Kategorie: Algemeen

Die biblioteek sal oop wees vir leerders wat wil kom lees, huiswerk of take doen. Sien die beskikbare tye hier onder:

 Na afloop van elf besige en opwindende weke kom kwartaal 3 vandag amptelik tot ‘n einde met die sluit van die skole vir ‘n kort vakansie voordat ons die finale kwartaal van die jaar aanpak. Ek hoop en vertrou dat julle ook kwartaal 3 saam met jul kind/ers terdeë geniet het.  Dit is vir my ‘n riem onder die hart om daagliks te sien hoe gelukkig die leerders by die skool is. Hulle vrymoedigheid om daagliks by my kantoor te kom inloer om te groet of net om seker te maak dat ek, soos hulle dit stel: ‘’okay’ is’, is seker die beste byvoordeel wat ek, as skoolhoof, voor kon vra. 

As ons vinnig oor die afgelope kwartaal terug kyk en ‘n kort refleksie sou wou doen, staan die volgende vir my uit: 

• Heelwat sportgeleenthede is vir die wintersporte (netbal, hokkie en rugby) die afgelope twee kwartale suksesvol gereël. Al het daar hierdie winterseisoen verskeie van die wedstryde, as gevolg van die gure weer uitgereën, is daar vanjaar ‘n rekord totaal van 743 wintersport-wedstryde gespeel. Dit is 157 wedstryde meer as gedurende 2023 en 215 wedstryde meer as 2022.  Dit is beslis ‘n pluimpie vir die sportkantoor. Baie geluk dan ook aan ons o/13A-dogtershokkiespan en ons o/7A-seunshokkiespan wat die seisoen onoorwonne afgesluit het.  Baie geluk aan die kaptein van ons eerste dogtershokkiespan, Hila Hertzog, en hul afrigters mnr. Leon en juf. Suné met die merkwaardige prestasie. Sportdeelname en -prestasie het oor die afgelope 3 jaar aansienlik by ons skool verbeter. Ons sportplan en -visie is stadig maar seker besig om vrugte af te werp. Daar is vir seker nog baie ruimte vir verbetering en soos ons weet, word Rome ook nie in een dag gebou nie. 

• Die aanbied van ‘n baie suksesvolle mini-sportdag (o/7 – o/9 rugby & netbal) op Saterdag, 03 Augustus. Vanjaar was dit ‘n perd van ‘n ander kleur, aangesien die sportdag hierdie jaar soveel groter was as in 2023 met 1 500 leerders wat aan 208 wedstryde deelgeneem het. Vir seker het ons skool nog nooit so ‘n groot sportbyeenkoms aangebied nie. Die dag was uiters suksesvol weens puik beplanning, veerkragtigheid en deeglike uitvoering! Dit is ‘n bewys dat ons skool ook groot sporttoernooie effektief kan aanbied tot voordeel van ons leerders. 

• Die opening van die wêreldklas Zen Den waar daar gestreef word om ‘n veilige en kalm omgewing vir leerders wat sensories oorlaai of oorweldig voel, te skep. Ons doel met die Zen Den is om die nodige wegbreekruimte gedurende skooltyd te skep waar leerders nodig het om hulle sintuie te reguleer en van hul angstigheid ontslae te raak. Hulle innerlike kalmte kan hier herstel word, sodat hulle weer rustig kan raak om verder in die klaskamer te funksioneer. Die sentrum bevorder selfregulering, emosionele welstand en akademiese sukses deur ‘n holistiese benadering wat die uniekheid van elke leerder erken en ondersteun. Om op te som, kan Zen Den gesien word as ‘n ‘toevlugsoord’ waar leerders kan selfreguleer, herlaai en floreer. Hier wil ons ook leerders met unieke uitdagings rakende neurodiverse prosessering ondersteun en hulle met die nodige vaardighede bemagtig om die wêreld met selfvertroue vierkantig in die oë te kyk. 
  

• Ons tweejaarlikse skoolkonsert is definitief nie net die hoogtepunt van die kwartaal nie, maar vir seker van die jaar, veral as ‘n mens die leerders se opinie moes kry oor dit wat vir hulle spesifiek die kwartaal uitgestaan het. Ons skoolkonsert is baie gewild en as gevolg van die aanvraag van kaartjies, is dit vanjaar oor ‘n tydperk van twee weke aangebied.   ‘’Somewhere over the Rainbow’ verdiskonteer ‘n puik produksie en elke item is aand-vir-aand luidkeels deur die gehoor toegejuig. Die liedjies wat vir elke graad en klas gekies is, is mooi afgewissel van moderne musiek tot musiek wat die oumas en oupas mee kon assosieër. Dus is daar vir oud en jonk voorsiening gemaak om die konsert terdeë te geniet. Die uitstekende beligting en klank, die asemrowende kostuums en professionele grimering het elke aand perfek afgerond. Ons streef in alles wat ons by die skool doen na uitnemendheid en dit is presies wat ook tydens die konsert gebeur het. Baie dankie aan al ons mammas se hulp met die grimering en maak van die ongelooflike kostuums. Die detail daarvan was verstommend. 

• Op Saterdag, 14 September, het 19 van ons leerders aan die jaarlikse WOW-spelkompetisie se provinsiale rondte te Wellington deelgeneem en soos oudergewoonte stof in die ander skole se oë geskop. Baie geluk aan die volgende drie leerders wat vir die Nasionale Kompetisie op 28 September te Stellenbosch gekwalifiseer het: 

• Graad 4: Maia du Toit 

• Graad 6: Katryn Silvis en Amelie van der Walt  

Baie dankie juf. Ilse-Marie vir al jou hulp in die verband. 

• Op kulturele gebied oefen biede die senior- en junior koor die afgelope kwartaal baie hard onderskeidelik onder die bekwame leiding van Leon Starker en mnr. Ben om slaggereed vir verskeie optredes gedurende volgende kwartaal te wees. Ons senior koor het veral die afgelope kwartaal baie hard aan stemtegnieke gewerk om helder koorklank voort te bring asook om stembou, gehoorontwikkeling, musiekwaardering en koordissipline aan te spreek. Ons sien baie uit na beide kore se optredes in kwartaal 4. 
  

• Vandag ontvang elke leerder ook hul skoolrapport om erkenning aan hul harde werk en toewyding die afgelope kwartaal te gee. Dit was ‘n groot voorreg om elke rapport te kon teken met ‘n baie kort persoonlike boodskappie vir elke leerder. Graag wil ek vir al ons leerders en opvoeders spesiaal gelukwens en hartlik bedank vir die kollektiewe poging tot die suksesvolle akademiese-, kulturele- en sportprestasies tydens kwartaal 3. Vandag is die Top 10 Gr. 7-akademiese presteerders vir kwartaal 3 in die saal aangewys. Baie geluk aan die volgende leerders (alfabetiese orde) wat elkeen ‘n spesiale sertifikaat ontvang vir hul harde werk en toewyding: 
  Daniella Boshoff 
  Izzy du Plessis 
  Hila Hertzog 
  Anna Louw 
  Isabella Marais 
  Michaan Naylor 
  Jessica Schincariol 
  Emma Snijders 
  Ané Swanepoel 
  Stella Zulch 

Bogenoemde is maar enkele hoogtepunte van ‘n baie suksesvolle kwartaal. Ek glo dat die hele skoolgemeenskap uitsien na die welverdiende vakansie, al is dit baie kort gaan dit help om die spreekwoordelike batterye te herlaai voor ons die pylvak van die laaste kwartaal aandurf.  

Op Sondag, 15 September om 14:00 het Cape Ballet Centre ‘n ongelooflike produksie, naamlik “Cirque Du Ballet’’ in die Baxter aangebied. Heelwat van ons skooldogters het aan die wêreldklas produksie deelgeneem. Ek was so bevoorreg om dit te kon bywoon met kaartjies wat die dogters spesiaal vir my en my vrou uit hul eie sakke gekoop het – dit was baie kosbaar! Opvallend was ook die ondersteuning van ons skoolgemeenskap tydens die vertoning met verskeie van ons mammas en dogters wat dit bygewoon het om die Jannie-deelnemers te ondersteun. Weereens ‘n bewys van die spesiale etos, ondersteuning, aanmoediging en omgee binne ons skoolgemeenskap. 

Laat my asseblief toe om ons toegewyde personeel hartlik te bedank vir hul harde werk en toegewydheid, maar veral vir hul omgee-harte om seker te maak ons Jannies kry geleenthede om hul volle potensiaal te bereik. Graag wil ek my Bestuurspan (EXCO) hartlik bedank vir hul harde werk en toegewydheid die afgelope kwartaal om die skool operasioneel uiters effektief te help bestuur. Hartlike dank aan ons dinamiese Beheerraad vir hul kosbare tyd en puik insette om te verseker dat Laerskool Jan van Riebeeck van krag-tot-krag sal gaan. Laat my ook toe ons voorsitter van ons Beheerraad, Merwe Scholtz, hartlik geluk te wens met sy verjaardag van 19 September. Mag dit ‘n geseënde lewensjaar wees vol voorspoed en sukses. Baie dankie vir wat jy alles as Voorsitter van die Beheerraad vir ons skool doen en beteken! 

Graag sluit ek af met ‘n uiters dankbare hart teenoor ons ouers/voogde wat ons weereens die afgelope kwartaal so lojaal ondersteun het. Ek waardeer jul betrokkenheid en omgee by die skool, maar veral in jul kinders se lewens. Betrokke ouers/voogde verseker suksesvolle skole wat altyd van krag-tot-krag sal gaan. Mag ons die spesiale etos en kultuur om net jouself te wees by ons trotse skool nog tot in lengte van dae koester. Dus sluit ek met die volgende bekende aanhaling van G.K. Chesterton af en mag ons altyd ons spreekwoordelike dankbaarheidsbrille dra. 

Ek wens vir julle ‘n wonderlike vakansie toe. Veilig reis! Ek sien uit om julle almal op Dinsdag, 01 Oktober, weer terug by die skool te verwelkom. Dra asseblief my groetwense aan jul kinders oor. 

‘’When it comes to life 
the critical thing is  
whether you take things for granted  
or take them with gratitude.’’ 

Vriendelike groete, 
Naas Beets
SKOOLHOOF 

Here is a special message for the amazing students who gave such an amazing donation that came from their hearts. They are an example to each one of us.

We are incredibly grateful to have received your generous donation of dog and cat food, bedding, treats, and other essential items for the animals in our care. Your kindness and compassion have made a significant impact on the lives of the animals at Cape of Good Hope SPCA. Thanks to you, they will not only have full bellies but also warm and comfortable bedding, as well as some special treats to enjoy.

It is truly heartwarming to see young students like you taking action to make the world a better place for animals. Your donation shows that you care deeply about their well-being, and that makes all the difference in their lives. Every time they enjoy a soft bed or wag their tails in excitement for a treat, they are feeling the love and care you have shown them.

On behalf of our entire team and, of course, all the animals who are benefiting from your kindness, thank you. Your generosity and thoughtfulness mean the world to us, and we are truly inspired by your efforts.

Please know that your support has brightened many days for the animals and brought hope to their future. We are lucky to have such compassionate young people like you in our community.

With heartfelt gratitude,

MOYO NDUKWANA
Chief Executive Officer

Sien die oorspronklike brief HIER

Ons is opgewonde om ons ouma- en oupadag vanaf vandag op Karri te adverteer.  Nooi gerus ons mooi kinders se grootouers om hierdie oggend saam met ons te geniet. 

Markdag sal op 19 September plaasvind. Hierdie keer kry die grondslagfase ‘n beurt om iets te verkoop. 

Geen klappers of lewende hawe mag verkoop word nie.
Dit begin om 10:00, ouers kan al van 09:30 kom regmaak.
Bespreek asseblief jou tafel op Karri.

Augustus-maand het net te vinnig tot ‘n einde gekom terwyl Moeder Natuur beslis nie haastig is om die lenteseisoen aan Kaapstad bekend te stel nie. Dit is ongelooflik dat ons die een kouefront op die ander kry wat groot hoeveelheid reënvalneerslae bring. Selfs die nuutste weervoorspelling toepassing sukkel om by te hou. Ons weet ook dat Lentedag tradisioneel orals in Suid-Afrika op 01 September gevier word, maar hier in die Moederstad gaan dit ons ongelukkig nog nie op 01 September beskore wees nie. Ek weet nie van julle nie, maar ek soek nou warmer weer met heerlike sonskyndae en bome vol pragtige lentebloeisels wat die hele omgewing ophelder. Kom ons hoop dat ons warm baadjies binnekort met warmer dae vervang sal word. 

Graag wy ek die grootste gedeelte van my nuusbrief dié week aan die nuwe leerontwikkelingsentrum wat op Maandag, 26 Augustus, amptelik sy deure oopgemaak het. Hierdie wêreldklas-sentrum met al sy moderne meubels, speelgoed en apparate is tot stand gebring as gevolg van die ruim skenking van Whitey en Annalise Basson asook Mari en Brynn Kushner. Ons is vir julle as familie baie dankbaar en ons is saam met julle baie trots op die merkwaardige ruimte. Na deeglike oorweging en konsultasie is daar op ‘n baie gepaste naam, naamlik Zen Den besluit. Die leerders is eens dat Zen Den ‘n baie “cool’’ naam en plek is. Die betekenis van Zen Den is soos volg:

• Zen: Dit is die Japanese uitspraak van ‘n Chinese woord wat ‘n gevoel van rustigheid en balans binne jouself verteenwoordig.
• Den: ‘n Plek waar ons leer om self slim keuses te maak. 

By die Zen Den word daar gestreef om ‘n veilige en kalm omgewing vir leerders wat sensories oorlaai of oorweldig voel, te skep. Hier kan leerders ondersteuning en rustigheid ervaar. Ons doel met die Zen Den is om die nodige wegbreekruimte gedurende skooltyd te skep waar leerders nodig het om hulle sintuie te reguleer en van hul angstigheid ontslae te raak. Hulle innerlike kalmte kan hier herstel word, sodat hulle weer rustig kan raak om verder in die klaskamer te funksioneer. Die sentrum bevorder selfregulering, emosionele welstand en akademiese sukses deur ‘n holistiese benadering wat die uniekheid van elke leerder erken en ondersteun. Om op te som, kan Zen Den gesien word as ‘n ‘toevlugsoord’ waar leerders kan selfreguleer, herlaai en floreer. Hier wil ons ook leerders met unieke uitdagings rakende neurodiverse prosessering ondersteun en hulle met die nodige vaardighede bemagtig om die wêreld met selfvertroue vierkantig in die oë te kyk. Ouers/voogde is welkom om die ongelooflike sentrum te kom besigtig. Ek glo ons skool is stadig maar seker besig om homself van ander skole te onderskei deur onder andere wêreldklas fasiliteite vir ons leerders te skep danksy ondersteuning van donateurs en weldoenders. Baie dankie ook aan Stephen Hitchcock (Stretch Architects), ‘n ouer en Beheerraadslid vir jou aandeel in die ontwerp van Zen Den. Laat my toe om veral vir Mari Kushner hartlik te bedank vir haar leeue-aandeel tot die totstandkoming van Zen Den. Mari, ons waardeer al jou kosbare tyd, finansiële bydraes en jou besonderse estetiese oog rakende die fynere afronding van die merkwaardige sentrum.

Vandag sluit ons die lang wintersportseisoen met ‘n sportnaweek tuis teen Laerskool Welgemoed af. Vanmiddag word al die hokkiewedstryde aangebied terwyl netbal- en rugbwedstryde môre sal plaasvind. Daar sal verskeie kosstalletjies by die skool en Conradieveld wees met smaaklike disse te koop. Vanaf Maandag, 02 September, is dit konserttyd! Daar is die laaste paar weke baie hard geoefen om vanjaar ‘n konsert, naamlik ’’Somewhere over the Rainbow’’, aan te bied wat jou vir seker sal meevoer. Ons Graad 7-leerders kry vanjaar elkeen ‘n geleentheid om as hoofkarakter op te tree. Ons weet dat dit vir hulle ook ‘n hoogtepunt sal wees. Kaartjies verkoop op die oomblik soos soetkoek. Tyd hardloop nou vinnig uit. Ek hoop van harte almal het al hul kaartjie gekoop, want mis jy die konsert, gaan jy vir seker baie spyt wees. Die skoolkonsert gaan beslis weer skooltrots en –gees aanwakker. Baie dankie aan al ons ouers/voogde wat so hard aan die kostuums werk. Ons is julle baie dankbaar en weet dat dit asemrowend gaan lyk. 

‘n Skoolkonsert bied vir ons leerders net soveel lewenslesse buite die vier mure van die klaskamer as wat byvoorbeeld sportwedstryde doen, naamlik om te leer om effektief as ‘n span saam te werk en te volhard. Verder bevorder dit die leerders se selfvertroue en kweek dit ‘n gesonde werketiek. Kom ons wees eerlik: om op ‘n verhoog voor ‘n gehoor van meer as 350 mense op te tree, definitief intimiderend vir die meeste mense sal wees. Die skoolkonsert bied dus ‘n geleentheid vir leerders om moedig voor ‘n gehoor op te tree, ‘n vaardigheid wat hy/sy nog baie in hul lewe nodig sal kry. Geniet die konsert, lekker saamsing en mag dit al jul verwagtinge oortref!

Ek sluit dan die week weer af met nog ‘n bekende aanhaling rakende dankbaarheid, dié keer deur Arianna Huffington.  Ek wens vir elkeen ‘n wonderlike naweek toe en geniet die sportnaweek teen Laerskool Welgemoed!

“Living in a state of gratitude 
is the gateway to grace.’’ 

Vriendelike groete,
Naas Beets 
SKOOLHOOF 

Konsertreëlings:

Volg hierdie skakel om die volledige konsertreëlings te sien:
https://bit.ly/konsertreëlings2024

Konsertkaartjies:

Bespreek by die skakel hier onder:

Kaartjies vir 2-11 September 2024
https://qkt.io/vBCzZL

Grand Finale Kaartjies – 12 September 2024
UITVERKOOP

Vir enige navrae kontak vir Megan per e-pos by:
megan@jvrprim.co.za

Ons is reeds besig om aan 2025 se Akademiese week te beplan. Indien enige iemand ‘n kontak het met iemand by Lego – boublokkies sal dit so gaaf wees om my (Marinda Brink) in kennis te stel. Die tema van die week is geskoei op Lego – boublokkies. Die plan is om volgende jaar se Akademiese week nog groter en met nog meer pret aan te bied.

Kontak my gerus: marinda@jvrprim.co.za

Dit is tyd vir veiling! Kliek op die skakel vir meer inligting: https://qkt.io/gSkzHj

Ons is baie trots op twee van ons oud-Jannies wat skitterend tydens hierdie jaar se nasionale senior ATKV-Afrikaansolimpiade gevaar het!

Stella Malan behaal ‘n gesamentlike 4de plek in die Wes-Kaap en 7de in Suid-Afrika en Mari Swanepoel die gesamentlike  7de plek in die provinsie en 11de in die land.

Dit is ‘n ongelooflike prestasie vir ‘n baie uitdagende eksamen waaraan duisende hoërskoolleerders regoor Suid-Afrika deelneem.

Ons harte loop oor van trots! Welgedaan, Jannies.