Kategorie: Algemeen
Baie dankie aan elkeen wat ons aflaai- en optelbeleid so mooi volg. Ons doen ‘n beroep dat jy asb. versigtig moet wees waar jy jou kind aflaai. Kinders dink en kyk nie mooi nie, hulle hardloop sommer net voor motors in, want om skool toe te kom is hul missie vir die oggend. Maak seker dat jou kind op ‘n veilige plek afgelaai word. Gesels met hulle oor padveiligheid. Ons kinders is vir ons uiters kosbaar en ons wil hulle veilig hou.
Groot opgewondenheid heers onder die personeel om Maandag, 15 Februarie 2021, ons Jannies te verwelkom. Baie welkom ook aan al ons nuwe ouers by Huppelland en die Laerskool. Wees verseker julle het die beste keuse vir jul kind gemaak en my beste wense vergesel julle vir die nuwe reis.
Alhoewel die aanvang van 2021 ook vreemd is, is ons skool bevoorreg om teen 100% kapasiteit te open, onderhewig aan streng Covid-19 protokol. Ons almal se wens is dat ons so spoedig moontlik kan terugkeer na ‘n tipe normaal, want die buitengewone omstandighede bring dikwels vreemde uitdagings. Daarom wil ek graag Helen Keller aanhaal: ‘’Keep your face to the sunshine and you cannot see a shadow’’. Ek nooi dus die ouers en skoolgemeenskap uit om saam met ons as personeel nie deur die pandemie ontmoedig te word nie. Ons moet eerder mekaar inspireer en onderskraag om uitdagings op ‘n kreatiewe wyse te bowe te kom. Ons moet voortbou en uitreik na gemeenskappe wat swaar deur die pandemie getref is.
Ek is vanaf 1 Januarie in die stoel, voel baie tuis en alles verloop klopdisselboom. Ek was bevoorreg om reeds in die kort tydjie heelwat ouers en leerders te ontmoet en beter te leer ken. Baie dankie vir jul ondersteuning die afgelope tyd en dat julle jul kind/ers aan die skool toevertrou. Wees verseker dat ons alles in ons vermoë doen om die leerders en personeel veilig te hou.
Die 100ste bestaansjaarvieringe het stil-stil begin, maar dit is besig om momentum te kry. Vanaf verlede jaar is daar baie moeite gedoen om die sigbaarheid van die 100ste verjaardag duidelik te maak (sien foto 1, 2 & 3). ‘n Groot dankie word aan Rentia (kunsjuffrou) oorgedra vir die manier hoe sy met ons leerders se pragtige kuns die skool verfraai asook die trotse LS JvR 100-embleem wat sy op ‘n besondere manier in die skoolgange laat pryk.
Helecia Groenewald (musiekdepartement) het vir ons kore die volgende inspirerende Eeufeeslied geskryf en getoonset.
Soos Tafelberg uitkyk oor Kaapstad
So pronk ons skool fors en fier
Soos hy vasstaan in sy fondamente
So eer ons die eeu wat ons vier.
Jan van Riebeeck die beste skool
Jan van Riebeeck bo!
Jan van Riebeeck die mooiste skool
Jan van Riebeeck ONS skool!
Baie dankie Helecia, jy maak ons so trots!
Ter voorbereiding vir die jaar het ons opvoeders insiggewende opleiding (sien foto 4) rakende die volgende onderwerpe ontvang:
● Dispraksia/apraksia
● Inentings vir kinders en volwassenes
Ons doel is om voortdurende gefokusde opleiding aan ons personeel te bied om te verseker dat die standaard en kwaliteit van onderrig uitmuntend bly.
Graag wil ek ook vir Helpende Hand hartlik bedank wat die afgelope week 15 skoolrompies vir ons behoeftige leerders geskenk het (sien foto 5).
Baie dankie aan Huppelland en sy personeel wat op Maandag, 8 Februarie 2021, hul deure oopgemaak het. Sake verloop vlot en die kinders geniet hulle gate uit.
Neem asseblief kennis van die volgende:
1. COVID-regulasies en protokol:
Skooltye:
Skool begin:
Oranjespan kan tussen 07:15 – 07:30 skool toe kom en die blouspan tussen 07:30 – 07:45.
Uitkomtye:
● Graad 1 – 13:00
● Graad 2 – 13:15
● Graad 3 – 13:30
● Graad 4 & 5 – 14:00
● Graad 6 & 7 – 14:10
Siftingstasies:
● Graad 1 – 3 leerders word by hul klasse gesif.
● Graad 4 & 6: Snoepie
● Graad 5 & 7: Buite juf. Storm (gr. 7) se klas
Kleredrag en klerebank:
● Drie dae per week – skooluniform
● Een dag – LO-drag
● Vrydae- LS JvR 100-hempie
*die dae sal deur klasonderwyser bepaal word afhangend van dag waarop klas LO het.
Klerebanktye:
● Maandae- & Woensdaeoggende: 07:15 – 08:00
● Dinsdag- & Donderdagmiddae: 13:00 – 14:20
*Indien jou kind dringend voor Maandag, 15 Februarie 2021 skoolklere benodig, sal die klerebank op Saterdag, 13 Februarie 2021 vanaf 09:00 – 10:30 oop wees.
2. Skoolkwartale 2021
Nuwe skoolkwartale is reeds gekommunikeer.
3. Algemene Vervoervrywaring
Voltooi asseblief die algemene vervoervrywaringsvorm soos deur die klasonderwyser/graadhoof gegee. Hierdie vrywaringsvorm dien slegs in gevalle waar leerders direk na skool na die Conradieveld en/of HS JvR-veld direk na skool vervoer moet word om aan onderskeie sportoefeninge deel te neem. Sodra daar wegwedstryde, uitstappies, kampe, ens. plaasvind, sal ‘n spesifieke vrywaringsvorm met die vervoer duidelik uiteengesit, gestuur word.
4. Klasverteenwoordigers /OOV
Tradisioneel verkies ons klasverteenwoordigers, een per klas, tydens die inligtingsaand aan die begin van elke jaar. Weens die pandemie moet ons egter vanjaar die proses anders hanteer. Gedurende die jaar sal die klasverteenwoordigers betrokke wees by die volgende aksies:
● Fondsinsamelingsprojekte en funksies;
● Organisering van ouerhulp tydens skoolfunksies en byeenkomste
● Direkte kommunikasielyn met ouers in die spesifieke klasgroepe
Indien jy bereid is om as ‘n 2021-klasverteenwoordiger te dien, stuur asseblief ‘n e-pos met die volgende inligting vir Ria Hertzog (OOV Voorsitter) by oov@jvrprim.co.za:
● Jou naam en van
● Jou kind se naam en van asook sy/haar klas
● Jou selfoonnommer
● Jou e-posadres
Baie dankie vir jul bereidwilligheid.
5. Buitemuurse program:
Begin die week van 22 Februarie 2021.
Sport:
Program volg vir nie-kontaksportsoorte.
Kultuur:
Kooroefening met maskers sal in graadverband geskied. Program en indeling volg.
Geniet ‘n wonderlike naweek en ek is so opgewonde om die leerders Maandag te verwelkom.
Vriendelike groete
Naas Beets
Skoolhoof
Geagte Ouers,
En so kom ‘n unieke en uitdagende jaar tot ‘n einde …
Die koms van die pandemie het ons lewens totaal omgekeer. Normale leefwyse het skielik verander. Nuwe wetgewings en dra van maskers het die nuwe ‘normaal’ geword. Skoolonderrig en skoolgaan, soos ons dit altyd geken het, het ook drasties verander en ons sal dit lewenslank onthou. Alles was ook nie net negatief nie, gelukkig is daar ook silwer randjies. Van die positiewe dinge wat ons geleer het, is hoe ongelooflik aanpasbaar en kreatief ons as Suid-Afrikaners kan wees. Jan van Riebeeck het puik gevaar om te verseker dat ons leerders kon voortgaan om kwalitiet onderrig en ondersteuning te ontvang tydens die moeilike jaar. Baie geluk aan die Beheerraad en Exco wat met kreatiewe idees vorendag gekom het om effektiewe leer en die veiligheid van die leerders, ouers en personeel ten alle tye te verseker. Baie dankie aan die personeel van die skool en Huppelland vir hul harde werk, toegewydheid en bereidwilligheid om altyd die spreekwoordelike ekstra myl te loop tot voordeel van ons leerders! Laaste maar nie die minste nie, baie dankie aan mev. Marinda Brink wat die afgelope tyd as waarnemende skoolhoof die skool puik bestuur het.
Volgende jaar is vir Jan van Riebeeck ‘n besondere jaar – ons gaan die skool se 100ste bestaansjaar vier. Wat ‘n voorreg om as ‘n skoolhoof by ‘n skool te begin wat ‘n nuwe hoofstuk in sy geskiedenis gaan betree en ‘n voortreflike mylpaal bereik. Ek sien voorwaar uit om saam met die skoolgemeenskap ‘n 100 jaar van ‘wees jouself’ en die ryk tradisies te vier.
Die pandemie het bewys dat tegnologie ongelooflike potensiaal het om onderrig en leer drasties te verander. Die 21ste eeu vereis dat ons leerders meer betrokke raak by die onderrig- en leerproses. Leerders moet medeskeppers van kennis in die klaskamer word. Tegnologie-integrasie is baie belangrik en leerders moet kan kies tussen ‘n wye spektrum van metodes wanneer hul leer of take doen. Ek glo dat ons in die toekoms moet poog om ons leerders te leer hoe om te dink, eerder as wat om te dink.
Graag wens ek vir almal ‘n wonderlike en welverdiende vakansie toe. Geniet die spesiale Kerstyd saam met gesinslede en familie. Mag ons ook in die tyd dink aan hulle wat hul geliefdes as gevolg van die virus verloor het.
Veilig reis, lekker rus en ek en my gesin sien uit om julle almal volgende jaar te ontmoet en beter te leer ken.
Groetnis,
Naas Beets
Vir die skool en sy mense, is ek baie lief en as ‘n mens lief is vir iemand of iets is dit maklik om dinge vir hul te doen. Dit som so te sê my 8 jaar by die Laerskool op. ‘n Plesier om die skoolgemeenskap te dien en ook deel te wees van ‘n ‘familie’ wat vir mekaar omgee. Dankie aan die personeel wat my elke dag laat lag het. Ons het beslis hard saam gewerk en net so hard saam gekuier. Dankie vir wedersydse respek wat deurentyd betoon is. Spesiale dank aan mnr. Oosthuizen wat my vrye teuels gegee het om inisiatief aan die dag te lê en in my vermoëns geglo het van dag een. Dankie aan die Beheerraad en spesifiek tesourier, Cobus Loubser. Jul bron van onuitputbare kundigheid is meer werd as enige formele kwalifikasie. Dankie aan my mede Exco-lede (Marinda, Jodene, Lucia, Benita, Mariëtte en Leon). Saam het ons gegroei en saam het ons mekaar gedra.
Finansies word dikwels gesien as ‘n baie vervelige veld. ‘n Wit en Swart wêreld, ‘n debiet en ‘n krediet, ‘n begroting – iets wat beperk. Vir my is finansies ‘n klomp feite wat ‘n wonderlike kleurvolle storie vertel, dikwels wat mense nie wil sê nie. ‘n Begroting, iets wat vryheid gee, om juis dit te kan doen wat regtig saak maak. Laerskool Jan van Riebeeck se finansies het vir my baie verskillende stories oor die jare vertel en dinge uitgewys waarop ons kon verbeter. Die een storie wat dit my wel vertel het, is ‘n storie van ‘n ouerkorps wat omgee en wie lynreg tot die sukses van die skool bydra. Dankie aan elke ouer/voog wat skoolfonds so presies en op datum betaal, ten spyte van moeilike tye. Dankie dat jul altyd vriendelik en gaaf gebly het, al was daar soms moeilike gesprekke. Doen so voort!
Nou ja, hierdie is my JvR-pad se einde as personeellid, maar beslis nie my einde as JvR-ouer nie!
Mag ons almal saam altyd een doel voor oë hê en dit is om gelukkige kinders te kweek!
First of all I want to thank God for the 21 years he gave me to work at Jan van Riebeeck and always showed me love. It was God’s grace and him allowing me to leave is still his grace. I want to thank all teachers and children for loving me. We were like a family and I will always pray for you.
“Sometimes God closes doors because it is time to move forward. He knows you won’t move unless your circumstances force you. Trust the transition. God’s got you. Amen.”
Dit is met ‘n swaar hart dat ek Jan van Riebeeck Dinsdag verlaat. Vir 7 en ‘n half jaar was dit my boekehuis in die skadu van die berg.
Uit die vele hoogtepunte is dit moeilik om iets uit te sonder. Maar niks het my soveel genot gegee soos ‘n kind wat kom sê dat hulle ‘n boek baie geniet het nie. Veral as daardie leerling ‘n nie-leser was. Daar was vir my geen goedvoel-oomblik soos om ‘n graad eentjie se gesig te sien straal wanneer hulle besef hulle kan boeke bo hul leesvlak lees of wanneer hulle ‘n prenteboek beetkry wat presies is waarvan hulle hou nie.
In my tyd by Jan van Riebeeck het my lewe deur meer as 4 seisoene gegaan. Maar in die rondgooi van die lewe, was die skool my veilige hawe. Met kinderdrukkies en briefies, kollegas wat omgee en ‘n ouergemeenskap wat deernisvol en met passie inspring om hierdie skool ‘n skool van uitnemendheid te maak.
Dankie liewe ouers, kollegas en kinders dat ek hier kon leef in my taal. ‘n Stukkie van my hart sal altyd hier bly, waar kind nog kind is en kennis gedy.
Tot weersiens,
Magriet van Zyl
JvR-biblioteek
Hierdie kwartaal neem ons afskeid van heelwat personeel wat ons hierdie jaar verlaat. ‘n Hele paar van hulle werk al jare by die skool. Met Covid kon ons ongelukkig nie ‘n behoorlike afskeid saam met hulle hou nie. Daar gaan nie hierdie kwartaal ‘n Suidooster verskyn om vir elkeen ‘n afskeidsbrief te plaas nie, maar ons wil wel graag vir elkeen op hierdie platform bedank vir jare lange toegewyde werk.
Juf. Marianna Oosthuizen
Daar’s geen twyfel dat juf. Marianna die tye saam met haar leerders geniet het nie! Daar was genoeg vryheid aan haar leerders gegun om ons leuse, Wees Uself, ten volle uit te leef. Leerders gaan nog vir jare praat van hul gawe graad 1-juffrou, wat altyd mooi lyk en lekker ruik! Op Vrydae is daar altyd klavier gespeel en saam gesing en as ‘n mens op daardie oomblik in haar klas ingestap het, kon jy die lekker atmosfeer aanvoel. Sy het jare lank van die grootste geleenthede by die skool met styl en presisie gereël.
Geniet elke oomblik van die lekker lang vakansie saam met Meneer Oosthuizen. Mag dit vol interessante reise, mooi aande by die lekker huis in Vredehoek, kuiers by vriende en middae by die Mount Nelson wees!
Juf. Magriet van Zyl
Juf. Magriet het toegewyd-wees ‘n nuwe betekenis gegee. Die moeite wat daar in elke boekbespreking, biblioteeklesse en ekstra erkenning vir leerders gegaan het, is inspirerend. Die gretigheid waarmee die tegnologie-uitdagings aangepak is tydens die grendeltydperk was net so lekker om te beleef! Sy het ook hard gewerk om te help om Die Suidooster elke kwartaal suksesvol, betyds en sonder foute uit te bring.
Ons het so baie by jou geleer, veral hoe om weer op te staan en positief te bly wanneer die lewe moeiliker dinge na ‘n mens se kant toe gooi. Die leerders en personeel gaan jou baie mis!
Marili Thompson
Die finansies tannie wat ure voor haar rekenaar deurgebring het om Jan van Riebeeck se boeke te laat klop! Dit voel of sy net-net onder Meneer Oosthuizen was in die rang van die skoolorde. Marili was beslis die perfekte een vir die werk – rustig en kalm in enige krisis, streng, maar altyd bereid om te luister na jou motivering hoekom jy graag ‘n nuwe ietsie vir jou klas wil aankoop, en dan natuurlik uitstekend met syfers, organisasie en kophou met ongeveer 450 leerders se finansiële sake. Baie dankie vir 8 jaar se betroubaarheid en toewyding.
Rose Chikwata
Ma Rose het in die 21 jaar wat sy by die skool gewerk het, gesorg dat die skool se gange blink en later by die Nasorg aangesluit om daar ‘n handjie by te sit. Rose het ’n sagte hart vir kinders en was vir menige leerders hul skoolma wat nooit te besig was om ’n geselsie aan te knoop in Afrikaans, Engels of isiXhosa nie. Ons gaan jou deernis en omgee mis, Ma Rose.
Juf. Michelle-Marié Niemand
Juf. Niemand het aan die begin van die jaar deel van die Jannie-span geword. Sy het onlangs verloof geraak en daar is omtrent opwindende dinge wat vir hulle voorlê! Dit was lekker om haar deel van ons span hierdie jaar te hê en ons gaan verseker haar vriendelikheid mis!
Die Steyntjie is ons eie skoolbus (vernoem na mnr. Steyn, die busbestuurder) en vervoer elke dag kinders vanaf Bloubergstrand, Table View/Parklands en Milnerton skool toe en in die middae weer huis toe met Table View biblioteek as laaste stop. Almal, van Huppellanders tot Gr.7’s, ry saam. Daar is nog baie plek in die bus vir volgende jaar. Kontak vir Sebastine 082 5779108 of janniesbus@gmail.com vir meer besonderhede.
Baie geluk aan die volgende graad 6-leerders wat verkies is tot die leerderraad van 2021:
Agter v.l.n.r.: Mia Symington, Danny Newton en Alexander Benecke
Middel v.l.n.r.: Fredrich Erasmus, Héloïse Strauss en Luca Zulch
Voor v.l.n.r.: Mieke Hertzog, Jan Karsten, Carla Snijders en Katrien Stimie
Afwesig: Daniel Wasserman en Taniel Webber
Liewe Jan van Riebeeck-familie
Vandag is daar ‘n behoefte in my hart om met julle te gesels…. in die vreemde omstandighede van 2020…. maar ek weet die skool het net die beste gedoen om alles so glad as moontlik te laat verloop! Welgedaan!
Die tyd het nou aangebreek dat ek ook moet groet na ‘n tydperk van amper 25 jaar! Dit voel soos ‘n leeftyd….wat ‘n heerlike reis was die tyd nie vir my nie!
Eerstens kan ek nie dankbaar genoeg wees dat ons as gesin die voorreg gehad het om deel van hierdie unieke skool en gemeenskap te kon word nie…ons sou nie voor die tyd besef het hoe wêrelde vir ons, as gevolg van hierdie skool en gemeenskap, oopgegaan het nie! Wat ‘n ongelooflike voorreg en daarvoor sê ek net BAIE DANKIE! Ons het sulke hegte vriendskappe opgebou waarvan ons nog steeds deel is.
Dan….my hart se punt….die kinders wat deur my hande gegly het, is natuurlik my hoogtepunt! Daardie onskuld van die kleintjies en opregte sêgoed gaan ek voorwaar oneindig mis! (As ek maar net alles kon neerskryf!) Die afgelope klompie jare was hulle my alles…(dalk ‘n bietjie van ‘n ‘ouma’-gevoel)! Wat ‘n genot om met sulke sponsies te kon werk! Ek het voorwaar so baie van hulle geleer en moes myself dikwels knyp as hulle met sulke waarhede en ‘diepdinge’ uitkom wat my baie laat dink het….mis gaan ek julle verseker!
Op hierdie noot sê ek net tot siens …. met groot dankbaarheid asook met ‘n traan in die oog. Mag die skool net van krag tot krag gaan en alle sterkte word almal toegewens vir die jaar 2021! Mag Kersfees ook net vol vrede, vreugde en geluk wees!
Mooi loop!
Liefde
Marianna Oosthuizen
Hoërskool Jan van Riebeeck het onlangs aangekondig dat mnr. Pieter Rademeyer as nuwe skoolhoof aangestel is met ingang 1 Maart 2021. Mnr. Rademeyer, sy vrou Jana en hul twee jong kinders, Pieter en Karu, verhuis vanaf Port Elizabeth na die Kaap. Pieter en Karu gaan hier by Laerskool Jan van Riebeeck aansluit.
Ons is opgewonde oor die samewerking wat tussen die Laerskool en Hoërskool sal plaasvind en wens hom en sy gesin alle sterkte toe met die verhuising. Ons weet dat hy sommer baie gelukkig by ons sal wees.
Beste Ouers
Daar is berigte in die media dat ’n EFF-verteenwoordiger na beide die Jan van Riebeeckskole as rassisties verwys – daar word ook aangedui die skole gaan deur die EFF besoek word. Dit is na aanleiding van die onlangse rasvoorvalle by Hoërskool Brackenfell.
Verder is daar geen inligting beskikbaar nie – óf so ‘n besoek werklik beplan word en indien wel wanneer dit sal plaasvind, is onduidelik.
Hiermee ’n paar belangrike punte van die Beheerraad se kant:
• Sover ons kon vasstel, was daar geen rassevoorval by enige van die skole nie.
• Die veiligheid van ons leerders en personeel is ononderhandelbaar – sou daar enige samekoms van die EFF naby die skool plaasvind, sal verantwoordelike veiligheidaksies geloods word.
• Indien enige samekoms van die EFF plaasvind, sal ouers dadelik per WhatsApp in kennis gestel word.
• Sover ons kennis strek, het die EFF nie aansoek gedoen om ‘n permit te kry vir so ‘n samekoms nie. Sou enige samekoms geskied, versoek ons ouers en enige ander volwassenes wat met ons skool geassosieër word, om geen interaksie met EFF-lede te hê van enige aard nie.
• Die Beheerraad se standpunt rondom diversiteit is as volg en word nie beïnvloed deur die dreigemente nie: Die Laerskool is ‘n gemeenskapskool wat inklusiwiteit en diversiteit omarm, maar ons besef dis ’n voortdurende proses. Ons skool se leuse is ons rigtingwyser – Wees jouself. Ons het die laaste paar jaar aksies geloods om diversiteit te bevorder en is van plan om momentum te hou in 2021.
• Wees asseblief verseker ons bestuur die situasie so goed ons kan in aggenome die inligting wat tot ons beskikbaar is. Daar is op die stadium, geen rede om bekommerd te wees of jou gemoed te versteur nie. Julle is welkom om enige korrespondensie rakende die situasie te rig aan admin@jvrprim.co.za
Vriendelike groete
Marinda Brink
WAARNEMENDE SKOOLHOOF
NAMENS BEHEERLIGGAAM
Belangrike Datums
september 2026
oktober 2026
november 2026
desember 2026
januarie 2027
februarie 2027
maart 2027
april 2027
mei 2027
junie 2027
julie 2027
augustus 2027