Kategorie: Algemeen

Maandag, 11 Des:

• Sivviedag
• 07:45 – gr. 7-saalbyeenkoms vir Gr. 2-7-leerders (gr. 7-ouers welkom)
• 13:00 (gr. 1-3) & 13:15 (gr. 4-7) – skool verdaag

Dinsdag, 12 Des:

• Sivviedag
• 07:45 – skool begin
• Leerders ontvang vorderingsverslae (rapporte)
• 10:30 – skool sluit vir alle leerders
• Nasorg soos normaal

Met dagbreek vanoggend besef ek met ‘n skok dat dit vandag die eerste dag van Desembermaand is en dit beteken dat Kersfees om die draai is! Waar het die kosbare tyd so vinnig heen gevlieg? In terme van die skool is die antwoord voor die hand liggend: dit was ‘n besondere jaar, ‘n besige jaar propvol opwindende akademiese-, kulturele- en sportaktiwiteite, en wanneer daar ook pret betrokke is, dan vlieg tyd behoorlik verby!

Gister het die finale eksamens vir die gr. 4 – 7-leerders uiteindelik tot ‘n einde gekom en ek glo ons huisgesinne het ‘n sug van verligting gegee, want huishoudings kan weer ‘normaal’ en stresvry funksioneer. Alhoewel die rapporte nog nie gefinaliseer is nie, wil ek graag vir julle die versekering gee dat ons leerders puik tydens hul finale eksamens gevaar het. Ek was so bevoorreg om self die afgelope week aktief by die modereringsproses betrokke te wees. Baie dankie aan ons onderwysers wat so deeglik die antwoordstelle merk om seker te maak die leerders ontvang hul regmatige punte. Laat my ook toe om die modereringspan hartlik te bedank vir die belangrike rol wat hulle speel om seker te maak dat die eksamenpunte volledig en akkuraat is wat ons benodig vir die prysuitdelings vir gr. 4 en 5 wat op Dinsdag, 05 Desember, en vir gr. 6 en 7 op Donderdag, 07 Desember, plaasvind.

Ek het begrip dat prysuitdelings altyd kontroversieël sal wees, maar wees verseker dat die skool prysuitdelings met die grootste respek en omsigtigheid hanteer. Net soos ons weekliks erkenning aan sport- en kultuurprestasie in die saal en nuusbrief gee, wil ons ook graag erkenning vir leerders wat akademies hard werk en presteer gee, want akademie is darem ons kernbesigheid. Ons neem deurdagte besluite rakende die proses van erkenning aan presteerders gee sonder om die ander leerders te na te kom. Ons fokus beslis nie net op ons presteerders nie en wil graag ons leerders te alle tye beskerm, maar ons besef ook dat dit ons plig as laerskool is om ons leerders te bemagtig vir die hoërskool asook die grootmenswêreld wat voorlê.

Op Sondagaand, 26 November, om 19:00 het beide ons junior- en senior koor in die pragtige NG Tamboerskloof Kerk tydens die jaarlikse kerssangdiens opgetree. Beide kore het hul puik van hul taak gekwyt en al die kerkgangers betower met hulle pragtige kersliedere. Dit was nog een van daardie trotse oomblikke wat ek die afgelope jaar ervaar en weereens besef het wat ‘n wonderlike voorreg ek het om as skoolhoof van dié merkwaardige skool op te tree. Ons sien baie uit na nog ‘n kerssangdiens, die keer by die Drieankerbaai, NG Kerk wat op Sondagaand, 03 Desember, om 19:00 plaasvind. Indien jy die eerste kerssangdiens uitgemis het, dan is dit nou jou kans om dit eersterangs te ervaar. Sien julle Sondagaand.

Op Dinsdag, 28 November, het die gr. 4-leerders Engels geskryf en kon hulle soos hul gunsteling karakter uit hul letterkundeboek (The Foolish King) skool toe aantrek. die gr. 4-leerders het pragtig gelyk en spoggerig in hul kostuums rondgeloop. Baie dankie juf. Marianne vir die wonderlike inisiatief! Dit maak eksamen pret en help sommer ook om in die proses eksamenangs te verminder.

Ons skoolgemeenskap het werklik so baie om voor dankbaar te wees, dus sluit ek af met ‘n bietjie pitkos en gebruik die volgende aanhaling deur Antonia Montoya oor dankbaarheid. Mag julle ‘n wonderlike naweek sonder enige eksamenstres saam met jul gesin, vriende en/of familie geniet.

“Find gratitude in little things
and your well of gratitude will never run dry.’’

Vriendelike groete

Naas Beets
SKOOLHOOF

Liewe Ouer/Voog

Neem asseblief kennis van die onderstaande boodskap van die “Friends of Tamboerskloof Association” (FOTA)

FOTA wil graag belanghebbendes in die area bewus maak van die voorgestelde ses verdieping woonstelblok-ontwikkeling “The Aloe” bo die “Swiss Tennisclub” op die hoek van Leeukop en Quarry Hill. Julle kan meer inligting oor die projek en die beswaarproses kry by https://tinyurl.com/fotadocs.

Neem asseblief kennis dat alle besware teen 11 Desember aangeteken moet word.

Baie dankie vir julle dringende aandag.

Ons gr. 4 – 6-leerders het die afgelope week op Dinsdag, 21 November, ook met hul finale eksamens begin en dit eindig op Donderdag, 30 November. Die grondslagfase se finale assesserings vir die jaar is gedurende die afgelope twee weke afgehandel, gemodereer en punte is verwerk. Hiermee wil ek ons toegewyde grondslagfase opvoeders en hul klasassistente hartlik bedank vir hul leeue-aandeel in die suksesvolle afhandeling van die akademiese jaar.

Die jaarlikse prysuitdelings vir die Grondslagfase het op Donderdag, 23 November, plaasgevind. Baie geluk aan al ons wonderlike grondslagfase leerders wat op die dag die nodige erkenning vir hul harde werk, toewyding en puik prestasies ontvang het. Julle is almal presteerders wat ons baie trots maak! Baie dankie aan al die ouers/voogde wat in groot getalle die onderskeie prysuitdelings bygewoon het en in die proses dit baie spesiaal vir hul kind/ers gemaak het. Prysuitdelings vir gr. 4 en 5 geskied op Dinsdag, 05 Desember, en vir gr. 6 en 7 op Donderdag, 07 Desember.

Op Donderdagaand, 16 November, om 18:00 het die inligtingsaand vir gr. 7-ouers van 2024 in die saal plaasgevind. Graag wil ek juf. Charlene (gr. 7-Graadhoof) en haar span hartlik bedank vir die puik aanbieding waartydens die onderskeie vakonderwysers aan die ouers voorgestel is, die gr. 7-kurrikulum met nuwe vakke is verduidelik, besprekings rakende kampe, sokkies, roomysverkope, fondsinsamelingsprojekte, konsert, afskeid aan die einde van die jaar, ens. is in detail hanteer. Ons ouers/voogde het die sessie baie insiggewend ervaar en met geruste harte uit die saal gestap met die wete dat hul kinders volgende jaar vir hul laaste laerskooljaar weer in goeie hande sal wees.

Baie geluk aan Louise en haar Huppellandspan met die uitstekende jaarlikse konsert wat op Vrydagaand, 17 November, in die skoolsaal plaasgevind het. Dit is beslis ‘n hoogtepunt op die Huppellandkalender en is so goed deur die ouers/voogde en familie ondersteun. Die leerders en hul onderskeie opvoeders het die afgelope twee weke baie hard geoefen om die sukses van die aand te verseker.

Ons is verder ook trots op Jan Kas met sy merkwaardige aanlyn aankope platform wat sedert die amptelike opening ongelooflik deur ons ouers/voogde ondersteun word. Ons is nou in ‘n posisie om ons nuwe gemaklike skooldrag onmiddellik aan ons leerders te voorsien. Suzaan kan amper nie voorbly met die bestellings nie en ons moes noodgedwonge nog voorraad bestel om ons ouers/voogde te bedien. Ek glo julle het ook die nuwe aanwysingsborde vir Jan Kas gesien wat beslis sal help sodat almal maklik hul pad na die ligging van ons nuwe klerewinkel sal vind.

Ons innige meegevoel gaan aan die familie van Charl Theron, voormalige voorsitter van ons Beheerraad, wat onverwags die week afgesterwe het. Mag ons gebede die familie tydens die moeilike tyd dra. Ons dink ook aan mnr. Oosthuizen in hierdie tyd, aangesien hy en Charl vir ‘n baie lang tyd ‘n hegte vriendskap gedeel het.

Graag sluit ek af met ‘n bietjie pitkos en gebruik die volgende aanhaling deur Mandy Hale oor die belangrikheid van ‘n positiewe gesindheid. Mag julle ‘n wonderlike naweek saam met jul gesin, vriende en/of familie geniet.

“A great attitude becomes a great day,
which becomes a great month,
which becomes a great year,
which becomes a great life.’’

Vriendelike groete

Naas Beets
SKOOLHOOF

Prysuitdelings is ‘n kontroversiële onderwerp wat ons met die grootste respek by ons skool probeer hanteer. Ons neem dit baie ernstig op om vir elke leerder in die skool erkenning d.m.v. ‘n sertifikaat te gee. Ons poog om wel deurdagte besluite te neem deur leerders aan te moedig terwyl ons ook toekennings wil gee. Net soos by Sport en Kultuur wil ons ook graag spesiale erkenning aan ons leerders gee wat daagliks hul bes doen om ons skool se kernbesigheid, Akademie, ernstig op te neem en op hierdie gebied te presteer. Dis vir leerders belangrik dat ouers hulle ondersteun afgesien van jou eie ervaring van prysuitdelings, daarom nooi ons alle ouers uit om die onderskeie gr. 4 – 7-prysuitdelingsgeleenthede soos hier onder uiteengesit, by te woon. Tydens hierdie geleenthede word die Top 10 Akademiese prestasies per graad aangekondig saam met die eerste drie plekke in Tale en Wiskunde. Hiermee probeer ons motiveer en aanmoedig. Ons weet ook dat dit uiters belangrik is dat die leerders in klasverband aanwys wie hulle dink die maat was wat die jaar hul deel gedoen het, daarom dat daar drie baie spesiale, geliefde toekennings toegeken word nl.

• Klasburger van die jaar – klas stem
• Mees vasberade leerder – klas stem
• Onderwyserstoekenning – onderwyserskeuse

Prysuitdelings:

• Graad 4 – Dinsdag, 5 Des., 9:00
• Graad 5 – Dinsdag, 5 Des., 11:00
• Graad 6 – Donderdag, 7 Des., 9:00
• Graad 7 – Donderdagaand, 7 Des., 18:00

Dankie vir die ondersteuning. Ons sien uit om jou by hierdie spoggeleentheid te sien.

Neem asseblief kennis dat die skool op Dinsdag, 12 Desember, sluit en nie soos beplan op Woensdag, 13 Desember, nie. Die amptelike vakansiedag wat op 15 Desember is, veroorsaak dat skole genoodsaak word om een dag vroeër te sluit aangesien daar van onderwyspersoneel verwag word om twee dae nadat die skool gesluit het, admin te voltooi. Nasorg sal soos normaal tot op 17:15 plaasvind. Geen skool of nasorg op/vanaf Woensdag, 13 Des. nie.

Organisasie van laaste twee weke van skool:

• Dinsdag, 5 Desember
  • Gr. 4-Prysuitdeling 09:00
  • Gr. 5-Prysuitdeling 11:00
  • Skool verdaag 13:00 (Gr. 1-3) & 13:15 (gr. 4-7)
• Woensdag, 6 Desember
  • Atletiek o.10 – Ope (Velditems) 07:45 – 14:00
    • Bus sal beskikbaar wees om leerders na veld te vervoer
    • Bus sal leerders weer terugbring
    • Sien atletiekprogram in Vrydag, 24 Nov., se nuusbrief
• Donderdag, 7 Desember
  • Gr. 6-Prysuitdeling 11:00
  • Skool verdaag 13:00 (gr. 1-3) & 13:15 (gr. 4-7)
  • Gr. 7-Prysuitdeling 18:00
• Vrydag, 8 Desember
  • Atletiek gr. 1-7 (Baanitems) 06:45 – 15:00
    • Sien atletiekprogram in Vrydag, 24 Nov., se nuusbrief
    • Geen formele skooldag nie
• Maandag, 11 Desember
  • Gr. 7-afskeidsaal 07:45 – 09:00
    • Gr. 7-ouers welkom
    • Gr. 2-7 woon saal by
    • Gr. 7-rapporte uitdeel
    • Gr. 7’s versier saal vir sokkie 11:00
  • Skool verdaag 13:00 (gr. 1-3) & 13:15 (gr. 4-7)
  • Gr. 7-sokkie 18:00 – 21:00
• Dinsdag, 12 Desember
  • Gr. 1 – 7-saalbyeenkoms – laaste saal vir jaar 08:30 – 10:00
    • Sertifikate uitdeel, Dansoptredes
    • Leerderraad aankondig
    • Afskeid: Helecia Groenewald, Liezel Theron en Suné Alberts
    • Gr. 1-6-rapporte uitdeel
  • Gr. 7-afskeid (nie by skool nie) 10:00 – 12:00
  • Skool sluit vir vakansie: vir almal 10:30
    • As gevolg van vakansiedag, 15 Des., moet skool een dag vroeër sluit sodat onderwysers admin kan afhandel
  • Privaat Dramakonsert 18:00

Prysuitdeling vir graad 1-3-leerders vind Donderdag, 23 November 2023, in die skoolsaal plaas.

Graad 1 – 08:30
Graad 2 – 10:00
Graad 3 – 12:00

Netjiese skooldrag is ‘n vereiste. Ouers is baie welkom om die spesiale geleenthede by te woon.

So kom week 6 van die laaste kwartaal tot ‘n einde met die gr. 7’s wat vandag met hul finale eksamen by die laerskool afskop met die skryf van Wiskunde. Die jaar het besonders vinnig verby gesnel en as ‘n mens vinnig daaroor wil reflekteer, wonder ek dadelik hoe is dit moontlik dat dit al amper weer Kersfees kan wees. Die jaar was besonders besig, maar tog was dit ‘n suksesvolle jaar met hope opwinding en sukses. Die somersportbuitemuurse program maak ook vandag klaar met die aflosgala wat by Laerskool Kampsbaai plaasvind. Gedurende die eksamen gaan ons voort met sportoefeninge, maar dit geskied in skooltyd. Ons leerders geniet dit terdeë om tydens die eksamen en veral na afloop van die skryf van ‘n vraestel ‘n bietjie uit die klas te kom om aan ‘n sportaktiwtiteit deel te neem. Dit help ongelooflik baie vir die leerders om die onnodige eksamenangs dikwels onbewustelik onder beheer te kry asook om die eksamenervaring in ‘n positiewe lig te sien.

Ons leerders se merkwaardige deelname en prestasie op kulturele- en sportgebied hierdie afgelope jaar staan uit soos ‘n paal bo water en dit terwyl hul ‘arme’ ouers/voogde onder druk was om al die logistieke reëlings uit te werk en seker te maak hul kinders daag betyds by al die verskillende geleenthede op. Daarvoor salueer ek julle as ouers/voogde asook al die personeel en afrigters wat instrumenteel was tot die suksesvolle skepping van ‘n gesonde sportkultuur by ons skool binne ‘n relatiewe kort tydjie. Daardeur sê ek nie dat ons nou ‘n sportskool wil word nie, maar eerder dat ons onderneem om in die toekoms voort te bou om geleenthede vir ons leerders te skep om te ontwikkel. Graag gebruik ek die voorbeeld van die aflosgalas wat die afgelope kwartaal vir die eerste keer plaasgevind het. Dit was so lekker om verlede Vrydag te sien hoe ons swemmers die aflosgala by die Duitse Skool geniet het. Opvallend vir my was die kameraderie tussen al ons swemmers, selfs tussen seuns en dogters. Dit was werklik ‘n trotste oomblik vir my as skoolhoof om te ervaar hoe die Jannies vir mekaar omgee en vir mekaar uitkyk.

Die lading van al die ‘einde van die jaar’-departementele administrasie beperk ongelukkig my tyd om al die somersportwedstryde by te woon. Gelukkig kon ek op Woensdag, 15 November, ‘n draai by die tennis tuis maak waar ons dogters o.13A teen LS Kenridge o.13A 4 – 2 gewen het asook by die o.11A-kriektspan wat hul laaste wedstryd teen LS Kampsbaai o.11A in ‘n spannende stryd gewen het. Baie geluk aan ons o.13A-dogterspan met die puik oorwinning asook aan juf. Iscké en haar o.11A-krieketspan wat die seisoen onoorwonne afgesluit het.

My dankbaarheidsbeker loop verder oor as ek sien hoe die vierkant weekliks esteties ‘mooier’ en ‘mooier’ word. Ek wonder nog of julle kan onthou hoe die ‘ou’ vierkant gelyk het? Kom loer gerus en aanskou hoe die voorheen slegs beton-, steen- en ‘harde’-omgewing binnekort in ‘n pragtige lushof gaan verander. Verder probeer ons orals die skoolterrein estieties mooier maak. Graag deel ek dan ook die goeie nuus dat ons hierdie afgelope week begin het om die ablusieareas vir ons inwonende terreinpersoneel op te gradeer. Ek sal julle op hoogte hou soos die projek vorder. Ons wil juis met die opgradering verseker dat ons lojale terreinpersoneel met die nodige respek behandel word deur vir hulle en hul gesinne die nodige ablusie- en wasgeriewe te skep.

Ek word daagliks deur die verjaardag-leerders tot in die afgrond bederf met heerlike soet- en/of eetgoed. Ek maak dan altyd ‘n ophef van die geleentheid om hul verjaardae vir hulle ekstra spesiaal te maak deur vir ‘n spesiale verjaarsagplakker en ‘n klein lekkertjie te gee. Op Vrydag, 10 November, is ek deur die gr. 7-tweeling, Jana en Klare Maree, saam met hul ma met ‘n smaaklike ‘doughnut’ bederf om hul dertiende verjaardag te vier. My beste wense vergesel hulle vir hul nuwe lewensjaar.

Graag sluit ek af met ‘n bietjie pitkos en gebruik die volgende aanhaling deur Roy. T. Bennet oor positiewe denke. Mag julle ‘n wonderlike naweek saam met jul gesin, vriende of familie geniet.

“Don’t be pushed around by the fears in your mind.
be led by the dreams in your heart.’’

Vriendelike groete

Naas Beets
SKOOLHOOF

Dit is vir ons belangrik om op ‘n tydige en gerieflike wyse met ouers te kan kommunikeer, daarom kondig ons graag die volgende reëlings t.o.v. kommunikasie vir 2024 aan:

• Met die volledige implementering van Teams by die skool en die uitbreiding van funksionaliteit in WhatsApp, is besluit om die gebruik van Skooler aan die einde van 2023 op te skort.
• Die skool het reeds ons eie WhatsApp Community, Ls JvR, geskep. Dié WhatsApp Community, tesame met ‘n aantal WhatsApp-groepe, sal vanaf 11 Desember as amptelike kommunikasiekanaal gebruik word om aankondigings, dringende kennisgewings en reëlings t.o.v. sportoefeninge, wedstryde, optredes e.d.m. aan ouers te kommunikeer. Skooler sal steeds tot einde van die kwartaal gebruik word terwyl ouers kans het om by die WhatsApp Community aan te sluit. Moet asb. nog nie Skooler van jou selfoon af verwyder nie.

Om by die skool se WhatsApp Community-groepe aan te sluit, volg asb. hierdie stappe:

1.  Gaan in op Skooler en volg die WhatsApp Community-skakel wat later vandag in die Algemeengroep beskikbaar gaan wees.
2. Sluit aan by die skool se Community.
3. Jy sal outomaties deel wees van die Announcement-groep waarop ons algemene afkondigings sal maak. Niemand sal jou selfoonnommer in hierdie groep kan sien nie.
4. Jy gaan ‘n lys van groepe sien waarby jy ook kan aansluit. Kies die relevante groepe en kies die opsie “request to join”. Jou versoek sal met tyd aanvaar word, wees asb. geduldig indien jy nie onmiddellik tot die groep toegelaat word nie. Neem kennis dat jou selfoonnommer wel vir ander ouers sigbaar sal wees in die groepe waarby jy aansluit. Wanneer jy by groepe in die Community aansluit, gee jy toestemming dat die ouers in daardie groep jou nommer mag sien.
5. Onthou dat hierdie groepe vir 2024 geskep is. Moet asb. nog nie by klasgroepe aansluit totdat jy weet in wie se klas jou kind volgende jaar is nie.
6. Dit is ouers verantwoordelikheid om by die skool se WhatsApp Community en die relevante groepe wat onder dit val, aan te sluit.
7. Alle groepe is gestel op eenrigting-kommunikasie en ouers sal dus nie nou op enige groepe boodskappe kan stuur nie. Dit sal verander sodra daar ‘n behoefte in ‘n groep ontstaan vir ouers om met mekaar reëlings te tref.
8. Daar is ‘n “Create Group”-opsie in die Community. Ouers sal egter nie groepe binne die Community kan stig nie en dit sal slegs as ‘n versoek by die administrateurs van die Community uitkom. Moet dus asb. nie op “Create Group” kliek nie.

Riglyne tot Kommunikasie 

Onderhewig aan ondernemings rondom redelikheid en respek vir die reg op privaatheid, geld die volgende riglyne vir kommunikasie tussen ouers en onderwysers: 

• Onderwysers is formeel beskikbaar vanaf 07:00 – 18:00 gedurende weeksdae om ouers se oproepe en boodskappe te beantwoord. Slegs in noodgevalle kan buite hierdie ure gekommunikeer word.
• Neem in ag dat personeel nie noodwendig onmiddellik beskikbaar gaan wees om boodskappe te beantwoord nie. Onderrig in die klas en afrigting op die sportveld geniet voorkeur. Indien daar ‘n dringende versoek gedurende hierdie tyd is, kan ouers die skool se ontvangs kontak om ‘n boodskap te los.
• Onderwysers sal binne 24 uur op boodskappe en navrae reageer.
• Onderwysers sal ouers wat versoek het om by ‘n groep aan te sluit binne 24 uur aanvaar.
• Die skoolhoof is beskikbaar indien daar ‘n krisis is.
• Vertroulike inligting behoort per e-pos gekommunikeer te word en nie per WhatsApp nie.
• Minstens een ouer/voog per gesin moet deel wees van die skool se WhatsApp Community.
• Die volgende is aanvaarbare vorme van kommunikasie tussen ouers en onderwysers: 
  • E-pos;
  • WhatsApp na amptelike skoolnommers soos in die Community aangedui;
  • Telefoonoproep;
  • Afspraak in persoon.
• Die volgende vorme van kommunikasie met die skool en onderwysers word nie toegelaat nie:
  • WhatsApp stemnotas;
  • Onderwysers betrek by privaatgroepe wat deur ouers gestig is.

Indien jy graag ‘n kersdonasie d.m.v. Karri vir die terrein-, nasorg- en snoepiepersoneel by die laerskool wil bydra, is jy welkom. Die Karri-insameling maak binnekort oop.

Aangesien die graad 7’s reeds op Vrydag, 17 November, met eksamen begin, sal die skool vir almal vanaf Donderdagmiddag, 16 November, vroeër verdaag. Hierdie reëling sal tot Dinsdag, 12 Desember, geld.

• 13:00 – Graad 1-3
• 13:15 – Graad 4-7
• Bus vertrek om 13:15

Groot was die opwinding op Vrydag, 03 November, vir leerders, ouers en personeel om die Bokke in die stad te gaan toejuig as deel van die Bokke se trofeetoer deur die Moederstad en die res van die land. Talle geesdriftige Suid-Afrikaners het in die stadskom saamgedrom en dit was ‘n riem onder die hart om te sien dat die Bokondersteuners omtrent elke kultuur van ons reënboognasie verteenwoordig het. Die Bokke het beslis die vermoë om alle Suid-Afrikaners van elke moontlike agtergrond, kultuur en geloof bymekaar te bring en te herenig met volkstrots. Die Bokke is die enigste span wat die Webb Ellis-beker op drie verskillende kontinente (Afrika, Asië en Europa) gewen het. As Suid-Afrkaners kan ons gerus onsself ‘n klop op die skouer gee, want ons veerkragtigheid staan wêreldwyd soos ‘n paal bo water uit. Dit is belangrik dat ons nou op die momentum bou en die Proteas ook ondersteun. Wie weet, dalk is ‘n dubbele wêreldbeker vir 2023 ons beskore.

Op Vrydag, 17 November, begin die finale eksamen vir die gr. 7’s. Die assesserings vir die Grondslagfase is reeds volstoom aan die gang. Vir die eerste keer skryf ons gr. 1’s en 2’s deurlopende assesserings en net die gr. 3’s volg ‘n amptelike rooster. Ek mag mos nie eintlik die ‘E-woord’ gebruik nie, maar op Dinsdag, 21 November, begin die gr. 4 – 6 leerders ook met hul eksamen en ek wens al ons leerders, ouers/voogde en personeel voorspoed toe. Eksamens verhoog ongelukkig stresvlakke by leerders en dit filter ook dikwels deur na die huisgesin. Graag versoek ek julle as ouers/voogde om ons as personeel te help om die stresvlakke en spanning tydens die eksamen te bestuur sodat dit nie die oorhand kry nie. Stres as gevolg van enige eksamen laat enige persoon snak na sy asem, maar dit is ‘n natuurlike reaksie en as dit reg aangewend en bestuur word, kan dit ook voordelig wees. Probeer gerus die volgende wenke om jou kind/ers se eksamenstres en moontlik jou eie angstigheid daaroor hok te slaan:

• Berei betyds voor. Help om saam met jou kind/ers betyds ‘n studierooster op te stel wat jou kind/ers genoeg tyd gee om ook te ontspan en vroeg saans in die bed te spring sodat hulle genoeg slaap kry. Handhawing van ‘n roetine sal beslis help!
• Skep ‘n rustige en ontspanne atmosfeer vry van stressors by die huis vir jou kind/ers om te leer.
• Skep ‘n toegewyde studieruimte met behoorlike beligting en vry van geraas.
• Skep ‘n emosionele band met jou kind/ers dat hulle nie voel dat hulle die eksamenpad alleen stap nie. Vra vir hulle hoe die eksamen was en spreek positiewe woorde uit. Laat hulle verstaan dat julle vir hulle nog steeds baie lief sal wees, ongeag die uitslae en hulle beslis nie op grond daarvan sal beoordeel word nie.
• Help jou kind/ers om ‘n gewoonte te kweek dat hulle die regte skryfbehoeftes en die regte toerusting vir die dag inpak.
• Vermy gejaagdheid en om op die nippertjie soggens voor die eksamen by die skool jou kinders af te laai, want dit maak leerders angstig.

So tussen die eksamen en die leer gaan die somersportprogram in skooltyd vir gr. 1 – 3-leerders voort terwyl die gr. 4 – 7 leerders slegs op atletiek gaan fokus a.g.v. die kleure-atletiek wat op Woensdag, 06 Desember, (Velditems) en Vrydag, 08 Desember, (baanitems) by die hoërskool se velde plaasvind. Die dirigente word ook die week aangewys en binne die kleurgroepe gaan daar lekker gesing en voorberei word.

Op Maandag, 06 November, het die jaarlikse begrotingsvergadering met ouers vanaf 18:00 in die biblioteek plaasgevind. Die 2024 begroting en verhogings van skoolfooie is soos volg goedgekeur:

Die 2024 skoolgelde is op R39 400 per GF-leerder en R40 400 per ISF-leerder vir die Laerskool, en Huppelland: R44 200 per leerder vir Graad R en R43 200 vir voor-Graad R vasgestel. Baie dankie ons Finansiële Bestuurder, Liesel Hammond, en ons Tesourier, Susan van der Walt, vir jul kosbare tyd en harde werk om ‘n uitstekende en effektiewe begroting vir finale goedkeuring te kon voorlê. Baie dankie aan die ouers/voogde wat die belangrike vergadering bygewoon het.

Hiermee wil ek ook ons ouers/voogde versoek om ernstig met jul kind/ers te praat oor die gebruik van sosiale media. Die onderwysers het die afgelope week onder my aandag gebring dat verskeie leerders mekaar op sosiale media platforms, veral TikTok en Snapchat aanvat, onvanpaste video’s maak en plaas asook onaanvaarbare dinge kwyt raak. Hierdie tipe sosiale media platforms is nie ouderdomsgepas vir ons leerders nie en alhoewel dit buite skoolure plaasvind, is ek bekommerd dat ouers/voogde dalk salig onbewus is dat hul kind/ers dit gebruik of jul toestemming daarvoor het. Ons beplan om net na die eksamen weer met ons leerders oor die gevare van sosiale media te praat.

Graag sluit ek af met ‘n bietjie pitkos en gebruik die volgende aanhaling deur Mary Lou Retton oor positiewe denke. Mag julle ‘n wonderlike naweek geniet en nou moet ons, ons volle gewig agter die Proteas gooi.

“If you stay positive
good things and
good people will be drawn to you’’.

Vriendelike groete

Naas Beets
SKOOLHOOF

• Bestel foto’s aanlyn teen 24 November.
• Webtuiste: Lunchbox Photography
• Wagwoord: JVR2020
• Indien jy die afsnydatum vir bestellings mis, kan jy steeds aanlyn bestel. Jy gaan wel net self vir die aflewering moet betaal.
• Stuur gerus ‘n e-pos indien jy enige vrae het: info@lunchboxphotography.co.za

November het onverwags sy opwagting gemaak met Oktober wat as gevolg van die rugby- en krieketwêreldbeker net te vinnig verby gesnel het. Ek glo dat na die Springbokke se naelskraap oorwinning in die finaal teen die All Blacks om as wêreldkampioene bekroon te word, moet ons van nou af in Suid-Afrika die maand Oktober na Boktober herdoop. Die Bokke het beslis die vermoë om die land te verenig soos niemand anders kan nie. Hulle bewys weereens dat uitnemendheid in ons land moontlik is en dat ons almal daarna moet streef!

Ek dink almal stem saam dat die Bokke se laaste 3 wedstryde om elke keer met net een punt te wen, werk nie vir ‘n stoere bokondersteuner se senuwees nie. Ek glo die rugbywêreld wag al sedert 1995 vir die klassieke finaal tussen die magtige All Blacks en die Springbokke. Die Springbokke het vir seker die moeilikste pad na die finaal gehad, maar tog het hulle volhard om die eerste span in die geskiedenis te word wat die gesogte titel vir ‘n 4de keer te kon inpalm. Merkwaardig is dat hulle die gesogte titel vir 2 jaar agtereenvolgens kon verdedig en die indrukwekkende Webb Ellis-trofee weer terug na Suid-Afrika kon bring. Die Springbokke leer ons almal groot lewenslesse met hul voete plat op die aarde en ‘n nederige kaptein, Siya Kholisi, wat saam met sy span tot die bittereinde baklei het vir hul land. Soos Rassie gesê het: hulle speel nie vir hulle self nie, maar vir elke Suid-Afrikaner wat elke dag soveel buitengewone uitdagings moet trotseer. Wel gedaan, Bokke! Julle staan vir eenheid en nederigheid en maak elke Suid-Afrikaner so trots!

Verlede Vrydag, 27 Oktober, was Hoërskool Jan van Riebeeck se jaarlikse gholfdag wat op die idilliese Atlantic Beach gholfoord aangebied is. Die puik georganiseerde dag is deur heelwat van ons laerskoolouers ook bygewoon. Die gholfbaan is in ‘n puik kondisie as gevolg van die goeie winterreën. Die laerskool se gholfspan is deur myself, Warren, Rashard en die bekende sportster, Herschelle Gibbs verteenwoordig. Dit was ‘n groot voorreg om Herschelle te kon ontmoet en dan nog 18 putjies gholf saam met hom te kon speel. Hy is voorwaar ‘n legende en kan omtrent enige sport met groot gemak speel.

Die opwinding was groot op Maandag, 30 Oktober, met die amptelike opening van Jan Kas (die nuwe klerewinkel). Die opening behels dan ook die bekendstelling van Jan Kas se aanlyn aankoop platform wat deur Marié Cruywagen ontwerp en geskep is vir ons ouers/voogde se gerief. Dit maak aankope soveel makliker en soomloos. Juf. Suzaan, baie dankie dat jy vir ons Jan Kas met ‘n vriendelike glimlag gaan bestuur. Baie geluk aan Hila Hertzog en Ruben Eksteen wat met die gepaste naam Jan Kas vorendag gekom het na afloop van ‘n kompetisie onder die gr. 6-leerders om met ‘n kreatiewe naam vir die nuwe klerewinkel na vore te kom.

Ek herinner weer en nooi al ons ouers/voogde na die jaarlikse begrotingsvergadering uit wat op Maandag, 06 November, om 18:00 in die biblioteek plaasvind. Tydens hierdie belangrike vergadering word die skoolfooie vir 2024 bekragtig asook die 2024 begroting amptelik deur ouers/voogde goedgekeur.

Verder nooi ek ook al ons ouers/voogde uit om na die vierkant wat oor die afgelope naweek pragtig verfraai is, te kom kyk. Ons beplan om dit oor tyd in ‘n pragtige lushof te omskep waar leerders en personeel tydens pouses kan gaan sit en heerlik ontspan asook om daar buitelug-funksies aan te bied.

Graag sluit ek af met ‘n bietjie pitkos en gebruik die volgende aanhaling rakende tyd. Mag julle ‘n wonderlike naweek geniet en nou moet ons ons volle gewig agter die Proteas gooi. Stel julle voor ons wen beide die rugby- en krieketwêreldbekers in dieselfde jaar, dan gee president Cyril ons seker ‘n hele week af.

“Tyd is te stadig vir die wat wag,
te lank vir die wat treur,
te kort vir die wat haastig is,
maar vir die wat liefhet , staan tyd stil om dankbaar te wees.”

Vriendelike groete

Naas Beets
SKOOLHOOF

Vandag is nie sommer net weer die gewone “#Bok-Vrydag” nie! Vandag gaan ons groot om die Springbokke voluit te ondersteun in hul soeke na roemryke glorie om vir die 4de keer as die Wêreldbeker-wenner uit die stryd teen New Zealand te tree. Die ‘Rassie-plan’ moet eenvoudig net môreaand teen die All Blacks beter uitgevoer word. Die naelskraap oorwinnings met 16 – 15 teenoor die arrogante Engelse asook teen die Franse Hane het menigte bokondersteuners se senuwees behoorlik opgekyl. Die Bokke het teen Engeland weereens nie hul beste spel op die dag gelewer nie, maar hulle het vir 80 minute gespeel en in hulself geglo. Nooit het hulle paniekerig geraak nie en dit terwyl alles op die dag verkeerd geloop het. Die Engelse spelers was die spreekwoordelike kaartmannetjies op die veld en het hard probeer om die Bokke te ontsenu. Die Springbokke het ons veral die afgelope 2 weke beslis ‘n paar belangrike lewenslesse geleer en ek kan kortliks dit soos volg saamvat:

• Moet nooit moed opgee nie, glo in jouself en bly gefokus!
• Deursettingsvermoë word beloon.
• Wees nederig, handhaaf jouself en stel altyd ‘n voorbeeld al loop dinge nie volgens jou verwagtinge nie.
• Wees aanpasbaar en dankbaar.

Ons wag al sedert 1995 vir nog ‘n spesiale finaal teen die All Blacks en dit realiseer môreaand om 21:00 in Parys te Stade de France. Alhoewel Parys bekend staan as die die stad van liefde, gaan daar beslis bittermin liefde tydens die wedstryd wees, maar wel wedersydse respek tussen die twee merkwaardige spanne. Jy het nie meer ‘n keuse nie, vandag op “#Bok-Vrydag” en môre moet jy asseblief jou springboktrui, of ‘n springbok t-hemp, of net iets groen en goud moet aantrek of jouself laat groen verf om die Bokke ten volle te ondersteun. Mag die Bokke die naweek geskiedenis maak en ons land weer verenig oor alle kulture en hoop gee vir ‘n beter Suid-Afrika waar daar dringende aandag aan armoede, misdaad en korrupsie gegee moet word. “Go Bokke Go, just one more time. Together we are stronger!”

Op Dinsdag, 24 Oktober, het ons vir die eerste keer ‘n suskesvolle mini-krieketdag by die Conradieveld aangebied. Die volgende skole uit ons onmiddellike omgewing het deelgeneem:

• Laerskool Kampsbaai
• Laerskool Llundudno
• Laerskool Kronendal
• Laerskool Houtbaai
• Reddam House

Op Donderdagaand, 19 Oktober, het Huppelland hul jaarlikse kunsuitstalling in die opgegradeerde klubhuis aangebied. Louise en haar span het hulself weereens oortref met die pragtigste uitstalling van ons leerders se kinderkuns wat Huppelland-ouers kon aankoop. Dit vorm ook deel van die gewilde onthouboeke. Louise het vanjaar die volgende skilders gebruik en die verskillende grade het hul eie kunswerke daarop baseer:

• Shakes Tembani (Gr. 00)
• Ruschka du Toit (Gr. 0)
• Michael Taylor (Gr. R)

Ons Huppelland-ouers het die aand in groot getalle opgedaag, selfs die weer het saamgespeel met een van die mooiste en windlose aande in die Moederstad. Die lekker samesyn en omgee-kameradie onder die ouers was amper tasbaar. Die bouprojek by Huppelland is amper voltooi en vroeg volgende jaar hoop ons om bouprojeknommer 2 te begin, naamlik die bou van ‘n balletsaal, nuwe ingang en ontvangsarea. Hierdie projek word ook deur ‘n weldoender befonds waarvoor ons baie dankbaar is.

Verlede naweek was Hoërskool Jan van Riebeeck se 50ste reünie m.a.w. die matrikulante van 1973. Twaalf van hulle was vanaf gr. 1 by die laerskool en ek het die voorreg gehad om hulle Vrydagmiddag, 20 Oktober, by die laerskool te ontmoet en vir ‘n kort toer deur die skool te vergesel. Wyle mnr. du Preez was destyds die laerskoolhoof en merkwaardig was al die stories en staaltjies wat hulle rakende hul laerskoolloopbaan met my gedeel het.

Die opwinding is baie groot met die opening van Jan Kas (ons eie nuwe klerewinkel) op Maandag, 30 Oktober. Die ou konsertstoor is opgegradeer tot ‘n pragtige en funksionele klerewinkel. Die hele projek sluit ook die loods van die Jan Kas aanlyn aankope platform wat deur Marié Cruywagen (BR-Lid en ouer van ons skool) ontwerp is om juis skooldragaankope so gerieflik moontlik vir ouers/voogde te maak. Ons is haar baie dankbaar vir al die tyd en werk wat sy by die skool insit. Groot dankie ook aan ons OOV-Voorsitter, Coreen Scholtz, asook Elmarie Erasmus wat met die voorraadoorname en voorbereiding van Jan Kas gehelp het. Baie dankie ook aan Marinda, Liesel (finansies) en Suzaan wat ook hard agter die skerms gewerk het om die sukses van die projek te verseker. Suzaan gaan vir ons Jan Kas bestuur en beman.

Dit is dan my voorreg om met julle te deel dat Raché de Goede-Turner vanaf 01 Januarie 2024 amptelik deur die departement (WKOD) as ons nuwe Hoof van die grondslagfase aangestel is. Baie geluk en welverdiend, Raché. Sterkte met die groot taak wat voorê.

Graag sluit ek af met ‘n bietjie pitkos en gebruik die volgende bekende aanhaling van Walt Disney. Mag julle ‘n wonderlike naweek geniet terwyl ons styf duimvas hou dat die Springbokke die naweek geskiedenis gaan maak.

“Laughter is timeless,
Imagination has no age,
Dreams are forever”

Vriendelike groete

Naas Beets
SKOOLHOOF