Kategorie: Algemeen

Die skool verdaag Maandag, 4 Sept., vroeër a.g.v. ‘n personeelopleiding:

12:45 (graad 1 – 3)
13:00 (graad 4 – 7)
Die bus vertrek om 13:05

Vandag vier ons Loslitdag. Loslitdag is vir die eerste keer in 1995 gevier. Hierdie toonaangewende en bewusmakingsinisiatief is ten bate van mense met gestremdhede. Ons moedig dus vandag ons leerders, ouers en personeel aan om iets unieks (so bont en kleurvol moontlik) aan te trek en in die proses ook ‘n klein donasie (plakker @ R20) te maak wat ons dan vir ‘n organisasie wat vir persone met gestermdhede help, skenk. Hiermee kan ons dan as skoolgemeenskap ons klein gebaar van dankbaarheid en omgee betoon. Ons tema vanjaar is “share a smile”. ‘n Glimlag kos nie ‘n sent nie; ek daag ons skoolgemeenskap uit om dit daagliks vir ander mense te gee en so skep ons ‘n beter wêreld.

Op Vrydag, 25 Augustus, het die jaarlikse en gewilde Ouma- en Oupadag plaasgevind. Oumas en Oupas het van heinde en verre gekom om die spesiale dag saam met hul kleinkind(ers) by ons pragtige skool te geniet. Die hoogtepunt van die dag was beslis die insiggewende toespraak deur ons gasspreker, naamlik Elsabé Daneel. Elsabé is nie net ‘n formidabele vrou en aktrise nie, maar ook ‘n ouma by ons. Die dag is verder opgekikker met smaaklike lekkernye om aan te smul terwyl ons deur die gr. 7-leerders met drinkgoed bedien is. Groot dankie aan Marinda en haar span wat die dag onvergeetlik gemaak het.

Dit was ‘n groot eer en voorreg om al ons oumas en oumas by ons skool te ontvang, hulle te ontmoet en die dag saam met hulle te kon spandeer. Ons moet nooit vergeet dat Oumas en Oupas die spilpunte is van die familie tussen die verlede en hede veral wanneer dit kom by familie-erfenis, tradisies en die oordra van stories oor die jare heen. Ek salueer al ons oumas en oupas vir die belangrike rol wat hulle in ons skoolgemeenskap speel. Hulle is vir ons leerders veral in vandag se veranderde lewe belangrike mentors en rolmodelle en natuurlik ook hul helde. Graag wil ek sommer namens ons leerders en ouers/voogde vir al ons oumas en oupas hartlik bedank vir hul onverdeelde aandag, liefde, toegeneentheid en omgee. Oumas en Oupas is baie spesiaal en hulle moet dit nooit vergeet nie. My beste wense vergesel hulle!

Hierdie afgelope week vier ons akademiese week en fokus ons op die KUNS om ‘n Jannie te wees! Die doel van die akademiese week is juis om ons leerders blootstelling te gee wat juis nie tydens ‘n normale akademiese week plaasvind nie. Hulle het die geleenthede gekry om aan die volgende aktiwiteite en aanbiedinge deel te neem:

• Die KUNS van Karate – Gr. 1-3
• Die KUNS van Joga – Gr. 5-7
• Die KUNS van Pilates – Gr. 4
• Die KUNS van Entrepreneurskap – Gr. 7
• Die KUNS van algemene gesondheid – Gr. 1-3
• Die KUNS van redenaars
• Die KUNS van goeie velsorg – Gr. 5-7
• Die KUNS om jou tande te versorg – Gr. 1-3
• Die KUNS van omgee
• Die KUNS om gesond te leef – Gr. 5-7
• Klimaat – ‘n KUNS op sy eie – Gr. 5-7
• KUNS van leierskap – Gr. 6-7 en personeel
• KUNS van modeparade – Gr. 7
• Die KUNS van toekomstige vaardighede – personeel
• Die KUNS om sensoriese integrasie aan te spreek – personeel
• KUNS om talente te ontwikkel – Jannies Talent
• Die KUNS van klassieke musiek – Gr. 1-3
• Die KUNS van houtwerk – Gr. 4
• Die KUNS om kunstig te wees – Gr. 2
• Die KUNS om pret te hê – Gr. 1-7 (Kaskarresies)
• Die KUNS om jouself te verdedig – Gr. 5-7

Die bogenoemde aktiwiteite en aanbiedinge is juis gereël om ons leerders blootstelling op ‘n ander vlak van leer te gee. Leer hoef nie noodwendig in die tradisionele sin van die woord byvoorbeeld slegs in die klaskamer plaas te vind nie. Daarom het die leerders aan nuwe, kreatiewe aktiwiteite deelgeneem om hulle juis te inspireer om buite die spreekwoordelike boksie te dink. Baie dankie aan al ons ouers wat die afgelope week as gasspekers opgetree het. Dinsdagmiddag het Jonty Thomson (‘n ouer by die skool) die onderwyspersoneel toegespreek as deel van die akademiese week oor leierskap. Hy noem onder andere dat onderwysers almal leiers is en leiers inspireer ander mense om te groei en ‘n beter weergawe van hulself te wees. Sy aanbieding was merkwaardig en ons gaan poog dat hy een aand ook ons ouers toespreek. Ons is so bevoorreg om julle kundigheid in die skool aan te wend en wat ‘n wonderlike voorreg vir ons leerdes om na hulle eie ouers te kon luister. Hierdie akademiese week kan nie plaasvind indien dit nie deeglik beplan en gereël is nie, dus laat my toe om vir Marinda en haar span hartlik te bedank en geluk te wens met ‘n fantastiese en inspirerende akademiese week wat vir ‘n lang tydjie by die leerders en personeel sal bly.

Woensdagaand, 30 Augustus, is die jaarlikse en gewilde Jannies Talent-aand gehou. Weereens laat ons talentvolle Jannies ‘n mens stomgeslaan staan met hul unieke talente en selfvertroue. Ek wil elke deelnemer baie gelukwens met hul puik optrede. In my oë was julle almal wenners! Baie geluk aan die volgende leerders wat op die aand as trofee-wenners aangewys is:

• André Marais
• Armand Coetzer
• Jean-Jacques Rossouw

Baie dankie aan die OOV onder leiding van Coreen Scholtz wat vir ons die drank en spyse hanteer het. Laat my ook toe om die organiseerder, naamlik Helecia Groenewald, hartlik te bedank met die puik en gesellige aand. Dit was ook ‘n nostalgiese aand, aangesien Helecia na 32 jaar van ongebroke diens by ons skool aan die einde van die jaar aftree. Groot dankie ook aan Ben wat verantwoordelik was vir die professionele verfraaiing van die saal en die voorportaal.

In die vorige nuusbrief het ek verwys na Frank van der Walt (gr. 6) se opname in die WP o.12-rugbygroep wat die komende September-vakansie te Riversdal gaan deelneem. Graag deel ek dat hy hierdie afgelope week vir die WP o.12A-Span gekies is. Dit is die eerste keer sedert 2013 dat ons skool ‘n WP-Skole rugbyspeler oplewer. Baie geluk ook aan die trotse ouers, naamlik Franci en Nel, ons is saam met julle trots op sy prestasie.

Baie geluk ook aan al ons leerders wat op Vrydag, 25 Augustus, aan die jaarlikse WOW-Spelkompetisie deelgeneem het. Ons leerders het puik gevaar en weereens stof in die ander groter skole se oë geskop. 19 uit die 20 leerders wat deelgeneem het, het deurgedring na die provinsiale rondte in Stellenbosch wat op Saterdag, 09 September, gaan geskied.

Baie dankie aan Stephanie le Roux van Alive Foundation wat gereël het dat van ons leerders en personeel gratis oogtoetsing ondergaan het en in die proses ook brille ontvang het. Ons leerders en personeel se dag is beslis gemaak toe Stephanie dit die afgelope week kom aflewer het.

Graag sluit ek af met die onderstaande aanhaling met die fokus op “Die KUNS om ‘n Jannie te wees”. Ek wens vir julle ‘n wonderlike naweek toe. Sterkte aan al die spanne wat oor die naweek aan sportwedstryde teen Laerskool Welgemoed deelneem.

“The artist is not a special kind of person;
rather each person is a special kind of artist!”:

Vriendelike groete

Naas Beets
SKOOLHOOF

Die Burger het twee keer per jaar ‘n Skole Spogblad en ons wil graag iets van Jan van Riebeeck plaas. Ons gaan foto’s van leerders gebruik om met ‘n paar aktiwiteite en prestasies by JvR te spog. Indien jy nie graag wil hê ‘n foto van jou kind moet in die koerant verskyn nie, stuur asb. ‘n e-pos aan suzaan@jvrprim.co.za of ‘n Skooler-boodskap op die Algemeen kontakgroep voor Woensdag, 6 September.

Die bylaag sal in Die Burger van 11 September verskyn.

Ek probeer normaalweg nie om al die fokus in my weeklikse nuusbriewe rakende skoolsport te hou nie, maar ek glo dat ek my plig sal versuim indien ek nie die afgelope Interskole teen Laerskool Dirkie Uys te Moorreesburg uitsonder nie.

Al die opwinding, positiewe energie en afwagting, en glo vir my daar was baie, het begin op Maandag, 14 Augustus, met die afskop van die Geesweek. Die spreekwoordelike kersie op die koek was die ‘Groot Brag’ wat Vrydagoggend vanaf 09:00 – 10:00 in die saal plaasgevind het. Vanjaar het die geeskomitee ‘GROOT’ gegaan en almal se verwagtinge oortref met die omvang van die ‘Groot Brag’. Dis begin met ‘n spesiale video waarin al die personeel hul onderskeidelike dansies uitvoer as deel van die geesvang asook om ons leerders sterkte vir die Interskole toe te wens. Dit is weereens ‘n bewys van die goeie gees wat onder die personeel heers asook hul omgee karakter wat baie kosbaar is. Die Hoërskool Jan van Riebeeck was ook deel van die funksie en onder leiding van hul Interskole-rasieleiers het ons sommer heerlik in die saal saamgesing en behoorlik geesgevang. Baie dankie aan mnr. Rademeyer wat ook die verrigtinge bygewoon het. Na afloop van die voorstelling van ons eerste spanne is daar ‘n baie spesiale video aan ons leerders vertoon waarin verskeie Protea-netbal- en -hokkiespelers asook Springbokke ons spanne sterkte vir die naweek toegewens het. Cheslin Colbie en Manie Libbok was deel van die video en dit was net eenvoudig die hoogtepunte vir die meeste leerders. Ek wens ons het genoeg spasie in die saal gehad om ook ons ouers te nooi om saam met ons die ongelooflike funksie te kon ervaar. Graag bedank ek die Geeskomitee onder leiding van juf. Shahneé wat eenvoudig ons wildste verwagtinge rakende geesweek en ‘Groot Brag’ oorskry het. Ek glo dat ons leerders hierdie ‘Groot Brag’ vir nog baie jare sal onthou. Ek is vas oortuig dat as jy nie tydens die ‘Groot Brag’ geesgevang het nie, sal daar bittemin goed in die wêreld wees wat jou sal laat geesvang.

Ons wintersportspanne het deur die bank goed oor die 2 dae van interskole presteer met die hokkiewedstryde wat op Vrydag, 18 Augustus, en die rugby- en netalwedstryde wat op Saterdag, 19 Augustus, plaasgevind het. Dit is altyd lekker vir ons stadsbewoners om die pad na die platteland te vat en vanjaar as gevolg van die goeie winterreën was die landskap en omgewing idilies mooi. Die kontras tussen die jong groenkoringlande, die blaarlose wingerde en geel kanola-lande maak die rit na Moorreesburg die moeite werd. Verfrissend was die heerlike plattelandse gasvryheid en ons is al twee dae met met ope arms deur hul leerders en ouers ontvang. Selfs die weer het saamgespeel en kon ons lekker meeding tydens die sonnige dae en heerlik smul aan smaaklike lekkernye wat net die platteland kan bedien. Laat my toe om al ons eerste spanne (dogtershokkie, seunshokkie, netbal en rugby) hartlik geluk te wens met hul puik oorwinnings. Soos ek dit verstaan het die eerste spanne oor die naweek geskiedenis gemaak aangesien dit nog nie voorheen gebeur het nie en veral nie weg nie. Tellings en uitslae is beslis nie al waaroor interskole gaan nie, maar eerder oor sportmansgees, deursettingsvermoë, spanwerk, toets van jou karakter en die geleentheid vir ons leerders om nuwe vriende te maak. Natuurlik is ek baie trots op die suksesvolle naweek, maar ek is meer trots op ons leerders se gedrag op en van die veld af, hoe hulle sportmansgees uitleef asook hoe hulle die opposisie met die grootste respek hanteer het. Ons as skoolgemeenskap kan uiters trots op ons leerders en afrigters vir hul onberispelike gedrag wees terwyl daar baie druk op beide is. Baie dankie aan die massa ouers wat die interskole ondersteun het. Dit was so lekker om julle daar saam met jul kinders te sien. Wel gedaan Laerskool Jan van Riebeeck! Mag ons alyd nederig bly, maar nog steeds voortbou op ons suksesse om van krag-tot-krag te gaan.

Graag sluit ek af met die onderstaande aanhaling van sukses deur Hans W Thomasz en ek wens vir almal ‘n wonderlike naweek toe. Mag al ons oumas en oupas die spesiale dag vandag by die skool geniet en baie dankie dat julle moeite doen om jul kleinkind/ers se dag te maak. Sterkte aan al die spanne wat oor die naweek aan sport deelneem asook aan al ons leerders wat aan Eistedfodd en WOW-spelfees deelneem.

“Work hard and achieve your dreams!
Enjoy success,
but always stay humble!’’

Vriendelike groete

Naas Beets
SKOOLHOOF

Leerders gaan tydens Akademiese Week sport in skooltyd beoefen. Daar sal dus geen sport na skool wees nie. Maandag, 4 Sept, verdaag die skool vroeër a.g.v. ‘n personeelopleiding.

Maandag, 28 Aug.:

Netbal / Rugby
12:00 – 13:00
o.7 – o.9

Dinsdag, 29 Aug.:

Hokkie
11:30 – 12:30 (o.7 – o.9)
13:00 – 14:00 (o.10 – o.13)

Woensdag, 30 Aug.:

Netbal / Rugby
11:30 – 12:30 (o.7 – o.9)
13:00 – 14:00 (o.10 – o.13)

Maandag, 4 Sept.:

Skool verdaag vroeër
12:45 (graad 1 – 3)
13:00 (graad 4 – 7)

Die skool het ‘n platform waarop ons foto’s van skoolaktiwiteite deel. Indien jy nog nie daarop ingeteken het nie, of graag ‘n e-poskennisgewing wil ontvang wanneer ons iets geplaas het, volg gerus hierdie skakel vir instruksies: JvR-Kiek

Die afgelope week is daar sommer behoorlik gees gevang vir die afskop van die interskole vandag met hokkie teen LS Dirkie Uys te Moorreesburg. Die Geesweek het met groot opwinding op Maandag, 14 Augustus, afgeskop met die volgende temas en aktiwiteite vir elke dag:

• • Maandag: Bloudag
  • Dinsdag: Barbiedag
    
  • Woensdag: ‘’Mismatch’’ dag asook onderwysers wat teen die ouers netbal en raakrugby gespeel het. Die leerders het luidkeels hul ouers asook die onniespanne aangemoedig, maar dit tog moeilik gevind vir watter span hulle nou eintlik moes ondersteun. Dit was groot pret en graag wil ek al die ouers hartlik bedank wat die tyd gemaak het om aan die wedstryde deel te neem en in die proses dit baie spesiaal vir die leerders te maak. Baie geluk aan ons pappas wat die raakrugby teen ons manspersoneel gewen het, maar ongelukkig moes ons mammas tweede viool teen ons netbaljuffies speel.
    
    

• Donderdag: “Crazy Hat” dag
• Vrydag: Oranjedag asook die “Big Brag”

Verder versier die leerders hul klaskamerdeure vir die interskole en daar is daagliks pryse uitgedeel vir die leerders met die mees oorspronklike kleredag om die onderskeidelike temas uit te beeld.

Op Vrydagaand, 11 Augustus, het die jaarlikse Quiz-aand alias die Bring-en-Raai-aand plaasgevind. Hierdie gewilde, sosiale geleentheid op die skoolkalender was weer vanjaar die spreekwoordelike wenner. Daar was nie plek vir ‘n muis of sal ek eerder sê vir ‘n rot in die saal nie en die bekende akteur, Beer Adriaanse, was aan die stuur van sake. Hy het hom uitstekend van sy taak gekwyt. Ek het die voorreg gehad om self die vasvrae-aand by te woon en opvallend was die opwinding en ongelooflike gees wat onder ons ouers geheers het. Indien jy die gewilde Bring-en-Raai-aand gemis het, maak beslis seker dat jy dit volgende jaar bywoon terwyl jy jou eie spys en drank kan geniet. Baie geluk aan Kees Snijders en sy span wat twee jaar in ‘n ry die spesiale trofee verower het. ‘n Spesiale dankie aan Karien Zulch wat elke jaar vir ons die gewilde geleentheid reël.

Alhoewel daar heelwat sport- en kultuuraktiwiteite (Koor & Eisteddfod) die afgelope tyd plaasgevind het, bly akademie nog steeds ons kernbesigheid. Ons gr. 4 – 7-onderwysers werk hard om ons eie akademiese materiaal op Teams te ontwikkel. Ek is baie dankbaar vir ons dinamiese IKT-span onder leiding van Marié Cruywagen wat saam met ons onderwysers werk om tegnologie te gebruik om die gr. 4 – 7-leerders se leerervaring verder te verryk. Verder is daar op Saterdag, 12 Augustus 2023, ‘n wiskundekamp vir ons gr. 6 en 7-leerders vanaf 08:30 – 17:00 by die skool deur Leon Hanekom en Andri de Villiers aangebied. Die doel van die wiskundekamp is drieledig, dit sluit eerstens die vaslegging van belangrike wiskundige beginsels in, tweedens om ‘n liefde vir Wiskunde verder te inspireer en derdens om pret te hê terwyl hulle wiskundige kennis en –vaardighede uitgebrei word. Tydens die dag is daar ook in goeie gees gekompeteer en die volgende wenners is as volg aangewys:

• Wenspan vir die dag was die Leeus (Katia van Wyk, Stella Lamprecht, Michel-Georges Delpierre en Anna Louw)
• Kahoot – beste prestasie: Willem Burger
• Snelvuur – beste prestasie: Wiillem Burger
• Woordsomme – beste prestasie: Katia van Wyk
• Algehele beste prestasie: Willem Burger

Baie dankie aan Leon en Andri wat seker maak ons gr. 6 & 7-leerders geniet Wiskunde as ‘n belangrike leerarea asook om ‘n hoë standaard van Wiskunde-onderrig te verseker.

Graag sluit ek af met die onderstaande uitdaging en ek wens vir almal ‘n wonderlike interskole-naweek toe. Ek hoop om almal vandag of môre by die interskole raak te loop. Geniet gerus die interskole saam met jou kind/ers. Dit is vir my belangrik dat ons leerders ook pret moet hê wanneer hulle aan sportwedstryde en toernooie deelneem. Onthou: die spel gaan oor die kinders en nie oor ons as ouers of afrigters nie. Mooi naweek!

“BE HAPPY
Not because everything is good
but because you can see the good in everything.’’

Vriendelike groete

Naas Beets
SKOOLHOOF

Beste Huppelland- & Graad 1 & 2-ouers

Ons eerste ouerpraatjie dié jaar geskied 17 Augustus deur Dr. Jenny Rose. Sy is ‘n Kliniese Sielkundige wat in kinders spesialiseer. Gaan lees gerus meer deur die volgende skakel te volg.

Die praatjie kan ongelukkig weens die bouery nie in die klubhuis plaasvind nie. Hierdie jaar sal dit in die Laerskool se skoolsaal wees. Die kaartjies sal op Karri teen R100 pp te koop wees en sluit ‘n glasie wyn in. Die praatjie sal stiptelik om 18:30 begin. Ouers kan van 17:45 by die skoolsaal vergader, ‘n glasie wyn drink en sosialiseer.

Dr. Jenny Rose se praatjie sal oor die volgende handel:
– Emosionele ontwikkeling
– Hoe om jou kind se gedrag te verstaan
– Dissipline tuis

Ons sien almal geweldig uit om na haar te luister en wag al lank om haar by Huppelland te verwelkom!

Groete
Die Huppellandspan

Volgende week is Geesweek! Leerders kan volgende week volgens die volgende temas aantrek:

• Maandag: Bloudag
• Dinsdag: Barbiedag
• Woensdag: Mismatch-dag
• Donderdag: “Crazy hat”-dag
• Vrydag: Oranjedag

Maak skoon, maak leeg en skenk als vir Hoërskool Jan van Riebeeck se Plezier Markt wat vir 23 September beplan word!

Ons versoek dat ouers enige van die onderstaande produkte wat in ‘n goeie toestand is, vir die Hoërskool sal skenk. Produkte wat ons ontvang, sal gedurende die mark ten bate van die Hoërskool by hul Thrifting-stalletjie verkoop word.

meubels
juweliersware
handsakke / sakke
klere (volwassenes en kinders)
boeke
legkaarte
lap
wol

Enige produkte wat ons nie verkoop nie, sal aan ander liefdadigheidsorganisasies geskenk word. Alle skenkings kan by die Hoërskool se sekuriteit afgelaai word. Indien enige items by u opgelaai moet word, kontak asseblief vir Jana Rademeyer (navonjane@gmail.com of 083 459 9965) om reëlings te tref. Dankie by voorbaat vir u ondersteuning!

Kan alle leerders wat verlede jaar bekers by die prysuitdeling ontvang het, dit asseblief so gou as moontlik terugbring skool toe. Onthou asseblief ook dat leerders self daarvoor verantwoordelik is om die beker te laat graveer. Alle bekers kan na die biblioteek gestuur word. Baie dankie!

Die Damesontbyt (Saterdag, 2 Sept.) word ongelukkig uitgestel na ‘n ander datum a.g.v. Welgemoed sportdag. Indien jy reeds ‘n kaartjie gekoop het, Liesel sal jou Karri-betaling aan jou terugbetaal in jou Karri-beursie sodat jy dit vir iets anders kan gebruik. Ons sal so gou moontlik ‘n alternatiewe datum bekendstel.

Die afgelope week is soveel mense, skole en besighede in ons Moederstad en Kaapse Metropool ontwrig as gevolg van die geweldadige taxi-stakings. Ons dink veral aan die mense wat hul lewens verloor het en ons bid dat God hul geliefdes tydens die moelike tyd sal vertroos. Die onderwysdistrik waarbinne ons skool val, is die ergste getref in terme van leerder- en personeelafwesighede asook skade aan skoolgeboue. Gelukkig het dit ons skool nie so erg geaffekteer nie, aangesien van ons terreinpersoneel op die skoolgronde woonagtig is en ons die skool relatief skoon en netjies kon hou. Die impak van die staking op skole is skokkend. Net om julle ‘n idee te gee dat op Dinsdag, 08 Augustus, moes 92 skole sluit terwyl 852 259 leerders en 17 725 personeellede indiens van die WKOD afwesig was of nie by die skool kon uitkom nie. Ons hou styf duimvas dat die situasie vinnig en vreedsaam opgelos sal word.

Op Saterdag, 05 Augustus, het ons skool ‘n baie suksesvolle mini-sportdag by die skool aangebied. Verskeie skole se o.7- en o.8-netbal- en rugbspanne het deelgeneem en die leerders het saam met hul afrigters en ouers die mini-sportdag terdeë geniet. Vroegoggend het die weer hard probeer om die dag te versuur, maar gelukkig het die mis vinnig opgeklaar en in ‘n pragtige sonskyndag verander met Tafelberg, Leeukop en Seinheuwel wat die sportverrigtinge fyn dopgehou het. Dit was wonderlik om soveel besoekende leerders, afrigters en hul ouers by ons te ontvang. Baie dankie aan die personeel wat met ‘n glimlag tydens die dag gewerk het om die sukses van die mini-sportdag te verseker. Ons beplan om in die toekoms meer sportdae aan te bied.

Die EXCO (skoolbestuur) het vanaf 07 – 08 Augustus hul jaarlikse strategiese beplanningsessie suksesvol afgelê. Hierdie sessie is uiters belangrik om seker te maak ons trotse skool is strategies op die spreekwoordelike regte pad om ons skool na nog hoër hoogtes saam met die Beheerraad te neem.

Ek glo almal het die spesiale vakansiedag, naamlik Vrouedag op Woensdag, 09 Augustus, saam met hul gesinne geniet. Hierdie was nie sommer net nog ‘n publieke vakansiedag nie, maar ‘n baie spesiale dag waartydens ons die belangrike rol van vrouens in ons samelewing vier. Graag wil ek van die geleentheid gebruik maak om al ons vrouens in ons skoolgemeenskap hartlik te bedank vir die belangrike rol wat hulle speel. Vrouedag moet gevier word om hulde te bring aan vrouens wat groot bydraes tot vroueregte in Suid-Afrika gemaak het. Ek glo vrouens is die spreekwoordelike sout van die aarde asook die gom wat gesinne en families bymekaar hou. Baie dankie dat julle as skoolgemeenskap al ons vrouens wil vereer vir hoe wonderlik en merkwaardig hulle is!

Mag almal wat vanaand aan die jaarlikse Quiz-aand deelneem hul gate uit geniet. Moenie jou algemene kennis-hoed vergeet nie en geniet ‘n heerlike aand van samesyn. Baie dankie aan Karien Zulch wat die spesiale aand reël. Verder wil ek graag ‘n beroep op ons ouers/voogde doen om asseblief ons Akademiese Week vanaf 25 Augustus – 01 September by die skool te ondersteun. Die idee met vanjaar se Akademiese Week is nie noodwendig om iets nuut na afloop van die week by die skool te implementeer nie, maar eerder om Akademie met verskillende leerareas rondom die woord KUNS te integreer. Om daardeur ons skoolgemeenskap te verryk en verder te bou aan die unieke, besondere kultuur wat Laerskool Jan van Riebeeck van ander skole onderskei. Die balans waarna ons skool jaarliks streef, word hiermee gevier, want dit verg ‘n spesiale KUNS om ‘n Laerskool Jan van Riebeecker te wees! Ons rig ‘n ope uitnodiging aan jou om betrokke te raak by hierdie week se program – as toeskouer, deelnemer of selfs aanbieder. Hou asb. hierdie ruimte dop, want daar sal weekliks verdere inligting rondom al die bedrywighede van die week geplaas word. Baie dankie en sterkte aan Marinda wat vir ons die spesiale week reël.

Graag sluit ek af met die volgende anonieme stelling en ek wens vir almal ‘n wonderlike naweek saam met jul gesinne toe.

“Always pray to have eyes that see the best in people,
a heart that forgives the worst,
a mind that forgets the bad,
and a soul that never loses faith.’’

Vriendelike groete

Naas Beets
SKOOLHOOF

Vriendskappe en interaksie met maats is ‘n bron van ondersteuning en dra by tot jou kind se gevoel van eiewaarde aanleer van sosiale vaardighede. Die Engelse akroniem “THINK” is ’n lekker praktiese riglyn om jou kind leiding te gee oor hoe om ‘n goeie maat te wees:

T – Is it true?
H – Is it helpful?
I – Is it inspiring?
N – Is it necessary?
K – Is it kind?

Marike Badenhorst: Opvoedkundige Sielkundige

Om jou kind te dissiplineer, bly ‘n moeilike taak, veral as hy of sy aanhoudend die grense toets en op ‘n onaanvaarbare manier met jou praat. Hier volg ‘n paar voorstelle wat jy as ouer kan probeer om binne ‘n konfliksituasie duidelike grense te stel:

• “Jy mág kwaad raak, maar dit gee jou nie ‘n rede om goed te sê wat my seermaak nie…”
• “Ek kan hoor jy is kwaad en ontsteld, maar dit gee jou nie die reg om só met my te praat nie…”
• “Kan jy bietjie sagter praat dat ek beter kan verstaan wat jy probeer sê…”
• “Kan jy probeer om dit op ‘n ander manier te sê?”
• “Dit klink vir my of jy ‘n bietjie op jou eie wil wees. Ons kan hieroor praat wanneer jy beter voel en nie nodig het om op my te skree nie…”
• “Kom ons stop nou dadelik om hieroor te praat, dan gesels ons later as ons altwee beter voel…”

Marike Badenhorst : Opvoedkundige Sielkundige