Kategorie: Algemeen

Ons wil baie graag weer vanjaar Kaapstad se Lions Club help om paaseiers in te samel vir minderbevoorregte kinders. Dit sal wonderlik wees as elke leerder minstens een paaseier vir ons kan bring en dit in die emmer wat in Adri se kantoor staan, kan plaas. Hulle verkies die eiers wat die malvalekker aan die binnekant van die sjokolade het. Dit kom ook in ‘n string van vier of in verpakkings van 24 en meer. Ons wil vra dat die paaseiers voor of op Woensdag, 23 Maart, skool toe gebring word.

Hierdie week sluit ons met die besige somersportprogram af waartydens baie sportwedstryde plaasgevind het. Volgende week begin ons met wintersport. Verskeie wedstryde en sportdae is vir kwartale 1 en 2 geskeduleer. Ek kan net soos julle nie wag om ons sportspanne aan te moedig nie.

Vrydag, 4 Maart, het ons die jaarlikse junior swemgala aangebied. Selfs die weer het op dié spesiale dag mooi saam gespeel met toeskouers wat luidkeels ons Grondslagfase swemmers toegejuig het. Graag bedank ek ons ouers/voogde wat tyd afknyp om hul kind(ers) tydens sportaktiwiteite te ondersteun. Al wys die kinders dit nie, is julle teenwoordigheid tydens sportbyeenkomste kosbaar vir hulle. Baie dankie ook aan almal wat die klasbraai op Vrydagaand, 4 Maart, bygewoon het. Die lekker kuier en gesellige samesyn is kosbaar en ‘n tradisie wat ons vir nog lank sal omhels.

Die afgelope week was die fokus primêr op ons kernbesigheid, naamlik akademie. Grondslagfase het die eerste week van hul assesseringsweek suksesvol voltooi terwyl die intersenfase elke Vrydag tydens toetsperiode hul assessering vir die kwartaal aflê. Ek maak graag van die geleentheid gebruik om die opvoeders hartlik te bedank vir die handhawing van hoë akademiese standaarde. Die hoeksteen van ons suksesvolle kurrikulumbestuur sluit onder andere assesserings in wat deeglik beplan en opgestel word. Daarna volg dit ‘n effektiewe modereringsproses en elke formele assessering word deur my afgeteken. Laerskool Jan van Riebeeck was nog altyd bekend as ‘n skool wat se hoë akademiese standaarde ononderhandelbaar is en op hierdie manier van ander skole onderskei word. Baie dankie dat julle jul kinders tydens die assesseringsweke en deurlopede assessering ondersteun.

Op Dinsdag, 8 Maart, het Juffrou Michelle vir ons Grondslagfase ‘n insiggewende en praktiese boodskap oor ons waarde van die maand, naamlik Omgee tydens ons weeklikse saalbyeenkoms gelewer. Tydens die saalbyeenkoms het ons ook vir die eerste keer pragtige sertifikate vir die ‘Jannies van die Week’ oorhandig. Hierdie inisiatief is deur juffrou Nicola geïnisieer om ons Grondslagfase-leerders erkenning te gee wat werklik ons kernwaardes daagliks uitleef sonder dat die juffrouens dit vra. Trots het die volgende leerders saam met my op die verhoog verskyn:

• Noa Rademan
• Jan-Jurie Fourie
• Kitty Partner
• Christopher Hoffman
• Cailyn Visser
• Damian Daniels
• Julia Schincariol
• Louis Greeff-Cronjé

‘n Dringende versoek rig ek graag aan ieder en elk: Kyk mooi na jou skool- en sportklere asook persoonlike besittings wat skool toe gebring word. Indien jou kind met ander kinders se tasse, klere, ens. by die huis opdaag, stuur dit asseblief die volgende oggend reeds saam met hom/haar terug skool toe (verlore goedere). Die meeste van ons leerders se klere en persoonlike items is gemerk. Baie dankie vir jou samewerking in die verband.

Laat my asseblief toe om spesiaal vir Sophia Liebenberg (gr. 7) sterkte toe te wens vir môre se Wes-Kaap Atletiekbyeenkoms in die Paarl. Sophia is ons enigste leerder wat vanjaar WP Klere vir atletiek verwerf het en sy gaan môre aan verspring en spiesgooi deelneem. Sophia, ons is baie trots op jou! Sterkte ook aan ons o/13A-rugby- en netbalspanne wat die naweek aan die Bulfeestoernooi te Porterville deelneem.

Ek sluit dan af met die volgende aanhaling rakende die skool se waarde van die maand, naamlik OMGEE:

“Te dikwels onderskat ons die krag van ‘n glimlag, vriendelike woorde, ‘n oor wat luister, ‘n opregte kompliment, of die kleinste bietjie omgee, alles wat die potensiaal het om iemand se lewe heeltemal te verander.”

Geniet die naweek! 

Vriendelike groete

Naas Beets
SKOOLHOOF

Ons wil graag alle graad 7-ouers/voogde aanmoedig om so gou as moontlik vir hoërskole vir 2023 aansoek te doen. Alle aansoeke moet deur die Wes-Kaapse Department van Onderwys se aanlynstelsel gedoen word en aansoeke kan vanaf Maandag, 14 Maart, tot Vrydag, 15 April, ingedien word. Die stelsel sal jou toelaat om 3-5 skole van jou keuse aan te dui, maar onthou asseblief om jou aansoek met die nodige ondersteunende dokumentasie op te volg soos elke skool se toelatingsbeleid verreis. Besoek gerus die Departement se webtuiste hier om aansoek te doen.

Willem Vorster en Frank van der Walt is kranige Rubik-kubus spelers. Sondag, 6 Maart, was hulle beoordeelaars in ‘n SA-kompetisie wat plaaslik by Hoërskool Seepunt plaasgevind het en is deur speedcubes.co.za aangebied.

Dit was ‘n interessante dag met baie opwinding waar spelers van regoor Suid-Afrika verskillende kubusse opgelos het – 2×2, 3×3, 4×4, pyraminx en selfs 3×3 geblinddoek!

Dit is die twee se fokus om volgende keer self as spelers deel te neem.

Sien gerus verlede week se nuusbrief of kliek HIER vir die nuusbrokkie i.v.m. kwartaal 2 se twee dag stap in die Boesmanskloof.

• Almal wat saam stap, moet verkieslik al ten minste ‘n langerige dagstap vantevore gedoen het.
• Kinders onder 10 is welkom, mits hulle al ‘n stap gedoen het en jy seker is hulle sal nie halfpad moed opgee nie.
• Die bedrag betaalbaar sal binnekort op Karri gelaai word vir almal wat die vorm ingevul het. Jy sal op hierdie manier jou plek verseker.
• Kliek HIER vir die vorm.

Die geboorte van ‘n baba bly nou maar net ‘n wonderwerk.  Ons is baie opgewonde om die nuutste toevoeging tot ons Jannies-familie te verwelkom!  Baie geluk aan die trotste pappa en mamma wat verlede Woensdag, 2 Maart, hul babadogtertjie verwelkom het.  Ons weet dat sy sommer baie pret en vreugde aan die Hanekom-gesin sal voorsien.  

Dit is aangenaam om te rapporteer dat die sport- en kultuurprogram amper weer in volle swang is met verskeie wedstryde, byeenkomste en galas wat plaasvind. Opvallend is die dankbaarheid onder ons ouers/voogde dat ons leerders weer die geleentheid kry om aan sport- en/of kultuuraktiwiteite te kan deelneem.

Vir die eerste keer in 2 jaar gaan van ons Jannies weer opvoedkundige kampe bywoon. Groot was die opwinding en die energievlakke op Woensdagoggend, 2 Maart, toe ons gr. 5-leerders na die SOS-Kamp vertrek en die gr. 7’s na die Melkboskamp. Hierdie puik opvoedkundige kampe is ook ‘n verlengstuk van die skool en bied ‘n wonderlike geleentheid waar karakter gebou word, kommunikasievaardighede verbeter word asook die ontwikkeling van emosionele- en leiereienskappe. Wees verseker dat die kampe wat ons bywoon ‘n gestruktureerde, veilige en vriendelike omgewing vir ons leerders bied. Ek weet die gr. 5 en 7-Jannies gaan hul gate uit geniet en ek glo dat hulle nie kan wag om al die wonderlike stories en avonture wat hulle die afgelope 2 dae beleef het, met julle te deel nie.

Ek het ook die wonderlike voorreg om leerders se werk en/of projekte te sien wat hulle op ‘n daagliks basis by my mee kom spog. Ons leerders is ongelooflik talentvol en ek wens ek kan al die spogstukke en stories met julle deel. Dit is wonderlik om te sien dat ons leerders die vrywmoedigheid het om my kantoor te kom besoek, al is dit net om te groet, ‘n storie te deel of ‘n lekkertjie te vra – dit is so kosbaar! Dit is vir my belangrik dat die leerders moet weet daar is vir hulle ‘n oopdeurbeleid na die skoolhoof se kantoor. Meeste van ons het die skoolhoof se kantoor soos die pes vermy, want dit het altyd gepaard gegaan met ‘n negatiewe konnotasie. Vir my is dit egter belangrik dat ons leerders moet weet ek het baie deernis met hulle en ek stel opreg in elkeen van hulle se welstand belang. Die skool is my “happy place”, want ek geniet my werk terdeë en dit is vir my ook belangrik dat die skool hulle “happy place” moet wees waar elkeen erkenning binne ‘n veilige leeromgewing ontvang.

Ek wil nie soos ‘n platespeler klink wat vasgehaak het nie, maar ek doen weer ‘n ernstige beroep op ouers/voogde en au pairs wat kinders agter by die skool vanuit “New Church” kom aflaai en optel om asseblief nie op die ‘aflaai en ry-sone’ te parkeer nie (sien bordjies). Hou asseblief te alle tye die ’rooi rybaan’ oop vir verkeer om te vloei. Indien jy vroeg arriveer en daar wil wag tot jou kind opdaag, parkeer asseblief in die parkeerareas en nie op die ‘aflaai en ry sone’ nie sodat die vloei van verkeer nie belemmer word nie. Ons vra ook dat kinders asseblief vinnig (“kiss and drop off”) afgelaai en opgelaai word om die vloei van die verkeer te verseker. Ons is van die min skole waar ouers/voogde wel die voorreg het om hul kinders op die skoolperseel te kan af- en oplaai. Baie dankie vir almal se samewerking in die verband.

Op daardie noot wil ek afsluit met die volgende aanhaling rakende die skool se waarde van die maand, naamlik OMGEE:
“Liefde en omgee is verniet, jy kan dit elke dag uitdeel sonder dat dit ooit opraak. Dit kos nie ‘n sent nie, maar is goud werd.”

Geniet die naweek en sien julle vanaand by die klasbraai wat vanaf 18:00 by die Conradievelde plaasvind.

Vriendelike groete

Naas Beets
SKOOLHOOF

Ons herinner julle graag dat aansoeke vir 2023 vir nuwe leerders oop is. Onthou asseblief om betyds vir gr. 00 aansoek te doen en laat weet enige ander belangstellende ouers buite die skool. Ons sluitingsdatum is einde Maart.

Groete

Die Huppellandspan

Ons wil graag in die tweede kwartaal ‘n twee dag stap te doen. Die roete begin in Greyton. Die stap is in die Boesmanskloof en volg dieselfde roete uit sodat ‘n mens weer in Greyton eindig.

Kostes:

Permit – R50 per persoon per dag (m.a.w. R100 per persoon vir die 2 dae)
Verblyf – R300 per persoon (10 jarige ouderdom en op)

Datum:

Begin Saterdag, 28 Mei. Stap Sondag, 29 Mei , terug.
*Sport wat daardie naweek plaasvind kry voorkeur.

Afstand & Tydsduur:

12.5 km, 5-6 ure

Moeilikheidsgraad:

Gemiddeld, afhangend van jou fiksheidsvlak. Jy moes verkieslik al ‘n langer dagstap gedoen het. Jy moet ‘n rugsak met jou kos & klere saam vat. Daar is beddegoed by die huisies waar ons sal slaap. Die roete het ‘n paar opdraendes aan die begin & einde van die stap, maar die grootste deel van die stap is plat. In die middel van die roete is daar ‘n groot swemgat en waterval om bietjie in af te koel.

Vorm:

Kliek HIER vir die vorm om in te skryf.

Navrae:

Kontak my gerus indien jy enige navrae het: suzaan@jvrprim.co.za
Volg hierdie SKAKEL vir foto’s en inligting i.v.m. die verblyf.
Volg hierdie SKAKEL om meer oor die roete uit te vind.

Week 6 het sommer lekker flink afgeskop met ‘n baie besige sportprogram. Dit is ‘n riem onder die hart om te sien hoe al ons Jannies aktief aan die verskillende sport- en kultuuraktiwiteite by die skool deelneem. Na 2 jaar is die kinders se belangstelling om aan die buitemuurse program deel te neem op ‘n ‘nuwe’ energieke vlak. Dit herinner ons dat ons vir jare die normale funksionering van die samelewing as selfsprekend aanvaar het en groot was die ontnugtering met die koms van ‘n wêreldwye pandemie.

Hierdie afgelope week het ons Jannies aan verskeie krieket- en tenniswestryde asook die subsone atletiekbyeenkoms te Vygieskraal deelgeneem. Ek is so trots om aan te kondig dat van die 37 atlete wat daar op Woensdag, 23 Februarie, deelgeneem het, gaan 15 atlete deur na die distriksbyeenkoms wat op Saterdag, 26 Februarie, te Vygieskraal plaasvind. Ek verwys graag na die res van die nuusbrief. Ons o/13-krieketspanne het die afgelope week twee wedstryde gespeel. Ek wil nie graag leerders uitsonder nie, maar ek sal my van my taak kwyt indien ek nie melding maak van Werner Steyn (Gr. 7) wat op Dinsdag, 22 Februarie, ‘n ongelooflike kolfbeurt tydens ‘n T20-wedstryd weg teen Laerskool Parklands gehad het. Hy het ’n blitsige 102 lopies van slegs 54 balle aangeteken waarop iemand soos AB de Villiers ook baie trots sou wees. Baie geluk aan Adan Eksteen wat ook 57 lopies tydens die wedstryd geslaan het en soos julle kan aflei, het ons met ‘n allemintige 188 lopies gewen. Welgedaan aan meneer Warren en sy span, julle maak ons baie trots! Ons 6 tennispanne het ook die week goed gevaar en gaan van krag-tot-krag. Op Saterdag, 19 Februarie, het ons skaakspelers aan Laerskool Welgemoed se individuele skaaktoernooi deelgeneem. Baie geluk aan Bella Naylor wat die beste dogtersprys gewen het. Ons is baie trots op jou, Bella. Baie geluk aan al ons sportleerders en afrigters wat ons skool so mooi verteenwoordig.

Dinsdag, 22 Februarie 2022, was natuurlik ‘n baie unieke dag, want dit is Palindroomdag. Dit beteken dat die datum presies dieselfde bly al lees jy dit van links na regs of van regs na links. Hierdie 8-syfer Palindroomdae is uiters skaars. In die vorige eeu was daar geen, maar hierdie eeu is daar 29 as jy die datum skryf met eers die dag, dan die maand en dan die jaar.

Ek, juffrou Izel en die leerderraad het die wonderlike voorreg gehad om saam met 9 ander laerskole se leerderrade op Donderdag, 24 Februarie, ‘n heerlike Leierskapontbyt te Hoërskool Jan van Riebeeck by te woon. Die ongelooflike funksie is in die pragtige tuin voor die Welgemeend gehou met die voormalige Springbokkaptein, Corné Krige, as die gasspreker. Sy insiggewende toespraak het oor leierskap gehandel en sy nederigheid het ‘n groot indruk op al die jong leiers en almal teenwoordig gemaak. Hy het ons almal uitgedaag om die beste van jouself elke dag te wees en mense te inspireer dat daar hoop is. Ons land hunker so na hoop en dit maak sy boodskap so treffend. Wees elke dag jouself soos ons leuse sê, maar wees die beste van jouself elke dag – dan gaan ons ‘n groot verskil maak. Baie dankie Karien Zulch en die skoolhoof, mnr. Pieter Rademeyer, vir die uitnodiging en baie geluk met ‘n puik funksie waarop julle baie trots kan wees. Dit was so lekker om ons oud-leerders en verlede jaar se Gr.7-leerders weer in aksie te sien.

Ek doen ‘n beroep op ouers/voogde en au pairs wat kinders agter by die skool vanuit “New Church” kom aflaai en optel, om asseblief so te parkeer dat die ’rooi rybaan’ te alle tye nie geblokkeer word nie. Indien jy vroeg arriveer en daar wil wag tot jou kind opdaag, parkeer asseblief so dat die vloei van verkeer nie belemmer word nie. Ons vra ook dat kinders asseblief vinnig (“drop and go”) afgelaai en opgetel word om die vloei van die verkeer te verseker. Daar is verskeie motorbestuurders wat die afgelope tyd nie hulle samewerking gegee het nie en onnodig ouers/voogde warm om die kraag gemaak het. Baie dankie vir almal se samewerking in die verband.

Op daardie noot wil ek afsluit met die volgende aanhaling deur Jonathan Garcia-Allen oor verdraagsaamheid:

“Verdraagsaamheid is die irriterende gevoel dat ander mense op die ou end reg kan wees.”

Geniet die naweek en sterkte aan almal betrokke by sport oor die naweek!
Vriendelike groete

Naas Beets
SKOOLHOOF

HS JvR hou Afrikaans-week en bied ‘n heerlike kaas-en-wyn aand op Donderdag, 3 Maart, om 18h00 aan. Dit is ‘n inisiatief wat ons graag met die Laerskool saamdoen!

Na amper twee jaar van inperkings gaan ons weer Jannies vir Jesus hervat! Hierdie projek is in 2019 geloods om ons Jannies die geleentheid te gee om hul geloof uit te leef. Vrywillige Jannies het lekker saam gesing en na ‘n kort boodskap geluister. Ons is baie opgewonde dat die Groote Kerk ook hierdie jaar betrokke gaan raak. Ds Marietjie Steyn of hul jeugwerker (wat binnekort aangestel word) of ‘n onderwyser sal die boodskap behartig. Ons beoog ook om ons gr.7’s en entoesiastiese kitaarspelers by die aanbieding te betrek.

Ons nooi alle gr.1-7-leerders en hulle ouers uit om betrokke te raak!
Wanneer? Elke Donderdagoggend (Begin 10 Maart)
Waar? Skoolsaal
Tyd? 07:15 – 07:40

Rig alle navrae aan lucia@jvrprim.co.za

Dis weer tyd om heerlik op 23 April 2022 op die skoolgronde saam te kuier. Merk solank die datum op jou kalender sodat julle nie uitmis nie. Ons het julle kostalente by die Oor-Die-Kole kompetisie nodig. Kliek op die GOOGLE FORM vir al die inligting en om in te skryf. Vul asb. die Google Form voor 25 Maart 2022 in om jou land/span in te skryf. Kontak vir Martie Viljoen 084 601 5640 | martie.viljoen7@gmail.com of Ria Hertzog 082 320 3288 | oov@jvrprim.co.za met enige vrae.

Alle Gr.5 – 7-Jannies word na ons skitterende ‘disco’ dans op Donderdag, 17 Maart 2022, genooi!
Tyd: 18:00 – 21:30

Kaartjies sal vanaf Maandag, 28 Februarie, op die Karri-toep teen R60 beskikbaar wees.
Kaartjies sluit ‘n worsrolletjie en ‘n koeldrank in.

Die snoepie sal die aand oop wees.