wrywing tussen deelnemers nie. Deelnemers kry dikwels die geleentheid om mekaar beter te leer ken en in goeie gees teen mekaar te kompeteer. Hier is beslis ‘n soort van kameradie om mekaar te ondersteun en hulle raak saam opgewonde oor mekaar se toekennings. Dit is ook ‘n baie goeie geleentheid om voor vreemde mense op te tree en selfvertroue op te bou. Ek moedig al ons Jannies aan om in te skryf en hul talente ten toon te stel.

Op Dinsdag, 31 Augustus 2021, het ek die voorreg gehad om die Graad 7’s se Top 10 akademiese presteerders vir kwartaal 2 in die saal aan te kondig. Die Top 10 leerders het elk ‘n spesiale sertifikaat ontvang om erkenning aan hul harde werk en pligsgetrouheid te gee. Ons glo dat dit ook die res van ons Jannies sal inspireer om hard te werk en verantwoordelikheid vir hul eie leer te neem. Hiermee dan die Graad 7’s se Top 10 akademiese presteerders (alfabetiese volgorde) soos einde kwartaal 2:

• Fredrich Erasmus
• Mieke Hertzog
• Jan Karsten
• Cala Snijders
• Amelie Snyman
• Katrien Stimie
• Héloïse Strauss
• Mia Symington
• Taniel Webber
• Luca Zulch

Baie geluk aan die bogenoemde akademiese presteerders asook hul trotse ouers en grootouers. Baie dankie aan al die opvoeders wat reeds van Huppelland se dae instrumenteel was om ons leerders te bemagtig, te motiveer en te inspireer tot hoër hoogtes. Ons kernbesigheid is akademie en ons is trots op die kwaliteit van onderrig en leer by Laerskool Jan van Riebeeck met die oog op uniekheid van elke Jannie.

Dit spyt my om met julle mee te deel dat die hoof van Huppelland, Mariëtte Herholdt, ons in kennis gestel het dat sy aan die einde van die jaar ons diens gaan verlaat om onder andere meer tyd saam met haar man, Marius, te spandeer. Mariëtte bestuur Huppelland vir meer as 9 jaar baie effektief. Sy het diep spore in die skoolgemeenskap getrap en diep in die harte van ons Jannies en ouers gekruip. Ons sal op ‘n latere stadium formeel van haar afskeid neem. Baie dankie Mariëtte vir wat jy alles vir Huppelland asook die Laerskool gedoen en beteken het. Dit gaan nie ongesiens verby nie. Ons gun jou egter die tyd van aftrede om kosbare tyd saam met jou man deur te bring. Baie dankie dat jy nog steeds beskikbaar sal wees om vir ons te help.

Graag sluit ek met ‘n vriendelik versoek af dat ons as skoolgemeenskap asseblief nog steeds versigtig en waaksaam rakende die pandemie sal optree. Ons almal is verby ‘keelvol’ vir die situasie, maar hou asseblief in gedagte dat verskeie van ons gesinne nog steeds in isolasie is of selfs positief vir Covid-19 getoets het. Sommige gesinslede se gesondheid is en word tot die uiterste deur die virus beproef. Die derde vlaag is nog lank nie verby nie en vir almal se veiligheid wil ek versoek dat ons Covid-protokolle te alle tye sal toepas. Dit is ‘n groot uitdaging om ‘n skool effektief te bestuur met al die uitdagings wat die pandemie bring. Baie dankie vir julle samewerking in die verband.

Geniet die lente en die naweek. Mag die volgende aanhaling deur Daniel Kahneman vir jou iets tydens die ongekende tye beteken: “It’s a wonderful thing to be optimistic. It keeps you healthy and it keeps you resilient.”

Neem asb. kennis dat die skooldrag as volg gedra moet word:

• Dag waarop leerder LO het, mag hy/sy met korrekte LO-klere skool toe kom.
• Vrydae word Feeshempies (korrekte LO-klere) gedra.
• Die ander drie dae moet die korrekte winterklere gedra word.

Maak asb. ook seker dat jou kind die huis/motor netjies verlaat met korrekte sokkies, haarbykomstighede, ens.

Leerders moet asb. almal hulle feeshempies op Donderdag, 9 September, aantrek. Ons gaan individuele foto’s van elke leerder in die skool neem wat ons in ons Feesboek wil publiseer.

Die Laerskool Jan van Riebeeck Opvoedingstrust het onder meer ten doel die bevordering van ‘n gemeenskapskool met insluiting van alle leerders. Die trustees het besluit om ‘n verdere ondersteuningsbeurs te bied vir alle leerders waar die ouers reeds vir volledige vrystelling van skoolfonds in lyn met die onderwysdepartement se riglyne goedgekeur is.

Hierdie beurs maak voorsiening vir skoolklere, daaglikse etes, data en ‘n bedrag vir ad hoc uitgawes vir kwalifiserende ouers se kinders.

Vir meer inligting oor wat dit behels en hoe om aansoek te doen, stuur ‘n e-pos aan Jodene by admin@jvrprim.co.za.

Vir meer inligting oor die trust, volg die skakel.

Ek glo dat ons almal die deelname aan winterspansporte asook lekker sosiale skoolfunksies waar ons as ‘n skoolgemeenskap die hoogte- en laagtepunte saam kan deel, mis. Wat is dan nou nie lekkerder as om rondom die sportveld ons skoolsportspanne aan te moedig nie of om Eisteddfod- en kooroptredes saam by te woon nie? Op Woensdag, 25 Augustus 2021, het ons so ‘n voorsmakie van netbal- en rugbydeelname teen Laerskool Van Riebeeckstrand gekry. Die weer het wonderlik saamgespeel net voor die kouefront sy kloue kon inslaan. Ons seuns was so opgewonde om net weer ‘n rugbywedstryd vir hul skool na amper 2 jaar te kon speel en die stralende gesiggies het elke oomblik terdeë geniet. Nie so seker wie die meeste in hul noppies was nie, ek, die trotse afrigters of die seuns. Dit was vir my amper ‘n emosionele oomblik en ‘n wonderlike voorreg om luidkeels die spanne aan te moedig. Ons rugbyspanne was hopeloos te sterk vir die opposisie se B- en C-spanne, maar dit was ‘n wonderlike geleentheid wat ons koester. Ek is so trots op die manier wat ons seuns rugby gespeel het, hoe hulle hulself gehandhaaf het en as nederige oorwinnaars uit die stryd getree het. Hulle was ware ambassadeurs van ons trotse skool. Ek kon ongelukkig nie die netbalwedstryde tuis bywoon nie, maar as alles volgens plan verloop, speel ons volgende Woensdag netbal teen Laerskool Kampsbaai. Volgens ons netbalafrigters was die middag gevul met ‘n merkwaardige gees van opgewondenheid en sportmanskap. Daar is geen twyfel daaroor nie, sport is goed vir ons leerders se emosionele gesondheid tydens die ongekende tye van onsekerhede. Ongelukkig is geen toeskouers toegelaat nie, maar vasbyt ouers/voogde en hopelik sal ons moontlik binnekort saam luidkeels om die sportvelde ons Jannies kan aanmoedig. Baie dankie aan ons ouers wat vanuit hul motors of vanaf nuwe Kerkstraat ons netbalspanne met passie aangemoedig het.

Ek het ook die afgelope week die voorreg gehad om saam met ons BR Voorsitter, Merwe Scholtz, tydens skoolure deur die skool te stap, die infrastruktuur te inspekteur asook om te wys wat ons op ‘n daaglikse basis by die skool doen. Die pandemie ontneem ouers/voogde die geleentheid om die skool te besoek, sommer net in te loer of skoolaktiwiteite te mag bywoon. Ek glo Merwe sal saamstem dat die klasklimaat hartlik, warm en innemend is. Leerders en opvoeders is ontspanne, beide is bereid om hulself oop te stel en betrokke te wees. Ons omhels beslis ‘n etos waar ons ons leuse uitleef om jou ware self te wees. Die moraal is hoog en ons Jannies is gemotiveerd om te leer en nie eers die pandemie kry ons onder nie. Om vandag ‘n onderwyser te wees is egter nie maklik nie. Ek dink dit is baie uitdagend en ek glo met jul onlangse ervaring as tuisopvoeders gedurende die onderskeie grendelperiodes, vereis dit dalk meer as wat jy as ouer/voog pre-Covid in terme van onderrig gedink het. Ons is regtig geseënd met toegewyde opvoeders, omgee mense wat nie net ‘n salaris soek nie, maar eerder ‘n passie uitleef. Hulle beskik oor ‘n sterk konseptuele begrip van hul onderskeie vakgebiede wat ‘n hoë standaard van leer en onderrig verseker. Vir my as skoolhoof is dit ‘n riem onder die hart om te weet ons opvoeders handhaaf ‘n klasmilieu waarin elke leerder voel hy/sy het ‘n plek om vol te staan en ‘n rol het om te speel.

Kunsonderrig by meeste skole speel dikwels tweede viool, want daar word by die meeste skole eerder gefokus op syfervaardighede en tale. Gelukkig by Laerskool Jan van Riebeeck volg ons ‘n holistiese benadering en het ons al ‘n geruime tyd gelede besef dat ons in ‘n visuele wêreld leef en dat visuele geletterdheid belangrik is om ‘n sinvolle bestaan te kan voer. Vir ons is visuele kunsonderrig uiters belangrik, want dit stimuleer kreatiwiteit en lei tot verhoogde akademiese prestasie. Baie dankie aan juffrou Rentia wat so hard werk om haar vakgebied uit te bou en ook in die proses ons skool binne esteties met ons talentvolle leerders se kunswerke te verfraai.

Vir kennisname: Ons Finansiële Bestuurder, Christoff Bothma, het onlangs bedank en vandag is sy laaste dag by die skool. Christoff het ‘n kort tydjie by ons vertoef, maar ons wil graag vir hom hartlik bedank vir sy harde werk en toegewydheid die afgelope 10 maande en ons wens hom die beste vir sy pad vorentoe. Baie dankie aan Marili Thomson wat gaan instaan totdat ons ‘n nuwe aanstelling gemaak het.

Graag sluit ek dan die laaste keer rakende die waarde van Augustus-maand (verantwoordelikheid) af d.m.v. ‘n aanhaling: “Every privilege comes with a responsibility. If you don’t take the responsibility, you will lose the privilege”

Geniet jul naweek en wees veilig.

Ons Graad 7’s se Sanitize maskerbonanza!

‘n Masker wat gemaklik pas
Voel soos ‘n ligte hoed en nie ‘n swaar jas
Ene vir jou en ene vir my
So werk ons saam om nie Covid te kry

Handsaniteerder wat nie voel of dit plak
Sag op die hande en vars in die neus
So maak ons sommer gou-gou mak
Daardie lastige ou Corona-reus

Ons Graad 7’s se Sanitize maskerbonanza
is nou aan die loop:
‘n Boks met 50 maskers en ‘n botteltjie fluweel
Net honderd rand en jy kry soveel!

Onthou om vandag nog
vir Mamma en Pappa te sê
Hul moet kliek in die nuusbrief
Om dit ook vir julle te koop!

Ondersteun asb. ons graad 7-inisiatiewe om ’n besondere afskeidsgeskenk aan die skool te kan gee en ‘n gesellige afskeid vir al ons graad 7-leerders te kan aanbied. Maak gerus van ons spesiale afslag-aanbod gebruik om jou gesin se maskervoorraad en saniteerders aan te vul – Kliek op die foto en volg die maklike stappe onder “For school promotion” om die afslag te bekom. Onthou net om jou kind se naam en klas in te sluit, sodat jou pakkie saam met jou kind huis toe gestuur kan word.

Ons gewilde BRING-EN-RAAIVASVRA vind op 17 September plaas en beloof om weer groot kompetisie tussen ons ouers op te lewer. Kry ‘n span van 6 lede bymekaar, skryf in en kom neem deel aan die pret. De Jongh Borchardt speel weer “quizmaster” en beloof om al ons ouers op hul tone te hou.

Kliek HIER om die vorm in te vul.