Kategorie: Algemeen

Hierdie sessie word gratis vir graad 5 – 7 leerders tydens skoolure aangebied. Ouers kan R50 op Karri betaal om dit op 10 Mei om 18:00 by te woon.

 

Beste Ouers/Voogde

Met die einde van 2021 se dolheid, het ons nooit die strategiese vraelys se opsomming aan julle kommunikeer nie. Baie dankie vir julle deelname – dit is lekker om sulke gemoedelike en oop kommunikasie met ouers te hê.

Hier is dit nou: Ons is vreeslik bly om te kan sê ons kinders is steeds gelukkig in die skool en dat ons ouers veral tevrede was met hoe die pandemie hanteer is. Dit is veral verblydend dat ouers nie bekommerd is oor hul kinders se akademiese vordering nie – ten spyte van die pandemie.

Daar is egter ‘n paar kwessies wat die skoolbestuur se aandag getrek het en waaraan die skoolbestuur reeds aandag gee:

• Die skoolroosterkompleksiteite verhoed dat daar meer tyd gewy kan word aan isiXhosa – nietemin gaan ‘n nuwe aksieplan geloods word. Ander vakke soos kodering, kuns en drama word ook afgeskeep – dit word ook in ag geneem.
• Diversiteit en geloofsblootstelling aan ander gelowe is volgens heelwat ouers problematies. Ten spyte van goeie vordering wat meer diverse personeel-aanstellings betref, het die pandemie ander inisiatiewe gekortwiek. Daar is planne vir die komende jaar en ouers wat by sulke inisiatiewe betrokke wil raak, moet asseblief hul hand opsteek om deel te word van die diversiteitskomitee – kommunikasie sal eersdaags via die nuusbrief versprei word. Tegelykertyd is ons vrywillige en buite-skoolure groep Jannies vir Jesus weer volstoom aan die gang.
• Ouers het aangedui dat kommunikasie rondom nie-akademiese probleme soms moeilik is. Registeronderwysers bly die eerste kontakpunt. As jy steeds nie tevrede is nie, kontak asseblief ons skoolhoof Naas Beets.
• Sommige ouers blyk verward te wees rondom presies watter aktiwiteite die skool aanbied. Alles is in die ouerhandleiding, die nuusbrief asook die webwerf beskikbaar. Kontak asseblief die registeronderwyser as jy in die donker is.
• Boeliegedrag is vir die skoolbestuur ‘n netelige kwessie omdat daar reeds goeie sisteme in plek is om dit so bes moontlik te hanteer. Sien asseblief ons boeliebeleid op die webwerf. Ons wil ouers aanmoedig om dadelik kontak te maak met hul klasonderwysers sodra daar enige boeliegedrag bespeur word.
• Die gebruik van Google Classroom was tydens die pandemie ‘n lewensredder, maar deesdae is ouers verward oor hoe dit gebruik moet word. Graadhoofde sal met elke graad kommunikeer presies oor hoe die tegnologie gebruik word en hoe dit leerders raak.
• Onderwysers is van nuuts af versoek om huiwerige leerders aan te moedig om te kom gesels as hul nie werk verstaan nie. Daar is ook sowat twee jaar gelede besluit om sekere vakke se vraestelle (Afrikaans, Engels en Wiskunde) vanaf Graad 4 vir ouers huis toe te stuur (dit geld vir toetse en die Junie-eksamens). Hierdie antwoordstelle moet deur ‘n ouer/voog onderteken word en dan weer terug skool toe gestuur word. Alle ander vraestelle kan by oueraande besigtig word en ouers is uiteraard welkom om enige tyd onderwysers te kontak as hul onraad vermoed. Ouers/voogde moet tegelykertyd vrymoedigheid neem om te eniger tyd met onderwysers te skakel.
• Wat infrastruktuur betref, bly die op-en-aflaai ‘n beslommernis. Ouers moet asseblief onthou om so gou moontlik deur die area te beweeg en stadig te ry. Infrastruktuur is hoog op die bestuur se agenda. Ons sal deurlopend daaroor kommunikeer.
• Kliek HIER vir die opsomming van die strategiese vraelys.

Ons sien uit na ‘n goeie verdere 2022 saam met julle!

Beste wense,
Die Skoolbestuur

Vandag heers daar groot opwinding by die skool, aangesien skole vandag in die Wes-Kaap vir ‘n kort, maar welverdiende vakansie sluit. Kwartaal 1 was propvol verskeie sport-, kultuur- en pretaktiwiteite geskeduleer. Vir die eerste keer in 2 jaar kon ons Jannies weer aan somersportwedstryde, byeenkomste, galas en konserte deelneem waar ouers, voogde, oumas en oupas teenwoordig kon wees. Ons kernbesigheid, naamlik Akademie, het beslis nie stil gestaan nie en daar is sommer hard in die klasse gewerk om die nodige doelwitte vir die kwartaal te bereik. Vandag ontvang al ons leerders ‘n rapport waarin daar erkenning vir hul harde werk en toewyding gegee word. Graag wil ek al die Jannies en die opvoeders wat onderskeidelik so getrou en hard gewerk het, hartlik gelukwens met die puik akademiese uitslae. Ek is so trots en ‘n dankbare skoolhoof van die puik skool!

Laat my dan ook toe om die volgende Gr.7-leerders (alfabeties) hartlik geluk te wens met die aankondiging van die Top Tien Akademiese Presteerders vir kwartaal 1 tydens vanoggend se saalbyeenkoms:

• Lara Basson
• Lea Basson
• Liza Hitge
• Adelé Holtzhausen
• Luja Marx
• Kate Mouton
• Elsabé Scholtz
• Cara Swanepoel
• Nell von Lieres
• Owen Wiese

Ahoewel die laaste week van die kwartaal slegs 4 dae lank was, het daar die volgende klompie pretaktiwiteite plaasgevind:

• Op Dinsdag, 22 Maart 2022, het die grondslagfase leerders ons heerlik in die saal tydens die Gr. 1 – 3 musiekkonsert vermaak. Baie dankie aan al die ouers, voogde en grootouers wat hul kosbare tyd afgestaan het om hul kinders/kleinkinders tydens die vrolike musiekkonsert te ondersteun. Ons leerders is so talentvol, vol selfvertroue en nie eers die groot verhoog en gehoor kon hulle intimideer nie.

• Op Woensdag, 23 Maart 2022, het ons Graad 1’s die ikoniese Tafelberg besoek en hul gate uit geniet terwyl hulle en die opvoeders die pragtige uitsig van bo-op die berg oor ons pragtige Moederstad aanskou het.
• Op Donderdag, 24 Maart 2022, was dit weer die kwartaallikse markdag en kon leerders hul entrepreneurskapvaardighede gebruik terwyl daar aan heerlike eetgoed gesmul is.
• Wintersportvaardigheidsklinieke: Is vanaf 22 – 24 Maart in skooltyd aangebied. Die leerders het dit terdeë geniet.

Verlede Donderdagaand, 17 Maart, kon die Gr. 5 – 7-leerders ook vir die eerste keer na ‘n lang tyd weer ‘n sokkie in ons skoolsaal bywoon. Ons Jannies het omtrent uitgehaal met hul kleredrag en het spoggerig by die skool opgedaag, gereed vir die groot partytjie.

Graag wil ek die personeel hartlik bedank vir hul harde werk, passie en toewyding die afgelope kwartaal. Kwartaal 1 word gekenmerk as ‘n baie besige kwartaal wat dan ook die modus operandi vir die res van die jaar bepaal. Baie dankie dat julle altyd bereid is om die spreekwoordelike ekstra myl te loop tot voordeel van ons Jannies. Suksesvolle skole word gekenmerk deur aktiewe ouerbetrokkenheid en ‘n effektiewe Beheerraad. Dus wil ek vir julle as ouers/voogde hartlik bedank dat julle altyd die belange van ons skool op die hart dra. Groot dankie aan Merwe Schotz (Voorsitter van die Beheerraad) en die Beheerraadslede vir hul kosbare tyd en insiggewende insette tydens die kwartaal om te verseker dat Laerskool Jan van Riebeeck van krag-tot-krag gaan.

Ek sluit af en hiermee wens ek vir julle ‘n lekker ontspanne vakansie toe en indien jullie reis, wees asseblief veilig. Ek sien uit om almal weer op Dinsdag, 5 April, terug te verwelkom wanneer die skool vir kwartaal 2 heropen.

My aanhaling vir die vakansie deur Eleanor Browne:
“Rus en selfversorging is so belangrik. As jy tyd neem om jou gees aan te vul, kan jy ander met oorloop bedien. Jy kan nie uit ‘n leë houer dien nie.”

Vriendelike groete

Naas Beets
SKOOLHOOF

• Die leerders het reeds hul fotokoeverte ontvang.
• Vul asb. alle besonderhede op die koevert in en stuur dit terug skool toe.
• Leerders kan die koevert(e) inhandig by hul registeronderwyser.
• Foto’s kan nog nie aanlyn bestel word nie. Verdere inliging hieroor sal later deurgegee word.
• Laaste dag vir fotobestellings d.m.v. die koevert is Donderdag, 21 April.

Ons wil julle graag aanmoedig om die advertensies aan die onderkant van die nuusbrief dop te hou. Daar is weekliks nuwe advertensies en sluit gereeld privaat buitemuurse sportaktiwiteite of kultuurgebeurtenisse in.

Persone wat graag iets in die nuusbrief wil adverteer, kan ‘n e-pos stuur aan suzaan@jvrprim.co.za .Dit kos R150 om ‘n advertensie vir ‘n week op ons webtuiste te laai en een keer in die nuusbrief te laat verskyn.

Markdag vind op Donderdag, 24 Maart, plaas. Dit kos R15 om ‘n tafel te beman. Besprekings vir ‘n tafel sal later vandag op die Karri-toep tot en met Woensdag 12:00 gemaak kan word. Leerders is verantwoordelik vir hul eie kleingeld. Die markie sal vanaf 09:30 tot 10:00 bedryf word.

Neem kennis van die volgende:

• Maandag – vakansiedag
• Dinsdag – skool verdaag vroeër

12:45 (Gr.1 – 3)
13:00 (Gr.4 – 7)

• Woensdag – normale skooldag
• Donderdag – skool verdaag vroeër (+ sivvies)

13:00 (Gr.1 – 3)
13:15 (Gr.4 – 7)

• Vrydag – skool sluit (+ sivvies)

10:30 (Gr.1 – 3)
10:45 (Gr.4 – 7)

* Die bus vertrek altyd 5 minute na graad 4 – 7 verdaag word.

Johan Symington het onlangs aan hierdie jaar se eerste Wes-Kaap .22 SA Precision Rifle kompetisie in Atlantis deelgeneem en uitstekend gevaar. Gedurede die kompetisie skiet deelnemers met .22 kaliber gewere vanaf verskeie praktiese posisies na “gongs” op afstande wat wissel tussen 40m en 200m.

Hy het nie net die hoogste telling van die jong skutte behaal nie, maar ook die algehele hoogste telling van die sowat 62 skutte op die dag geskiet – selfs beter as sy eie pa!

Baie geluk, Johan!

Ons wil baie graag weer vanjaar Kaapstad se Lions Club help om paaseiers in te samel vir minderbevoorregte kinders. Dit sal wonderlik wees as elke leerder minstens een paaseier vir ons kan bring en dit in die emmer wat in Adri se kantoor staan, kan plaas. Hulle verkies die eiers wat die malvalekker aan die binnekant van die sjokolade het. Dit kom ook in ‘n string van vier of in verpakkings van 24 en meer. Ons wil vra dat die paaseiers voor of op Woensdag, 23 Maart, skool toe gebring word.

Hierdie week sluit ons met die besige somersportprogram af waartydens baie sportwedstryde plaasgevind het. Volgende week begin ons met wintersport. Verskeie wedstryde en sportdae is vir kwartale 1 en 2 geskeduleer. Ek kan net soos julle nie wag om ons sportspanne aan te moedig nie.

Vrydag, 4 Maart, het ons die jaarlikse junior swemgala aangebied. Selfs die weer het op dié spesiale dag mooi saam gespeel met toeskouers wat luidkeels ons Grondslagfase swemmers toegejuig het. Graag bedank ek ons ouers/voogde wat tyd afknyp om hul kind(ers) tydens sportaktiwiteite te ondersteun. Al wys die kinders dit nie, is julle teenwoordigheid tydens sportbyeenkomste kosbaar vir hulle. Baie dankie ook aan almal wat die klasbraai op Vrydagaand, 4 Maart, bygewoon het. Die lekker kuier en gesellige samesyn is kosbaar en ‘n tradisie wat ons vir nog lank sal omhels.

Die afgelope week was die fokus primêr op ons kernbesigheid, naamlik akademie. Grondslagfase het die eerste week van hul assesseringsweek suksesvol voltooi terwyl die intersenfase elke Vrydag tydens toetsperiode hul assessering vir die kwartaal aflê. Ek maak graag van die geleentheid gebruik om die opvoeders hartlik te bedank vir die handhawing van hoë akademiese standaarde. Die hoeksteen van ons suksesvolle kurrikulumbestuur sluit onder andere assesserings in wat deeglik beplan en opgestel word. Daarna volg dit ‘n effektiewe modereringsproses en elke formele assessering word deur my afgeteken. Laerskool Jan van Riebeeck was nog altyd bekend as ‘n skool wat se hoë akademiese standaarde ononderhandelbaar is en op hierdie manier van ander skole onderskei word. Baie dankie dat julle jul kinders tydens die assesseringsweke en deurlopede assessering ondersteun.

Op Dinsdag, 8 Maart, het Juffrou Michelle vir ons Grondslagfase ‘n insiggewende en praktiese boodskap oor ons waarde van die maand, naamlik Omgee tydens ons weeklikse saalbyeenkoms gelewer. Tydens die saalbyeenkoms het ons ook vir die eerste keer pragtige sertifikate vir die ‘Jannies van die Week’ oorhandig. Hierdie inisiatief is deur juffrou Nicola geïnisieer om ons Grondslagfase-leerders erkenning te gee wat werklik ons kernwaardes daagliks uitleef sonder dat die juffrouens dit vra. Trots het die volgende leerders saam met my op die verhoog verskyn:

• Noa Rademan
• Jan-Jurie Fourie
• Kitty Partner
• Christopher Hoffman
• Cailyn Visser
• Damian Daniels
• Julia Schincariol
• Louis Greeff-Cronjé

‘n Dringende versoek rig ek graag aan ieder en elk: Kyk mooi na jou skool- en sportklere asook persoonlike besittings wat skool toe gebring word. Indien jou kind met ander kinders se tasse, klere, ens. by die huis opdaag, stuur dit asseblief die volgende oggend reeds saam met hom/haar terug skool toe (verlore goedere). Die meeste van ons leerders se klere en persoonlike items is gemerk. Baie dankie vir jou samewerking in die verband.

Laat my asseblief toe om spesiaal vir Sophia Liebenberg (gr. 7) sterkte toe te wens vir môre se Wes-Kaap Atletiekbyeenkoms in die Paarl. Sophia is ons enigste leerder wat vanjaar WP Klere vir atletiek verwerf het en sy gaan môre aan verspring en spiesgooi deelneem. Sophia, ons is baie trots op jou! Sterkte ook aan ons o/13A-rugby- en netbalspanne wat die naweek aan die Bulfeestoernooi te Porterville deelneem.

Ek sluit dan af met die volgende aanhaling rakende die skool se waarde van die maand, naamlik OMGEE:

“Te dikwels onderskat ons die krag van ‘n glimlag, vriendelike woorde, ‘n oor wat luister, ‘n opregte kompliment, of die kleinste bietjie omgee, alles wat die potensiaal het om iemand se lewe heeltemal te verander.”

Geniet die naweek! 

Vriendelike groete

Naas Beets
SKOOLHOOF

Ons wil graag alle graad 7-ouers/voogde aanmoedig om so gou as moontlik vir hoërskole vir 2023 aansoek te doen. Alle aansoeke moet deur die Wes-Kaapse Department van Onderwys se aanlynstelsel gedoen word en aansoeke kan vanaf Maandag, 14 Maart, tot Vrydag, 15 April, ingedien word. Die stelsel sal jou toelaat om 3-5 skole van jou keuse aan te dui, maar onthou asseblief om jou aansoek met die nodige ondersteunende dokumentasie op te volg soos elke skool se toelatingsbeleid verreis. Besoek gerus die Departement se webtuiste hier om aansoek te doen.

Willem Vorster en Frank van der Walt is kranige Rubik-kubus spelers. Sondag, 6 Maart, was hulle beoordeelaars in ‘n SA-kompetisie wat plaaslik by Hoërskool Seepunt plaasgevind het en is deur speedcubes.co.za aangebied.

Dit was ‘n interessante dag met baie opwinding waar spelers van regoor Suid-Afrika verskillende kubusse opgelos het – 2×2, 3×3, 4×4, pyraminx en selfs 3×3 geblinddoek!

Dit is die twee se fokus om volgende keer self as spelers deel te neem.

Sien gerus verlede week se nuusbrief of kliek HIER vir die nuusbrokkie i.v.m. kwartaal 2 se twee dag stap in die Boesmanskloof.

• Almal wat saam stap, moet verkieslik al ten minste ‘n langerige dagstap vantevore gedoen het.
• Kinders onder 10 is welkom, mits hulle al ‘n stap gedoen het en jy seker is hulle sal nie halfpad moed opgee nie.
• Die bedrag betaalbaar sal binnekort op Karri gelaai word vir almal wat die vorm ingevul het. Jy sal op hierdie manier jou plek verseker.
• Kliek HIER vir die vorm.

Die geboorte van ‘n baba bly nou maar net ‘n wonderwerk.  Ons is baie opgewonde om die nuutste toevoeging tot ons Jannies-familie te verwelkom!  Baie geluk aan die trotste pappa en mamma wat verlede Woensdag, 2 Maart, hul babadogtertjie verwelkom het.  Ons weet dat sy sommer baie pret en vreugde aan die Hanekom-gesin sal voorsien.