Kategorie: Algemeen
Hierdie kwartaal neem ons afskeid van heelwat personeel wat ons hierdie jaar verlaat. ‘n Hele paar van hulle werk al jare by die skool. Met Covid kon ons ongelukkig nie ‘n behoorlike afskeid saam met hulle hou nie. Daar gaan nie hierdie kwartaal ‘n Suidooster verskyn om vir elkeen ‘n afskeidsbrief te plaas nie, maar ons wil wel graag vir elkeen op hierdie platform bedank vir jare lange toegewyde werk.
Juf. Marianna Oosthuizen
Daar’s geen twyfel dat juf. Marianna die tye saam met haar leerders geniet het nie! Daar was genoeg vryheid aan haar leerders gegun om ons leuse, Wees Uself, ten volle uit te leef. Leerders gaan nog vir jare praat van hul gawe graad 1-juffrou, wat altyd mooi lyk en lekker ruik! Op Vrydae is daar altyd klavier gespeel en saam gesing en as ‘n mens op daardie oomblik in haar klas ingestap het, kon jy die lekker atmosfeer aanvoel. Sy het jare lank van die grootste geleenthede by die skool met styl en presisie gereël.
Geniet elke oomblik van die lekker lang vakansie saam met Meneer Oosthuizen. Mag dit vol interessante reise, mooi aande by die lekker huis in Vredehoek, kuiers by vriende en middae by die Mount Nelson wees!
Juf. Magriet van Zyl
Juf. Magriet het toegewyd-wees ‘n nuwe betekenis gegee. Die moeite wat daar in elke boekbespreking, biblioteeklesse en ekstra erkenning vir leerders gegaan het, is inspirerend. Die gretigheid waarmee die tegnologie-uitdagings aangepak is tydens die grendeltydperk was net so lekker om te beleef! Sy het ook hard gewerk om te help om Die Suidooster elke kwartaal suksesvol, betyds en sonder foute uit te bring.
Ons het so baie by jou geleer, veral hoe om weer op te staan en positief te bly wanneer die lewe moeiliker dinge na ‘n mens se kant toe gooi. Die leerders en personeel gaan jou baie mis!
Marili Thompson
Die finansies tannie wat ure voor haar rekenaar deurgebring het om Jan van Riebeeck se boeke te laat klop! Dit voel of sy net-net onder Meneer Oosthuizen was in die rang van die skoolorde. Marili was beslis die perfekte een vir die werk – rustig en kalm in enige krisis, streng, maar altyd bereid om te luister na jou motivering hoekom jy graag ‘n nuwe ietsie vir jou klas wil aankoop, en dan natuurlik uitstekend met syfers, organisasie en kophou met ongeveer 450 leerders se finansiële sake. Baie dankie vir 8 jaar se betroubaarheid en toewyding.
Rose Chikwata
Ma Rose het in die 21 jaar wat sy by die skool gewerk het, gesorg dat die skool se gange blink en later by die Nasorg aangesluit om daar ‘n handjie by te sit. Rose het ’n sagte hart vir kinders en was vir menige leerders hul skoolma wat nooit te besig was om ’n geselsie aan te knoop in Afrikaans, Engels of isiXhosa nie. Ons gaan jou deernis en omgee mis, Ma Rose.
Juf. Michelle-Marié Niemand
Juf. Niemand het aan die begin van die jaar deel van die Jannie-span geword. Sy het onlangs verloof geraak en daar is omtrent opwindende dinge wat vir hulle voorlê! Dit was lekker om haar deel van ons span hierdie jaar te hê en ons gaan verseker haar vriendelikheid mis!
Die Steyntjie is ons eie skoolbus (vernoem na mnr. Steyn, die busbestuurder) en vervoer elke dag kinders vanaf Bloubergstrand, Table View/Parklands en Milnerton skool toe en in die middae weer huis toe met Table View biblioteek as laaste stop. Almal, van Huppellanders tot Gr.7’s, ry saam. Daar is nog baie plek in die bus vir volgende jaar. Kontak vir Sebastine 082 5779108 of janniesbus@gmail.com vir meer besonderhede.
Baie geluk aan die volgende graad 6-leerders wat verkies is tot die leerderraad van 2021:
Agter v.l.n.r.: Mia Symington, Danny Newton en Alexander Benecke
Middel v.l.n.r.: Fredrich Erasmus, Héloïse Strauss en Luca Zulch
Voor v.l.n.r.: Mieke Hertzog, Jan Karsten, Carla Snijders en Katrien Stimie
Afwesig: Daniel Wasserman en Taniel Webber
Liewe Jan van Riebeeck-familie
Vandag is daar ‘n behoefte in my hart om met julle te gesels…. in die vreemde omstandighede van 2020…. maar ek weet die skool het net die beste gedoen om alles so glad as moontlik te laat verloop! Welgedaan!
Die tyd het nou aangebreek dat ek ook moet groet na ‘n tydperk van amper 25 jaar! Dit voel soos ‘n leeftyd….wat ‘n heerlike reis was die tyd nie vir my nie!
Eerstens kan ek nie dankbaar genoeg wees dat ons as gesin die voorreg gehad het om deel van hierdie unieke skool en gemeenskap te kon word nie…ons sou nie voor die tyd besef het hoe wêrelde vir ons, as gevolg van hierdie skool en gemeenskap, oopgegaan het nie! Wat ‘n ongelooflike voorreg en daarvoor sê ek net BAIE DANKIE! Ons het sulke hegte vriendskappe opgebou waarvan ons nog steeds deel is.
Dan….my hart se punt….die kinders wat deur my hande gegly het, is natuurlik my hoogtepunt! Daardie onskuld van die kleintjies en opregte sêgoed gaan ek voorwaar oneindig mis! (As ek maar net alles kon neerskryf!) Die afgelope klompie jare was hulle my alles…(dalk ‘n bietjie van ‘n ‘ouma’-gevoel)! Wat ‘n genot om met sulke sponsies te kon werk! Ek het voorwaar so baie van hulle geleer en moes myself dikwels knyp as hulle met sulke waarhede en ‘diepdinge’ uitkom wat my baie laat dink het….mis gaan ek julle verseker!
Op hierdie noot sê ek net tot siens …. met groot dankbaarheid asook met ‘n traan in die oog. Mag die skool net van krag tot krag gaan en alle sterkte word almal toegewens vir die jaar 2021! Mag Kersfees ook net vol vrede, vreugde en geluk wees!
Mooi loop!
Liefde
Marianna Oosthuizen
Hoërskool Jan van Riebeeck het onlangs aangekondig dat mnr. Pieter Rademeyer as nuwe skoolhoof aangestel is met ingang 1 Maart 2021. Mnr. Rademeyer, sy vrou Jana en hul twee jong kinders, Pieter en Karu, verhuis vanaf Port Elizabeth na die Kaap. Pieter en Karu gaan hier by Laerskool Jan van Riebeeck aansluit.
Ons is opgewonde oor die samewerking wat tussen die Laerskool en Hoërskool sal plaasvind en wens hom en sy gesin alle sterkte toe met die verhuising. Ons weet dat hy sommer baie gelukkig by ons sal wees.
Beste Ouers
Daar is berigte in die media dat ’n EFF-verteenwoordiger na beide die Jan van Riebeeckskole as rassisties verwys – daar word ook aangedui die skole gaan deur die EFF besoek word. Dit is na aanleiding van die onlangse rasvoorvalle by Hoërskool Brackenfell.
Verder is daar geen inligting beskikbaar nie – óf so ‘n besoek werklik beplan word en indien wel wanneer dit sal plaasvind, is onduidelik.
Hiermee ’n paar belangrike punte van die Beheerraad se kant:
• Sover ons kon vasstel, was daar geen rassevoorval by enige van die skole nie.
• Die veiligheid van ons leerders en personeel is ononderhandelbaar – sou daar enige samekoms van die EFF naby die skool plaasvind, sal verantwoordelike veiligheidaksies geloods word.
• Indien enige samekoms van die EFF plaasvind, sal ouers dadelik per WhatsApp in kennis gestel word.
• Sover ons kennis strek, het die EFF nie aansoek gedoen om ‘n permit te kry vir so ‘n samekoms nie. Sou enige samekoms geskied, versoek ons ouers en enige ander volwassenes wat met ons skool geassosieër word, om geen interaksie met EFF-lede te hê van enige aard nie.
• Die Beheerraad se standpunt rondom diversiteit is as volg en word nie beïnvloed deur die dreigemente nie: Die Laerskool is ‘n gemeenskapskool wat inklusiwiteit en diversiteit omarm, maar ons besef dis ’n voortdurende proses. Ons skool se leuse is ons rigtingwyser – Wees jouself. Ons het die laaste paar jaar aksies geloods om diversiteit te bevorder en is van plan om momentum te hou in 2021.
• Wees asseblief verseker ons bestuur die situasie so goed ons kan in aggenome die inligting wat tot ons beskikbaar is. Daar is op die stadium, geen rede om bekommerd te wees of jou gemoed te versteur nie. Julle is welkom om enige korrespondensie rakende die situasie te rig aan admin@jvrprim.co.za
Vriendelike groete
Marinda Brink
WAARNEMENDE SKOOLHOOF
NAMENS BEHEERLIGGAAM
Naam en van: Zanru Breedt
Graad: 3BS
Waar woon jy?: Ek woon in Simonstad saam met my ma, pa en boetie (15).
Gunsteling vak: Ek hou baie van Wiskunde en Afrikaans. Wiskunde maak my slim.
Ek is ‘n trotse Jannie, want ek help my juffrou om die klas netjies te maak, op te ruim en weg te pak aan die einde van die dag. Ek hou daarvan om ander te help en ek is goed daarmee.
3 Desember 2020 is ‘Casualday’ / Loslitdag!
Tema: Trek aan soos jou gunsteling Disney karakter!
Kostes: R20 vir ‘n loslitdagplakker om Donderdag, 3 Desember, sivvies volgens die tema aan te trek! Plakkers is beskikbaar op die Karri-toep vanaf 23 November en kan ook kontant by juffrou Wright gekoop word.
Fondse word ingesamel ten bate van Paarl ontwikkelingskool.
Die leerders het hierdie week hul foto’s ontvang. Die laaste dag vir bestellings is Maandag, 30 November. Maak asb. seker dat die kontant in die koevert korrek is. Vul ook asb. die koevertjie waarop bestel moet word, volledig in. Jy is ook welkom om op die fotograaf se webtuiste te bestel: Lunchbox Photography. Die wagwoord is JVR2020.
- Klasfoto’s en individuele foto’s word by die klasonderwyser betaal en bestel.
- Leerderraad- Juffrou Izèl Storm
- Biblioteekmonitors – Juffrou Magriet van Zyl
- Suidoosterredaksie – Juffrou Suzaan Burger
Baie geluk aan die volgende leerders wat as Hoërskool Jan Van Riebeeck se hoofleiers vir 2021 aangekondig is:
Foto: Voor van links na regs
Hoofseun: Gregory Barends
VRL Voorsitter & Hoofdogter: Jana-Mari Beukes (oud-leerder van Laerskool Jan Van Riebeeck)
Foto: Agter van links na regs
Onderhoofseun: Leander Viljoen
Onderhoofdogter: Misha Kapot
Die graad 7-fondsinsameling vir die opgradering van die Johan Oosthuizen-klubhuis het baie goed verloop en die skool het in totaal R21 100 ingesamel. Baie dankie vir almal se volgehoue ondersteuning en bydraes. Sonder julle hulp sou ons nie hierdie projek suksesvol kon bestuur nie.
Ella-Mari le Roux het die meeste kaartjies verkoop en sy het die Spar-geskenkpak ter waarde van R500 gewen. Ons is baie trots op jou, Ella!
Die trekking vir die gelukkige wenners het op Donderdag, 5 November, plaasgevind. Ons wenners lyk soos volg:
• Twee nagte in ‘n selfsorg-eenheid aan die voet van Tafelberg (waarde R6000) – Jacky Solomons
• Heel lam (Waarde R2500) -Beata von Lieres
• Clinton Stolz fotografie: familie fotosessie (Waarde R2500) – Theo van der Walt
• Paul Renè geskenkpak (Waarde R2000) – Coreen Scholtz
• Juweelstuk van Pierre Liversage (Waarde R1500) – Linda Brink
• Jenewer geskenkpak (Waarde R1500) – Inge Roberts
• 10kg wors (Waarde R1100) – Clive Joubert
• “Baked Studio” koek (Waarde 750) – Alet Laubser
• “Baked Studio” koek (Waarde 750) – Ingrid Olivier
• Heleen Meyer geskenkpak (Waarde R750) – Emmy Stoltz
Baie geluk aan hierdie wenners. Ons hoop dat julle die lekker bederf-geskenke sal geniet!
Gedurende die afgelope vakansie het ‘n groep Graad 7’s, saam met hulle ouers, en sommige saam met hulle gesinne, drie heerlike aande op die walle van die Breederivier deurgebring.
Dit het als begin met ‘n beplande roei op die Oranjerivier, iets wat nou al ‘n instelling by die Graad 7-Jannies is. Toe die Covid-pandemie ‘n stokkie daarvoor steek, is “Plan B vir Breede” opgeroep! Hierdie plan het so goed uitgewerk, dat ‘n paar ouers reeds voorgestel het dat dit deel van die Jannies-kalender word!
Ons het heerlik geroei, al het dit soms geknor om die ‘crocs’ reguit te stuur wanneer die wind van voor gekom het! Die stroomversnellings het gesorg vir ekstra opwinding: ‘n paar van ons is agteruit deur ‘n paar stroomversnellings. Soms was daar ‘n noodgedwonge swem wanneer die draaie nou net nie perfek wou uitwerk nie, maar ons is daardeur! Daar was ook ander lekker aktiwiteite vir die kinders, soos ‘abseil’, tafeltennis en snoeker. Saans het ons tot laat om die kampvuur gekuier. Louis Boshoff en LJ le Roux het ons op die laaste aand bederf met die heerlikste braaivleis – dankie, julle is voorwaar “Braaimeesters”!
Dankie aan almal wat vasgebyt het met die reëlings deur al die onsekerhede oor die Oranje-roei, tot op die Breederivier!!
Kliek HIER vir die Skoolfooie vir 2021, goedgekeur en aanvaar deur die ouers tydens die Begrotingsvergadering gehou op 4 November 2020.
Belangrike Datums
augustus 2026
september 2026