Kategorie: Algemeen
Markdag vind Donderdag, 28 September, plaas en dit is die gr. 4 – 6-leerders se beurt om verkope te doen. Graad 7’s het verlede week hul Markdag gehad.
- Tafels kan teen R15 per tafel op die Karri-toep bespreek word.
- Tafelbesprekings sluit Dinsdag, 26 September.
- Geen lewende hawe of klappers mag verkoop word nie.
- Verkope sal vanaf 11:45 tot 12:30 geskied.
Oom Steyn is ons skool se opregte legende! Vir 26 jare het oom Steyn gesorg dat ieder en elk (Huppelland en Laerskool) aangery is tot waar nodig vir uitstappies, sport, toere, ens. Hy was bankier en regterhand vir soveel van ons wat al jare by die skool betrokke is. Ja, leerders het gereeld na oom Steyn as die skoolhoof verwys as bewys van die respek wat hy by soveel mense afgedwing het. Die man met die sterk handdruk wat so gereeld na ‘n vakansie vir elke klas kom groet het en so mooi vir elke onderwyser gevra het hoe ons vakansie was – soveel liefde en mooi is in oom Steyn se hart. Ons sê finaal vir oom Steyn op Vrydag, 29 September, totsiens waar hy ‘n wel verdiende aftrede sal geniet. Alles wat mooi is vir die nuwe lewensfase wat vir jou voorlê!
Ons is so bevoorreg om twee JvR-babas hierdie jaar nog by ons laerskool te verwelkom – dié van Maricqe Coetzer en Michelle Compion (albei gr. 3-onderwysers). Ons het gedurende kwartaal 4 dus twee aflosonderwysers in hierdie twee onderwysers se klasse. Ons is dankbaar dat Anéne Loots ingestem het om in Maricqe en Marlize ter Borg in Michelle se klasse af te los. Ons het heelpartye onderhoude gevoer om geskikte onderwysers vir hierdie spesifieke klasse te vind.
Dan is dit ook lekker om te noem dat Laerskool Jan van Riebeeck (ingesluit Huppelland) hul onderwysers die geleentheid bied om by en van mekaar te leer. ‘n Derde juffrou by LS JvR (dié keer by Huppelland – Magdel Fourie, Hasieklas) verwag haar baba in Oktober en ons het besluit dat Madri Greyling (LS JvR se nasorghoof) die geskikte kandidaat sal wees om in Magdel se plek af te los. Madri is ‘n gekwalifiseerde onderwyseres met hope energie wat die uitdaging met ope arms omhels. Ons is baie dankbaar vir haar entoesiasme. Dit beteken dat Dolinda Mfulo tydelik as nasorghoof sal instaan totdat Magdel in 2024 weer by Huppelland aansluit.
Ons wens die mammas wat op kraamverlof gaan baie sterkte en vreugde toe. Ons vergeet ook glad nie van die onderwysers wat tydelik in hul plekke aflos nie – baie sterkte. Ons sien uit om elkeen beter te leer ken.
Die Bokke het hul wêreldbeker-rugbyveldtog goed afgeskop deur die Skotte 18 – 3 te klop tydens hul eerste wedstryd op Sondag, 10 September, te Stade De Marseille. Ek is seker daarvan dat dit almal se hoogtepunt van die naweek was. Dit is dus belangrik dat jy vandag weer “#Bok-Friday” ten volle ondersteun deur jou springboktrui, of ‘n springbok t-hemp of net iets groen en goud met trots aantrek om die Bokke te ondersteun in hul soeke na glorie. Mag die Bokke die naweek teen Roemenië vir al die ander spanne wys ‘waar Dawid die wortels gegrawe het’.
Op Vrydag, 04 September, het ek al ons gr. 1’s na HS Jan van Riebeeck vergesel om vir elke matrikulant ‘n spesiale kaartjie vir goeie eksamen-wense in die saal te oorhandig. Dit het ons gedoen net voordat hulle met Wiskunde en Wiskundige geletterdheid begin skryf het. Ons gr. 1’s het die pragtigste boodskappe geskryf wat ‘n kosbare glimlag op elke matrikulant se gesig veroorsaak het en ook sommer in die proses die eksamenstres verlig het. Een van die boodskappe het soos volg gelees: “Ek weet wiskunde is baie, baie moeilik, maar ek weet jy kan!”. Hierdie tipe van uitreik na die HS Jan van Riebeeck gaan ‘n jaarlikse instelling word. Volgens die gr. 1’s was dit die beste uitstappie van hul lewe, want hulle kon die ‘groot’ skool besoek. Ons wens HS Jan van Riebeeck se matrikulante alles van die beste vir jul rekord-eksamen toe asook die nasionale seniorsertifikaat-eksamen aan die einde van die jaar.
Op Saterdag, 09 September, het 19 van ons leerders aan die jaarlikse WOW-spelkompetisie se provinsiale rondte te Stellenbosch deelgeneem en soos oudergewoonte puik gevaar, Baie geluk aan die volgende vyf leerders wat vir die Nasionale kompetisie gekwalifiseer het:
Graad 1: Wrensch Silvis (2de)
Graad 4: Ghia Perreira (3de)
Graad 5: Katryn Silvis (1ste) en Amelie van der Walt (2de)
Graad 6: Isabella Marais (4de)
Ons wens vir hulle alle voorspoed en sterkte vir die nasionale rondte toe. Julle maak ons baie trots en ons hou styf duimvas. Baie dankie Ilse-Marié, Raché en Erick wat ons leerders vergesel het.
Baie geluk en sterkte aan die volgende drie leerders wat in die kinderkoor vir die produksie Tosca by die Kunstekaap Opera Huis vanaf 12 –17 September optree:
Karu Rademeyer
Abigail Fourie
Jacob Venter
Ons is baie trots op julle drie en ons weet dit het baie harde voorbereiding geverg.
Hierdie week het die kwartaallikse boekverkoping vanaf 11 – 12 September in ons biblioteek plaasgevind. Baie dankie aan al die leerders wat dit ondersteun het en geniet julle nuwe leesstof terdeë. Baie dankie Marlize vir al die puik reëlings om die dag moontlik te maak.
Alhoewel die weer net eenvoudig nie wil saam speel nie, want die lente het nog nie sy opwagting in die pragtige Moederstad gemaak nie, het ons die afgelope week alreeds met somersportoefeninge begin. Ons moedig al ons Jannies aan om aan ‘n somersport deel te neem en hope pret te hê.
Graag sluit ek af met die onderstaande aanhaling van Kirsten Armstrong (Olimpiese goue medaljewenner vir fietsry) met die fokus op dankbaarheid en positiewe denke. Ek wens vir julle ‘n wonderlike naweek toe.
“When we focus on our gratitude,
the tide of disappointment goes out and
the tide of love rushes in!”
Vriendelike groete
Naas Beets
SKOOLHOOF
Roete: Beginpunt is onder die kabelkarretjie, die beginpunt van Indiavenster. Ons gaan ‘n ent daarmee op en dan op ‘n kontoerpad. Die plan is om na die grot – Andy’s Cave – te stap.
Tyd: Ons vertrek 14:10 van die skool af. Die duur van die stap sal later bevestig word, maar sal nie lank wees nie.
Moeilikheidsgraad: Die eerste deel is opdraend, maar omdat dit nie ver is nie, sal beginners dit steeds kan doen, ons kan dit stadig vat.
Vandag vier ons “#Bok-Friday” en versoek ons al ons leerders, personeel en ouers/voogde om elke Vrydag vanaf 08 September tot die einde van die kwartaal ‘n springboktrui, of ‘n springbok t-hemp of iets groen en goud aan te trek as ‘n kollektiewe poging om die Bokke tydens die 2023 Rugby Wêreldbeker in Frankryk te ondersteun. Soos ons Springbokkaptein, Siya Kolisi sê: “We are in it together and together we are stronger”. Ons wil deel van die nasionale inisiatief wees om bankvas agter die Bokke te staan in ‘n poging om hul titel van 2019 te verdedig en geskiedenis te maak as die eerste land wat vier wêreldbekers verower het. Ek glo almal sien daarna uit om te sien hoe twintig internasionale spanne sake gaan uitspook om vanjaar as die wêreldkampioene bekroon te word.
Op Vrydag, 01 September, is ons akademiese week op ‘n hoogtepunt afgesluit met die gewilde kaskarresies wat op die mini-sportveld agter die skool plaasgevind het. Ons leerders het omtrent die akademiese week terdeë saam met die personeel geniet en ons het leerders die geleenthede gebied om op ander kreatiewe maniere te leer terwyl hulle hope pret het. Ek glo dat die KUNS om ‘n Jannie te wees na afloop van die spesiale week bemeester is.
Ons eerste sportnaweek teen LS Welgemoed het vanaf 01 – 02 September weg plaasgevind. Alhoewel ons dit net as ‘n einde van die seisoen-sportdag gesien het, het dit wel as ‘n interskole-naweek vir die Blessies gedien. Op Vrydag, 01 September, het ons hokkiespanne teen hulle deelgeneem en bietjie “houe gevat”, maar opvallend was die manier hoe ons Jannies, die afrigters en personeel, saam met ouers die verloor-uitslae op die spreekwoordelik ken gevat het. Ek was so trots om te sien dat die Jannies deurgaans oor die naweek met wen of verloor altyd beleefd was, geglimlag het en te alle tye puik sportmangees getoon het. Die naweek was weereens ‘n bewys van die spesiale verhouding tussen leerder en onderwyser, tussen leerder en leerder asook tussen onderwyser en ouer. Selfs een van die Welgemoed-mammas het my genader om ons leerders en personeel se gedrag en sportmangees te komplimenteer. Daar is min skole wat ons unieke etos en kultuur het. Op Saterdag, 02 September, het die momentum tydens die netbal- en rugbywedstryde egter na ons kant geskuif met ons senior netbalspanne wat puik oorwinnings behaal het.
Verskoon dat ek die o.11- en o.13-rugbywedstryde uitlig, maar hier was beslis die Dawid teen Goliat situasie a.g.v. beserings en siektes van sleutelspelers wat nie op die dag kon speel nie. Beide wedstryde was uiters spanningsvol en luidkeels deur leerders, ouers en afrigters aangemoedig. Die o.11’s wen 8 – 7 met ‘n strafdoel van buite die kwartgebied wat deur Carter (kaptein) verdoel is. Ons o.13A’s speel sonder vier sleutelspelers wat ongelukkig beseer en/of siek was. Die span speel egter die wedstryd van hul lewe. Hulle het absoluut vir mekaar gespeel en hul lywe letterlik op die spel geplaas, want hul wou ‘n punt op die dag bewys. Die o.13A’s wen die titaniese stryd met 22 – 14 en laat ons almal in ekstase met hul vasberadenheid en deursettingsvermoë. Baie geluk aan al ons spanne, ons puik en toegewyde afrigters asook ons ondersteunende ouers wat deur dik en dun by ons staan. Glo vir my dat hierdie spesiale vertonings deur sportspanne nie sommer elke dag gebeur nie en almal wat daar teenwoordig was, sal getuig dat dit kosbaar was en ons sal dit nog vir baie lank onthou. Die hoogtepunt was natuurlik toe al ons hokkie- en netbalspelers saam met die rugbyspelers en personeel ‘n kringetjie gemaak het om dit te vier. Ek kon myself nie keer nie en het self by die kringetjie aangesluit en die Jannie-Bom liedjie saam met die spelers gesing. Dit was so spesiaal en as ‘n trotse skoolhoof het ek vir ‘n oomblik amper emosioneel geraak, want ons skool is so geseënd in baie opsigte.
Op Maandag, 04 September, het die bekende motiveringspreker, Lynette Beer (Seeds of Inspiration), ons personeel kom toespreek as deel van personeelontwikkeling asook om die akademiese week met die personeel af te sluit. Lynette is ‘n formidabele dame wat die vermoë het om enige uitgeputte, afgematte en oorlaaide personeel binne een sessie so positief te inspireer dat hulle gevoel het of hulle sopas van ‘n heerlike lang vakansie teruggekeer het. Sy het veral gefokus op die feit dat die mens in die algemeen vergeet om sy/haar dankbaarheidsbril daagliks op te sit, want dit is net te maklik om te kla, negatief te wees en te kritiseer. Sy het verder gefokus op gesindheid en die feit dat jou eie gedagtes jou geestelik en emosioneel kan inspireer of dat dit jou na donker en negatiewe plekke kan dryf. Ons het elke dag twee eenvoudige keuses m.a.w. 1) ons sien al die uitdagings as geleenthede met ‘n silwer randjie of 2) ons laat toe dat negatiwiteit ons totaal insluk. Soos ek in my vorige nuusbriewe al gemeld het, leef ons in ‘n land vol negatiewe situasies soos byvoorbeeld korrupsie, beurtkrag, misdaad, stakings, verkeer, swak dienslewering, nadelige wisselkoerse, ens. en dit opsigself kan baie maklik tot negatiewe gedagtes en angs bydra. Dis juis hieroor waar ons onsself met positiewe mense moet skaar en positiewe dinge uitspreek. Dit is dan ook ons kollektiewe verantwoordelikheid om ons leerders/kinders positief te hou en hulle, die jeug, te motiveer dat hulle instrumenteel in die toekoms moet wees om die land ten goede te verander. Ons woon nog steeds in een van die mooiste stede in die wêreld en beleef elke dag eindelose genade. Ons moet net die moeite doen om die dankbaarheidsbril op te sit en die ‘pragtige’ wêreld saam met ons leerders/kinders aan die anderkant van die lens raak te sien.
Twee Vrydae terug, 25 Augustus, het ons aan die jaarlikse WOW-Spelkompetisie deelgeneem. Ons leerders het puik gevaar en weereens stof in die ander groter skole se oë geskop. 19 uit die 20 van die leerders wat deelgeneem het, het deurgedring na die provinsiale rondte wat môre in Stellenbosch plaasvind. My beste wense vergesel hulle.
Graag sluit ek af met die onderstaande aanhaling van G.K. Chesterton met die fokus op dankbaarheid en positiewe denke. Ek wens vir julle ‘n wonderlike naweek toe.
“When it comes to life
the critical thing is whether you take it for granted
or take them for gratitude!”
Vriendelike groete
Naas Beets
SKOOLHOOF
Vandag vier ons Loslitdag. Loslitdag is vir die eerste keer in 1995 gevier. Hierdie toonaangewende en bewusmakingsinisiatief is ten bate van mense met gestremdhede. Ons moedig dus vandag ons leerders, ouers en personeel aan om iets unieks (so bont en kleurvol moontlik) aan te trek en in die proses ook ‘n klein donasie (plakker @ R20) te maak wat ons dan vir ‘n organisasie wat vir persone met gestermdhede help, skenk. Hiermee kan ons dan as skoolgemeenskap ons klein gebaar van dankbaarheid en omgee betoon. Ons tema vanjaar is “share a smile”. ‘n Glimlag kos nie ‘n sent nie; ek daag ons skoolgemeenskap uit om dit daagliks vir ander mense te gee en so skep ons ‘n beter wêreld.
Op Vrydag, 25 Augustus, het die jaarlikse en gewilde Ouma- en Oupadag plaasgevind. Oumas en Oupas het van heinde en verre gekom om die spesiale dag saam met hul kleinkind(ers) by ons pragtige skool te geniet. Die hoogtepunt van die dag was beslis die insiggewende toespraak deur ons gasspreker, naamlik Elsabé Daneel. Elsabé is nie net ‘n formidabele vrou en aktrise nie, maar ook ‘n ouma by ons. Die dag is verder opgekikker met smaaklike lekkernye om aan te smul terwyl ons deur die gr. 7-leerders met drinkgoed bedien is. Groot dankie aan Marinda en haar span wat die dag onvergeetlik gemaak het.
Dit was ‘n groot eer en voorreg om al ons oumas en oumas by ons skool te ontvang, hulle te ontmoet en die dag saam met hulle te kon spandeer. Ons moet nooit vergeet dat Oumas en Oupas die spilpunte is van die familie tussen die verlede en hede veral wanneer dit kom by familie-erfenis, tradisies en die oordra van stories oor die jare heen. Ek salueer al ons oumas en oupas vir die belangrike rol wat hulle in ons skoolgemeenskap speel. Hulle is vir ons leerders veral in vandag se veranderde lewe belangrike mentors en rolmodelle en natuurlik ook hul helde. Graag wil ek sommer namens ons leerders en ouers/voogde vir al ons oumas en oupas hartlik bedank vir hul onverdeelde aandag, liefde, toegeneentheid en omgee. Oumas en Oupas is baie spesiaal en hulle moet dit nooit vergeet nie. My beste wense vergesel hulle!
Hierdie afgelope week vier ons akademiese week en fokus ons op die KUNS om ‘n Jannie te wees! Die doel van die akademiese week is juis om ons leerders blootstelling te gee wat juis nie tydens ‘n normale akademiese week plaasvind nie. Hulle het die geleenthede gekry om aan die volgende aktiwiteite en aanbiedinge deel te neem:
- Die KUNS van Karate – Gr. 1-3
- Die KUNS van Joga – Gr. 5-7
- Die KUNS van Pilates – Gr. 4
- Die KUNS van Entrepreneurskap – Gr. 7
- Die KUNS van algemene gesondheid – Gr. 1-3
- Die KUNS van redenaars
- Die KUNS van goeie velsorg – Gr. 5-7
- Die KUNS om jou tande te versorg – Gr. 1-3
- Die KUNS van omgee
- Die KUNS om gesond te leef – Gr. 5-7
- Klimaat – ‘n KUNS op sy eie – Gr. 5-7
- KUNS van leierskap – Gr. 6-7 en personeel
- KUNS van modeparade – Gr. 7
- Die KUNS van toekomstige vaardighede – personeel
- Die KUNS om sensoriese integrasie aan te spreek – personeel
- KUNS om talente te ontwikkel – Jannies Talent
- Die KUNS van klassieke musiek – Gr. 1-3
- Die KUNS van houtwerk – Gr. 4
- Die KUNS om kunstig te wees – Gr. 2
- Die KUNS om pret te hê – Gr. 1-7 (Kaskarresies)
- Die KUNS om jouself te verdedig – Gr. 5-7
Die bogenoemde aktiwiteite en aanbiedinge is juis gereël om ons leerders blootstelling op ‘n ander vlak van leer te gee. Leer hoef nie noodwendig in die tradisionele sin van die woord byvoorbeeld slegs in die klaskamer plaas te vind nie. Daarom het die leerders aan nuwe, kreatiewe aktiwiteite deelgeneem om hulle juis te inspireer om buite die spreekwoordelike boksie te dink. Baie dankie aan al ons ouers wat die afgelope week as gasspekers opgetree het. Dinsdagmiddag het Jonty Thomson (‘n ouer by die skool) die onderwyspersoneel toegespreek as deel van die akademiese week oor leierskap. Hy noem onder andere dat onderwysers almal leiers is en leiers inspireer ander mense om te groei en ‘n beter weergawe van hulself te wees. Sy aanbieding was merkwaardig en ons gaan poog dat hy een aand ook ons ouers toespreek. Ons is so bevoorreg om julle kundigheid in die skool aan te wend en wat ‘n wonderlike voorreg vir ons leerdes om na hulle eie ouers te kon luister. Hierdie akademiese week kan nie plaasvind indien dit nie deeglik beplan en gereël is nie, dus laat my toe om vir Marinda en haar span hartlik te bedank en geluk te wens met ‘n fantastiese en inspirerende akademiese week wat vir ‘n lang tydjie by die leerders en personeel sal bly.
Woensdagaand, 30 Augustus, is die jaarlikse en gewilde Jannies Talent-aand gehou. Weereens laat ons talentvolle Jannies ‘n mens stomgeslaan staan met hul unieke talente en selfvertroue. Ek wil elke deelnemer baie gelukwens met hul puik optrede. In my oë was julle almal wenners! Baie geluk aan die volgende leerders wat op die aand as trofee-wenners aangewys is:
- André Marais
- Armand Coetzer
- Jean-Jacques Rossouw
Baie dankie aan die OOV onder leiding van Coreen Scholtz wat vir ons die drank en spyse hanteer het. Laat my ook toe om die organiseerder, naamlik Helecia Groenewald, hartlik te bedank met die puik en gesellige aand. Dit was ook ‘n nostalgiese aand, aangesien Helecia na 32 jaar van ongebroke diens by ons skool aan die einde van die jaar aftree. Groot dankie ook aan Ben wat verantwoordelik was vir die professionele verfraaiing van die saal en die voorportaal.
In die vorige nuusbrief het ek verwys na Frank van der Walt (gr. 6) se opname in die WP o.12-rugbygroep wat die komende September-vakansie te Riversdal gaan deelneem. Graag deel ek dat hy hierdie afgelope week vir die WP o.12A-Span gekies is. Dit is die eerste keer sedert 2013 dat ons skool ‘n WP-Skole rugbyspeler oplewer. Baie geluk ook aan die trotse ouers, naamlik Franci en Nel, ons is saam met julle trots op sy prestasie.
Baie geluk ook aan al ons leerders wat op Vrydag, 25 Augustus, aan die jaarlikse WOW-Spelkompetisie deelgeneem het. Ons leerders het puik gevaar en weereens stof in die ander groter skole se oë geskop. 19 uit die 20 leerders wat deelgeneem het, het deurgedring na die provinsiale rondte in Stellenbosch wat op Saterdag, 09 September, gaan geskied.
Baie dankie aan Stephanie le Roux van Alive Foundation wat gereël het dat van ons leerders en personeel gratis oogtoetsing ondergaan het en in die proses ook brille ontvang het. Ons leerders en personeel se dag is beslis gemaak toe Stephanie dit die afgelope week kom aflewer het.
Graag sluit ek af met die onderstaande aanhaling met die fokus op “Die KUNS om ‘n Jannie te wees”. Ek wens vir julle ‘n wonderlike naweek toe. Sterkte aan al die spanne wat oor die naweek aan sportwedstryde teen Laerskool Welgemoed deelneem.
“The artist is not a special kind of person;
rather each person is a special kind of artist!”:
Vriendelike groete
Naas Beets
SKOOLHOOF
Die Burger het twee keer per jaar ‘n Skole Spogblad en ons wil graag iets van Jan van Riebeeck plaas. Ons gaan foto’s van leerders gebruik om met ‘n paar aktiwiteite en prestasies by JvR te spog. Indien jy nie graag wil hê ‘n foto van jou kind moet in die koerant verskyn nie, stuur asb. ‘n e-pos aan suzaan@jvrprim.co.za of ‘n Skooler-boodskap op die Algemeen kontakgroep voor Woensdag, 6 September.
Die bylaag sal in Die Burger van 11 September verskyn.
Ek probeer normaalweg nie om al die fokus in my weeklikse nuusbriewe rakende skoolsport te hou nie, maar ek glo dat ek my plig sal versuim indien ek nie die afgelope Interskole teen Laerskool Dirkie Uys te Moorreesburg uitsonder nie.
Al die opwinding, positiewe energie en afwagting, en glo vir my daar was baie, het begin op Maandag, 14 Augustus, met die afskop van die Geesweek. Die spreekwoordelike kersie op die koek was die ‘Groot Brag’ wat Vrydagoggend vanaf 09:00 – 10:00 in die saal plaasgevind het. Vanjaar het die geeskomitee ‘GROOT’ gegaan en almal se verwagtinge oortref met die omvang van die ‘Groot Brag’. Dis begin met ‘n spesiale video waarin al die personeel hul onderskeidelike dansies uitvoer as deel van die geesvang asook om ons leerders sterkte vir die Interskole toe te wens. Dit is weereens ‘n bewys van die goeie gees wat onder die personeel heers asook hul omgee karakter wat baie kosbaar is. Die Hoërskool Jan van Riebeeck was ook deel van die funksie en onder leiding van hul Interskole-rasieleiers het ons sommer heerlik in die saal saamgesing en behoorlik geesgevang. Baie dankie aan mnr. Rademeyer wat ook die verrigtinge bygewoon het. Na afloop van die voorstelling van ons eerste spanne is daar ‘n baie spesiale video aan ons leerders vertoon waarin verskeie Protea-netbal- en -hokkiespelers asook Springbokke ons spanne sterkte vir die naweek toegewens het. Cheslin Colbie en Manie Libbok was deel van die video en dit was net eenvoudig die hoogtepunte vir die meeste leerders. Ek wens ons het genoeg spasie in die saal gehad om ook ons ouers te nooi om saam met ons die ongelooflike funksie te kon ervaar. Graag bedank ek die Geeskomitee onder leiding van juf. Shahneé wat eenvoudig ons wildste verwagtinge rakende geesweek en ‘Groot Brag’ oorskry het. Ek glo dat ons leerders hierdie ‘Groot Brag’ vir nog baie jare sal onthou. Ek is vas oortuig dat as jy nie tydens die ‘Groot Brag’ geesgevang het nie, sal daar bittemin goed in die wêreld wees wat jou sal laat geesvang.
Ons wintersportspanne het deur die bank goed oor die 2 dae van interskole presteer met die hokkiewedstryde wat op Vrydag, 18 Augustus, en die rugby- en netalwedstryde wat op Saterdag, 19 Augustus, plaasgevind het. Dit is altyd lekker vir ons stadsbewoners om die pad na die platteland te vat en vanjaar as gevolg van die goeie winterreën was die landskap en omgewing idilies mooi. Die kontras tussen die jong groenkoringlande, die blaarlose wingerde en geel kanola-lande maak die rit na Moorreesburg die moeite werd. Verfrissend was die heerlike plattelandse gasvryheid en ons is al twee dae met met ope arms deur hul leerders en ouers ontvang. Selfs die weer het saamgespeel en kon ons lekker meeding tydens die sonnige dae en heerlik smul aan smaaklike lekkernye wat net die platteland kan bedien. Laat my toe om al ons eerste spanne (dogtershokkie, seunshokkie, netbal en rugby) hartlik geluk te wens met hul puik oorwinnings. Soos ek dit verstaan het die eerste spanne oor die naweek geskiedenis gemaak aangesien dit nog nie voorheen gebeur het nie en veral nie weg nie. Tellings en uitslae is beslis nie al waaroor interskole gaan nie, maar eerder oor sportmansgees, deursettingsvermoë, spanwerk, toets van jou karakter en die geleentheid vir ons leerders om nuwe vriende te maak. Natuurlik is ek baie trots op die suksesvolle naweek, maar ek is meer trots op ons leerders se gedrag op en van die veld af, hoe hulle sportmansgees uitleef asook hoe hulle die opposisie met die grootste respek hanteer het. Ons as skoolgemeenskap kan uiters trots op ons leerders en afrigters vir hul onberispelike gedrag wees terwyl daar baie druk op beide is. Baie dankie aan die massa ouers wat die interskole ondersteun het. Dit was so lekker om julle daar saam met jul kinders te sien. Wel gedaan Laerskool Jan van Riebeeck! Mag ons alyd nederig bly, maar nog steeds voortbou op ons suksesse om van krag-tot-krag te gaan.
Graag sluit ek af met die onderstaande aanhaling van sukses deur Hans W Thomasz en ek wens vir almal ‘n wonderlike naweek toe. Mag al ons oumas en oupas die spesiale dag vandag by die skool geniet en baie dankie dat julle moeite doen om jul kleinkind/ers se dag te maak. Sterkte aan al die spanne wat oor die naweek aan sport deelneem asook aan al ons leerders wat aan Eistedfodd en WOW-spelfees deelneem.
“Work hard and achieve your dreams!
Enjoy success,
but always stay humble!’’
Vriendelike groete
Naas Beets
SKOOLHOOF
Belangrike Datums
junie 2026
julie 2026
augustus 2026
september 2026
oktober 2026
november 2026
desember 2026
maart 2027
mei 2027