Kategorie: Algemeen
Die Beheerraad se eerste amptelike beheerraadsvergadering vir die jaar is Maandagaand gehou om te verseker dat ons trotse skool 2022 soomloos aanpak en van krag-tot-krag sal gaan. Graag wil ek by voorbaat ons Voorsitter, Merwe Scholtz, en die ouerkomponent van die beheerraad naamlik Izelle Venter (onder-voorsitter), Esri Marais, Marié Cruywagen, Andries Viljoen en Marili Thomson (Tesourier) hartlik bedank vir hul waardevolle insette asook die kosbare tyd wat hulle spandeer om die funksionaliteit van ons spogskool te verseker.
Op Dinsdag, 8 Februarie 2022, het 50 van ons atlete by Hoërskool Kampsbaai aan die Interskole Atletiekbyeenkoms wat deur die Duitse skool gereël is, gaan deelneem. Ons atlete het baie goed gevaar met 37 atlete wat na die volgende rondte vorder. Sien die uitslae onder die Sport afdeling in die nuusbrief. Dit was so jammer dat weens omstandighede buite ons beheer julle as ouers/voogde nie die byeenkoms kon bywoon nie. Ek het wel waargeneem dat van ons ouers vinnig ‘n plan gemaak het om vanuit ‘n ‘strategiese’- en hoër hoogte die byeenkoms op ‘n afstand dop te hou. Baie dankie aan ons opvoeders wat as beamptes opgetree het asook Razelle en Shahneé wat die administrasie van die hele byeenkoms hanteer het.
Op Woensdag, 9 Februarie, het verskeie tenniswedstryde asook ‘n o/11-krieketwedstryd plaasgevind. Graag wil ek die ouers/voogde komplimenteer wat die wedstryde weer so getrou begin bywoon om ons Jannies te ondersteun. Soos Rudi Badenhorst vir my Woensdag tydens die o/11-krieketwedstryd teen Laerskool Kampsbaai gesê het: “Wat ‘n voorreg om as ‘n ouer weer na ‘n lang tydperk langs die sportveld te kan wees.” Ons is so dankbaar dat ons Jannies weer aan sportwedstryde en byeenkomste kan deelneem waar hulle dikwels onwetend belangrike lewenslesse leer. Sport is nie net goeie oefening nie, maar dit lei ook tot gesonde emosionele welstand wat kinders in die algemeen gelukkiger maak. Wees verseker dat ons vanjaar uit ons pad sal gaan om vir ons Jannies die geleenthede te skep om hul sporttalente uit te leef. Die ‘oordoen’ van die tennisbane langs die swembad is amper voltooi en ons behoort binnekort daarvan gebruik te maak. Behoorlike dreinering is ook ingesit om te verseker dat vog nie weer onder die oppervlakte opbou nie.
‘n Pluimpie vir ons afrigters is dat ons vanjaar 6 spanne vir die tennisliga ingeskryf het. Ek rig ‘n vriendelike versoek dat julle as ouers/voogde ons met die vervoer van veral die tennisspanne na en van die verskillende plekke kan help. Tenniswedstryde geskied op Woensdae saam met o/11-krieketwedstryde wat ongelukkig so deur die onderskeie unies bepaal word. Verder vind tenniswedstryde tuis en sover as die noordelike voorstede plaas wat dit logisties moeilik maak om al die spelers betyds by die verskillende plekke te kry. Baie dankie by voorbaat vir hierdie hulp.
Dit is dan ook vir my aangenaam om te deel dat die getalle by die nasorg vanjaar weer mooi opgetel het. Baie dankie aan Madri en haar span wat uit hul pad gaan om die nasorg lekker vir ons nasorgleerders te maak. Ek weet hulle beplan heelwat meer interessante aktiwiteite om die nasorgleerders te vermaak.
Vandag geskied die senior swemgala en ek glo ons Jannies gaan dit baie geniet.
Graag sluit ek af met die volgende woorde rakende dankbaarheid:
“Dit is nie geluk wat ons dankbaar maak nie, dit is dankbaarheid wat ons gelukkig maak. Die pad na vrede loop deur die land van dankbaarheid.”
Geniet die naweek!
Vriendelike groete
Naas Beets
SKOOLHOOF
Besoek gerus ons Vraag & Antwoord-blad op die webtuiste. Dit is beskikbaar onder die MyJvR opskrif in die menu. Ouers kan die soekfunksie gebruik om iets op die webtuiste op te spoor en ook inligting en video’s onder die Gereelde Vrae-afdeling sien. Daar word binnekort nog bygevoeg, so hou die spasie dop!
Week 3 van die akademiese jaar het op ‘n baie warm en bedompige Maandagoggend afgeskop met ‘n aangename verrassing vir ons leerders aangesien ons skool op 31 Januarie 101 jaar oud is. Ek het spesiaal met Martin Venter, Meesterkannonier van die Suid-Afrikaanse Kannonier Vereninging, gereël om met sy miniatuur-kanon x10 skote agter op die sportveldjie ten aanskoue van ons leerders en personeel te kom afvuur ter herdenking van ons 100ste bestaansjaar. Elke skoot het 10 jaar verteenwoordig. Hy het ook sy kennis rakende al die geskiedkundige kannonne in Suid-Afrika met ons gedeel en die leerders het dit baie interessant en leersaam gevind.
Feesvieringe is verder die aand voortgesit met heerlike samesyn van ouers/voogde en vriende van die skool tydens ons 100 + 1 Feesvieringe. Vanaf 18:30 kon ons ouers/voogde deur die skool se gange stap om die spog kunsuitstallings van die leerders se kunswerke wat die 100 jaar se geskiedenis en ryk tradisies van die skool uitbeeld, te besigtig. Smaaklike etes is ook die aand voorsien en groot opgewondenheid het onder ons ouers/voogde geheers om weer ‘n slag lekker saam te kon kuier. Baie dankie aan Marinda wat die afgelope 2 jaar agter die skerms die feesvieringe en ‘n spogstuk van ‘n feesboek beplan het. Graag wil ek die OOV, onder leiding van Ria Hertzog hartlik bedank vir die puik reëlings vir die spesiale geleentheid. Baie dankie ook aan Stephanie le Roux wat kom hand bysit het om te verseker dat alles klopdisselboom verloop tydens die spesiale okkasie.
Laat my dan ook toe om almal te bedank vir my mooi verjaarsdagwense, boodskappe en geskenke. Die personeel, prefekte en die leerders het my tot in die afgrond bederf. Ek is so bevoorreg, want elke Jannie het vir my ‘n spesiale verjaarsdagkaartjie gemaak met ‘n verjaarsdagwens – dit is so kosbaar! Ek sal die spesiale dag nooit vergeet nie. Vrydag, 28 Januarie, was nie net my verjaardag nie, maar het ook gepaard gegaan met die Jannies Jooldag. Die Jannies was omtrent in die 7de hemel met al die pret-aktiwiteite op die spyskaart en het seker gedink dit is deel van die skoolhoof se verjaardag.
Hierdie week het ons buitemuurse program ook afgeskop om ons leerders vir die somersportkodes voor te berei. Ongelukkig het die weer nie op Woensdag, 2 Februarie, so lekker saam gespeel nie en is van ons tenniswedstryde ongelukkig gekanselleer as gevolg van die ongure weer. Die koeler en nat weer na die naweek en Maandag se hittegolf het egter ‘n groot lafenis vir mens en dier gebring.
Op Dinsdag, 1 Februarie, het Benita Smit (Hoof van Grondslagfase) vir die Grondslagfase ‘n pragtige boodskap rakende die korrekte gebruik van woorde in jou daaglikse kommunikasie met mense aan die die Grondslagfase leerders (Gr. 1 – 3) gebring. Skynbaar praat vrouens sowat 18 000 woorde per dag en mans slegs sowat 6 000. Ek weet ek beweeg nou op ‘n gevaarlike terrein! Kinders gebruik tussen 3 000 en 7 000 woorde per dag en dit is waar sy ons leerders aanraai om eerder positiewe woorde te gebruik as afbrekende woorde. Moenie woorde onnodig op ‘n destruktiewe wyse mors nie, maar eerder as opbouend – dit bring baie meer vreugde. Kom ons dink voor ons praat, want soos hulle sê: dit is baie keer nodig om eerder jou mond toe te hou sodat jou brein kan asemskep. My ma het my geleer: “Jy kan dink wat jy wil, maar jy kan nie altyd sê wat jy wil nie.”
Ons is so dankbaar dat dit baie beter met Kolya gaan aangesien hy uit die hospitaal ontslaan is en nou by die huis aansterk. Ons glo en vertrou hy sal binnekort by ons kan aansluit. Sy klasmaats mis hom baie en hulle glo dat hy sommer vinnig op die been sal wees.
Graag sluit ek af met die volgende woorde: “Woorde kan seer maak, heelmaak, saakmaak ….. Dink mooi voor jy praat!
Geniet die naweek!
Vriendelike groete
Naas Beets
SKOOLHOOF
Leerders van graad 4 tot 7 is welkom om op 26 Februarie saam met ons ‘n roete in die berg te gaan stap! Hou jul e-pos dop vir ‘n Google Form wat volgende week uitgaan vir meer inligting en om aan te dui of julle saam wil stap.
Indien julle voorstelle het vir lekker roetes, kliek HIER om ons te laat weet, ons sal julle insette waardeer.
Dinsdag, 1 Maart is dit fotodag.
Die volgende foto’s sal geneem word:
- Individuele foto’s
- Boetie- en sussie foto’s
- Beheerraadfoto
- Biblioteekmonitors
- Suidoosterredaksie
- OOV
Reëlings:
- Kleredrag: Leerders dra hul gewone wit JvR-skoolhemp (plat kraag met wapen op die sak) met hul grys kortbroek en donkerblou rompie, wit en grys sokkies met skoolskoene.
- Daar sal GEEN LO-lesse op hierdie dag wees nie.
- Leerders moet asb. betyds wees. Ons begin reeds om 08:00 met die foto’s.
- Maak asb. seker dat jou kind(ers) se hare en naels netjies en skoon is.
Kan julle glo, vandag is dit reeds die 2de week nadat die skool sy deure vir die akademiese jaar geopen het. Tyd vlieg ongelooflik vinnig verby. Roetine word weer stadig maar seker deel van ons leerders se daaglikse lewe en dit is verblydend om die stralende gesiggies te sien wat soggens by die skool opdaag.
Vandag is ‘n baie spesiale dag, want vandag is dit Jannies Jooldag om die 100 + 1 bestaansjaar van ons trotse skool te vier. Die pandemie het ons feesvieringe in 2021 totaal bederf, maar vandag beplan ons om die spreekwoordelike rooi tapyt uit te rol wat verskeie pret aktiwiteite insluit om ons Jannies te bederf. Aktiwiteite sluit in waterglyplank, “putt-putt”, hindernisbaan en sportkaskenades vir die gronslagfase leerders terwyl die Graad 4 tot 7-leerders met swemkaskenades, balspeletjies, sportkaskenades, toutrek en “minute to win it” vermaak gaan word. Ek glo die Jannies gaan hul gate uit geniet en hou gerus die JvR-Kiek dop vir foto’s. 100 + 1 Feesvieringe vir ouers/voogde geskied dan op Maandag, 31 Januarie, vanaf 18:00 by die skool met ‘n spog kunsuitstalling van die leerders se kunswerke wat die 100 jaar se geskiedenis en ryk tradisies van die skool uitbeeld. Moet asseblief nie die spoggeleentheid misloop nie.
Volgende week skop ons met die buitemuurse program af. Ek doen ‘n beroep op al ons leerders om aan al die sport- en kultuuraktiwiteite deel te neem. Ons weet almal dat buitemuurse aktiwiteite fiksheid, konsentrasie, deursettingsvermoë, dissipline, spierontwikkeling en samehorigheid ontwikkel.
Baie dankie aan ons ouers wat so getrou die afgelope week die ouerinligtingsaande bygewoon het. Graag daag ek julle uit om aktief betrokke by jou kind se skoolwerk te wees. Betrokke ouers verbeter hul kind se skoolprestasies en die kinders voel akademies meer bekwaam. Belê in jou kind se toekoms deur tyd te maak met jou kind rakende sy/haar skoolwerk. As skoolhoof verstaan ek die waarde wat betrokke ouers se waarde is. Onthou dat my deur altyd oopstaan.
Vandag is dan ook my 2de verjaardag by die skool wat dié dag nog meer spesiaal maak. Ek is egter bekommerd dat die leerders dink die spesiale Jooldag is deel van my verjaardag, want dan skep dit ‘n verwagting dat die pret aktiwteite elke jaar op my verjaardag gaan geskied.
Op Dinsdag, 25 Januarie, het ons weer met normale saalbyeenkomste begin wat voorheen met die pandemie nie moontlik was nie. Dit was dan my voorreg om die Intersenfase leerders (Gr. 4 – 7) en personeel toe te spreek. My boodskap het oor dankbaarheid gehandel. Volgens die HAT is dankbaarheid die gevoel van waardering wat ‘n mens tevredenheid gee. Ek versoek ons hele skoolgemeenskap om te probeer om met meer dankbaarheid te leef, veral met die lesse wat die pandemie wat ons die afgelope tyd geleer het. Ek glo verder dat dankbare mense gelukkige mense is en gelukkige mense is diensbaar tot die mensdom. Kom ons maak ‘n gewoonte om mense te bedank, want om dankie te sê is ‘n erkenning aan die mensdom.
Ons is so dankbaar dat dit baie beter met Kolya gaan aangesien hy nie meer in die Hoë Sorgeenheid van die hospitaal is nie. Ons bid vir sy spoedige en volkome herstel.
Graag sluit ek af met die bekende aanhaling van Mary Davis:
“The more grateful I am, the more beauty I see.”
Geniet die naweek!
Vriendelike groete
Naas Beets
SKOOLHOOF
Ons kan uiteindelik Maandagaand, 31 Januarie, ter viering van ons skool se 100 + 1 verjaardag lekker saam kuier. Ons (slegs ouers/voogde en onderwysers) ontmoet mekaar stiptelik om 18:00 in die skoolsaal waarna kos en drankies buite die saal beskikbaar sal wees. Ons sal die koskaartjies (soos deur Karri bestel) vanaf 17:30 voor die saal beskikbaar hê. Dit verseker dat dit nie verlore raak nie. Die kunsuitstalling is dwarsdeur die skool. Jy is welkom om teen jou eie tyd rustig daarna te kyk.
Indien jy onseker is hoe om die skool se algemene kalender en/of die Gr.4-7 taak-en toetsrooster kalenders met jou eie kalender te sinchroniseer, volg die gepaste skakel hieronder (ook beskikbaar aan die bokant van ons webtuiste). Volg dan die instruksies in die grys blokkies wat op jou van toepassing is.
Algemene kalender
Graad 4 taak- en toetsrooster
Graad 5 taak- en toetsrooster
Graad 6 taak- en toetsrooster
Graad 7 taak- en toetsrooster
Indien jy steeds nie regkom nie en graag die kalender op jou selfoon/rekenaar se kalender wil hê, stuur gerus ‘n e-pos na suzaan@jvrprim.co.za.
Kan jy goed organiseer? Wil jy graag help om die lewe makliker en lekkerder vir almal by Laerskool Jan van Riebeeck te maak of het jy ander eienskappe wat ons by die OOV nodig het?
Kontak asb. vir Ria Hertzog (oov@jvrprim.co.za of 082 320 3288) as jy bereid is om op die OOV te dien of met enige vrae.
Ons is so dankbaar dat skole vanjaar hul deure kon oopmaak soos beplan sonder dat die pandemie die laaste sê het. Groot opgewondenheid het geheers en hoë vlakke van positiewe energie was tasbaar op Woensdag, 19 Januarie, met die opening van ons trotse skool. Die Burger en Maroela Media het ook spesiaal ons Graad 1’s kom afneem terwyl die prefekte al die nuwe leerders ontvang het om die eerste skooldag van die leerders en hul ouers meer spesiaal te maak. Laat my ook toe om al ons nuwe ouers by Huppelland en die Laerskool te verwelkom. Wees verseker julle het die beste keuse vir jul kind gemaak en my beste wense vergesel julle vir die nuwe reis.
Ek wil julle verseker dat ons personeel slaggereed is om 2022 vir ons leerders baie spesiaal te maak. Ek glo julle het ook ‘n heerlike vakansie geniet, kosbare tyd saam met familie spandeer en die spreekwoordelike ‘batterye’ herlaai is om die nuwe jaar aan te pak.
Die pandemie het vir die afgelope 2 jaar verwoesting gesaai en ons is deur die virus geaffekteer of geïnfekteer. Graag wil ek die skoolgemeenskap komplimenteer wat tydens die moeilike tye weereens sy veerkragtigheid getoon het. Baie dankie dat ons mekaar kon inspireer en onderskraag om die uitdagings op ‘n kreatiewe wyse te bowe te kom. Ons moet nog steeds voortbou en uitreik na gemeenskappe wat swaar deur die pandemie geraak is.
Weens die feit dat die pandemie ons 100ste bestaansjaarvieringe verlede jaar in die wiele gery het, beplan ons om vanjaar beslis 100 +1 se feesvieringe te geniet. Op Vrydag, 28 Januarie, skop ons met 100 + 1 Jooldag vir die leerders af. Op Maandag, 31 Januarie, is dit die ouers/voogde se beurt om die ryk tradisies van 100 + 1 saam te vier. Hou gerus die Karri-toep dop om vroegtydige bestellings vir heerlike kos te plaas. Volledige programme volg.
Laat my ook toe om Lousie Neser, die nuwe hoof by Huppelland, by ons te verwelkom. Mag sy die nuwe fase in haar lewe geniet en Huppelland van krag-tot-krag neem.
Ter voorbereiding vir die jaar het ons personeel op Maandag, 17 Januarie, ‘n insiggewende opleidingssessie en praatjie van Lynette Beer oor die Vierkleur Temperament-Model bygewoon. Hierdie model help ongelooflik baie om jou eie en ander mense se temperament te verstaan wat instrumenteel tot beter menseverhoudinge is. Sy het ook op die liefdestale gefokus en ons bewus gemaak dat mense op sekere maniere reageer namate die manier waarop daar gekommunikeer word. Dis natuurlik waardevolle kennis aangesien ons dit direk met die leerders in ons skool kan toepas. “Google” haar gerus, dit is die moeite werd! Ons poog om voortdurend gefokusde opleiding aan ons personeel te bied om te verseker dat die standaard en kwaliteit van onderrig uitmuntend bly.
Ons nuwe ouerhandleiding het ook sy verskyning gemaak. Elke gesin sal ‘n kopie ontvang en graag wil ek Suzaan Burger vir die spogstuk bedank. Die ouerhandleiding bevat alle inligting wat jy benodig rakende ons skool en sy aktiwiteite. Dit is ook op die webtuiste beskikbaar.
Op ‘n hartseer noot versoek ek jul gebede/gedagtes vir die Paschke-Bos gesin. Van die gesinslede was Dinsdag, 18 Januarie, in ‘n motorongeluk betrokke waartydens hul geliefde ouma gesterf het en Kolya (vanjaar Gr. 6) ernstige beserings opgedoen het. Kolya is tans in ‘n stabiele toestand in die Rooikuis-Hospitaal waar hy ‘n operasie ondergaan het. Ons dink aan die familie tydens die moeilike tyd en bid dat Kolya spoedig sal herstel.
Hiermee sluit ek dan af en wens vir jul almal ‘n voorspoedige jaar vol vreugde toe en mag ons stelselmatig terugkeer na ‘n tipe normaal waar ons weer voluit kan leef.
Geniet ‘n wonderlike naweek!
Vriendelike groete
Naas Beets
Skoolhoof
Program:
Woensdag, 19 Jan. – Skool begin
- Graad 1-ouers is welkom om hul kind na hul klas te vergesel. Foto’s is welkom. Die Burger en Maroela Media sal hier wees om foto’s, met toestemming van ouers/voogde, te neem.
- Oorspronklike skooltye sal gehandhaaf word soos voor Covid: soggens 07:45 en smiddae Maandag tot Donderdag: Gr. 1-2 – 13:12 ; Gr. 3 – 13:41 ; Gr. 4-7 – 14:10
Vrydag: Gr. 1-2 – 13:09 ; Gr. 3 – 13:34 ; Gr. 4-7 – 14:00 - Klerebanktye:
– 07:20 tot almal gehelp is
– 13:30 tot almal gehelp is, maar nie later as 15:30 nie
Verkose aankoopmetode is aanlyn.
Items word gepak sodra beskikbaar en word afgelewer by jou kind. - Nasorg begin
- Ouerhandleiding: Elke jongste en enigste ontvang 1 kopie per gesin.
- Algemene vervoerbeleid word aan elke leerder uitgedeel om onderteken te word.
- Snoepie is oop, maar etes is nie beskikbaar nie. Slegs broodjies sal te koop aangebied word. Etes sal weer vanaf Maandag, 24 Jan., beskikbaar wees.
Donderdag, 20 Jan.
- Klerebanktye:
– 07:20 tot almal gehelp is
– 13:30 tot almal gehelp is, maar nie later as 15:30 nie
Verkose aankoopmetode is aanlyn.
Items word gepak sodra beskikbaar en word afgelewer by jou kind.
Vrydag, 21 Jan. – Stuur Algemene vervoerbeleid terug skool toe.
Dinsdag, 25 Jan. – Gr. 1 en 2-ouerinligtingsvergadering in registerklasse om 18:00-19:00.
Woensdag, 26 Jan.
- Gr. 3 en 4-ouerinligtingsvergadering in registerklasse om 18:00-19:00
Donderdag, 27 Jan.
- Gr. 5 en 6-ouerinligtingsvergadering om 18:00-19:00.
- Gr. 7-onderwysers sal in hul klasse beskikbaar wees (18:00-19:00) indien gesprek of ontmoeting verlang word. Inligtingsessie is reeds Nov. 2021 gehou.
Vrydag, 28 Jan.
- Jannies Jooldag (LS JvR 100 + 1) – pretdag vir leerders in skooltyd.
- Kleredrag: Feeshempie en donkerblou broekie (volledige inligting volg in Vr. se nuusbrief)
Saterdag, 29 Jan. – Lead4Life by skool vir Leerderraadslede
Maandag, 31 Jan.
- Skool se verjaardag! Onderwysers en ouers/voogde vier 100+1! Sien uitnodiging op Karri-toep.
- Algemene gesprek om 18:00 in skoolsaal. Kunsuitstalling dwarsdeur skool en ete (Foodtruck) sal daarna volg.
- Somerbuitemuurse program (sport en kultuur) begin.
*Neem asb. kennis dat skoolfondsrekeninge voor einde Januarie uitgestuur sal word met volledige inligting rakende musiek- en nasorginligting daarop aangedui.
