Kategorie: Algemeen

Ons wil graag ons Jannies se goeie prestasies tydens saalbyeenkoms op ‘n Dinsdag in die kollig plaas. Ons benodig julle (as ouers/voogde) se hulp hiermee. Enige sertifikate, medaljes of trofees moet asseblief op ‘n Maandag by juffrou Michelle Compion (gr. 3) se klas ingehandig word. Indien dit nie Maandag by haar is nie, sal dit oorstaan na die volgende Dinsdag. Dit moet asseblief duidelik as volg gemerk wees:

1. Naam en van;
2. Waarvoor die leerder die prestasie ontvang het

Baie dankie vir die samewerking!

Ons neem Dinsdag, 21 Februarie, klas- en individuele foto’s.

Ons is bewus dat nie alle leerders tans dieselfde skooldrag het nie aangesien ons hierdie jaar in ‘n oorgangsfase is. Indien jou kind reeds die nuwe skooldrag dra, beveel ons aan dat hy/sy dit aantrek.  Indien nie, wil ons vra dat leerders sportdrag dra.  

Vrydag, 17 Feb., om 10:00 tot ongeveer 10:30 sal daar ‘n opleidingsessie oor rou/verlies in die skoolsaal aangebied word. Ouers is welkom om dit by te woon. Die sessie is slegs vir volwassenes. Dr. Arina Fourie sal dit hanteer. Hierdie onderwerp strek oor verskeie aspekte.

Kliek asb. op die skakel vir ‘n nuusbrief vanaf die WKOD.

Vanjaar poog ons ‘n groter fokus op Groei-ingesteldheid (‘Growth Mindset’). Al gewonder watter boodskappe jy jouself vertel indien sukses jou die heeltyd ontwyk? Mense met vaste groei-ingesteldheid glo dat hul intelligensie en vaardighede eienskappe is waarmee hulle “gebore is” en dat dit nie kan verander nie. Mense met hierdie tipe oortuiging word maklik ontmoedig en hulle is geneig om weg te skram van moeilike take of uitdagings. Navorsing het bewys dat mense met ‘n groei-ingesteldheid glo dat jy jou intelligensie kan uitbrei/ontwikkel deur vaardighede aan te leer en dat jy met meer oefening en moeite die uitdaging mettertyd sal baasraak.

Ons doel met groei-ingesteldheid is om ‘n skoolgemeenskap te ontwikkel wat deursettingsvermoë, wilskrag, empatie, goeie kennis oor jouself, ‘n behoefte aan leer en ontwikkeling en ‘n ingesteldheid van groei, uitleef. Om regtig jouself te wees, moet ons ruimte vir ontwikkeling skep. Navorsing toon dat breinontwikkeling slegs kan plaasvind indien uitdagende take aangepak word. Dus wil ek julle versoek om jou kind/ers onder jou wakende oog ‘n kans te gee om ‘n bietjie te waag en selfs te misluk terwyl hulle nog jonk is sodat die spreekwoordelike groei-ingesteldheid se ‘spiere’ kan oefen. Vertel vir jou kinders dat bekendes soos Albert Einstein, Walt Disney, Steve Jobs, Michael Jordan en Oprah Winfrey verskeie mislukkings ervaar het. Hulle het egter nooit tou opgegooi of weggestap van hul drome nie. ‘n Mens leer dikwels die belangrikste lewenslesse wanneer jy misluk. Ek sê gereeld vir ons sportspanne dat ‘n mens eintlik net leer wanneer jy eers verloor. Kollektief moet ons, ons kinders leer dat om te verloor of te misluk deel van die lewe is, maar belangrik dat solank jy daaruit iets leer en nie moed opgee nie, sukses jou sal volg.

Op Vrydag, 03 Februarie 2023, het ons o.13A-krieketspan vanaf 16:00 ‘n middag-aand wedstryd teen LS Kampsbaai by die Conradieveld gespeel. Die wedstryd was egter van korte duur aangesien ons hulle vir slegs 38 lopies uitgeboul het. Ons het die lopies binne 8 beurte afgeslaan. Baie geluk aan die span en hul afrigter, mnr. Warren, met die puik oorwinning. Op Maandag, 06 Februarie 2023, het die interskole atletiekbyeenkoms te HS Jan van Riebeeck se velde plaasgevind. Ons atlete het puik gevaar en 18 atlete is deur na die volgende rondte. Baie dankie aan mnr. Leon en sy span vir al die puik reëlings. Die afgelope week het daar ook verskeie tennis- en krieketwedstryde plaasgevind. Die sportprogram is in volle swang en ek versoek al ons leerders om aan ten minste een somersport deel te neem.

Baie dankie aan juf. Andri wat op Saterdag, 04 Februarie 2023, die inligtingsessie rakende redenaars met al ons belangstellende leerders en hul ouers gehou het. Redenaars leer die leerders om hul verbale- en nie-verbale kommunikasievaardighede te verbeter, effektiewe navorsing te doen, denkprosesse te ontwikkel om mense van hul standpunt te oortuig en laaste maar nie die minste nie, help dit met selfvertroue.

Graag sluit ek af met die volgende aanhaling oor groei-ingesteldheid deur Roger Crawford en wens vir julle ‘n wonderlike naweek toe:

“Being challenged in life is inevitable,
Being defeated is optional”

Vriendelike groete

Naas Beets
SKOOLHOOF

• 2 Maart 2023
• R300 vir volwassenes
• Kinders kom verniet
• Kaartjies op Karri te koop
• Deure open vanaf 17:00 en die vertoning begin om 19:00
• Kosstalletjies beskikbaar:
  • Bestellings vir etes kan vooraf geplaas word. Kies asseblief op Karri wat jy wil bestel en maak jou betaling. Op die aand van die konsert sal julle die etes van die stalletjie kan afhaal mits jy jou kosplakker/s wys. Jy sal jou kosplakkers op die aand van die konsert by die ingang ontvang. Jou naam en bestelling sal op ‘n lys wees. Stap net na die gemerkte tafeltjie – ‘kosplakkers’.
  • Opsies beskikbaar die aand wat vooraf bestel moet word en betaalbaar is op Karri:
    • Chicken Strips & Fries R75
    • Chicken Burger & Fries R115
    • Beef Burger & Fries R135
    • Poké Bowl R165 (Norwegian salmon, radish, pickled red onion, carrots, cucumber, sushi rice, pickled ginger, edamame beans, nori and a lemon soy dressing)
    • Falafel burger & Fries R90

Julle is welkom om vriende en familie te nooi. Julle kan namens hulle op Karri betaal.

Wenke:

1. Indien jy meer as een kind in die skool het, kan jy jou ander kind(ers) se profiel(e) en boodskap groepe sien deur op die pyltjie langsaan jou kind se naam bo-aan die toep te kliek en ‘n ander kind se naam te kies.
2. Wanneer jy ‘n “assignment” met ‘n aangehegsel van ‘n onderwyser af kry, kliek op die Assignment opskrif onderaan met die pyltjie om die aanhegsels te sien.
3. Indien jy tans nie ‘n Skooler kennisgewing (notifications) op jou selfoon ontvang nie, volg asb. die volgende stappe:
   • Tik op die menu icon links bo in die Skooler toep.
   • Kies ‘Settings’ in die opsielys.
   • Tik op ‘Test’ langs die ‘Test push notifications’ opsie.
   • Indien jy nie die toets kennisgewing van Skooler ontvang nie,  maak asb. seker dat Skooler kennisgewings in jou selfoon se kennisgewing settings aangeskakel is. 
   • Indien jy steeds hiermee sukkel, stuur gerus ‘n e-pos na suzaan@jvrprim.co.za.

Kennisgewings:

1. Ons is tans besig om die sportgroepe in Skooler op te stel. Sodra dit binne die volgende week afgehandel is, sal die sportboodskappe in Skooler ontvang word.
2. Ons is ook besig om al die datums in die Skoolerkalender te laai. Gebruik gerus intussen nog die ou Google Kalender of Webdagboek om al die datums te sien.
3. Enige persoonlike besonderhede wat deur die loop van ‘n week in myJvR verander is, word Vrydagoggende na die Skooler platform opgelaai. Maak dus asseblief seker dat jou kontakbesonderhede in myJvR altyd op datum is.

Februarie-maand het die afgelope week skielik sy onverwagse opwagting gemaak en onmiddellik dink ‘n mens waarheen het Januarie dan nou so vinnig verdwyn. Weereens kom ons tot die besef dat tyd spreekwoordelik verby vlieg en vir niemand wag nie. Dus beveel ek aan dat indien jy nog iets spesiaal beplan om te doen, moenie wag nie, doen dit sommer dadelik!

Graag wil ek almal bedank vir al die mooi verjaardagwense wat ek ontvang het. Ek het op Saterdag, 28 Januarie, saam met die ouer- en kindsportdag verjaar, maar is reeds vanaf Vrydag, 27 Januarie, tot in die afgrond deur die leerders en personeel bederf. Dit is seker die lekkerste voordeel van skoolhoof wees om veral deur die leerders bederf te word. Ek wens julle kon die spesiale dag saam met my beleef. Dit was kosbaar en sal my altyd by bly. Suné Alberts (gr. 7-juffrou) verjaar ook op Saterdag, 28 Januarie, en ons twee het heerlik saam met al die leerders wat ook daardie dag verjaar, feesgevier. Dit was verblywend om te sien hoeveel ouers het saam met hul kinders opgedaag om aan die sportdag deel te neem. Nie eers die gure weer kon die opgewondenheid en gees gedemp nie. Ek glo natuurlik dat die koeler weer en ligte reën wat uitgesak het, was ‘n bedekte seën, want dit het al die warm gespeelde liggame help afkoel. Hierdie sportdag gaan beslis ‘n jaarlikse instelling op die 2de Saterdag van die nuwe akademiese jaar word. Hierdie geleentheid was die perfekte geleentheid vir leerders, ouers en personeel om sommer lekker gees te vang en die jaar op ‘n hoogtepunt af te skop. Groot dankie aan die personeel wat as beamptes en spelers opgetree het asook registrasies en die snoepieverkope hanteer het.

Op Dinsdag, 31 Januarie 2023, het ons leerderraad hul balkies tydens die weeklikse saalbyeenkoms ontvang. Baie dankie aan hul ouers wat die spesiale geleentheid bygewoon het om die balkies vir hul kinders aan te steek. Ons beste wense vergesel die leerderraad vir hul belangrike rol as leiers in ons skool.

Die afgelope week het ons ook met wedstryde vir krieket en tennis begin. Graag wil ek melding van ons uitstekende tennisuitslae op Woensdag, 01 Februarie, maak. Ons eerste seunstennisspan het LS Durbanville se eerste seunspan met 4 – 2 gewen. Ons 2de seunstennisspan wen LS Van Riebeeckstrand met 5 – 1. Welgedaan spelers en afrigters.

Maandag, 06 Februarie 2023, geskied die interskole atletiek by Hoërskool Jan van Riebeeck se velde. Sterkte aan al ons atlete en afrigters. Baie dankie aan Leon Hanekom wat aan die stuur van sake by die interskole staan.

Dit is dan my voorreg om die volgende drie oud-Jannies wat as die gr. 8-lede van die VRL by Hoërskool Jan van Riebeeck verkies is, hartlik en trots geluk te wens:

• Helene Greeff
• Sebastian Senekal
• Albert Griesel

Laat my ook toe om die skoolhoof, Pieter Rademeyer, en sy personeel hartlik geluk te wens met hul puik matriekuitslae van 2022. Drie van hul volgende vakke het landswyd die Top 20 plekke behaal:

• Fisiese Wetenskap – 8ste plek
• Wiskunde – 10de plek
• Afrikaans – 11de plek.

Pieter ontvang op 16 Februarie 2023 ‘n spesiale nasionale toekenning in Centurion vir sy skool se puik matriekuitslae. Ons is saam met Hoërskool Jan van Riebeeck trots op die merkwaardige akademiese prestasies en wens Pieter en sy personeel ‘n wonderlike en suksesvolle 2023 toe. Baie geluk met die puik werk en suksesse van die afgelope tyd!

Ons oud-leerders presteer ook in ander skole en graag wil ons Lizaan Swartz wat as die 2023 Hoofdogter en Edward Bock wat as ‘n prefek te Hoërskool De Grendel verkies is, voorspoed toewens.

Graag sluit ek af met die volgende aanhaling oor groei-ingesteldheid deur Samual Johnson en wens vir julle ‘n wonderlike naweek toe:

“Great works are performed not by strength, but by perseverance!”

Vriendelike groete

Naas Beets
SKOOLHOOF

Met verandering kom spanning. Hierdie ontwikkelingsproses skep fantastiese groeigeleenthede. Ons het gedurende 2022 die behoefte identifiseer om ons skoolgemeenskap te help om veranderinge en uitdagings beter te hanteer deur ‘n groei-ingesteldheid te ontwikkel.

Die WKOD het ‘n baie oulike ‘growth mindset’ program ontwikkel waarby ons as loodskool hierdie jaar betrokke is. Natuurlik sal ons meer as verwag doen en hierdie platform gebruik om alle fasette van skool te integreer. Ons doel is om ‘n skoolgemeenskap te ontwikkel wat deursettingsvermoë, wilskrag, empatie, goeie kennis oor jouself, ‘n behoefte aan leer en ontwikkeling en ‘n ingesteldheid van groei, uitleef. Om regtig jouself te wees, moet ons ruimte vir ontwikkeling skep. Navorsing toon dat breinontwikkeling slegs kan plaasvind indien uitdagende take aangepak word.

Ons streef daarna om leerders se ingesteldheid te vernuwe sodat hulle …

• nie bang sal wees om foute te maak nie – om waagmoed te toon;
• vrae sal vra al klink dit ‘dom’;
• nie bekommerd sal wees oor hoe hulle sal ‘lyk’ indien ‘n nuwe vaardigheid/projek aangepak word nie;
• probeer – al voel dit asof hy/sy nie ‘kan’ nie;
• uitdagings aanvaar / aangryp;
• allerhande metodes vind om ‘n probleem op te los
• positiewe gesprekke met ‘self’ voer
• ingesteldheid om te leer en te ontwikkel
• daagliks nuwe konsepte en vaardighede aan te leer

Met hierdie oulike karakters (Brein, Katie en Mojo) sal ons die leerders se aandag gevestig hou om in ons doel te slaag.

Maak gerus van hierdie ingesteldheid tuis ook gebruik sodat ons spoedig ‘n algehele omgewing van ‘ek kan nog nie nou nie, maar ek sal nog kan’ kan skep.

Met die aanvang van die 2de week van die kwartaal is alle skoolaktiwiteite in volle swang. Laasjaar die tyd was daar nog so ‘n bietjie bekommernisse oor COVID, maar vanjaar is daar nie sprake daarvan nie en kan ons as ‘n skoolgemeenskap weer ‘normaal’ funksioneer.

Op Maandag, 23 Januarie 2023, het die somer buitemuurse program amptelik afgeskop en ons is aangenaam verras met die opkoms van leerders wat aan die verskillende somersportkodes wil deelneem. Baie dankie aan al die ouers/voogde vir julle aandeel om jul kinders te motiveer om vanjaar aktief te wees en aan skoolsport deel te neem deur dit saam met hul maats te geniet.

Graag wil ek al ons ouers/voogde wat die inligtings- en bekendstellingsaand op Dinsdag, 24 Januarie 2023, bygewoon het hartlik bedank en gelukwens met die opkoms. Dit is werklik ‘n riem onder die hart om te sien dat soveel ouers/voogde werklik betrokke by sy/haar kind se skool wil wees en dit koester om deel te wees van ‘n spesiale skoolgemeenskap wat omgee. Laat my toe om ons OOV-voorsitter, Ria Hertzog, en haar span (Esna Boshoff en Elette Symington) vir die puik reëlings en harde werk hartlik te bedank wat die sukses van die aand verseker het. Die samesyn was kosbaar en die positiewe ‘gees’ onder die ouers/voogde was amper tasbaar. Die doel van die aand was natuurlik om inligting oor jou kind/ers se nuwe graad oor te dra, asook om die personeel bekend te stel. Ek dink almal stem saam dat die geleentheid absoluut die regte geleentheid was om die jaar op ‘n hoogtepunt af te skop. Ek glo ouers/voogde het die geleentheid gebruik om mekaar beter te leer ken, veral die graad 1-ouers asook al die nuwe ouers en daardeur nuwe vriendskappe te bewerkstellig.

Die pret vir die week stop egter nie by Dinsdagaand nie, dus glo ek dat ek weer almal môre tydens die ouer- en kindsportdag by die Conradieveld sal sien. Ouers en kinders word op die dag in spanne van 6 lede in gedeel wat bestaan uit 3 volwassenes en 3 kinders. Julle kan aan sokker, mini-krieket, ‘tag-rugby’ en veldnetbal deelneem. Neem gerus deel, geniet die dag saam met jou kind/ers en indien jy bekommerd is oor ‘n ‘ou’ besering, ons gaan spesiaal van professionele noodhulp gebruik maak. Daar sal ook heerlike koffie, eet (Pizza) – en drinkgoed te koop wees. Braaidromme gaan ook uitgepak word indien julle na afloop van die sportdag (vanaf 12:00) wil braai en lekker saam kuier. Bring dus gerus jou smaaklike ‘skaaptjoppies’ en ander verversings saam. By voorbaat dankie dat julle die dag gaan ondersteun. Ek glo dit gaan ‘n jaarlikse instelling word. Groot dankie aan die personeel wat as beamptes gaan optree asook registrasies en die snoepieverkope gaan hanteer.

Graag sluit ek af met die volgende aanhaling oor groei-ingesteldheid deur Sherman Finesilver en wens vir julle ‘n wonderlike naweek toe:

“Don’t worry about failure.
Worry about the chances you miss
When you don’t even try!”

Vriendelike groete

Naas Beets
SKOOLHOOF

*Plakaat ontwerp deur Jacques Viljoen (gr. 7S)

1. Skooler is die toep wat ons gaan gebruik om met ouers te kommunikeer, leerders se opdragte en beplanning te laai en datums beskikbaar te stel.
2. Ouers moet asb. Skooler Parent aflaai.
3. Wifi: Indien julle nie internet by die huis het nie, kan julle tot volgende week Vrydag, 3 Februarie, aan die skool se wifi konnekteer om die toep af te laai:
   • JvR Guest
   • Wagwoord: 24Jan2023
4. Soek JvR nadat dit afgelaai is.
5. Kies die Activate my account opsie langsaan First-time user?
6. Tik die e-posadres / selfoonnommer wat die skool van jou het, in.
7. Tik die kode wat aan jou gestuur is, in.
8. Skep ‘n wagwoord.
9. Teken in.
10. Indien iemand sukkel om in te teken of die toep af te laai, stuur gerus ‘n e-pos aan suzaan@jvrprim.co.za
11. Om Skooler op ‘n rekenaar te gebruik, volg hierdie instruksies:
    • Tik Skooler in by jou soekenjin en kliek op die https://skooler.com webtuiste.
    • Kliek Login regs bo.
    • Kliek op die Home Parents blok.
    • Tik in JvR om die skool te soek.
    • Indien jy reeds op jou selfoon geregistreer het, kan jy inteken met jou e-posadres en wagwoord. Indien jy nog nie het nie, kan jy op Activate my Account kliek.

Hartlik welkom terug by die skool. Groot opwinding met hoë energievlakke het op Woensdagoggend, 18 Januarie 2023, tydens die opening van die skool na die heerlike somervakansie geheers. Ons graad 1’s is spesiaal met ope arms deur die leerderraad ontvang en na hul onderskeie klaskamers vergesel. Dit was so lekker om ook al ons ouers te verwelkom, blad te skud en sommer net lekker te gesels oor die vakansie en die jaar wat voorlê.

Ek hoop en vertrou almal het ‘n heerlike vakansie en ‘n geseënde Kerstyd saam met familie en vriende geniet. Ek glo almal se spreekwoordelike batterye is ten volle herlaai en slaggereed om die nuwe jaar aan te pak. Sterkte ook met al die nuwe jaar voornemens!

Graag rapporteer ek dat al ons personeel veilig terug is na die lang vakansie, uitgerus en gereed om jul kinders te onderrig en te ondersteun om seker te maak dat elke Jannie sy/haar skooljaar sal geniet. Ons streef daarna dat elke leerder sy/haar volle potensiaal bereik teen die tempo waarteen elke leerder individueel ontwikkel. Laat my ook toe om die volgende nuwe personeel hartlik by die JvR-familie te verwelkom:

• Naomi Uys (Gr. 2)
• Ilse-Marie Holtshauzen (Gr. 4)
• Erick Snyman (Gr. 5)
• Suné Swanepoel (Kodering en Robotika)
• Jua-Mari Strehler (GF-klasassistent)
• Charmlynn Hendricks (GF-klasassistent)

Maak asseblief seker dat jy volgende week op Dinsdagaand, 24 Januarie 2023, vanaf 18:00 die bekendstellingsfunksie en inligtingsaand by die skool bywoon sodat julle ook al die nuwe personeel kan ontmoet. Die program vir die aand werk as volg:

• 18:00 – Inligtingsgesprek met klasonderwyser in klaskamer soos deur onderwysers gereël.
  Benut assseblief dié geleentheid om jou kind se leeromgewing te sien en die roetines / stelsels binne-in die klas te verstaan. Ons gaan ook die akademiese verwagting vir die graad deurgee. Onderwysers moet egter direk na afloop van die vergadering in die saal wees vir die bekendstellingsfunksie. Individuele afsprake sal op ‘n latere stadium met ouers gemaak word sodra die basislynassesserings voltooi is.
• 18:45 – Almal verdaag saal toe vir ons algemene inligtings- en bekendstellingsvergadering.

Na afloop van die bekendstellingsfunksie sal heerlike etes geniet word. Ek sien baie uit na die heerlike samewyn.

Ons begin ook vanjaar vroeër met ons sportoefeninge. Die atletiekspan het alreeds vanaf Woensdag, 18 Januarie, begin oefen ter voorbereiding van die Interskole atletiekbyeenkoms wat op 06 Februarie plaasvind. Die somersport-buitemuurse program skop dan amptelik op Maandag, 23 Januarie 2023, af. Hou asseblief Saterdagoggend, 28 Januarie 2023, oop waartydens ons ‘n ouer-kind informele sportdag by die Conradieveld gaan aanbied. Die doel hiervan is om pret saam met jou kind te hê terwyl ouers ook die geleentheid kry om sommer ook mekaar beter te leer ken en saam die jaar behoorlik af te skop met lekker gees en opwinding.

Graag sluit ek af en wens julle ‘n wonderlike en voorspoedige 2023 toe. Geniet saam met jou kind/ers hul nuwe graad en leerervaring. Mag julle ‘n heerlike naweek geniet.

Vriendelike groete

Naas Beets

SKOOLHOOF