Kategorie: Algemeen

Sport- en kultuurfoto’s is nou beskikbaar. Kyk asseblief na die besonderhede hieronder vir aankope:

Waarom het ons besluit om weekliks inligting rakende boelie in die nuusbrief te plaas?

Wat kan ek as ouer doen om my kind meer weerbaar teen boeliegedrag te maak? Wat kan ek binne hulle leefwêreld beheer en wat nie? Wat kan ék doen om my kind te beskerm teen seerkry en struikelblokke? In hoe ‘n mate kan ék besluit wat ek wil toelaat wat van die wêreld se kant op my kind gelaai en soms “gegooi” word wat my kind potensieel emosioneel kan laat struikel?

Ongelukkig is daar nie ‘n kitsoplossing nie. Al wat jy as ouer in sekere situasies régtig kan beheer, is om jou kind se emosionele weerbaarheid te ontwikkel; om lewensvaardighede aan te leer wat hulle vir die res van hulle lewe kan toepas in watter situasie hulle ookal mag wees. En om dáár te wees sodat hulle nie alleen voel en broei rondom sekere emosies en vrae wat hulle verwar of trauma mag veroorsaak nie.

Waar begin ‘n mens as ‘n ouer? ‘n Goeie vertrekpunt mag wees om jou kind bewus te maak van “wat sê ek vir myself in my kop?” Onthou, dit is nie net ons as volwassenes wat moet baklei teen daardie interne kritiese stemmetjie nie. Glo my, kinders sukkel ook daarmee. Daarom: hoe jonger jy jou kind leer om daardie stem te “beheer”, hoe gelukkiger en meer selfvertroue sal jou kind hê. Onthou: as óns as ouers nie vir ons kinders daardie vaardigheid aanleer nie, wie gaan dit vir hulle leer?

Hoe verduidelik ek “selfspraak” aan my kind? Hier is ‘n lekker praktiese manier waarop jy dit dalk kan

benader afhangend van die ouderdom van jou kind. Begin deur jou kind daarvan bewus te maak dat gedagtes wel beheer kan word. Noem dat ons brein se stemmetjie van binne af gaaf kan wees en soms ‘n regte boelie kan wees. Maak jou kind daarvan bewus dat hy/sy beheer het oor hoe sy dink en voel.

Verduidelik dat ons almal se gedagtes twee kante het: ‘n “beste-maat(jie)-kant” en ‘n ”boelie-kant.”Hierdie laaste kant hou niks van jou nie en dit is vir hulle lekker om jou hartseer en ongelukkig te sien.

‘n Wonderlike tegniek om te gebruik is humor. Dit is ‘n tegniek wat heeltemal onderskat word en wat die angel uit ‘n plofbare situasie haal, alles ligter maak en dikwels ‘n ander perspektief gee. Besluit saam met jou kind wat hy/sy elke kant wil noem … hoe snaakser die naam, hoe beter. Veral die “boelie-stem”. ‘n Voorbeeld mag wees: jou kind kom moedeloos van die skool af en die eerste ding wat hy/sy sê is: “Ons skryf Vrydag ‘n Wiskundetoets. Ek verstaan níks nie, ek gaan definitief dop en dan gaan Meneer sien hoe dom ek eintlik is” … Jou reaksie kan wees: “Ag nee, nou hoor ek Rosie die Rot (negatiewe gedagtes) se stem. Het jy al ooit ‘n Wiskundetoets gedop en het jy al ooit gaan toets skryf as jy nie seker gemaak het jy verstaan nie alles nie? Kom ons maak ‘n plan!”

Of jou kind maak ‘n opmerking: “Sjoe, dit het vandag so goed gegaan met my mondeling. Ek is so trots op myself.”

Jou reaksie: “Ag ek is so bly ek hoor dit is Liewe Lolla wat daar praat … dalk moet jy meer na haar luister, want dit klink vir my sy jok nie vir jou nie en sy hou van jou.”

Leer jou kind: BE YOUR OWN BIGGEST FAN … En dan pas ons dit sommer ook op onsself toe!

Marike Badenhorst

Welkom by die splinternuwe Suidooster blog. Ons is opgewonde om hierdie moderne weergawe van ons geliefde skoolkoerant met julle te deel!

Kliek hier vir ‘n lusmaker: ‘N NUWE JAS VIR DIE SUIDOOSTER

Hier is hoe jy kan inteken:

Gaan na hierdie skakel: SUIDOOSTER
Gebruik jou JvRKiek intekenbesonderhede.

Indien jy enige intekenprobleme ervaar, stuur gerus vir Megan ‘n e-pos:
megan@jvrprim.co.za

Het jou kind hulp nodig met eksamenvoorbereiding?
Drie van ons oud-leerders is beskikbaar om kinders met eksamenvoorbereiding te help. Al drie was Top 10 studente vanaf laerskool en het gematrikuleer aan Hoërskool Jan van Riebeeck. Hulle studeer tans en is reeds vanaf November beskikbaar om enige tyd van die dag te help. Lesse kan by die laerskool, by ‘n kantoor oorkant die skool of aan huis van die leerder aangebied word.

Tariewe is R100/uur

Kontak hulle gerus:
Ilse de Lange (matriek 2020, studeer B.Sc.) beskikbaar vanaf 7 Nov, 0764612317 (slegs Whatsapp)
Lené Vorster (matriek 2022, studeer BA) beskikbaar vanaf 16 Nov, 0793359317
Thea de Lange (matriek 2022 studeer Arbeidsterapie), beperkte beskikbaarheid vanaf 22 Okt, volle beskikbaarheid vanaf 15 Nov, 0722186060

Soos ons die vorige keer genoem het, is dit belangrik dat my kind PRESIES weet wát boelie is. Ons het genoem dat ons dit in eenvoudige taal só vir ons kind kan verduidelik:

Boelie is:
Iets wat jou laat sleg voel oor jouself en jou hartseer maak
Iets wat ‘n maatjie opsetlik en aspris doen
Iets wat vir jou moeilik is om op jou eie te stop
Iets wat oor en oor gebeur
Iets wat nie by die skool mág gebeur nie

Met bogenoemde in gedagte, wat moet ek doen as my kind ontsteld by die huis kom en sê hy/sy word geboelie? Ouers kan op een van twee maniere reageer. ‘n Mens kan dit eerstens afmaak as: “Ag, jy verbeel jou; dit kan nie so erg wees nie!”… Of ‘n mens kan sê: “Ek gaan onmiddellik sy/haar ouers bel…” Dalk help nie een van hierdie twee reaksies op daardie oomblik regtig jou kind nie.

So, wat moet ek doen? Die volgende mag help:

1. Wys jy gee om. Net om na jou kind te luister wat hulle ookal met jou wil deel, help al klaar. Dit bemagtig jou kind om die volle storie met jou te deel.

2. Kry al die feite. Wanneer jy min of meer kan aflei wat gebeur het en jou kind minder ontsteld is, kry die spesifieke feite.
– Waar gebeur dit?
– Wanneer?
– Hoe gereeld?
– Wat presies word gesê of gedoen?

Ek gebruik gewoonlik die volgende drie riglyne om presíés die omvang van die situasie te probeer verstaan. Dalk kan dit jou as ouer ook help:
-Frekwensie: Hoe gereeld gebeur dit? ‘n Paar keer per dag? Een maal in die week wat verby is? Of was dit net een terloopse opmerking wat jou kind ontstel het?
-Intensiteit: Hoe “erg” is dit? Word jou kind élke pouse opsetlik uitgesluit? Wanneer en waar gebeur dit? Wat word gesê wat jou kind so seermaak?
-Duur: Hoe lank gebeur dit al?

3. Dokumenteer die feite. Skryf al die details neer. Probeer om ‘n tydslyn te skep: wat het waar gebeur en wanneer? As jy voel jou kind kan dit self hanteer, gaan saam met hom/haar deur die tydslyn en wat gebeur het.

4. Deel die inligting met iemand wat jy vertrou. Vra vir terugvoer nadat jy dit gedeel het. Het jy by die feite gebly? Raak jy te emosioneel wanneer jy dit vertel?

5. Vergewis jou met jou skool se boeliebeleid. Dit sal jou die riglyne gee watter stappe jy moet volg om dit te rapporteer en wie jy om hulp kan vra. Deel hierdie inligting met jou kind sodat hulle weet die skool het ook reëls in plek en glo óók hierdie gedrag mag nie toegelaat word nie.

6. Monitor die skool se reaksie. Indien die boeliegedrag voortgaan, dokumenteer nuwe insidente en lig die skool onmiddellik hiervan in.

7. Maak jou kind bewus van boeliegedrag en praat daaroor. Dit gaan jou kind help om te leer watter gedrag is aanvaarbaar en watter gedrag is nie.

8. Bly ingelig en op hoogte van jou kind se gedrag en leefwêreld. Probeer monitor hoe jou kind optree in verskillende situasies wanneer jy by is. Weet jy wie jou kind se maats is? Ken jy die ouers? Wat doen jou kind in sy/haar vrye tyd? Hoe en wanneer gebruik jou kind sosiale media? Volgende keer gesels ons oor wat ons as ouers nog kan doen om ons kind emosioneel weerbaar te maak.

Marike Badenhorst
Opvoedkundige Sielkundige

Week drie van die laaste kwartaal skop met ‘n opwindende kultuurweek af wat vir ons leerders en ouers/voogde aangebied word. Hierdie inisiatief is deel van die skoolbestuur en Beheerraad se visie om die kwaliteit van die kultuuraanbieding by die skool te bevorder en te promoveer. Ek is seker dat julle sal saamstem dat kultuur ‘n opvoedkundige bondgenoot is en dat dit gelykwaardige ruimte, tyd en erkenning soos akademie en sport binne ons skoolopset moet geniet. Dus wil ons skool ‘n wye verskeidenheid van kultuuraktiwiteite aanbied waarin leerders hulself kan uitleef en hul talente ontwikkel.

Die kultuurweek het die volgende aktiwiteite ingesluit: 

Dag 1: Ons was baie bevoorreg om op Maandag, 14 Oktober, die Kaapse Filharmoniese orkes te ontvang en hulle het hul puik produksie Pieter en die Wolf vir ons leerders in die saal aangebied.  Dit was voorwaar ‘n verrykende belewenis vir die leerders en personeel. 

Dag 2:  Op Dinsdag, 15 Oktober, is die kultuurweek verder gevier met ‘n kunsuitstalling van ons leerders se kunswerke in die personeelkamer en skoolgange. Ons het ook ‘n stylvolle Dankie-sê-funksie die aand aan al ons donateurs en borge wat oor die afgelope paar jaar ruim donasies asook kosbare tyd aan die skool en Huppelland geskenk het om skoolinfrastrukture, tegnologie, kurrikulum- en dienslewering vir ons leerders op te gradeer en te verbeter. Agtergrondmusiek is die aand deur mnr. Ben en sy orkes verskaf. Die hoogtepunt van die glansfunksie was vir seker die puik kultuuroptredes tydens die aand:

• Junior koor onder leiding van mnr. Ben. 
• Ruben de Ridder met ‘n klavieritem. 
• Adigail Theron met ‘n kitaaritem asook ‘n duet saam met mnr. Brent. 
• Strykensemble-optrede bestaande uit Coreen Scholtz, Jacob Venter, Peter More, Anabella en Daniella Boshoff en juf. Shannon wat saamgespeel het. 
• Sang duet deur Danielle Boshoff en Karu Rademeyer wat deur mnr. Ben begelei is. 
• Leah de Kock met ‘n klavieritem. 
• Senior koor onder leiding van Leon Starker. 

Baie dankie en baie geluk aan ons hoofseun en -dogter, naamlik Frank van der Walt en Karu Rademeyer, wat soos wafferse en ervare seremoniemeesters opgetree het om die gladde verloop van die program te verseker. Ons spesiale gaste het die aand ook die geleentheid gekry om ons leerders se indrukwekkende kunswerke in die personeelkamer en skoolgange te besigtig, asook die nuwe mediasentrum en Zen Den te besoek. Ons kunsleerders is so talentvol en hul beeldende kunswerke is merkwaardig. Ek bewonder hul kreatiwiteit en skeppende vaardighede. Maak gerus ‘n plan om die pragtige kunswerke van ons leerders te besigtig. 

Dag 3: Op Woensdag, 16 Oktober, is daar ‘n redenaarswerkswinkel deur Lindie Strydom vir die Gr. 6 en 7-leerders en hul ouers in die mediasentrum aangebied. Bianca Flaunders het ook vir die Gr. 1 – 3-leerders die opwindende produksie ‘Pampoenpit voel ‘n Beat’ in die nasorgsaal aangebied. Haar energie en passie was opvallend en die leerders het dit terdeë geniet. 

Dag 4: Op Donderdag, 17 Oktober, is ‘’Mutton Hour’’ deur die bekende akteurs Cintaine Schutte en Wilhelm van der Walt vir die Gr. 6 en 7-leerders aangebied. Dit was ‘n absolute vreugde om hierdie akteurs in aksie te beleef! Die ISF-kultuurkonsert het in die saal vanaf 18:00 plaasgevind. Ons is so dankbaar aan elkeen wat hierdie aand bygewoon het.  

Dag 5: Die GF-kultuurkonsert vind op Vrydag, 18 Oktober, vanaf 08:00 – 09:00 plaas. Drum Cafe bied ‘n opwindende en interaktiewe trommesessie vir die Gr. 4 en 5-leerders vanaf 11:00 – 12:00 aan. 

Laat my toe om juff. Marinda, Rolene en hulle span hartlik te bedank vir die uitstekende reëlings van die kultuurweek. Kultuur is die afgelope week behoorlik omhels en gevier. Mag die Kunste vir altyd by ons skool gevier word. Dankie ook aan juf. Rentia wat soveel moeite met die kunsuitstalling gedoen het. 

Ons junior – en senior kore het op Saterdag, 12 Oktober, tydens HS Jan van Riebeeck se PlezierMarkt opgetree. Baie geluk met hul onderskeie puik optredes tot groot vermaak van die markgangers. Ons kore het in ‘n baie kort tydjie so verbeter met die kwaliteit samesang wat hulle lewer. Baie dankie aan juf Rolene en mnre. Ben en Leon Starker vir jul harde werk en passie vir koorafrigting. Geluk met jul nuwe keuses van musiekstukke, dit verleen sprankel en bevorder positiewe koorgees. Baie geluk ook aan HS Jan van Riebeeck met die puik aanbieding van die PlezierMarkt. 

Dit is dan my eer en voorreg om die volgende Gr. 6-leerders hartlik geluk te wens met hul merkwaardige prestasie tydens die Gr. 6 English Home Language Spelling Bee kompetisie waar die volgende vier leerders met die louere weggeloop het:

• Katryn Silvis (eerste plek) 
• Dané Olivier (tweede plek)
• Amelie van der Walt (derde plek)
• Johannes Mouton (vierde plek) 

Ons was die enigste Afrikaanssprekende skool wat aan die Engelse spelkompetisie deelgeneem het, wat dus die bogenoemde leerders se prestasie so merkwaardig maak. Baie dankie aan juff. Charlene en Mardry wat die vier bogenoemde leerders help voorberei en bygestaan het. Julle maak ons baie trots! 

Baie geluk aan Ruben Eksteen wat ‘n onoorwonne 102* lopies op Dinsdag, 15 Oktober, tydens ‘n o/13 krieketwedstryd teen LS Kampsbaai aangeteken het en ook sommer in die proses vyf paaltjies geneem het. Dit is nie aldag dat ‘n speler ‘n honderdtal in krieket aanteken asook vyf paaltjies neem nie, en dit in ‘n T20. Dit is ‘n merkwaardige prestasie Ruben, ons is baie trots op jou! 

Ek sluit dan die derde week van die kwartaal op ‘n dankbare noot af met die onbekende aanhaling oor die lewe en ek wens vir julle ‘n wonderlike naweek saam met julle gesin en/of vriende toe. 

“A good life is when you assume nothing,  
do more, need less, smile often, dream big,  
laugh a lot and realize how blessed you are for what you have!’ 

Vriendelike groete,
Naas Beets 
SKOOLHOOF 

Carla de Beer kom op Dinsdag, 22 Oktober 2024 by ons kuier om met ouers te gesels oor tieners en die gebruik van sosiale media.
Koop jou kaartjie op Karri! Jy wil dit nie mis loop nie. 

Respek is een van ons kernwaardes by Laerskool Jan van Riebeeck. Ons fokus op positiewe versterking en poog om die leerders te lei om daagliks hierdie waarde tydens alle skoolaktiwiteite (klas, speelgrond, kampe, uitstappies, wedstryde) uit te leef. Oor die algemeen leef ons Jannies hierdie waarde daagliks uit, maar daar is tog enkele leerders wat moet besef dat hul aksies spesifieke gevolge het.

Ons was ongelukkig genoodsaak om ‘n dissiplinêre proses op te stel in die geval waar ‘n leerder herhaaldelik oortree en nie gehoor gee aan vermaning nie. In so ‘n geval sal die registeronderwyser in die vervolg ‘n vorm oopmaak vir die spesifieke leerder sodat die oortredings deeglik aangeteken kan word. Indien die leerder se gedrag nie verander nie, sal die ouer/voog ‘n e-pos eers van die registeronderwyser en op ‘n latere stadium, indien nodig, van ‘n dissiplinekomiteelid ontvang. In hierdie e-pos sal die ouer/voog ingelig word van ‘n oortreding(s) en hul ondersteuning en hulp sal ook versoek word. Op hierdie stadium sal mnr. Beets die vorm onderteken en hy of die komiteelid ‘n gesprek met die leerder voer. Die leerder sal as straf ‘n tweede pouse (sal wel tyd kry vir eet en badkamer toe gaan) verbeur of ontneem word van ‘n skoolaktiwiteit bv. ‘n uitstappie of sportwedstryd. In uitsonderlike gevalle sal ‘n vergadering met die ouer(s)/voog(de), registeronderwyser, mnr. Beets en ‘n dissiplinekomiteelid belê word.

Tipiese oortredings wat op hierdie vorm aangebring sal word is: herhaaldelike versteuring van klasse, huiswerk wat herhaaldelik nie gedoen word nie, vloektaal, vandalisering van skooleiendom, bakleiery, onwelvoeglike gebruik van sosiale media, swak sportmanskap, oneerlikheid (tydens toetse/steel/jok), nalatigheid met skootrekenaars en ernstige disrespek teenoor ‘n personeellid of ‘n mede-leerder.

Kyk asseblief mooi na die kleredrag wat leerders Maandag moet saambring vir sportfoto’s.

Kliek hier om die PDF dokument oop te maak:

Die biblioteek sal oop wees vir leerders wat wil kom lees, huiswerk of take doen. Sien die beskikbare tye hier onder:

 Na afloop van elf besige en opwindende weke kom kwartaal 3 vandag amptelik tot ‘n einde met die sluit van die skole vir ‘n kort vakansie voordat ons die finale kwartaal van die jaar aanpak. Ek hoop en vertrou dat julle ook kwartaal 3 saam met jul kind/ers terdeë geniet het.  Dit is vir my ‘n riem onder die hart om daagliks te sien hoe gelukkig die leerders by die skool is. Hulle vrymoedigheid om daagliks by my kantoor te kom inloer om te groet of net om seker te maak dat ek, soos hulle dit stel: ‘’okay’ is’, is seker die beste byvoordeel wat ek, as skoolhoof, voor kon vra. 

As ons vinnig oor die afgelope kwartaal terug kyk en ‘n kort refleksie sou wou doen, staan die volgende vir my uit: 

• Heelwat sportgeleenthede is vir die wintersporte (netbal, hokkie en rugby) die afgelope twee kwartale suksesvol gereël. Al het daar hierdie winterseisoen verskeie van die wedstryde, as gevolg van die gure weer uitgereën, is daar vanjaar ‘n rekord totaal van 743 wintersport-wedstryde gespeel. Dit is 157 wedstryde meer as gedurende 2023 en 215 wedstryde meer as 2022.  Dit is beslis ‘n pluimpie vir die sportkantoor. Baie geluk dan ook aan ons o/13A-dogtershokkiespan en ons o/7A-seunshokkiespan wat die seisoen onoorwonne afgesluit het.  Baie geluk aan die kaptein van ons eerste dogtershokkiespan, Hila Hertzog, en hul afrigters mnr. Leon en juf. Suné met die merkwaardige prestasie. Sportdeelname en -prestasie het oor die afgelope 3 jaar aansienlik by ons skool verbeter. Ons sportplan en -visie is stadig maar seker besig om vrugte af te werp. Daar is vir seker nog baie ruimte vir verbetering en soos ons weet, word Rome ook nie in een dag gebou nie. 

• Die aanbied van ‘n baie suksesvolle mini-sportdag (o/7 – o/9 rugby & netbal) op Saterdag, 03 Augustus. Vanjaar was dit ‘n perd van ‘n ander kleur, aangesien die sportdag hierdie jaar soveel groter was as in 2023 met 1 500 leerders wat aan 208 wedstryde deelgeneem het. Vir seker het ons skool nog nooit so ‘n groot sportbyeenkoms aangebied nie. Die dag was uiters suksesvol weens puik beplanning, veerkragtigheid en deeglike uitvoering! Dit is ‘n bewys dat ons skool ook groot sporttoernooie effektief kan aanbied tot voordeel van ons leerders. 

• Die opening van die wêreldklas Zen Den waar daar gestreef word om ‘n veilige en kalm omgewing vir leerders wat sensories oorlaai of oorweldig voel, te skep. Ons doel met die Zen Den is om die nodige wegbreekruimte gedurende skooltyd te skep waar leerders nodig het om hulle sintuie te reguleer en van hul angstigheid ontslae te raak. Hulle innerlike kalmte kan hier herstel word, sodat hulle weer rustig kan raak om verder in die klaskamer te funksioneer. Die sentrum bevorder selfregulering, emosionele welstand en akademiese sukses deur ‘n holistiese benadering wat die uniekheid van elke leerder erken en ondersteun. Om op te som, kan Zen Den gesien word as ‘n ‘toevlugsoord’ waar leerders kan selfreguleer, herlaai en floreer. Hier wil ons ook leerders met unieke uitdagings rakende neurodiverse prosessering ondersteun en hulle met die nodige vaardighede bemagtig om die wêreld met selfvertroue vierkantig in die oë te kyk. 
  

• Ons tweejaarlikse skoolkonsert is definitief nie net die hoogtepunt van die kwartaal nie, maar vir seker van die jaar, veral as ‘n mens die leerders se opinie moes kry oor dit wat vir hulle spesifiek die kwartaal uitgestaan het. Ons skoolkonsert is baie gewild en as gevolg van die aanvraag van kaartjies, is dit vanjaar oor ‘n tydperk van twee weke aangebied.   ‘’Somewhere over the Rainbow’ verdiskonteer ‘n puik produksie en elke item is aand-vir-aand luidkeels deur die gehoor toegejuig. Die liedjies wat vir elke graad en klas gekies is, is mooi afgewissel van moderne musiek tot musiek wat die oumas en oupas mee kon assosieër. Dus is daar vir oud en jonk voorsiening gemaak om die konsert terdeë te geniet. Die uitstekende beligting en klank, die asemrowende kostuums en professionele grimering het elke aand perfek afgerond. Ons streef in alles wat ons by die skool doen na uitnemendheid en dit is presies wat ook tydens die konsert gebeur het. Baie dankie aan al ons mammas se hulp met die grimering en maak van die ongelooflike kostuums. Die detail daarvan was verstommend. 

• Op Saterdag, 14 September, het 19 van ons leerders aan die jaarlikse WOW-spelkompetisie se provinsiale rondte te Wellington deelgeneem en soos oudergewoonte stof in die ander skole se oë geskop. Baie geluk aan die volgende drie leerders wat vir die Nasionale Kompetisie op 28 September te Stellenbosch gekwalifiseer het: 

• Graad 4: Maia du Toit 

• Graad 6: Katryn Silvis en Amelie van der Walt  

Baie dankie juf. Ilse-Marie vir al jou hulp in die verband. 

• Op kulturele gebied oefen biede die senior- en junior koor die afgelope kwartaal baie hard onderskeidelik onder die bekwame leiding van Leon Starker en mnr. Ben om slaggereed vir verskeie optredes gedurende volgende kwartaal te wees. Ons senior koor het veral die afgelope kwartaal baie hard aan stemtegnieke gewerk om helder koorklank voort te bring asook om stembou, gehoorontwikkeling, musiekwaardering en koordissipline aan te spreek. Ons sien baie uit na beide kore se optredes in kwartaal 4. 
  

• Vandag ontvang elke leerder ook hul skoolrapport om erkenning aan hul harde werk en toewyding die afgelope kwartaal te gee. Dit was ‘n groot voorreg om elke rapport te kon teken met ‘n baie kort persoonlike boodskappie vir elke leerder. Graag wil ek vir al ons leerders en opvoeders spesiaal gelukwens en hartlik bedank vir die kollektiewe poging tot die suksesvolle akademiese-, kulturele- en sportprestasies tydens kwartaal 3. Vandag is die Top 10 Gr. 7-akademiese presteerders vir kwartaal 3 in die saal aangewys. Baie geluk aan die volgende leerders (alfabetiese orde) wat elkeen ‘n spesiale sertifikaat ontvang vir hul harde werk en toewyding: 
  Daniella Boshoff 
  Izzy du Plessis 
  Hila Hertzog 
  Anna Louw 
  Isabella Marais 
  Michaan Naylor 
  Jessica Schincariol 
  Emma Snijders 
  Ané Swanepoel 
  Stella Zulch 

Bogenoemde is maar enkele hoogtepunte van ‘n baie suksesvolle kwartaal. Ek glo dat die hele skoolgemeenskap uitsien na die welverdiende vakansie, al is dit baie kort gaan dit help om die spreekwoordelike batterye te herlaai voor ons die pylvak van die laaste kwartaal aandurf.  

Op Sondag, 15 September om 14:00 het Cape Ballet Centre ‘n ongelooflike produksie, naamlik “Cirque Du Ballet’’ in die Baxter aangebied. Heelwat van ons skooldogters het aan die wêreldklas produksie deelgeneem. Ek was so bevoorreg om dit te kon bywoon met kaartjies wat die dogters spesiaal vir my en my vrou uit hul eie sakke gekoop het – dit was baie kosbaar! Opvallend was ook die ondersteuning van ons skoolgemeenskap tydens die vertoning met verskeie van ons mammas en dogters wat dit bygewoon het om die Jannie-deelnemers te ondersteun. Weereens ‘n bewys van die spesiale etos, ondersteuning, aanmoediging en omgee binne ons skoolgemeenskap. 

Laat my asseblief toe om ons toegewyde personeel hartlik te bedank vir hul harde werk en toegewydheid, maar veral vir hul omgee-harte om seker te maak ons Jannies kry geleenthede om hul volle potensiaal te bereik. Graag wil ek my Bestuurspan (EXCO) hartlik bedank vir hul harde werk en toegewydheid die afgelope kwartaal om die skool operasioneel uiters effektief te help bestuur. Hartlike dank aan ons dinamiese Beheerraad vir hul kosbare tyd en puik insette om te verseker dat Laerskool Jan van Riebeeck van krag-tot-krag sal gaan. Laat my ook toe ons voorsitter van ons Beheerraad, Merwe Scholtz, hartlik geluk te wens met sy verjaardag van 19 September. Mag dit ‘n geseënde lewensjaar wees vol voorspoed en sukses. Baie dankie vir wat jy alles as Voorsitter van die Beheerraad vir ons skool doen en beteken! 

Graag sluit ek af met ‘n uiters dankbare hart teenoor ons ouers/voogde wat ons weereens die afgelope kwartaal so lojaal ondersteun het. Ek waardeer jul betrokkenheid en omgee by die skool, maar veral in jul kinders se lewens. Betrokke ouers/voogde verseker suksesvolle skole wat altyd van krag-tot-krag sal gaan. Mag ons die spesiale etos en kultuur om net jouself te wees by ons trotse skool nog tot in lengte van dae koester. Dus sluit ek met die volgende bekende aanhaling van G.K. Chesterton af en mag ons altyd ons spreekwoordelike dankbaarheidsbrille dra. 

Ek wens vir julle ‘n wonderlike vakansie toe. Veilig reis! Ek sien uit om julle almal op Dinsdag, 01 Oktober, weer terug by die skool te verwelkom. Dra asseblief my groetwense aan jul kinders oor. 

‘’When it comes to life 
the critical thing is  
whether you take things for granted  
or take them with gratitude.’’ 

Vriendelike groete, 
Naas Beets
SKOOLHOOF 

Here is a special message for the amazing students who gave such an amazing donation that came from their hearts. They are an example to each one of us.

We are incredibly grateful to have received your generous donation of dog and cat food, bedding, treats, and other essential items for the animals in our care. Your kindness and compassion have made a significant impact on the lives of the animals at Cape of Good Hope SPCA. Thanks to you, they will not only have full bellies but also warm and comfortable bedding, as well as some special treats to enjoy.

It is truly heartwarming to see young students like you taking action to make the world a better place for animals. Your donation shows that you care deeply about their well-being, and that makes all the difference in their lives. Every time they enjoy a soft bed or wag their tails in excitement for a treat, they are feeling the love and care you have shown them.

On behalf of our entire team and, of course, all the animals who are benefiting from your kindness, thank you. Your generosity and thoughtfulness mean the world to us, and we are truly inspired by your efforts.

Please know that your support has brightened many days for the animals and brought hope to their future. We are lucky to have such compassionate young people like you in our community.

With heartfelt gratitude,

MOYO NDUKWANA
Chief Executive Officer

Sien die oorspronklike brief HIER