Kategorie: Algemeen

Gedurende die afgelope vakansie het ‘n groep Graad 7’s, saam met hulle ouers, en sommige saam met hulle gesinne, drie heerlike aande op die walle van die Breederivier deurgebring.

Dit het als begin met ‘n beplande roei op die Oranjerivier, iets wat nou al ‘n instelling by die Graad 7-Jannies is. Toe die Covid-pandemie ‘n stokkie daarvoor steek, is “Plan B vir Breede” opgeroep! Hierdie plan het so goed uitgewerk, dat ‘n paar ouers reeds voorgestel het dat dit deel van die Jannies-kalender word!

Ons het heerlik geroei, al het dit soms geknor om die ‘crocs’ reguit te stuur wanneer die wind van voor gekom het! Die stroomversnellings het gesorg vir ekstra opwinding: ‘n paar van ons is agteruit deur ‘n paar stroomversnellings. Soms was daar ‘n noodgedwonge swem wanneer die draaie nou net nie perfek wou uitwerk nie, maar ons is daardeur! Daar was ook ander lekker aktiwiteite vir die kinders, soos ‘abseil’, tafeltennis en snoeker. Saans het ons tot laat om die kampvuur gekuier. Louis Boshoff en LJ le Roux het ons op die laaste aand bederf met die heerlikste braaivleis – dankie, julle is voorwaar “Braaimeesters”!

Dankie aan almal wat vasgebyt het met die reëlings deur al die onsekerhede oor die Oranje-roei, tot op die Breederivier!!

Kliek HIER vir die Skoolfooie vir 2021, goedgekeur en aanvaar deur die ouers tydens die Begrotingsvergadering gehou op 4 November 2020.

Loer gerus na hierdie kwartaal se elektroniese Suidooster, Die Oosie-uitgawe. Blaai gerus na bladsy 6 en kliek op die foto vir ‘n video waar mnr. Oosthuizen vir oulaas deur die skool se gange loop.

Daar kan nog geen foto’s bestel word nie. Die skool ontvang eers die voorbeeldfoto’s vanaf die fotograaf. Daarna word dit huis toe gestuur. Ouer(s)/voog(de) is ook welkom om op die fotograaf se webtuiste te gaan loer wanneer foto’s gereed is. Hou die nuusbriewe gedurende kwartaal 4 dop vir verdere inligting.

Ons gaan vroeg in volgende kwartaal (4 & 5 November) weer ‘n geleentheid vir ouerbesoeke bied. Maak slegs ‘n afspraak indien jy voel dat ‘n opvolgvergadering nodig is of indien jy nie met hierdie kwartaal se ouerbesoeke ‘n afspraak gekry het nie, maar graag jou kind se onderwyser wil sien.

Gr.1-3 afsprake: Kliek HIER en vul die vorm in.

Gr.4-7 afsprake: Kliek HIER en vul die vorm in.

Op 15 Oktober 2020 het die Jannies ons trots gemaak met hulle #stopboeliegedrag plakkate. Die hele skool het aan die stop boelie opstand deelgeneem om die week se tema, vriendskap, te vier. Boelie is een van die grootste probleme in laerskole en ons is baie bly om te sien hoeveel Jannies passievol is om hierdie probleem te stop. Natuurlik word al die plakkaat-kunstenaars se harde werk waardeer en daar was selfs twee baie lekker pryse vir die beste plakkate. Jacques du Toit en Nevieke Bender het pryse gewen vir hul treffende plakkate. Welgedaan, Jannies! Baie dankie vir al jul moeite en harde werk!!! Bly gaaf, bly postitief en onthou: #stopboeliegedrag

Vanaf Maandag, 2 November 2020, sal die dra van somerdrag verpligtend wees. Ons het ook besluit om die sivviedag van Woensdae te staak en eerder ‘n ekstra dag te implementeer waarop leerders LO-klere dra. Die klasonderwyser sal saam met sy/haar klas besluit watter dae skool- en LO-klere gedra word aangesien daar verskillende dae is waarop LO aangebied word. Neem asb. kennis dat die korrekte somer- en LO-klere gedra moet word. Die einde van die maand sivviedag sal weer in werking tree en op die web-kalender aangedui word.

1. Ons vertrek vanaf die skool om 06:00, Dinsdag, 6 April 2021 en sal weer Sondag, 11 April 2021 terug wees.
2. Slegs die Gr.7’s van 2021 en een ouer/voog word toegelaat. Elke leerder moet saam met ‘n volwassene roei.
3. Vul die VORM VOOR 21 Oktober 2020 in.
4. Betaal ‘n deposito van R1,000 voor 31 Oktober 2020 in die skool se rekening (verwysing: OR en jou kind se naam, bv. OR JOHANN LOUBSER).
5. Paspoorte moet tot NOVEMBER 2021 geldig wees. Onverkorte (“unabridged”) geboortesertifikate van kinders word vereis.
6. Vir meer inligting of navrae, verwys na die brief aan die Graad 6-ouers hieroor of stuur gerus ‘n e-pos aan Cobus Loubser (cobusloubser1@gmail.com).

Om die bemarkingsvideo te kyk wat Wim Vorster van die 2019 toer gemaak het, kliek HIER.

Hierdie maand se waarde is VERANTWOORDELIKHEID. Kliek HIER vir ‘n oulike video oor verantwoordelikheid.

Bespreek nou vir volgende week – vul jou naam HIER in. As jy sukkel of vrae het, kontak asseblief vir Karien Zulch by 0834450980 of by jvrveiling2020@gmail.com. Die katalogus sal vroeg volgende week beskikbaar wees en die aanlynveiling sal einde Oktober plaasvind.

Reëlings:

1. As gevolg van die fotodag sal daar GEEN LO-prakties op Maandag, 19 Oktober, wees nie.
2. Leerders moet asb. betyds by die skool wees, want ons begin al om 08:00 met die neem van die foto’s.
3. Leerders mag slegs somerdrag dra.
4. Maak asb. seker dat jou kind(ers) se hare en naels netjies en skoon is.
5. Die laaste dag vir fotobestellings is Maandag, 9 November 2020.

Aangesien die leerders op ons skoolterrein op- en afgelaai word, voel hulle (en ons almal) veilig en meer ontspanne en hou nie noodwendig padveiligheid en -reëls in ag nie. Hierdie ‘veilige’ gevoel wat ons as vanselfsprekend aanvaar, kan so maklik in ‘n onnodige besering ontaard. Moedig asseblief jou kind(ers) aan om slegs van die voetoorgang gebruik te maak wanneer hulle op- of afgelaai word en dat niemand oor die ‘pad’ mag hardloop nie. Die onderwysers sal met sy/haar registerklas ‘n gesprek hieroor voer. Baie dankie vir die versigtigheid waarmee jy bestuur en dat ons leerders se veiligheid prioriteit geniet. Ek doen ‘n beroep op elkeen om asseblief nie op die teer te parkeer wanneer leerders op- en afgelaai word nie en dat alle motoriste en veral die vloei van ons skoolverkeer gerespekteer sal word.

Ons herinner julle dat Woensdag, 7 Oktober, se sivvies wegval. Leerders sal volgende week slegs op die 9de sivvies kan dra. Kliek op die foto vir ‘n oulike video wat jou wys hoe om ‘n blommekransie te maak.