Kategorie: Algemeen

Ek voel vandag besonders geseënd en dankbaar weens die feit dat dit in alle opsigte relatief met die skool baie goed gaan. Ons kernbesigheid, naamlik akademie het weer onlangs met die bekendmaking van die 2021 WKOD se sistemiese uitslae bevestig dat ons baie trots kan wees op die akademiese standaard wat ons jaar in en jaar uit handhaaf. Effektiewe kwaliteitsbestuurpraktyke word gereeld hersien om te verseker dat ons Jannies kwaliteit onderrig en ondersteuning ontvang. Ons is werklik geseënd met passievolle opvoeders en ondersteuningspersoneel wat kollektief werk sodat ons Jannies hulle volle potensiaal kan bereik. Ons personeel loop die spreekwoordelike ekstra myl, want opvoeding is vir hulle ‘n passie eerder as ‘n beroep.

Die dankbaarheid loop ook verder oor as ek sien hoe goed dit met die skoolsport gaan, veral met die uitdagings as gevolg van die Covid-19 pandemie oor die laaste 2 jaar. Ek verwys nie net na die puik sportuitslae die afgelope tyd nie, maar ook na die ongelooflike deelname deur ons leerders aan al die geleenthede wat daar vir hulle geskep word. Ons leerders geniet die spansportaktiwiteite en raak skoon angstig as die weer begin dreig om oefeninge, wedstryde of toernooie in die wiele te ry. Sportkodes soos skaak en landloop is weer besig om momemtum te kry. Ek was aangenaam verras toe ek op Vrydagmiddag, 13 Mei, by die skaakwedstryde wat by ons skool in die biblioteek plaasgevind het, ingestap het. Ons gemengde o/11-skaakspan het die spesifieke middag wedstryde teen drie skole uit Gugulethu, naamlik Luzoko, Litha en Vukuhayne gespeel. Ons leerders het dit baie geniet en dit was ‘n riem onder die hart om te sien hoe vinnig hulle sommer onder mekaar maats gemaak het en mekaar oor die fynere kunsies van skaak touwys gemaak het. Hier het ons skaak gespeel teen kinders wat nie eers weet waar hulle volgende maaltyd vandaan gaan kom nie en dit het ons almal opnuut weer laat besef hoe bevoorreg ons almal by Laerskool Jan van Riebeeck is.

Ons kultuuraktiwiteite met musiekonderrig, koor, redenaars en Eisteddfod is weer in volle swang. Daar heers groot opgewondenheid onder leerders en ouers met die deelname aan die Eisteddfod. Baie dankie aan Sean met die suksesvolle kitaarkonsert wat op Woensdagaand, 11 Mei, in die skoolsaal gehou is. Ons kultuurleerders is baie talentvol en hulle kry ook die geleentheid om ‘n item tydens ons saalbyeenkomste op Dinsdae te lewer. Juf. Helecia en mnr. Ben beplan verder weer ‘n heerlike musiekkonsert op 21 Junie waarna ons baie uitsien.

Ek wil nie graag leerders uitsonder nie, maar ek sal my plig versuim indien ek nie vir Sophia Liebenberg (graad 7) hartlik gelukwens met haar opname in die o/13 Wes-Kaap netbalspan nie. Sy gaan deelneem aan die interprovinsiale toernooi vanaf 25 – 29 Junie 2022 te Boksburg, Gauteng. Ons is baie trots op jou, Sophia, en ons wens vir jou en juf. Ischké, wat ook as skeidsregter tydens die toernooi gaan optree, sterkte toe.

Ek sluit dan met die volgende bekende aanhaling rakende dankbaarheid af:

“Dankbaarheid gee sin aan gister, gee vrede vir vandag en skep ‘n droom vir môre.”

Geniet ‘n wonderlike naweek en sterkte aan ons netbal- en rugbyspanne en hul afrigters wat môre by Laerskool F.D. Conradie te Prince Alfred Hamlet deelneem.

Naas Beets
SKOOLHOOF

Graag neem ek die vrymoedigheid om julle as ouers/voogde vriendelik te versoek om jul kinders betyds soggens by die skool te besorg. Covid-19 protokolle is alreeds die afgelope tyd drasties verslap en ons is amper terug pre-Covid tyd. Dalk besef julle dit nie, maar deur jou kind soggens laat by die skool af te laai, maak hulle angstig en op die lange duur belemmer dit hul akademiese ontwikkeling. Dinsdae begin die skool reeds om 07:40, want dan het ons ‘n saalperiode waar die hele skool toegespreek word. Dit is in ‘n skoolkonteks ‘n baie belangrike periode waar ek onder andere die geleentheid kry om met al die leerders en opvoeders gelyktydig te praat en ‘n boodskap vir die week te bring. Baie dankie by voorbaat vir julle samewerking om te verseker jul kinders daag betyds vir skool op.

Vanaf Maandag, 16 Mei, is winterdrag vir leerders verpligtend. Kontak gerus vir Eda wat die klerebank bestuur indien julle enige items benodig (jvrklerebank@gmail.com) of plaas bestellings aanlyn.

Vir die eerste keer in 6 weke het ons weer ‘n vol Maandag tot Vrydag-week agter die rug met al die langnaweke wat mekaar as lekker meevallertjies opgevolg het. Die week voel egter skielik besonders lank en ‘n mens kan dit amper aan jou lyf voel. Ek glo ons skoolgemeenskap het ook sommer lekker hul vere reggeskud om weer gewoond te raak aan al die verskeie sport- en kultuuraktiwiteite wat by die skool plaasvind. Ek wil ook van die geleentheid gebruik maak om ons ouers/voogde hartlik te bedank wat die afgelope tyd wedstryde, toernooie, redenaars en musiekkonserte getrou bygewoon het om hul kinders en spanne te ondersteun. Dit is lekker om te sien hoe julle die geleenthede saam met jul kinders terdeë geniet. Die betrokkenheid van ouers, die omgee en kameradie onder leerders en ouers staan uit soos ‘n paal bo water. Dit is vir my ‘n groot voorreg om aan stuur te staan van ‘n skool wat hul waardes in alle opsigte met trots uitleef.

Baie dankie aan al ons ouers wat Dinsdagaand, 10 Mei 2022, die insiggewende inligtingsessie van Carla de Beer rakende hoe om veilig op sosiale media te verkeer wanneer dit by selfies, seksklets, kuberboelie en privaatheid kom, bygewoon het. Die vraag is, hoe gevaarlik is die gebruik van sosiale media, nie net vir ons as volwassenes nie, maar ook vir ons kinders? Daar is nuwe wetgewing wat selfs vir ons jong kinders gevolge inhou. Hierdie debat bestaan reeds baie jare. Vandat die televisie ons sitkamer betree het, wou ouers weet vir hoe lank op ‘n slag hul kinders toegelaat mag word om televisie te kyk, waarna hulle mag kyk en of die skerm as my kinderoppasser mag optree sodat ek net ‘n bietjie kan ontspan. Dit is egter vandag kinderspeletjies in vergelyking met die magdom toegang tot toestelle wat ons kinders kan gebruik. Ons het vandag toegang ook tot verskeie toeps, aanlynspeletjies en sosiale platforms. Die Covid-19 inperking het ons kinders ook gedwing om meer van die internet en sosiale media gebruik te maak as ooit tevore. Ons besef ook dat die gebruik van selfone, tablette, ander toestelle en natuurlik die gepaardgaande tegnologie deel van ons kinders se verwysingsraamwerk geword het. Dit hoef nie noodwendig altyd negatief te wees nie, maar daar is ernstige gevare aan verbonde soos kuberboeliery, webtuistes wat nie geskik vir kinders is nie en natuurlik heeltemal te veel skermtyd wat weer tot ander probleme kan lei. Die tweede vraag is, wat moet ons as ouers/voogde in die verband doen? Ek wil by Carla aansluit en aanbeveel dat dit fundamenteel belangrik is dat ons as ouers/voogde meer betrokke by ons kinders se gebruik van sosiale media raak en met hulle daaroor gesels. Moet beslis nie net op die gevare fokus en die heeltyd ‘n preek afsteek nie, maar fokus eerder dat die regte gebruik van sosiale media lekker en voordelig kan wees. Boesem hul vertroue in en tree op as mentor deur miskien saam met hulle ook nuuskierig te wees oor verskillende sosiale media platforms. Praat met hulle oor die gevare en die korrekte gebruik daarvan, eerder as om die heeltyd te preek. Maak verder asb. ook seker dat alle veiligheidsprotokol op die verskeie platforms geïmplementeer is.

Weer eens baie geluk aan al ons wintersportspanne met die puik uitslae van die afgelope week. Ons kan regtig trots wees dat ons met heelwat groter skole kompeterend op die sportveld kan wees. Baie dankie aan al ons opvoeders en buite-afrigters wat met soveel passie afrig en seker maak dat ons Jannies in die proses ook sport geniet. Groot dankie aan die sportkantoor onder leiding van Leon Hanekom wat seker maak ons Jannies kry genoeg wedstryd- en toernooiblootstelling. Die weeklikse vordering van ons spelers is duidelik sigbaar.

Ek sluit dan af met die volgende bekende aanhaling van Dalai Lama rakende ons kernwaarde van die kwartaal, naamlik verantwoordelikheid:

“We need to cultivate a universal responsibility for one another and the planet we share”.

Geniet ‘n wonderlike naweek en sterkte vir ons skaakspan vanmiddag teen Luzoko tuis asook ons o/12-netbalspan wat môre aan die Laerskool Panorama se o/12-toernooi deelneem.

Naas Beets
SKOOLHOOF

Die onderwysdepartement doen ‘n beroep op alle ouers / voogde om die sensusopname vir hul gesinne in te vul. Lees asb. die onderstaande brief en volg die skakel indien jy nog nie aan die sensusopname deelgeneem het nie. Voltooi dit asb. voor 14 Mei. Dit is baie belangrik vir onder andere die begroting vir die komende tydperk.

Alhoewel die week korter is as gevolg van die afgelope langnaweek het daar heelwat sportwedstryde die afgelope week plaasgevind asook nog rugby-, hokkie-, netbal en skaakwedstryde wat vandag en môre geskied. Ons is stadig maar seker besig om die spreekwoordelike ‘Covid-juk’ af te skud deur weer aan normale sportaktiwiteite sonder enige drakoniese inperkings deel te neem. Ons leerders het die afgelope 2 weke puik op die sportvelde presteer en die ding wat my die meeste trots maak, is ons Jannies wat op en af van die sportveld deurlopend ‘n baie goeie en gesonde sportmangees handhaaf. Dit is lekker om te sien hoe ons leerders die wintersportaktiwiteite geniet en terselfde tyd onbewustelik ‘n waardevolle lewensles kry van hoe om in spanverband te funksioneer asook om te leer om mekaar te verdra, probleme op te los en om ‘n kollektiewe doelwit te bereik. Sport bly darem ‘n belangrike opvoedingsmiddel en ons beoefen dit op ‘n mededingende grondslag, maar ook op die beginsel van ontspanning en genot.

Sondag, 8 Mei, is natuurlik Moedersdag wat ‘n spesiale dag is waarop moederskap jaarliks regoor die wêreld gevier word. Moedersdag word in Suid-Afrika sowel as die V.S.A., Australië, China, Japan en Indië altyd op die 2de Sondag van Mei gevier. Alhoewel Moedersdag alreeds in antieke tye deur die Grieke en Romeine gedurende feeste gevier is, is die oorsprong van Moedersdag soos wat ons dit vandag ken, alles te danke aan die Amerikaanse kampvegter vir vroue, naamlik Anna Jarvis. Sy het na haar eie ma se dood in 1905 met ‘n veldtog begin om moeders te vereer vir die belangrike rol wat hulle in die samelewing speel. Dus doen ek ‘n beroep op ons skoolgemeenskap dat ons op Sondag, 8 Mei, Moedersdag in alle vorme van moederskap en die spesiale mense in ons lewens wat ons help vorm het in wie ons vandag is, eer. Ek glo dat al ons Moeders asook ons kosbare Oumas op die spesiale dag tot in die afgrond bederf gaan word.

Graag wil ek van die geleentheid gebruik maak om een van ons opvoeders, naamlik Warren Stoman, hartlik geluk te wens wat onlangs sy BCom-graad (Hons) in bedryfsielkunde behaal het. Welgedaan, Warren, ons is baie trots op jou!

Ek sluit dan af met die volgende bekende aanhaling van Gene Bedley rakende ons kernwaarde van die kwartaal, naamlik verantwoordelikheid:

“Responsibility finds a way, Irresponsibility finds excuses”

Geniet ‘n wonderlike naweek en sterkte vir al ons sportspanne wat vanmiddag en môre deelneem.

Naas Beets
SKOOLHOOF

Indien jy ‘n inskrywing op die skool se kalender sien waaroor jy meer inligting wil hê, kliek gerus op die inskrywing. Indien daar meer inligting daaroor beskikbaar is en op die webtuiste lê, sal die skakel in die beskrywing verskyn.

Kliek HIER vir instruksies om die kalenders met joune te sinchroniseer (beskikbaar vir Google, Apple en Outlook kalenders).

Onthou asb. van die baie belangrike praatjie rakende die gevare van sosiale media en die effek wat dit op ons kinders het. Carla de Beer (kollega van Emma Sadleir) spreek ons ouers/voogde en personeel op Dindag, 10 Mei, om 18:00 in Hoërskool Jan van Riebeeck se saal toe. Kaartjies is @R50 op Karri beskikbaar. Die leerders se sessie tydens skooltyd is verniet.

1. Vir kos- en vervoerreëlings, vul hierdie GOOGLE FORM in.
2. Verdere reëlings:
   • Ons begin Saterdag, 28 Mei, om 09:00 stap. Wees asb. betyds in Greyton. HIER is waar ons begin. Die roete is ongeveer 12.5km.
   • Ons sal Sondag, 29 Mei, terugstap en weer in Greyton eindig.
   • Pak asb. genoeg snacks en water (eerder te veel as te min!) en ‘n middagete (bv. wrap of broodjie) vir langs die pad. Hou die volgende dag se middagete ook in gedagte.
   • Daar is ‘n lekker swemgat en waterval na die helfte van die roete. Ek weet nie of die weer gaan saam speel nie, maar pak dalk maar vir kinders ‘n swembroek en handdoek in (en vir jouself as jy braaf genoeg is!).
   • Onthou jou hoed en sonskerm. Dra verkieslik tekkies met ‘n lekker sool of stapskoene.
   • Daar is beddegoed en kombuisgeriewe by die huisies. Jy hoef slegs jou klere vir die aand en volgende dag, kos en handdoek in te pak.
   • Daar is hout. Dit wat ons gebruik, betaal ons voor. Bring asb. kontant wat ons daar kan los vir die hout (R30 ‘n sakkie).
3. Betaal asb. die permit- en verblyfkostes so gou moontlik op Karri indien julle nog nie het nie.
4. Indien julle nie meer kan saam stap nie, dismiss die Karri kennisgewings en stel Suzaan in kennis (suzaan@jvrprim.co.za).

Jy sal nou foto’s op die aanlynplatform kan bestel en betaal indien jy nie met die koevertjies bestel het nie. Die sluitingsdatum vir aanlynbestellings is 11 Mei. Daarna sal jy steeds aanlyn kan bestel, maar sal self die afleweringkostes moet betaal.

Kliek HIER vir die Lunchbox Photography webtuiste. Indien jy vir ‘n wagwoord gevra word, tik in JVR2020.

Indien ‘n foto nie daar verskyn nie of jy enige ander vrae het, stuur gerus ‘n e-pos na ischke@jvrprim.co.za.

Ek glo dat almal op Saterdag, 23 April 2022, die Kaperjolle terdeë geniet het. Dit was my en my vrou se eerste Kaperjolle en wat ‘n ongelooflike ervaring om saam met hierdie pragtige skoolgemeenskap ‘n wonderlike pretdag van samesyn te geniet. Die kos en lekkernye was uit die boonste rakke en ek is seker dat selfs indien iemand soos die bekende koskenner, Bertus Basson van ‘In die Sop’ hierdie geleentheid bygewoon het, sou hy selfs iets by ons bedrewe sjefs geleer het. Baie dankie aan die ouers wat ek nog nie amptelik ontmoet het nie, wat sommer op die dag hulle aan my kom voorstel het. Opvallend is die positiewe gees, omgee en samehorigheidsgevoel onder ons ouers/voogde. Dis ‘n riem onder die hart dat julle as ouers soveel omgee, betrokke by jul kinders se leer en onderrig is en in dieselfde asem baie trots op die skool is. Baie geluk aan die volgende spanne wat in die top 3-plekke geëindig het en wisseltrofees tydens die ‘oor die kole-kompetisie’ ontvang het:

1. SA-uitstalling deur die onderwyserspan van juf. Maricqe
2. Karoo Classic deur nog ‘n onderwyserspan van juf. Anja
3. Griekse uitstalling van Rudi en Oloff.

Die beste geesbeker het aan Kees se span (Uruguay) gegaan. Ek sal my van my taak kwyt indien ek nie Ria Hertzog en haar OOV-span hartlik bedank wat so hard gewerk het om die dag se sukses te verseker. Die groot sukses is verseker te danke aan toewyding en spanwerk.

Soos julle weet, is die komende naweek weer eens ‘n langnaweek met Werkersdag wat op 1 Mei gevier word. In die Suid-Afrikaanse konteks het Werkersdag ‘n baie lang en interessante geskiedenis. Werkersdag het wêreldwyd begin toe Australiese klipkappers in Victoria ‘n massastilstand op 21 April 1856 onderneem het as deel van die agt-uur werksdagbeweging. Dit het ‘n jaarlikse herdenking geword, wat Amerikaanse werkers geïnspireer het om hul eerste massastaking te hê. Dus is 1 Mei gekies om Internasionale Werkersdag te vier ter herdenking van die 1886 Haymarketaangeleentheid in Chicago. Dit het egter sedertdien ontwikkel tot ‘n viering van die historiese pogings van werkers internasionaal om solidariteit tussen die werkende klas mense te vestig in hul stryd om billike indiensnemingstandaarde te bekom. Dus vra ek dat ons ook op die spesifieke Werkersdag ons onderwysers en ondersteuningspersoneel se veerkragtigheid, deursettingsvermoë, hul gewilligheid en vermoë om aan te pas by ‘n voortdurend veranderende opvoedkundige landskap, en die toewyding waarmee hulle kennis oordra aan ons Jannies, te vier.

Die wintersportprogram loop in volle swang en verskeie wedstryde het reeds plaasgevind. Baie geluk aan ons hokkiespanne wat 7 van die 11 wedstryde op 21 April 2022 teen Elkanah House gewen het. Baie geluk ook aan ons netbalspanne wat 13 van die 17 wedstryde teen Laerskool Edgemead weg op 25 April 2022 gewen het (2 wedstryde was gelykop). Ons o/13A-span het onder andere 26 – 5 gewen. Baie dankie en geluk aan al ons afrigters en spelers met die puik vertonings.

Ek sluit dan met die volgende bekende aanhaling van Winston Churchill af rakende ons kernwaarde van die kwartaal, naamlik verantwoordelikheid:

“The price of greatness is responsibility”

Geniet ‘n wonderlike langnaweek.

Naas Beets
SKOOLHOOF

Die skool sal Vrydag, 29 April, vroeër verdaag weens die langnaweek.

Graad 1 – 3 verdaag om 12:45
Graad 4 – 7 verdaag om 13:00

Die bus vertrek om 13:05

Die graad 7-leerders verkoop oliebolle op Vrydae as deel van hulle fondsinsameling. Die Karri-toep sal vanaf Maandag, 2 Mei, vir bestellings oopgestel word.

1. Ingang is slegs deur Nuwe Kerkstraat se hek.
2. GEEN parkering op die terrein beskikbaar nie. Parkeer in die strate rondom die skool of gebruik UBER. Adres vir UBER is 83 New Church Street.
3. Toegang is gratis.
4. Alle Karri-items wat aangekoop is, moet Saterdag by die inligtingstafel afgehaal word.
5. Daar is verkope op die dag van kindercombo’s, Lekkergoedland, pannekoek, pizza, koffie, boereworsrolle, chip ‘n dip, snoepie en kroeg.
6. Betaling op die dag met kontant of Snapscan.
7. Snapscan verwysing is jou NAAM en VAN
8. Oor-Die-Kole spyskaarte sal by elke land se stalletjie beskikbaar wees om jou met jou keuse te help. Skryf jou naam tussen 12:00 en 15:00 by jou gekose land se stalletjie op waar jy wil eet. Etes sal tussen 15:30 en 16:00 gereed wees.
9. Sien die vloerplan hieronder.