Kategorie: Algemeen

Hiermee weer die boodskap soos in verlede week se nuubrief onder Uit die Hoof se Kantoor genoem:

Die jaarlikse begrotingsvergadering, waartydens die daaropvolgende jaar se skoolfondsverhoging bespreek en besluit word, is op Maandagaand, 07 November 2022, om 18:00 in die biblioteek gehou. Die skoolfondsverhoging is eenparig soos volg goedgekeur:

• Huppelland = 6% verhoging
• Laerskool = 12% (sien onder)

Graag wil ek al die ouers wat die belangrike vergadering bygewoon het, bedank. Baie dankie aan ons BR-Voorsitter (Merwe Scholtz), ons Tesourier (Susan van der Walt), ons finansiële bestuurder (Liesel Hammond) en al ons begrotingsbestuurders vir jul waardevolle insette en tyd om die effektiewe begroting saam te stel. Daar is ook tydens die vergadering uitgewys dat daar vanjaar meer as R4M aan projekte by die skool en Huppelland spandeer is wat nie uit die skool se begroting kom nie, maar wel uit ruim donasies van ouers. Ons salueer al ons ouers wat die agfelope jaar ‘n finansiële bydrae gemaak het of kosbare tyd by die skool spandeer het om ons skool van krag-tot-krag te neem.

Beste Ouers/Voogde,

Laerskool Jan van Riebeeck het die afgelope jaar met behulp van ouerdonasies en ruim skenkings heelwat infrastruktuurverbeteringe en opgraderingsprojekte afgehandel. Hiervoor is ons baie dankbaar.

Ons wil graag ook die ablusiegeriewe van die inwonende terreinpersoneel opgradeer. Ongelukkig beskik die skool nie oor die nodige fondse om dit onmiddellik te doen nie en neem ons die vrymoedigheid om vir julle vriendelik te versoek vir ‘n moontlike bydrae om die geriewe vir die inwonende terreinpersoneel op te knap.

Hierdie is ‘n vrywillige bydrae en ons sal volgende week ‘n Karri-toep bydrae skep en aanstuur.

Baie dankie vir jul goedgunstige oorweging.
Vriendelike groete
NAAS BEETS

Die skool verdaag vanaf net voor die eksamen tot die einde van die kwartaal vir die hele skool vroeër.

Donderdag, 17 November – Dinsdag, 13 Desember

13:00 (Graad 1 – 3)
13:15 (Graad 4 – 7)

*Bus vertrek op hierdie dae om 13:20

Woensdag, 14 Desember

10:30 (Graad 1 – 3)
10:45 (Graad 4 – 7)

*Bus vertrek om 10:50

Laerskool Jan van Riebceeck sluit week 4 van die laaste kwartaal af met die aanbieding van ‘n suksesvolle gholfdag op Vrydag, 04 November 2022, by die Royal Cape Gholfklub. Die merkwaardige gholfklub is die oudste gholfklub in Afrika met ryk tradisie en geskiedenis waarmee ons skool so maklik kan assosieer. Hierdie spesiale gholfdag dien nie as ‘n fondsinsamelingsprojek nie, maar eerder ‘n dag van samesyn vir ons ouers/voogde wat lief is daarvoor om gholf te speel. Die gholfdag lei tot nuwe vriendskappe, kameradie en bou nuwe netwerke asook om op nog ‘n manier die skool se sukses oor die afgelope jaar te vier. Gholf is egter ‘n sportsoort wat enige sportman baie nederig hou, soos wat deur baie van ons wat aan die dag deelgeneem het, ongelukkkig ervaar het. Ek het die wonderlike voorreg gehad om deel van Andries Viljoen se AVCONENG-span (André Symington en Jan-Jurie Fourie) te wees. Ons het ons gate uit geniet en lekker gelag, want daar is min sportsoorte wat ‘n mens kan uitdaag soos gholf en jou ego super broos laat. Die sogenaamde gholfgode was beslis nie aan ons span se kant nie, maar nie eers hulle kon ons geesdrif demp nie. Baie geluk aan Oloff Sieberhagen en sy span (Louis Boshoff, Adriaan Theron en Jake Rennie) wat die dag puik gespeel het en met ‘n allemintige 93 punte (4bal-samespel met beste 2 punte per putjie) die gholfdag gewen het. Laat my asseblief toe om die organiseerder van die gholfdag, Alet Loubser, hartlik te bedank vir al haar puik reëlings om die 48 spelers op die dag te akkommodeer en spesiaal te laat voel. Laat my ook toe om haar man, Cobus Loubser, wat voorheen ook as Tesourier in ons Beheerraad gedien het, hartlik geluk te wens met sy aanstelling as die nuwe bedryfshoof (CEO) van Curro. Cobus, ons wens jou alles van die beste toe met jou nuwe rol. Ons weet jy gaan ‘n groot sukses daarvan maak.

Verlede Woensdag tydens die o.13A-krieketwedstryd wat tuis teen Laerskool Kampsbaai gespeel is, kon ons ook die nuwe elektroniese tellingbord inwy. Weereens groot dankie aan al die ouers wat ‘n finansiële bydrae gemaak het om die tellingbord te kon aankoop. Ons o.13-krieketspan het die middag in slegs 15 boulbeurte ‘n reuse telling van 166 lopies aangeteken waarvan die openingskolwer, Werner Steyn, ‘n onoorwonne 80 lopies aangeteken het. Nodeloos om te sê dat ons ver gewen het, want die opposisie is vir slegs 55 lopies uitgeboul. Welgedaan aan mnr. Warren en sy span met die puik oorwinning.

Alhoewel ons nou net op somersport fokus, het 11 van ons Gr. 6- en 10 van ons Gr. 5-netbaldogters aan ‘n netbalkamp te Elandsrus naby Driesusters (Karoo-area) oor die naweek van 04 – 06 November deelgeneem. Die netbalkamp is deur die bekende Patrys van der Merwe en Elize Kotze aangebied. Ons netbaldogters en afrigters het ongelooflik baie geleer en dit alles buite hul gemaksone. Graag wil ek die volgende juffrouens hartlik bedank wat ons 21 dogters tydens die naweek vergesel het en veilig teruggebring het:

• Ischké Felix
• Lucia de Jager
• Shahneé Felix
• Helene Slabbert

Die jaarlikse begrotingsvergadering, waartydens die daaropvolgende jaar se skoolfondsverhoging bespreek en besluit word, is op Maandagaand, 07 November 2022, om 18:00 in die biblioteek gehou. Die skoolfondsverhoging is eenparig soos volg goedgekeur:

• Huppelland = 6% verhoging
• Laerskool = 12% (sien onder)

Graag wil ek al die ouers wat die belangrike vergadering bygewoon het, bedank. Baie dankie aan ons BR-Voorsitter (Merwe Scholtz), ons Tesourier (Susan van der Walt), ons finansiële bestuurder (Liesel Hammond) en al ons begrotingsbestuurders vir jul waardevolle insette en tyd om die effektiewe begroting saam te stel. Daar is ook tydens die vergadering uitgewys dat daar vanjaar meer as R4M aan projekte by die skool en Huppelland spandeer is wat nie uit die skool se begroting kom nie, maar wel uit ruim donasies van ouers. Ons salueer al ons ouers wat die agfelope jaar ‘n finansiële bydrae gemaak het of kosbare tyd by die skool spandeer het om ons skool van krag-tot-krag te neem.

Groot opgewondenheid heers vandag by die skool aangesien ons al die 2023 Gr.1’s hul nuwe skool en nuwe juffrou kom ontmoet. Dit dien dan as ons Opedag. Vanaand vind die jaarlikse piekniek saam met hul ouers by die sportveld agter die skool plaas. Dit is vir ons ‘n wonderlike voorreg om al die ‘nuwe’ Gr.1’s by die ‘groot’ skool saam hul ouers te verwelkom. Ons beste wense vergesel hulle met die aanvang van hul laerskoolloopbaan en ons weet dat hulle baie vinnig hul voete sal vind, want die spesiale etos by ons skool bemagtig hulle om net hulself te wees. Graag wens ek ook die volgende Gr.1-juffrouens sterkte toe wat so mooi na hulle gaan kyk en hulle help om hul volle potensiaal te bereik:

• Liezel Theron
• Nicola Swanepoel
• Helene Slabbert

Ons het ook aanpassings aan die res van die grondslagfase aangebring en deel dus graag met almal:

• Graad 2: Rache Turner, Anja Nauta (graadhoof) en Naomi Uys
• Graad 3: Maricqe Coetzer, Heidré Ehlers en Michelle Compion

Ons is hartseer om te noem dat Benita Smit (Grondslagfase Departementshoof) aansoek om ‘n bevorderingspos gedoen het. Ons het nog niks formeel ontvang om te bevestig dat sy wel die pos by Laerskool De Hoop as Grondslagfase Adjunkhoof ontvang het nie. Ons hou egter duimvas dat sy hierdie pos wel sal ontvang, want ons weet dat sy suksesvol in hierdie posisie sal wees. Ons hou almal op hoogte sodra ons formele nuus in die verband ontvang.

Op hierdie noot is ons ook spyt dat Bibi Janse van Rensburg (gr. 5), Nadia Meiring-Stahmer (gr. 4) en Razelle Hanekom (sportorganiseerder) ons aan die einde van die jaar sal verlaat. Beide Bibi en Nadia se mans het bevordering by hul onderskeie werke gekry. Ons is baie dankbaar vir hul puik werk wat hulle by die skool gedoen het en ons wens hulle baie sterkte toe met hul pad vorentoe. Razelle het ‘n pos by die Hoërskool aanvaar. Sy gaan ‘n groot leemte laat, maar ons is opgewonde saam met haar vir hierdie nuwe fase. Sy was vir lank deel van die Laerskool se span en het die sportprogram help op die been kry tot waar dit vandag is. Ons is baie dankbaar vir alles wat sy vir die skool oor die jare gedoen het!

Ons het reeds goeie onderwysers in Bibi en Nadia se plekke aangestel, nl. Erick Snyman (gr. 5) en Ilse-Marie Holtzhausen (gr. 4). Ons weet dat hulle sommer baie maklik by ons skoolgemeenskap sal inskakel.

Ek sluit af met die volgende anonieme aanhaling wat op ons waarde vir die kwartaal, Respek, fokus en wens julle ‘n wonderlike naweek toe.

“Respect is like a mirror,
The more you show it to other people,
the more they will reflect it back!’’

Vriendelike groete
Naas Beets
SKOOLHOOF

Ons somersportbuitemuurse program is in volle swang met leerders wat aan verskeie wedstryde en toernooie deelneem. Ongelukkig is die buitemuurse aktiwiteite vir kwartaal 4 van korte duur aangesien daar die laaste kwartaal van die jaar heelwat tyd aan die finale assesserings afgestaan word. Novembermaand het so stilletjies sy vriendelike opwagting gemaak en dit is onvermydelik om te dink dat die somervakansie en Kersfees net om die draai lê terwyl die wêreld stadig maar seker vir 2023 gereedmaak.

Soos genoem in verlede week se nuusbrief het ons o.11-tennisspelers tydens die naweek van 21 – 22 Oktober 2022 puik in die Ceres-Tennistoernooi presteer. Die afgelope naweek was dit die o.13-seuns en -dogters se beurt. Hulle het glad nie op hulle laat wag nie en in die spreekwoordelike voetspore van die o.11’s gevolg met die seuns- en dogterspanne wat beide silwer medaljes tydens die gewilde tennistoernooi verower het. Dit is duidelik dat ons tennis by die skool baie ‘gesond’ is en kan ons teen heelwat groter skole kompeterend meeding. Baie geluk aan die volgende o.13-dogters en -seuns met hul puik prestasie. Ons is baie trots op julle:

Dogters: 
Stella Lamprecht
Katia van Wyk
Liza Hertzog 
Cara Swanepoel

Seuns:
Dawid-Wiese Viljoen
Gustav Pansegrouw
Johan Symington
Pierre-Jaque Smit

Baie dankie aan Andri en Maricqe wat die bogenoemde o.13-tennisspelers oor die naweek vergesel het. Ons is ook baie dankbaar vir al die ouers wat die leerders so mooi tydens die toernooi ondersteun en aangemoedig het.

Op Woensdagmiddag, 1 November, het ons vir die eerste keer op die ‘nuwe’ sportveld agter die skool o.9 mini-krieketwedstryde teen Laerskool Kampsbaai aangebied. Dit was heerlik om saam met ons ouers agter op die veld onder die skadu van die bome ons spanne te ondersteun. Hoe bevoorreg is ons nie, met die ikoniese Tafelberg in die agtergrond, Leeukop en Sienheuwel wat ‘glimlag’ terwyl ons saam met die Kampsbaai-ouers die mini-krieketwedstryde kon geniet. Ons beplan om heelwat somer- en wintersportwedstryde op die nuwe sportveld aan te bied. Ons bespaar soveel tyd deurdat ons nie meer ons Grondslagleerders heen-en-weer tussen die skool en die Conradieveld hoef te vervoer nie. Ek kan nie anders as om weer vir Gerhard Conradie hartlik te bedank vir sy leeue-aandeel in die verbetering van die skoolfasiliteite nie!

Ons atlete het op Vrydag, 28 Oktober, aan Laerskool Bredasdorp se Top 10 atletiekbyeenkoms gaan deelneem. Ons atlete het goed gevaar en baie dankie aan Leon en André wat ons atlete vergesel het. Baie dankie aan die volgende netbalafrigters wat die naweek van 28 – 29 Oktober te Drie Susters aan ‘n afrigtingskamp aangebied deur Patrys van der Merwe en Elize Kotze bygewoon het: Ischké, Shahneé, Sharon, Razelle, Michelle, Heidré, Naomi en Liezel. Ons glo dat hul heelwat nuwe afrigtingstegnieke oor die naweek aangeleer het om te verseker dat ons netbal van krag-tot-krag gaan.

Ons waarde vir die kwartaal is respek. Hierde afgelope week tydens die saalbyeenkoms het juffrou Liezel vir ons ‘n baie mooi boodskap rakende respek gebring. Graag versoek ons ouers en voogde om ons as opvoeders te help om vir ons leerders die belangrikheid van respek vir mense, diere en eiendom vas te lê. Vir my is dit so belangrik dat ons leerders verstaan dat hulle ander mense moet behandel soos hulle self behandel wil word. Deesdae is dit algemeen dat mense mekaar openlik en blatant sonder respek behandel. Dit is ‘n kollektiewe proses waar personeel en ouers/voogde ons leerders moet help om te leer dat alle mense met waardigheid behandel moet word. Ons brose samelewing roep uit vir respek en medemenslikheid.

Graag herinner ek ons ouers/voogde aan die 2023 begrotingsvergadering op Maandag, 07 November 2022, om 18:00 in die biblioteek. Tydens die vergadering word die verhoging van die 2023 skoolfooie goedgekeur.

Ek sluit af met die volgende anonieme aanhaling wat op ons waarde vir die kwartaal fokus, naamlik Respek en wens julle ‘n wonderlike naweek toe.

“Treat people the way you want to be treated,
Talk to people the way you want to be talked to,
Everyone deserves respect’’

Vriendelike groete
Naas Beets
SKOOLHOOF

Die spreekwoordelike mooiste, mooiste maand van 2022 is stadig maar seker besig om plek vir die vrolike Novembermaand te maak soos tyd ongesiens en onverpoos verby snel. Kwartaal 4 mag dalk kort wees, maar sluit heelwat opwindende aktiwiteite asook finale eksamens en assesseringsweke in. Ons toegewyde opvoeders en die RO-opvoeders is tans hard aan die werk om ons leerders deeglik voor te berei en te bemagtig om die uitdagings van die finale assesserings met gemak te hanteer.

Ons skool het sommer vinnig na die Oktober-vakansie sy operasionele ritme gevind en ons leerders het aan verskeie sportwedstryde, ‘n swemgala en kultuuraktiwiteite deelgeneem. Baie geluk aan ons senior koor met hul puik optrede laasweek tydens die Weskus Koorfees te Laerskool Sunningdale. Onder leiding van die Helecia en Ben het hulle as ware ambassadeurs vir ons spogskool opgetree en ons senior- en junior koor eenvoudig van krag-tot-krag geneem. Maak asseblief ‘n nota in jou dagboek om op Sondag, 27 November 2022, die Kerssangdiens by die NG Kerk, Tamboerskloof vanaf 19:00 by te woon. Meer inligting sal binnekort volg.

Ek wil nie graag ‘n leerder spesifiek uitsonder nie, maar ek sal my plig versuim indien ek nie vir Karu Rademeyer hartlik gelukwens met haar merkwaardige prestasie nie. Karu het vanaf 21 – 22 Oktober 2022 aan die nasionale Radikale Redenaarskompetisie in Boksburg deelgeneem. Sy is as nasionale wenner in die Engelse afdeling aangewys en het ‘n tweede plek in die Afrikaanse afdeling behaal. Welgedaan, Karu. Jy maak ons baie trots.

Ons o.11-tennisspelers het ook oor die naweek van 21 – 22 Oktober 2022 tydens die Ceres-Tennistoernooi puik presteer. Hierdie gewilde tennistoernooi word deur die meeste top tennisskole ondersteun en ons seunspan het op die einde van die dag ‘n ongelooflike tweede plek behaal. Merkwaardig om te dink dat ons en LS De Hoop se seunspanne presies op dieselfde punte na 2 dae van tennis vir eerste plek geëindig het, maar ongelukkig by die uittel vir die meeste aantal potte gewen, is hulle as die wenners aangewys. Baie geluk aan Anja wat die spanne (seuns en dogters) vergesel het en natuurlik die volgende seuns: Adriaan Wessels, Gustav van der Linde, Nils le Roux en Rafa Lamprecht. Baie geluk aan Rafa wat nog maar in Gr. 3 is m.a.w. nog o.9 is, wat al sy wedstryde oor die naweek gewen het. Welgedaan, Seuns. Ons is baie trots op julle!

Op Vrydagaand vanaf 18:00 – 20:00 het die inwyding van die opgradering van die kroegfasiliteit by die klubhuis te Conradieveld saam met spesiale gaste plaasgevind. Laat my toe om spesiaal vir Oloff Sieberhagen (ouer by Huppelland en by die skool) hartlik te bedank wat die projek befonds en self bestuur het. Die estetiese en die funksionele verbetering aan die klubhuis maak ‘n ongelooflike verskil en ek glo die skoolgemeenskap gaan nog daar sommer heerlik in die toekoms saam kuier.

Die opgradering van die parkeerarea en aanbring van duidelike rigtingwysers op die teer aan die agterkant van die skool is nog nie afgehandel nie. Dus vir die interim periode rig ek ‘n vriendelik versoek dat tydens die af- en oplaai van jul kinders om asseblief die “drop and go / fetch and leave”-beginsel toe te pas. Moet asseblief nie so stop dat jou voertuig die verkeer belemmer nie. Indien ouers/voogde wel uit hul voertuie wil klim, moet hulle asseblief hul voertuie in die parkeerareas parkeer sodat die vloei van verkeer nog steeds so effektief as moontlik kan plaasvind. Baie dankie vir almal se samewerking in die verband.

Ek sluit af met die volgende aanhaling deur Albert Einstein wat op ons waarde vir die kwartaal fokus, naamlik Respek en wens julle ‘n wonderlike naweek toe.

“Everyone should be respected as individuals,
But no one idolized’’
.
Vriendelike groete

Naas Beets
SKOOLHOOF

Ons is baie trots op die volgende Jannies wat tot hul skole se leerderraad verkies is. Laat weet ons gerus indien julle van nog oud-Jannies weet wat by ander skole verkies is (marinda@jvrprim.co.za).

Henry Potgieter verkies as Onderhoofseun 2023 van HS Rondebosch Boys

Adrian Huysamen en Gerard Snijders is tot Hoërskool JvR se leerderraad as hoofseun en onderhoofseun verkies. Annabelle de Jager, Tiana van den Berg, Johan Jordaan en Adam Liebenberg is ook op volgende jaar se leerderraad.

Neem kennis van die volgende kleredrag vir die sportfotodag op 8 November.

Maak asb. ‘n aantekening in jou dagboek om die prysuitdelingsgeleenthede in ons skoolsaal by te woon.

Maandag, 5 Des:
Gr. 1 – 08:30
Gr. 2 – 10:00
Gr. 3 – 12:00

Dinsdag, 6 Des:
Gr. 4 – 08:30
Gr. 5 – 10:00
Gr. 6 – 12:00

Donderdag, 8 Des:
Gr. 7 – 18:00

Neem kennis dat die skool Vrydag, 28 Okt., vroeër gaan verdaag omdat baie onderwysers betrokke is by die sport op daardie dag en ons te min toesig het vir die res van die skooldag.

• Graad 1-3   12:30
• Graad 4-7   12:45

Hartlike welkom terug by die skool na die heerlike kort Oktober-vakansie. Ek glo almal het die ruskansie terdeë geniet en hul spreekwoordelike ‘batterye’ herlaai sodat ons as skoolgemeenskap die laaste kwartaal die bul by die horings kan pak.

Dit is natuurlik Oktober-maand: die mooiste, mooiste maand veral in Kaapstad met die langverwagte arrivering van die heerlike sonnige weer terwyl Moeder Natuur haar winterkloue stadig maar seker uit die Moederstad onttrek. Ek kan nie anders as om in die maand na C. Louis Leipodlt se pragtige gedig te verwys nie, want dan is alles mos so mooi, vars en nuut terwyl die voeltjies tjirp vanaf vroeg soggens tot laat saans vol lewenslustigheid:

Viooltjies in die voorhuis – Viooltjies blou en rooi!

Viooltjies oral op die veld,
En oral, ai, so mooi!

Dit is die maand Oktober, die mooiste, mooiste maand!

Op hierdie pragtige noot van ‘mooimaak’, glo ek dat julle waargeneem het dat daar ook hard tydens die vakansie aan die volgende twee opwindende projekte gewerk is:

• Die sportveld, plaveisel en teerwerk (agter die skool): Die gras op die uitgebreide sportveldjie het baie mooi gevestig en ons kan die ‘nuwe’ spasie nou baie meer doeltreffend aanwend. Die plaveisel onder die bome naaste aan die uitgang dra by tot die estetiese effek van die hele projek. Hier gaan ons nuwe bankies vir leerders, ouers en personeel plaas om sommer lekker voor-, tydens en na skool te ontspan. Die teerwerk is op Saterdag, 08 Oktober, onder die wakende oog van Gerhard Conradie perfek voltooi. My mond het letterlik oopgehang terwyl ek die indrukwekkende proses aanskou het. ‘n Baie fyner tipe teer is gebruik en met moderne toerusting en kompakteerde rollers (‘bomag’ rollers) perfek gevestig om die gladde oppervlakte te bewerkstellig. Gerhard Conradie ons salueer jou vir wat jy alles vir die skool doen.
• Die Opgradering van die Vierkant: Die projek het op Maandag, 03 Oktober 2022, begin en sal ongeveer 2 maande duur. Hierdie area is vir die tydperk buite perke vir leerders, personeel en ouers tot verdere kennisgewing. Ons is baie opgewonde oor hierdie projek om onder andere esteties die vierkant aan te spreek sodat ons dit in die toekoms meer effektief vir buitelugfunksies asook netbalwedstryde kan gebruik. Die befondsing van die vierkant geskied deur die opbrengs van die veiling vanjaar.

Ons het ook ‘n nuwe tellingbord op die Conradieveld te danke aan ouers se borgskappe opgerig. Dit gaan verseker baie help in die toekoms! Baie dankie aan almal wat ‘n bydrae gelewer het.

Kwartaal 3 is op ‘n hoogtepunt d.m.v die konsert afgesluit en gesprekke hieroor gaan nog lank duur. Die laaste dag van kwartaal 3 is tradisoneel met ‘n saalbyeenkoms afgesluit waartydens ons die Gr. 7’s se Top 10 akademiese presteerders vir kwartaal 3 aangekondig het. Die Top 10-leerders het elk ‘n spesiale sertifikaat ontvang om erkenning aan hul harde werk en pligsgetrouheid te gee. Ons glo dat dit ook die res van ons Jannies sal inspireer om skouer aan die wiel te sit en verantwoordelikheid vir hul eie leer te neem. Hiermee dan die Graad 7’s se Top 10 akademiese presteerders (alfabetiese volgorde) soos einde kwartaal 3:

• Lara Basson
• Lea Basson
• Mia Janse van Rensburg
• Liza Hitge
• Adele Holtshauzen
• Luja Marx
• Kate Mouton
• Elsabé Scholtz
• Cara Swanepoel
• Emke van Wyk
• Nell von Lieres
• Owen Wiese

Welgedaan aan die bogenoemde leerders, julle maak ons baie trots.

Baie geluk aan Susan van der Walt wat formeel tot die Beheerraad as Tesourier verkies is! Dankie vir die werk wat sy alreeds as gekoöpteerde lid verlede kwartaal vir die Beheerraad gedoen het.

Ek wens almal ‘n wonderlike laaste kwaartaal toe en sluit af met die volgende aanhaling van Hussein Nishah wat op ons waarde vir die laaste kwartaal fokus, naamlik Respek.

“Treat people the way
You want to be treated.
Talk to people the way you want to be talked to.
Respect is earned,
Not given.’’

Vriendelike groete

Naas Beets
SKOOLHOOF

Ons sien vreeslik daarna uit om die grootouers van ons pragtige leerders te verwelkom wat die oupa- en oumabederfoggend op Vrydag, 14 Okt., om 10:00 – 12:00 in ons skoolsaal bywoon.

Anders as by Huppelland kan ons ongelukkig net ‘n sekere aantal sitplekke (150) beskikbaar stel. Ons oupa- en oumabederfdag is nie van so ‘n aard dat grootouers saam met hul kleinkinders tee drink nie. Indien jy dalk onder hierdie indruk was en ‘n kaartjie beskikbaar is a.g.v. ‘n kaartjie wat vir ‘n kleinkind gekoop is, moet jy my (marinda@jvrprim.co.za) dadelik kontak om vir iemand anders plek te gee om die geleentheid by te woon.

Belangrike inligting om van kennis te neem:

• Niemand mag op die nuwe sportveld parkeer nie. Parkeer gerus op die plekke wat agter beskikbaar is.
• Aangesien ons tans met verbouings aan die vierkant besig is, maak ons Raché Turner se klas beskikbaar as die deurloopklas om maklik na die saal te stap. Dit is die klas naaste aan die trappe by die tennisbane. Daar sal graad 7-leerders wees wat aanwysings gee.
• Die oggend behels ‘n koppie tee/koffie met ‘n eetdingetjie rondom ‘n gedekte tafel waar lekker samesyn sal seëvier. Graad 7’s sal as kelners optree om die koffie en tee te bedien.
• Daar is ‘n program wat gevolg word met onder andere albei kore (Junior en Senior) wat as vermaak sal optree.
• Nadat die program afgehandel is, sal daar ‘n geleentheid vir foto’s gebied word waartydens grootouers en hul kleinkinders wat in die skool is, afgeneem kan word. Die kinders sal vanuit hul onderskeie klasse geroep word wanneer die tyd vir foto’s aanbreek.
• Grootouers mag gerus hul Grondslagfase kleinkinders (gr. 1-3) se klasse na afloop van die geleentheid besoek. Die kinders mag dan ook saam met hul grootouers huis toe gaan, mits die klasonderwysers daarvan kennis dra.

Leerders kan self besluit of hulle winter- of somerdrag gedurende 11 – 28 Okt. wil dra. Verpligte somerdrag is vanaf 31 Okt. – 14 Des.