Kategorie: Algemeen

Markdagverkope sal om 11:30 begin. Leerders sal direk na eerste pouse (10:30) kans kry om hul goed uit te pak en voor te berei. 

Tafels kan vanaf Maandagoggend, 20 Junie, om 08:00 op Karri teen R15 bespreek word (geen kontantbesprekings). Besprekings sluit Woensdag, 22 Junie, om 14:00. Geen lewende hawe of klappers mag verkoop word nie.

Die assesseringsreeks vir Grondslagfase en kontroletoetse (eksamen vir gr. 4 – 7) is in volle swang en voor die leerders dit besef is die eksamenstres verby en lê ‘n welverdiende vakansie voor om lekker uit te rus. Dit is verblywend om te sien hoe opgewonde ons leerders rakende die sportoefeninge wat tans tydens skooltyd plaasvind, is. Verseker help dit hulle om lekker te ontspan na afloop van ‘n uitdagende vraestel asook om hul konstante aandag van die studies en eksamen tydelike af te lei deur op iets anders te fokus.

Saterdagaand, 4 Junie, kon ons skool se opvoedingstrust sedert 2019 weer die gewilde veilingdinee aanbied wat nie die afgelope 3 jaar vir ons beskore was nie. Die suksesvolle maskerbal is in die historiese Mount Nelson Hotel aangebied. Die pragtige hotel aan die voet van die ikoniese Tafelberg is in 1918 pienk geverf om vrede te simboliseer. Die geskiedenis van die idilliese hotel met ons 100ste bestaansjaar maak die “Nellie” soos dit bekend staan, die perfekte venue. Dames is elegant in stylvolle aandrokke met gesigsmaskers geklee en die mans het deftig met hul aandpakke en strikdasse gepronk. Voordat die veiling afgeskop het, was daar 40 lotte stylvol uitgestal vir al die gaste om te besigtig waarop hulle kon bie. Die hotelsaal was pragtig versier en die dekorasies het die perfekte afronding verseker. Alles is haarfyn beplan en perfek uitgevoer om ‘n onvergeetlike aand van samesyn te bewerkstellig. Die veiling is deur MC. du Toit (gr. 1-ouer) hanteer en hy was instrumenteel tot die sukses van die veiling waartydens ‘n rekord opbrengs opgelewer is. Ek wil MC hartlik bedank dat hy altyd gewillig is om ons te help en dan moet ek ook noem dat hy beslis oor die kuns as ‘n meesterafslaer beskik.

Aan die stuur van die stylvolle en merkwaardige veilingsdinee was Coreen Scholtz, Esna Boshoff en Stephanie le Roux. Laat my toe om die drie dames saam met hul span spesiaal en hartlik te bedank vir al die harde werk agter die skerms en hul kosbare tyd om die sukses van die veilingsdinee te verseker. Ons ouers en gaste kan nie uitgepraat raak oor die fantastiese funksie nie. Dit was my en Sanelda se eerste veilingsdinee by Laerskool Jan van Riebeeck en dit was ‘n ongelooflike voorreg om as skoolhoof die funksie te kon bywoon. Baie dankie ook aan Oosie en Marianna wat die aand saam met ons bygewoon het en in die proses ‘n tafel vol van spesiale gaste (Vriende van die Skool) gemaak het. Die vriende van die skool ondersteun ons spogskool al vir jare en ons is dankbaar vir wat hulle al oor ‘n baie lang tydperk vir die skool gedoen het. Dit is dan vir my ‘n aangename voorreg om met julle te deel dat die veiling ‘n rekord bedrag op die aand gemaak. Meer as R1,673M vir 40 lotte is binne slegs 2 en half uur tydens die veiling gemaak. Dit spreek boekdele oor die gesindheid en karakter van ons skool- en ouergemeenskap. Groot dankie aan almal wat aan die veiling deelgeneem en hul beursies spreekwoordelike wawyd oopgemaak het om die rekord bedrag te kon insamel. Weer eens hartlike dank aan al ons borge, donateurs en ouers vir al die ruim skenkings en donasies. Graag deel ek dat Gerhard en Daneele Conradie ongelukkig nie die dinee kon bywoon nie, maar Gerhard het op Woensdag, 8 Junie, besluit om ‘n ruim bedrag te skenk sodat ons presies R2M wins kon maak. Gerhard baie dankie vir die ruim donasie! Die fondse wat tydens die veiling geïn word, sal terug geploeg word in die opgradering van die skool se vierkant.

Dankbaarheid is nog steeds deel van my tema, veral na afloop van die suksesvolle veilingsdinee en daarmee sluit ek dan af met die volgende bekende aanhaling: “Om dankbaar te wees sonder om dit te sê, is soos om ‘n geskenk toe te draai sonder om dit te gee”.

Geniet ‘n wonderlike naweek.

Naas Beets
SKOOLHOOF

Hoërskool Jan van Riebeeck nooi baie graag alle graad 7-seuns en hul ouers/voogde uit om saam met ons te kom kuier!

• Datum: Dinsdag, 14 Junie 2022
• Tyd: 16:30 – 18:00
• Plek: JvR-klubhuis, De Hooplaan, Tamboerskloof
• Drag: Gemaklik

’n Paar hoërskoolseuns wil graag ’n bietjie raakrugby saam met die gr.7-manne speel terwyl ons in die klubhuis nog enige ouervrae oor ons hoërskool beantwoord. Ons braai ook ’n boereworsrol vir elke seun en geniet iets te drinke saam met die ouers/voogde.

R.S.V.P. asseblief teen Maandag, 13 Junie, by skoolhoof@janvanriebeeck.co.za indien u en u seun hierdie geselligheid wil bywoon.

Groetnis.

Pieter Rademeyer
Skoolhoof

Beste Ouers en Voogde

Ons gaan die volgende twee weke gebruik om ons waarde vir die kwartaal, verantwoordelikheid, uit te leef. Die kleur wat ons aan die waarde koppel is, groen. Ons gaan verantwoordelik teenoor ons onmiddellike omgewing optree deur ons skoolterrein na pouse mooi skoon te maak.  Op hierdie manier bewys ons ook respek teenoor ons terreinpersoneel wat daagliks so hard werk.

Die onderskeie graadgroepe is ingedeel om op ‘n spesifieke dag ons skoolterrein skoon te maak. Die leerders kan ook op die spesifieke dag groen sivvies aantrek.

Sien asseblief op watter dag jou kind met groen sivvies skool toe mag kom:

• Graad 1 – Maandag, 13 Junie
• Graad 2 – Dinsdag, 14 Junie
• Graad 6 – Woensdag, 15 Junie (omgeruil met graad 3 a.g.v. Lead 4 Life)

Langnaweek

• Graad 4 – Maandag, 20 Junie
• Graad 5 – Dinsdag, 21 Junie
• Graad 3 – Woensdag, 22 Junie (omgeruil met graad 6 a.g.v. gr. 6 Lead 4 Life)
• Graad 7 – Donderdag, 23 Junie (maak skoon na markdag)

Indien julle van die vakansiedag-sorg gebruik wil maak, vul asb. die inskrywingsbrief in en stuur dit na die Nasorg of na die e-posadres wat in die brief gemeld is.

Ek glo julle sal saamstem dat kwartaal 2 tot op datum ‘n baie bedrywige, maar tog lekker kwartaal was. Dit is veral gekenmerk met verskeie sportwedstryde en -toernooie, kultuuraktiwiteite soos Eisteddfod, redenaars, kooroptredes en musiekkonserte, staptogte deur die Dapper Stappers en heerlike samesyn geleenthede soos die Kaperjolle en klasbraaie. Dit bring ons dan natuurlik by die assesseringsweke vir Grondslagfase en kontroletoetse (eksamen vir gr. 4 – 7) aan die einde van kwartaal 2 wat die week vir die gr. 1-3’s en 7’s afgeskop het en ons leerders moet egter weer agter die boeke inskuif.

Graag versoek ek julle om as ons opvoeders kollektief te help om die eksamenstres onder jul kind/ers te beperk en dit eerder as ‘n positiewe uitdaging onder jou kind/ers te promoveer. Ons samelewing en sosiale media het veroorsaak dat die druk om te presteer al groter en groter word. Kom ons wees eerlik, daar is bittermin mense wat uitsien na ‘n eksamen. Ek glo ook julle ken daai ‘hol’ gevoel op die maag voor jy ‘n eksamen gaan aflê. Ek besef ook dat jul as ouers saam met jul kind/ers ook moontlik eksamenstres kan ervaar. Dus deel ek ‘n paar handige wenke om te verhoed dat eksamenstres moontlik in jul huishouding kan handuit ruk:

• Moet asseblief nie jou kind/ers vir eksamens bang maak nie. Deur hulle byvoorbeeld te dreig dat indien hulle nie nou harder gaan leer nie, hulle sal druip. Dit werk nie, inteendeel dit maak kinders net meer angstig.
• Stel belang in jou kind/ers se voorbereiding en maak seker hulle berei betyds voor om angstigheid te vermy.
• Maak seker jou kind/ers leer by ‘n lessenaar en asseblief nie in of bo-op die bed nie.
• Navorsing toon dat veral laerskoolkinders nie te lank aaneen moet studeer nie, 20 – 30 minute op ‘n slag is ideaal. Dit is ook belangrik om gereeld blaaskanse te vat om die brein ruskans te gee om al die inhoud te verwerk.
• Maak seker dat jou kind/ers genoeg slaap kry, anders gaan hulle beslis nie optimaal in die eksamen funksioneer nie.

Verder wil ek ook noem dat die skoolbestuur besluit het dat ons leerders tydens die eksamen (Maandae tot Donderdae) in skooltyd (11:45 – 12:45) sal voortgaan met sportoefeninge. ‘n Volledige program ( 6 – 15 Junie) sal volg. Ek glo julle sal met my saamstem dat leerders na afloop van hul daaglikse eksamen ‘n bietjie oefening buite in die vars lug sal verwelkom. Leerders is dikwels angstig tydens eksamens en ek glo dat deur voort te gaan met sportoefeninge dit hulle sal help om die stresvlakke tydens eksamens te verlaag. Dit sal ook verder help om hul konstante aandag aan studies en eksamen tydelike weg te neem deur op iets anders te fokus.

Op Dinsdag, 31 Mei 2022, het ons seniorkoor tydens die saalbyeenkoms onder leiding van juf. Helecia en mnr. Ben opgetree. Hulle het twee liedere naamlik: “As jy staan op die maan” en “When Africa smiles” gesing. “When Africa smiles” is ‘n pragtige lied deur Jakkie Louw geskryf en Lara Basson het die trom gespeel. “As jy staan op die maan” is deur ‘n vriend van juf. Helecia geskryf. Sy naam is Alastair van Huyssteen. Juf. Helecia het dit verwerk, mnr. Ben het begelei en Adéle Holtshauzen het die viool gespeel. Alastair is ‘n prokureur van beroep, baie lief vir motors en skryf natuurlik liedjies. Hy het self die saalbyeenkoms bygewoon en sommer tussen die leerders gaan sit om die kooroptrede van sy liedjie te ervaar. Hy het ook na afloop van die saal met die seniorkoor gesels, hulle geloof vir die puik optrede en ook ‘n pragtige boodskap vir hulle gebring. Baie geluk en baie dankie aan ons seniorkoor wat ons so trots maak.

Op Woensdag, 1 Junie, het juffrouens Charlene en Mardry van die Engelse Huistaal departement my genooi om te kom luister na die Gr. 6’e se voordrag van gedigte uit die “Cats Musical”. Dit is nie sommer jou gewone Engelse gedigte nie, maar moeilike en komplekse gedigte wat geskryf is deur die bekende Engelse digter T.S. Elliot. Dit was ‘n ongelooflike ervaring en ek wens ek kon die hele skoolgemeenskap uitnooi om saam met my die ervaring in die saal te deel. Ek klink dalk soos ‘n platespeler wat vasgehak het, maar ons leerders is uiters talentvol in soveel opsigte en met die ondersteuning van passievolle opvoeders kan ons leerders nie anders as om hul volle potensiaal te bereik nie.

Saterdagaand, 4 Junie 2022, geskied ons skool se veiling by Mount Nelson Hotel nadat die pandemie dit vir 2 jaar onderskep het. Dit gaan my eerste ‘veiling-ervaring’ by die skool wees en ek en my vrou kan nie wag vir die spesiale geleentheid nie. Graag wil ek vir Coreen Scholtz, Esna Boshoff en hul span hartlik bedank wat hard agter die skerms gewerk het om die veiling moontlik te maak. Baie dankie aan al ons borge, donateurs en ouers vir al die ruim skenkings en donasies. Die fondse wat tydens die geleentheid geïn word, sal terug geploeg word in die opgradering van die skool se vierkant.

Dankbaarheid is nog steeds deel van my tema en daarmee sluit ek dan af met die volgende bekende aanhaling: “Omsoom jou seëninge met soveel dankbaarheid dat dit nie uitrafel nie”.

Geniet ‘n wonderlike naweek en sterkte aan al ons leerders en ouers vir die eksamentydperk.

Naas Beets
SKOOLHOOF

Die Jan van Riebeeck Gholfdag wat op Vrydag, 4 November, by die Royal Cape Gholfkub plaasvind, is byna vol bespreek. Daar is enkele plekke beskikbaar. Vir besprekings kontak vir Alet by 083 703 4433.

Ons is opsoek na ‘n kleinerige, baie netjiese tweedehandse tweesitplek rusbank wat ons in die opvoedkundige sielkundige se kantoor kan gebruik.
Indien jy beplan om huis mooi te maak, kontak gerus vir Marinda Brink: marinda@jvrprim.co.za

• Skool begin: 07:45
• Assessering gr. 1-3: 08:00 – einde van skooldag afhangend van sport vir die dag.
• Geen klasruilings sal plaasvind nie.  Musiekonderrig sal na afloop van die skryfsessies plaasvind.
• Eksamen skryfsessie vir gr. 4-7: 07:50 – 10:10
• Sport is reeds ingedeel sodat daar 3 oefensessies vir elke sportsoort (hokkie/netbal/rugby) in hierdie tydperk om 11:45 – 12:45 sal plaasvind.
• Leerders kan op oefendae met sportdrag skool bywoon.
• Skool eindig: gr. 1-3 om 13:00 en gr. 4-7 om 13:15
• Nasorg sal soos normaal voortgaan.
• Bus vertrek om 13:20

Woensdag, 1 Junie 

Graad 7’s verdaag vroeër: 13:15
Die res van die skool volg die tye van ‘n normale skooldag.

Donderdag, 2 Junie (eksamen begin vir graad 7)

Graad 7’s verdaag vroeër: 13:15
Die res van die skool volg die tye van ‘n normale skooldag.

Vrydag, 3 Junie – Woensdag, 15 Junie (eksamen vir graad 4 – 7 van 6 – 15 Junie)

Graad 1 – 3 verdaag om 13:00
Graad 4 – 7 verdaag om 13:15

*Bus vertrek om 13:20

*Skoolsport sal vanaf 11:45-12:45 plaasvind.  ‘n Spesiale rooster is saamgestel.

*Nasorg gaan voort.

In die vorige week se nuusbrief het ek na onder andere dankbaarheid verwys wat ons so dikwels miskyk, maar met my arrivering vroeg op ‘n bitterkoue Saterdagoggend, 21 Mei 2022, te Laerskool F.D. Conradie in die pragtige dorpie Prince Alfred Hamlet, het die gevoel van dankbaarheid my onmiddellik onarm.

Die idilliese landskap en die driehoekige wintersportdag by F.D. Conradie was presies wat ons as stadsjapies nodig gehad het. Hulle vriendelike ontvangs en gasvryheid van die platteland is kosbaar. Die koue oggend met wit gerypte sportvelde het soos die spreekwoordelike lelike eendjie in ‘n pragtige swaan van ‘n sonskyndag verander. Graag wil ek Mnr. Labuschagne, die skoolhoof van F.D. Conradie, sy personeel en ouers hartlik bedank vir die puik georganiseerde dag met smullekker eet- en drinkgoed wat vanaf vroegoggend beskikbaar was om die koue te verdryf. Ek het natuurlik heeltemal geswig onder die vars tuisgebakte plaasbrood met die heerlikste tuisgemaakte konfyte uit die kontrei. Baie dankie aan al ons ouers/voogde wat in groot getalle die spesiale dag ondersteun het. Die samenhorigheidsgevoel onder ons ouersgemeenskap is merkwaardig. Selfs ouers wie se kinders nie eers op die dag deelgeneem het nie, het spesiaal deurgery om die Jannies te ondersteun. Baie geluk aan ons spanne wat die dag so puik gevaar het. Die plattelandse skole het weer eens getoon dat hulle hoogs kompeterend is en nooit onderskat moet word nie. Ek glo ons Jannies het ook in die proses nuwe maats gemaak en ons ouers nuwe vriende.

Ek wil nie net in my nuusbrief oor sport praat nie, maar na afloop van die week se rugby, – hokkie- en netbalwedstryde, kan ek nie anders as om uit te lig hoe die standaard van sport die afgelope kwartaal ongelooflik verbeter het nie. Die beginsel is eenvoudig, want hoe meer jy as ‘n span wedstryde kan speel, hoe meer leer jy as ‘n span wat uiteindelik die span se prestasies sal verbeter. Saterdag se o/13A-netbalwedstryd teen F.D. Conradie was een van die hoogtepunte op die dag. Hierdie naelkou-wedstryd het ons o/13A-netbalspan se geduld, vermoë om druk te verwerk en spanwerk tot die uiterste beproef. Beide spanne het verdien om te wen, maar weens die feit dat ons span die afgelope tyd baie wedstryde gespeel het, kon ons die druk net eenvoudig beter hanteer en met die louere van 11 – 9 wegstap. Baie geluk, Juf. Ischké en span, met jul puik spelvlak en kameraadskap.

Woensdagmiddag se o/13A-rugbywedstryd teen Goodwoord Park sal ek vir ‘n baie lang tyd onthou, nie oor die uitslag of die groot getalle van ouers wat die middag kom ondersteun het nie, maar weens die feit dat ons teen ‘n heelwat fisies groter span ons man kon staan. Dit was amper die spreekwoordelike Dawid teen Goliat, maar mnr. André se span het karakter getoon en nie ‘n enkele tree terug gestaan nie. Harde duikslae is uitgevoer en ‘liggame is op die spel geplaas’ ter wille van die span om die wedstryd 17-0 te wen, was een van die beste rugbywedstryde wat ek in ‘n lang tyd gesien het. Baie geluk, seuns! Ek is baie trots op die wyse hoe julle gespeel en julle self op die veld gehandhaaf het.

Graag wil ek ds Marietjie Steyn van die Groote Kerk hartlik bedank vir die wonderlike Hemelvaartdiens wat sy op Donderdagoggend, 26 Mei, vanaf 07:15 – 07:45 tydens die Jannies vir Jesus-sessie gehou het. Baie dankie aan ons ouers wat ook die spesiale diens in die saal bygewoon het.

Laat my ook toe om Mia Smith (Gr. 6) hartlik geluk te wens met haar opname in die Tygerberg Kinderkoor. Haar inlywing het op Saterdag, 21 Mei, geskied en ons is saam met haar ouers baie trots op die besondere prestasie.

Ek sluit dan af met die volgende bekende aanhaling rakende dankbaarheid: “As jy geluk wil vind, vind eers Dankbaarheid”.

Geniet ‘n wonderlike naweek en sterkte aan ons o/11- en o/13-rugbyspanne en hul afrigters wat môre tuis vanaf 09:00 teen Laerskool Porterville speel. Baie dankie ook aan Juf. Suzaan wat ons Dapper Stappers oor die naweek op die Boesmanskloof-staproete tussen Greyton en McGregor vergesel.

Naas Beets
SKOOLHOOF