Kategorie: Algemeen

Eerskomende Maandag en Dinsdag se rooster sal omruil a.g.v. kooroefening wat moet plaasvind voordat die kore Maandagaand by HS JvR optree. 

Op 15 en 16 Julie vind daar ouerbesoeke plaas. 15 Minuut-afsprake sal met onderwysers gemaak kan word om oor jou kind(ers) se akademiese vordering of emosionele welstand te gesels.

Volg hierdie stappe om ‘n afspraak te maak:

1. Volg die skakel vir die Besprekingsbladsy.
2. Kies die graad waarin jou kind is.
3. Onder “Select Staff”, kies die onderwyser met wie jy ‘n afspraak wil maak.
4. Op die kalender, gaan na Julie en kliek op 15 / 16 Julie.
5. Kies die tydgleuf wat jou sal pas. Indien daar geen tydgleuwe meer beskikbaar is nie, stuur gerus ‘n boodskap op WhatsApp of per e-pos aan die betrokke onderwyser om ‘n alternatiewe tyd te reël.
6. Rol af op die bladsy en vul jou naam, e-posadres, kind se naam en enige addisionele kommentaar in.
7. Jy sal ‘n bevestiging van jou afspraak per e-pos ontvang.
8. Indien jy die afspraak wil skuif of kanselleer, volg die stappe in die e-pos.
9. Jy kan tot en met 24 uur voor ‘n afspraak nog bespreek, verander of kanselleer.
10. Om te sien watter onderwyser bied watter vak aan, sien gerus die personeelblad op die webtuiste.

Die skool verdaag op 15 en 16 Julie vroeër: 12:45 (gr. 1-3) en 13:00 (gr. 4-7)

So kom die 2de laaste week van kwartaal twee asook die eksamen tot ‘n einde terwyl Moeder Natuur se winterreën salig oor die stad uitsak. Ek glo dat heelwat ouers/voogde saam met hul kinders ‘n groot sug van verligting gegee het toe die laaste vak op Woensdag, 05 Junie, geskryf is. Die antwoordstelle is amper klaar gemerk, ‘n deeglike modereringsproses word gevolg en punte word verwerk sodat ons op Vrydag, 14 Junie, die dag wat die skole sluit, vir elke leerder sy/haar rapport kan gee.

Graag wil ek spesifiek die leerders bedank en gelukwens met hul deeglike voorbereiding vir die eksamen asook die besonderse werketiek wat hulle dwarsdeur die kwartaal gehandhaaf het. Hartlike dank ook aan ons ouers/voogde wat hul kinders so mooi en lojaal die afgelope twee weke tydens die eksamen/assessering ondersteun het om net hul beste te doen. Laaste, maar nie die minste nie, ‘n hartlike dank aan ons opvoeders en leerontwikkelingspersoneel wat met soveel deernis en toewyding ons leerders vir die eksamen en assesserings voorberei het.

Vanaf Maandag, 27 Mei, het die interim buitemuurse sportprogram in skooltyd, net na die aflê van die daaglikse eksamens plaasgevind. Die doel om nog steeds met sportoefeninge tydens die eksamentyd voort te gaan, was tweeledig: eerstens, die leerders geniet dit terdeë om direk na ‘n lang eksamensessie uit die klas te kom, die vars lug te geniet en aktief te wees wat sommer ook met hul algemene geestelike welsyn tydens eksamen help. Tweedens, help die program om hulle fiks te hou asook om hul spelpeil langer te handhaaf veral met ‘n welverdiende drie weke vakansie wat voorlê. Daar is die afgelope kwartaal so hard gewerk om fiksheidsvlakke te verbeter, effektiewe spelpatrone te implementeer en indien ons sportoefeninge vanaf die begin van die eksamen sou stop plus die vakansie wat voorlê, beteken dit dat daar amper sewe weke van geen oefeninge en afrigting sou plaasvind nie.

Saterdagaand, 01 Junie, het ons jaarlikse veilingsdinee by die ikoniese Pienk Dame, naamlik die Mt. Nelson Hotel plaasgevind. Al die kaartjies was vir die glans- en fondsinsamelingsgeleentheid uitverkoop. Die tema vir die aand was ‘Glansryk in Wit’ en die gaste was elegant en deftig vir die spesiale geleentheid getooi. MC du Toit, een van ons ouers het soos in die verlede as afslaer opgetree. Hy het die ongelooflike 41 lotte binne ‘n kort tydjie onder groot geesdrif van die gaste verkoop. Ons is hom uiters dankbaar vir die puik taak wat hy verrig het. Dit is dan my eer en voorreg om bekend te maak dat daar tydens die veiling ‘n enorme R1,5m ingesamel is. Dit het al ons verwagtinge oortref veral met die huidige ekonomiese toestande in ag geneem. Graag wil ek ook die geleentheid gebruik om al ons gaste en veral ons ouers wat op die aand ‘n finansiële bydrae gemaak het, hartlik te bedank vir hul finansiële bydrae om LS Jan van Riebeeck na nog hoër hoogtes te neem. Daar is darem nie net ‘n spogveiling gehou nie, maar ook lekker saam gekuier en gedans. Die onthaalsaal van die Mt. Nelson was uiters stylvol voorberei en verfraai. Die samesyn was kosbaar en die goeie gevoel van die skoolgemeenskap was feitlik tasbaar. Baie dankie aan ons Voorsitter van die Opvoedingstrust en die Beheerraad, naamlik Merwe Scholtz vir sy dinamiese leiding en puik toespraak wat die doel van die spesiale aand mooi in konteks geplaas het. Laat my ook toe om die reëlingskomitee bestaande uit Anna Blackmore en Michelle Forsyth weereens hartlik te bedank en geluk te wens met ‘n onvergeetlike glansaand.

Op Vrydag, 31 Mei, het ons skool ‘n pantoffeldag aangebied en kon die leerders vir R20 met hul gunsteling-pantoffels skool toe kom. Leerders en personeel het met hul gunsteling-pantoffels by die skool opgedaag en ‘n allemintige R6 700 is op die dag vir die Monte Rosa ouetehuis ingesamel wat die gr. 3’s volgende week aan hulle gaan oorhandig. Baie dankie juf. Michelle vir die reëlings asook vir almal se bydrae. Dit word opreg waardeer.

Dit is dan my eer en voorreg om die 2024 Hoofseun en Hoofdogter wat op 05 Junie verkies is, naamlik Frank van der Walt en Karu Rademeyer bekend te maak. My beste wense vergesel hulle met hul nuwe rol as hoofleiers by ons skool. Mag dit vir hulle baie vervulling bring. Ons is baie trots op Frank en Karu!

Op Woensdag, 05 Junie, het Marié Cruywagen (BR-lid) vir die onderwysers IKT-opleiding gegee om MineCraft Education in hul leer en onderrig te inkorporeer. MineCraft Education is ‘n samewerkende en veelsydige toepassing wat opvoeders ‘n transformerende manier bied om leerders te betrek en hul passie vir leer aan te wakker. MineCraft Education hou die volgende voordele vir leerders in:

• Verhoog kreatiwiteit
• Verbeter probleemoplossingsvaardighede
• Moedig lees en skryf aan
• Ontwikkel navorsingsvaardighede
• Verskerp wiskundige vaardighede
• Stimuleer verbeelding en inspireer kreatiwiteit
• Help om koderingsvaardighede te ontwikkel

Baie dankie, Marié! Ons het groot waardering vir al jou kosbare tyd en toegewydheid om IKT by Laerskool Jan van Riebeeck na nog hoër hoogtes te neem.

Hiermee sluit ek dan af met ‘n treffende aanhaling van Arthur Ashe en wens ek vir elkeen ‘n wonderlike naweek sonder eksamenstres saam met jul gesin toe:

“Success is a Journey,
not a Destination.
The Doing is often more important than the Outcome!’’

Vriendelike groete

Naas Beets
SKOOLHOOF

Op Woensdag, 12 Junie, sal die gr. 1-3-leerders van Laerskool Jan van Riebeek die geleentheid hê om ‘n bedreigde spesie Fynbos-saailinge te plant en eerstehands te leer oor konsepte soos bewaring, endemies en bedreigde plantspesies en ‘n praktiese geleentheid hê om by te dra.

Meer inligting:

Kaapstad se flora-koninkryk (Cape Floral Kingdom) is een van ses flora ‘koninkryke’ in die wêreld. Ons koninkryk spog met die grootste verskeidenheid plante in die wêreld! Daar is ongeveer 9000 plantspesies waarvan amper 70% endemies is!
Ongelukkig kom die koninkryk onder vreeslike druk a.g.v. menslike teenwoordigheid, stadsuitbreiding en -ontwikkeling. Amper een derde van die spesies is op die bedreigde spesies lys.

As deel van ‘n gemeenskap en bewaringsprojek het ons ‘n rehabilitasieprogram gestig om van die mees bedreigde spesies terug in hulle natuurlike omgewing te plant. Ons Kloofstraat Park is so geleë dat ons ‘n baie spesifieke groep Fynbos-/Renosterveld-spesies kan plant. Dit is op die rooilys van krities bedreigde spesies. 1500 Saailinge is klaar geoes en word in ‘n kwekery gekweek ter voorbereiding vir oorplanting. Ons beoog om 300m² van die park te omskep in ‘n inheemse, endemiese Fynbos-Renosterveld publieke spasie.

Markdag vind Donderdag, 13 Junie, vanaf 09:30 tot 10:30 plaas.

• Dit is die senior fase se beurt om Markdag aan te bied.
• Leerders word herinner dat hulle nie klappers of lewende hawe mag verkoop nie.
• Karri sal vanaf Vrydag, 7 Junie, tot Woensdag, 12 Junie, oop wees om ‘n tafel te bespreek indien jou kind(ers) in graad 4-7 iets by die markdag wil verkoop.

Maandag, 10 Junie, tot Donderdag, 13 Junie

• 13:00 (gr. 1-3)
• 13:15 (gr. 4-7)

Vrydag, 14 Junie

• 10:30 (gr. 1-3)
• 10:45 (gr. 4-7)

Die tweede week van die eksamen het klopdisselboom verloop. Soggens tydens eksamen is dit vir die eerste uur of twee doodstil in die skool soos die leerders besig is om hul kennis op skrif te stel. Vanaf 10:00 met die aanbreek van pouse wat dan gevolg word deur die interne sportprogram kom die hele skool skielik tot lewe met al die vrolike stemme wat die heerlike winterweer buite geniet. Gelukkig kom die eksamen op Woensdag, 05 Junie, tot ‘n einde en keer ons huishoudings terug na normaal met ‘n welverdiende vakansie wat voorlê.

Môreaand, 01 Junie, vind ons jaarlikse veilingsdinee by die ikoniese Pienk Dame, naamlik die Mount Nelson Hotel, plaas. Hierdie geskiedkundige hotel boei al gaste sedert 1899 en sodra jy die perseel betree, ervaar jy die gevoel van glans en ontspanning wat dit die perfekte venue vir ons gewilde veilingsdinee maak. Vanjaar se tema is ‘Glansryk in Wit’ en ek wil al die gaste by voorbaat hartlik bedank wat die glansgeleentheid gaan bywoon asook hul bereidwilligheid om hul hande diep in hul sakke te steek om ons skool finansieel te ondersteun. Fondse geïn word direk in projekte geploeg om onder andere die infrastruktuur by die skool asook die IKT-leer en -onderrig aan te spreek. Laat my ook toe om die reëlingskomitee bestaande uit Anna Blackmore en Michelle Forsyth hartlik te bedank vir hul deeglike beplanning en harde werk agter die skerms om die sukses van die veilingsdinee te verseker. Daar is 40 lotte plus ‘n spesiale verrassingslot wat opgeveil gaan word. Gelukkig is ons baie bevoorreg om MC du Toit as ‘n bedrewe afslaer aan die stuur van sake te hê.

Laat my toe om die volgende twee leerders hartlik geluk te wens met hul puik prestasie tydens die ATKV se semi-finale rondte op 15 Mei te Hoërskool Bellville:

• Pieter Rademeyer – 6de plek in die Wes-Kaap
• Dané Olivier – 6de plek in die Wes-Kaap

Welgedaan julle twee, julle maak ons baie trots. Baie dankie ook aan juf. Andri vir haar puik leiding in die verband en baie geluk met jou aanwysing as ‘n ATKV-beoordelaar.

Graag wil ek met ons ouers/voogde ‘n bekommernis rakende die taalgebruik van veral ons gr. 5 – 7-seuns tydens skool- en sporttyd, deel. Ek glo dat die meeste ouers/voogde salig onbewus van die onaanvarebare kru- en vloektaal is wat deur sommige seuns tydens pouses, voor en na skool gebesig word. Ek het alreeds met die onderskeie grade se seuns ‘n ernstige gesprek gevoer oor die gebruik van kru- en vloektaal. Ek het mooi aan hulle verduidelik dat ‘n mens se woorde toon wie jy werklik is en as jy kru- en/of vloektaal gebruik dit wys dat jy nie baie vir ander mense omgee nie. Hierdie gedrag weerspreek in totaliteit ons waardes en Jannies behoort van beter te weet. Leerders op ‘n jong ouderdom mag dalk dink dat dit “cool” is om vloek-/krutaal te gebruik en om die een of ander rede dink hulle dat dit hulle volwasse laat klink. Ons weet almal dat vloektaal maklik ‘n gewoonte kan raak daarom wil ek dit onmiddellik in die kiem smoor. Hiermee insinueer ek nie dat ek dink die seuns se taalgebruik by die huis te hore kom nie, maar eerder om julle hulp te vra om met jul kinders te praat dat vloek- en krutaal onaanvaarbaar is en niks met volwassenheid te doen het nie. Baie dankie vir julle ondersteuning in die verband.

Op Woensdag, 31 Mei, het stemgeregtigde Suid-Afrikaners die geleentheid gekry om hul stemme tydens die nasionale verkiesing te laat geld. Ek hoop en vertrou dat alle stemgeregtigde burgers hulle na die stemlokale gehaas het om hul kruise te trek om die nuwe nasionale vergadering sowel as die provinsiale wetgewer in elke provinsie te verkies. Vanjaar was die meeste kiesers ooit geregistreer, naamlik 27,7 miljoen met ‘n allemintige 52 partye op die nasionale stembrief om voor te stem. Kom ons hoop en bid dat al die politieke beloftes nagekom sal word en die morele gesag in die samelewing herwin sal word. Baie dankie dat jy jou kruisie in jou kind/ers se belang gemaak het in die poging om Suid-Afrika ‘n beter plek vir almal te maak!

Hiermee sluit ek dan af met ‘n treffende aanhaling oor die eksamen van die lewe en wens ek vir elkeen ‘n wonderlike naweek saam met jul gesin toe:

“Life is the most difficult exam.
Many people fail
because they try to copy others,
not realizing that everyone has a different question paper!’’

Vriendelike groete

Naas Beets
SKOOLHOOF

Dit spyt ons om julle mee te deel dat Suzaan Coetzee vroeër die kwartaal haar bedanking ingedien het. Sy verlaat ons aan die einde van die kwartaal. Ons beste wense vergesel Suzaan op haar nuwe reis en mag sy haar nuwe werk terdeë geniet.

Megan Zondagh gaan haar pos oorneem en sal van volgende kwartaal af die kontakpersoon wees vir navrae i.v.m. kommunikasie, inteken-probleme en Jan Kas.

• Kontakbesonderhede: megan@jvrprim.cp.za | 067 448 4943 (WhatsApp chat)
• Vir Jan Kas navrae, kan julle steeds die jankas@jvrprim.co.za e-posadres gebruik.

Ons is verder in die proses om onderhoude te voer om ‘n nuwe persoon in Megan se plek vir die biblioteek- en digitale geletterdheid-vak aan te stel.

Die wintersportprogram vir kwartaal 2 het die afgelope week tot ‘n einde gekom met ‘n besige, maar opwindende sportprogram agter die rug.   Ek glo dat elke gesin nou na afloop van al die baie wedstryde, sportdae en toernooie ‘n bietjie kan begin asem skep en ook in die proses vir die gr. 4 – 7 Mei/Junie-eksamen wat die afgelope week afgeskop het, voorberei.

Wintersportoefeninge het op Dinsdag, 21 Mei, vir die kwartaal geëindig, maar sportoefeninge gaan voort gedurende skooltyd en dit skop vanaf 27 Mei tot 05 Junie af. Hierdie wintersportoefeninge (o.7 – o.13) gedurende die eksamen is vrywillig. My ondervinding is dat die leerders dit geniet om sport net na afloop van ‘n eksamen- of assesseringsessie te kan beoefen. Dit help beslis om die angstigheid van eksamen te verminder asook om net ‘n bietjie asem te skep na ‘n lang skryfsessie. Studies toon dat leerders en studente wat gereeld oefen beter tydens kognitiewe toetse presteer, beter geheue het en meer waaksaam is tydens eksamens. Om voor te brei en gedurende die eksamen te studeer, kan geestelik en fisies uitputtend wees wat baie leerders moeg en afgemat laat voel. Wanneer jy oefen, stel jou liggaan hormone soos adrenalien en kortisol vry, wat weer help om die energievlakke hoog te hou. Ek is vas oortuig dat om sportoefeninge vir leerders tydens die eksamen in te sluit, hulle beslis sal help om beter in eksamens te presteer en hul algemene gesondheid en welstand ook in die proses te verbeter.

Die eksamen vir die gr.7’s het op Dinsdag, 21 Mei, met Wiskunde vraestel 1 begin en alles het klopdisselboom verloop. Na afloop van die vraestel was die gr. 7’s heel in hul noppies en is die spreekwoordelike ys gebreek om die res van die eksamen minder stresvol aan te pak.  Vandag begin die gr. 4 – 6’e met Wiskunde en ek glo dat hulle ook minder angstig sal wees na afloop van die eerste dag van hul Mei/Junie-eksamen. Baie dankie dat julle jul kind/ers sal aanmoedig om effektief tydens die eksamen te leer en te hersien, dat hulle gereeld blaaskanse sal neem, gesond sal eet en genoeg water sal drink asook om genoeg slaap in te kry. Ten slotte is dit belangrik om ‘n sterk emosionele band met jou kind/ers gedurende die eksamen te behou. Leerders gaan verseker stres of angstigheid tydens die eksamen ervaar en dit is dan belangrik om ‘n warm, onbevooroordeelde spasie te skep waar hulle gemaklik hul gevoelens met julle kan deel. Dit help leerders dikwels deur bloot oor die eksamenvrese te kan gesels en wanneer daar ‘n simpatieke oor naby is, ervaar hulle ondersteuning en liefde wat dikwels die eksamenvrese verdryf.

Laat my toe om die volgende leerders hartlik geluk te wens wat die afgelope week hul onderskeidelike WP-kleure verwerf het:

• Anouk van der Linde (WP o.11 Netbal);
• Stella Pansegrouw (WP o.12 Netbal);
• Frank van der Walt (WP o.13 Craven Week Akademiese span)

Verlede week het ek ook met julle gedeel dat Jack Dawes in die WP o.12 Hokkie-Sonespan opgeneem is. Met die bogenoemde ingedagte is dit die eerste keer dat ons skool provinsiale deelname in al drie wintersportsoorte in dieselfde jaar het. Dit is opsigself ‘n merkwaardige prestasie vir ons skool en ‘n duidelike bewys dat ons sportplan effektief is. Dit is dan ook ‘n absolute pluimpie vir ons afrigters en sportkantoor wat week-in en week-uit die ekstra myl loop om seker te maak ons Jannies voldoende geleenthede kry om hul potensiaal te bereik. Ek wil nie graag ‘n leerder uitsonder nie, maar ek sal my plig versuim indien ek nie ekstra melding van Stella Pansegrouw maak nie, want sy behaal vanjaar ‘n driekuns vir WP-kleure in die volgende sportsoorte, naamlik tennis, gimnastiek en nou ook netbal. Dit is voorwaar ‘n uitstekende prestasie!  Ons wens die bogenoemde leerders sterkte toe waar hulle die komende vakansie die WP in hul onderskeie sportsoorte verteenwoordig. Ons is saam met jul ouers baie trots op julle.

Ek is die week verder bederf met die gr. 4-leerders wat met trots hul Natuurwetenskappe en Tegnologie-take vir my kom wys het. Hulle het ongelooflike kreatiwiteit aan die dag gelê om indrukwekkende en stewige brûe uit verskeie materiale te bou. Dit het deeglike beplanning en ontwerp vereis. Baie dankie juf. Marianne wat die leerarea op ‘n verbeeldingryke en inspirerende wyse aanbied wat bydra tot kreatiewe denke en probleemoplossingsvaardighede.

Ons spreekwoordelike dankbaarheidsbeker hou eenvoudig nie op om oor te loop nie. Daarom sluit ek weereens af deur my dankbaarheidsjoernaal te deel. Hiermee wens ek vir elkeen ‘n wonderlike naweek toe en sterkte as gesin met die eksamen:

“Gratitude and Attitude are not challenges,
they are choices!’’
 
Vriendelike groete

Naas Beets
SKOOLHOOF

Die skoolbestuur en Beheerraad wil graag weer soos in 2021 ons ouergemeenskap se mening oor allerlei sake inwin. Dus wil ek julle vriendelike versoek om aan ons meningspeiling deel te neem. Dit is maklik en gou om in te vul. Die sperdatum is Vrydag, 7 Junie 2024, en die vorm is anoniem.

Dankie!
Naas Beets

Neem asb. kennis dat buitemuurse aktiwiteite (sport & kultuur) vanaf 27 Mei tot 5 Junie tydens skooltyd sal plaasvind.

Skool- en Jan Kas tye tydens die eksamen:

• Graad 7’s verdaag vanaf Maandag, 20 Mei, om 13:00.
• Graad 1-3 verdaag vanaf Donderdag, 23 Mei, om 13:00.
• Graad 4-7 verdaag vanaf Donderdag, 23 Mei, om 13:15.
• Hierdie tye geld tot Donderdag, 13 Junie.
• Vrydag, 24 Mei, sluit die skool reeds om 12:00 (gr. 1-3) en 12:15 (gr. 4-7) a.g.v. Eisteddfod wat by ons skool aangebied word.
• Jan Kas tye tot die einde van die kwartaal:
  • Maandae en Woensdae: 07:00 – 08:30
  • Dinsdae en Donderdae: 12:30 – 13:45

Ek hoop julle het die naweek se sport tuis teen Laerskool Mikro net soos ek en die personeel geniet. Vrydagoggend en -middag het Moeder Natuur haar beste probeer om ‘n demper op die hokkiewedstryde te plaas, maar sy kon egter nie die geesdrif en opwinding stuit nie. Ons spanne het puik gevaar en die sportnaweek teen Laerskool Mikro gaan ‘n jaarlikse instelling word van een jaar tuis en die volgende weg.

As skool verwelkom ons dat ouers/voogde hul kind/ers by sportklubs inskryf om hul kind/ers meer blootstelling aan ‘n spesifieke sportsoort te gee. Al voorwaarde verbonde is dat die skoolsport altyd voorkeur moet geniet. Ek glo dat julle sal verstaan dat ons nie kan toelaat dat ‘n ouer/voog of leerder eerder verkies om ‘n klub tydens ‘n wedstryd te verteenwoordig as om vir die skool tydens ‘n wedstryd, sportdag of toernooie te speel nie. Ons skool het juis nie die getalle nie en daarom versoek ek julle as ouers/voogde om asseblief die reëling te eerbiedig.

Volgende week op Dinsdag, 21 Mei, begin die Junie-eksamen vir die gr. 7’s en die gr. 4 – 6’e begin op Vrydag, 24 Mei 2024. Die assesserings vir die Grondslagfase het reeds verlede week begin en alles verloop klopdisselboom. My beste wense vergesel ons leerders en onderwysers tydens die eksamen, of soos die leerders na die ‘e-woord’ verwys – ‘n woord wat ons nie durf waag om enigsins sommer te besig nie. Hou ingedagte dat leerders assesseringstyd verskillend ervaar. Ons weet dat assessering ongelukkig stresvlakke by meeste leerders verhoog en dit filter ook soms deur na die gesinne. Graag versoek ek julle om ons as personeel te help om die stresvlakke en spanning tydens die eksamen te beheer sodat dit nie die oorhand kry nie. Stres tydens ‘n eksamen is ‘n natuurlike reaksie en as dit reg aangewend en bestuur word, kan dit ook voordelig wees.

Probeer gerus die volgende wenke om jou kind/ers se eksamenstres en jou moontlike eie angstigheid daaroor hok te slaan:

• Berei asseblief betyds voor. Help jou kind/ers om ‘n studierooster op te stel wat jou kind/ers genoeg tyd gee om ook te ontspan en vroeg saans in die bed te spring sodat hulle genoeg slaap inkry.
• Skep ‘n rustige en ontspanne atmosfeer vry van enige stressors by die huis vir jou kind/ers om te leer.
• Skep ‘n toegewyde studieruimte met behoorlike beligting wat vry van geraas is.
• Skep ‘n emosionele band met jou kind/ers dat hulle nie voel dat hulle die eksamenpad alleen stap nie. Vra vir hulle hoe die eksamen was en spreek positiewe woorde uit. Laat hulle verstaan dat julle vir hulle nog steeds baie lief sal wees, ongeag die uitslae en hulle beslis nie op grond daarvan sal beoordeel nie.
• Help jou kind/ers om ‘n gewoonte te kweek dat hulle die regte skryfbehoeftes en die regte toerusting vir die dag inpak.
• Vermy gejaagdheid, veral om op die nippertjie soggens voor die eksamen jou kind/ers by die skool af te laai, want dit maak leerders angstig.

Ek wil graag van die geleentheid gebruik maak om vir Jack Dawes hartlik geluk te wens met sy opname in die o.12A WP-Hokkie-Sonespan (Durbell). Hokkie by Laerskool Jan van Riebeeck is ‘n baie jong sport wat besig is om te ontwikkel. Dis ook besig om baie gewild onder leerders te word, aangesien dit ook ‘n amptelike Olimpiese sport is. Vanjaar was die eerste keer dat ons leerders, in die geval seuns, gekwalifiseer het om aan die WP-hokkieproewe deel te neem. Aanvanklik het Johannes Mouton, Vincent Oosthuizen en Jack Dawes aan die eerste rondte van proewe deelgeneem. Johannes en Jack het vir die volgende rondte gekwalifiseer, maar net Jack het die span gehaal. Jack neem vanaf 19 – 20 Julie aan die WP-Intersone Hokkietoernooi te Laerskool De Hoop deel. Hiermee ook ‘n pluimpie aan ons hokkie-afrigters wat week-in, week-uit met passie en groot entoesiasme afrig.

Baie geluk aan ons o.10A-, o.11A-, o.12A- en o.13A-netbalspanne wat op Woensdag, 15 Mei, te Laerskool Totius puik tydens die Noordelike Distrikte liga-uitspeelrondte gevaar het. Al vier ons spanne gaan deur na die volgende uitspeelrondte teen ander distrikte wat tydens kwartaal 3 sal plaasvind. Die o.11A- en o.12A-spanne het die finale gewen m.a.w. die uitspeelwedstryde (x4) onoorwonne afgesluit. Ons o.13A-span het slegs die finale wedstryd teen Laerskool Totius verloor, maar hulle moes die laaste wedstryd sonder hul hoof- en hulpdoel speel aangesien Karu Rademeyer en Emma Snijders direk na die 3de wedstryd moes haas om aan die semi-finale redenaarskompetisie van die ATKV (Wes-Kaap) deel te neem. Baie geluk aan ons netbalafrigters en spelers vir die puik prestasie om eerste in hul liga te eindig en dan nog verder vir die tweede uitspeelrondtes te kwalifiseer. Laat my ook toe om al die ouers wat so getrou hul wedstryde lojaal ondersteun, hartlik te bedank.

Baie geluk aan die volgende leerders wat op Woensdag, 15 Mei, aan die ATKV-Redenaars se semi-finale rondte te HS Bellville deelgeneem het: Pieter Rademeyer, Sabine Barnard, Karu Rademeyer, Emma Snjiders en Dané Olivier. Ons is baie trots op julle! Baie dankie juf. Andri vir jou puik leiding en voorbereiding van ons redenaarsleerders. Hulle uitslae behoort binne tien werksdae beskikbaar te wees.

Ons spreekwoordelike dankbaarheidsbeker loop oor. Daarom sluit ek nog steeds af deur my dankbaarheidsjoernaal te deel. Hiermee wens ek vir elkeen ‘n wonderlike naweek toe:

“Feeling gratitude and not expressing it
is like wrapping a present
and not giving it.’’

Vriendelike groete

Naas Beets
SKOOLHOOF

Liewe Ouers/Voogde,

Neem asseblief kennis dat ons ongelukkig op Vrydag, 2 Augustus, afskeid van juf. Izél Storm neem. Sy het besluit om Suid-Afrika vir Budapest (Hongarye) te verruil om leerders se lewens daar ook aan te raak. Hierdie verlies het ons genoodsaak na besluite wat ons leerders se behoeftes eerste stel.

Graag deel ons vir deursigtigheid die volgende met julle:

• isiXhosa: Na vele gesprekke, het die Beheerraad en die EXCO besluit om isiXhosa-klasse wat leerders (gr. 1-6) elke tweede week by juf. Sharon Mabena ontvang, te staak. Hierdie instelling is reeds ‘n paar keer hersien om die vak so goed moontlik aan leerders te bied. Ons ondervind dat die taal (‘n derde taal) nie met slegs een periode elke tweede week regtig optimaal aangeleer kan word nie. Ons benodig dus meer tyd, maar met ons kurukulum-aanbieiding is daar nie tyd op die rooster om meer isiXhosa- klasse aan te bied nie. Ons is wel van plan om isiXhosa as ‘n buitemuurse aktiwiteit aan te bied, indien daar belangstelling is. Hierdie besluit tree dadelik in werking en die aanbieding sal aan die einde van hierdie kwartaal reeds tot ‘n einde kom.
• Digitale geletterdheid/biblioteek: Hierdie vak/leerarea word elke tweede week afwisselend met isiXhosa aangebied wat direk deur die besluit geraak word. Ons gaan nou weekliks van die begin van kwartaal 3 hierdie baie belangrike vak aan ons leerders bied wat verseker dat die volle koderingskurrikulum ook aangespreek sal word. Digitale geletterdheid is ‘n baie belangrike komponent van kodering en robotika. Tydens die onderrig van digitale geletterdheid fokus ons onder andere op digitale voetspoor en -veiligheid, navorsingsvaardighede en met die addisionele tyd wat nou toegeken word, sal leerders ook meer geleentheid tot ons ‘nuwe’ mediasentrum se biblioteekboeke kan ontvang. Daar is baie spesifiek op hierdie vak/leerarea gefokus toe ons besluit het om hierdie leerruimte op te gradeer.

Juf. Sharon sal nou vanaf 03 Augustus aangewend word om die volgende vakke van juf. Izél Storm te onderrig tot aan die einde van hierdie jaar:

• Gr. 5 Eng. HL
• Gr. 6 Eng. FAL
• Gr. 5 PSW (soos kw. 1 en 2), en
• Gr. 7 Aardrykskunde

Verder is die graad 7-klasse van drie na twee verdeel, aangesien die graadgroep baie klein (50 leerders) is. Daar sal dus nie ‘n registeronderwyser in Izél se plek aangestel word nie. Hierdie nuus is reeds verlede week met die graad 7-leerders en ouers/voogde gedeel. Hierdie reëling is ook net tot die einde van hierdie jaar van toepassing. Vanaf 2025 sal daar weer 3 klasse by graad 7 wees.

Baie dankie vir jul ondersteuning in die verband.

Groete
Naas Beets

Volg die skakel vir die amptelike brief.

• 31 Mei 2024
• Koste: R20
• Alle fondse gaan aan die ouetehuis