Kategorie: Algemeen

Desembermaand het sy opwagting gemaak en oral waar jy in die inkopiesentrums rondloop, sien jy vrolike Kersversierings. Of jy nou gelowig is of nie, Kerstyd is ‘n spesiale tyd en die bekoring geskied wêreldwyd. Kerstyd gaan gewoonlik gepaard met baie inkopies, pragtige geskenke wat in die mooiste geskenkpapier toegedraai word, lekkernye word gebak en versierings wat oral opgesit word. Dit is die tyd van die jaar waar familie en vriende bymekaar kom. Die kinders se afwagting van die magiese figuur wat op Oukersaand die wonderlikste geskenke gaan bring, is alreeds tasbaar. Graag wil ek vir ons skoolgemeenskap ‘n heilsame en geseënde familie-en gesinstyd tydens die komende Kerstyd toewens.

Die wêreld is vol verrassings, veral met die nuwe Covid-19 variant wat verlede week onverwags in Suid-Afrika geïdentifiseer is. Die Wêreld Gesondheidsorganisasie het die onwelkome virus na die 15de letter van die Griekse alfabet vernoem, naamlik Omnicron. Die koms van ‘n nuwe Covid-19 variant met die aanbreek van die Desembervakansie kon seker nie op ‘n slegter tyd gebeur het nie. Behalwe die vrese rakende die nuwe variant, is daar die bekommernis wat dit vir die land se kwesbare ekonomie en toekoms inhou. Ons vuisvose ekonomie kan nie die bedreiging van toenemende sake en inperkings bekostig nie en dit terwyl buitelandsetoeristekansellasies nou die hoogte inskiet. Verblywend was darem die afkondiging tydens Sondagaand se ‘familievergadering’ deur ons president, mnr. Cyril Ramaphosa, dat vlak 1 van die grendelstatus vir eers van toepassing sal wees afhangende van die infeksiekoers in die komende paar weke. Heelwat oorsese toeriste moes inderhaas terugkeer na hul tuislande as gevolg van die onsekerheid wat die 4de vlaag van die pandemie mag bring. Die President het ook ‘n ernstige pleidooi aan alle Suid-Afrikaners gerig om vir die Covid-19 virus ingeënt te word. Die vraag op almal se lippe is: “Gaan inenting verpligtend raak?” Hierdie besluit deur die regering kan geweldige regs-, etiese en politieke uitdagings tot gevolg hê. Dit is dan ook ‘n tydperk waar ons, ons kinders se vrese rakende die pandemie weer moet aanspreek. Dit is belangrik dat ons vir hulle ‘n veilige omgewing skep om daaroor te praat sodat hulle die angs wat die 4de vlaag van die pandemie bring, kan oorkom.

Op Woensdag, 1 Desember, het ons al die Gr. 1’s van 2022 saam met hul ouers vir ‘n heerlike piekniek by die skool agter op die sportveld ontvang. Die samesyn met ouers en die opwinding onder die Gr. R’e maak ons weer van vooraf baie opgewonde om hulle volgende jaar by die ‘groot’ skool te ontvang sodat hulle nuwe reis om hulself te wees, kan begin. Laerskool Jan van Riebeeck is ‘n unieke skool met ‘n plattelandse gevoel in die middel van die stadskom van een van die bedrywigste stede ter wêreld. Ons is ‘n waardegedrewe skool aan die voet van die ikoniese Tafelberg en trots Afrikaans. Ons is vanjaar ‘n 100 jaar oud, en mag ons, ons leuse van “Wees Jouself” as padwyser vir die volgende 100 jaar uitleef. Graad 1’s van 2022, ons kan nie wag om julle volgende jaar te ontvang nie.

Vandag vind ook die prysuitdelings vir die gronslagfase (grade 1 – 3) plaas waartydens ons erkenning aan al ons junior Jannies gee sonder om enige leerder spesifiek uit te sonder. Elke leerder se sertifikaat vertoon hul onderskeie prestasies en wil ons elkeen hartlik gelukwens met hul harde werk en toewyding die afgelope jaar. Ons is saam met julle as ouers/voogde baie trots op ons Jannies! Laat my ook toe om die opvoeders en personeel te bedank vir die waardevolle rolle wat hulle in elke Jannie se lewe die afgelope jaar gespeel het. Volgende week is daar baie opwinding op die agenda met Intersen-prysuitdelings, atletiek en afskeidsfunksies. Ons sien ook baie uit om al ons ouers/voogde by die prysuitdelings te ontvang. Ons het spesiaal ons skoolsaal laat uitverf vir die belangrike okasies, maar a.g.v. die stygende Covid-infeksies, wil ons nie kanse vat om voor die Desembervakansie in ‘n vertrek bymekaar te kom nie. Die prysuitdelings sal buite geskied sodat ouers dit steeds kan bywoon. Hier is solank ‘n voorskou van ons nuut-geverfde saal!

Graag sluit ek met die volgende aanhaling deur Christopher Reeve (Superman) oor hoop af: Al lyk dinge op die stadium nie so rooskleurig nie, weet ons dat hoop alles oorwin.

“Once you choose hope,
anything is possible!”

Ek bly verstom oor hoe vinnig tyd eenvoudig verby snel. Ek onthou goed toe ek nog ‘n kind was, wou ek net ‘groot’ word, want ek het telkemale gesê dat ek eendag die wêreld wil sien, projekte wil aanpak om die wêreld ‘n beter plek te maak en baie ander dinge wat ek graag wou doen. Ek glo julle sal ook daarna kan verwys. Die probleem wat ons egter ervaar nou dat ons wel ‘groot’ is, is dat ons nie die tyd het om die dinge te doen waarna ons nog altyd gehunker het nie. Ons werk hou ons 24/7 besig en ons hardloop van bakboord na stuurboord om ‘n lewe te maak en so gaan die lewe ongemerk vinnig verby.

Dit voel amper asof ons dié jaar soos passasiers op ‘n hoëspoedtrein was – Iewers in ‘n eerste wêreld land, waar die trein eenvoudig nie by enige stasie wou stop nie. Ek weet aan die einde van die jaar geniet meeste van ons ‘n welverdiende ruskans waar ons die vinnige pas tot halt roep. Die sogenaamde “rat race” sluk ons so maklik in en ons jaag onverpoosd voort na sukses terwyl ons eintlik elke oomblik met ons kinders, familie en vriende moet waardeer sodat daar geen kosbare oomblikke verlore gaan nie. Dit gee ‘n mens weer ‘n bietjie perspektief van wat belangrik is en wat ons dink belangrik is.

Die muur by die nasorg (gr. 1 en 2 se parkie) in Kloofstraat neem mooi gestalte aan en behoort binnekort voltooi te wees. Hierdie verbetering ten opsigte van ons skool se infrastruktuur is nie net esteties van waarde nie, maar eerder ook om die veiligheid en sekuriteit van ons leerders en personeel te verseker. Die speelarea word beslis nie net vir die nasorgleerders aangewend nie, maar ons beplan om vanaf 2022 die area meer gereeld vir opelugklaskamerdoeleindes te gebruik. Sonder die muur was dit ‘n groot uitdaging vir enige opvoeder om sy/haar klas daarheen te neem, want hulle was dikwels die slagoffers van ongewenste- en krutaal komende vanaf die ‘Kloofstraatgebruikers’. Graag wil ek weer aan al die ouers wat ‘n donasie gemaak het om die oprigting van die muur moontlik te maak, hartlik bedank en indien jy dalk ook ‘n bydrae wil maak, is jy welkom om Marili by finansies@jvrprim.co.za te kontak.

Verder hoop en vertrou ek dat dit met al ons Jannies tydens die eksamen en finale assesserings of sal ek eerder sê die kontroletoetse, goed gaan. Baie dankie aan julle wat seker maak dat jul kinders vroegtydig voorberei het asook om ‘n omgewing by die huis te skep waar hulle rustig kan leer en voorberei. Voor ons ons oë uitvee is die eksamens verby en beplan die skool heelwat pretdae vir ons Jannies om die jaar op ‘n hoogtepunt af te sluit.

Ek sluit dan graag week 7 af met die gedagte om in elke oomblik te leef as agtergrond met die bekende aanhaling deur Dalai Lama en wens ek julle ‘n wonderlike naweek toe:

“There are only two days in the year that nothing can be done.
One is called yesterday and the other is called tomorrow,
so today is the right day to love, believe and mostly live.”

Let wel dat die skool die volgende tye sal uitkom na eksamen totdat die skool sluit:

• Vrydag, 3 Desember 2021 – 13:00 (Gr.1-3) en 13:15 (Gr.4-7)
• Maandag, 6 Desember 2021 – 13:00 (Gr.1-3) en 13:15 (Gr.4-7)
• Dinsdag, 7 Desember 2021 – 13:00 (Gr.1-3) en 13:15 (Gr.4-7)
• Woensdag, 8 Desember 2021 – 13:00 (Gr.1-2) by die skool, ongeveer 14:00 (Gr.3-7) by die Hoërskool se veld
  *Die skool sal ‘n WhatsApp op die dag stuur sodra ons ‘n meer definitiewe tyd vir die Gr.3-7’s het.
  *Leerders wat by Nasorg is, sal met die skoolbus teruggebring word skool toe.
  
• Donderdag, 9 Desember 2021 – 13:00 (Gr.1-3) en 13:15 (Gr.4-7)
• Vrydag, 10 Desember 2021 – 14:00 (Gr.1-7) by die Hoërskool se veld
  *Die skool sal ‘n WhatsApp op die dag stuur sodra ons ‘n meer definitiewe tyd vir die Gr.1-7’s het.
  *Leerders wat by Nasorg is, sal met die skoolbus teruggebring word skool toe.

*Die bus vertrek altyd 5 minute na die Gr.4-7-leerders verdaag.

Kliek HIER vir stappe om die skool se kalender en/of jou kind se taak- en toetsrooster met jou eie kalender te sinkroniseer. Jy kan dit ook op die webtuiste onder die myJvR tab by V&A (vraag en antwoord) kry. Ons gaan in die vervolg meer stappe daar laai vir vrae wat ouers gereeld vra.

‘n Herinnering aan die onderskeie prysuitdelingsgeleenthede. Ouers/voogde is welkom om dit by te woon.

Vrydag, 3 Des:
Gr. 1 – 8:30
Gr. 2 – 10:45
Gr. 3 – 12:00

Dinsdag, 7 Des:
Gr. 4 – 9:00
Gr. 5 – 11:00

Donderdag, 9 Des:
Gr. 6 – 9:00
Gr. 7 – 18:00 (aandfunksie)

Marike Badenhorst, die skool se opvoedkundige sielkundige, deel graag met ouers die volgende dokument: Leer jou kind die stappe van taakvoltooiing

Vir ouers wat verkies dat hul dogters in die somer kort grysbroeke dra (wat seuns gewoonlik dra), dit word voortaan toegelaat saam met standaard grys skoolkouse. Dit sal eers volgende jaar amptelik op die skoolbeleid aangepas word.

Kwartaal 4 is ‘n besige kwartaal wat onder andere eksamen, finale assesserings, prysuitdelings, afskeid neem en laaste van laastes insluit terwyl Vader Tyd nie stil staan nie. Vrees vir eksamen (kontroletoetse) is al vir baie jare ‘n realiteit en hierdie tyd kan moontlik stresvol vir ‘n gesin wees. Daarom wil ek ‘n ernstige beroep op julle plaas om by die huis ‘n omgewing wat bevordelik vir leer is, te skep. Help jul kinders om vroegtydig te beplan om met eksamenvoorbereiding te begin. Verder is dit net so belangrik om ook tyd vir bietjie ontspanning te skeduleer so tussen die studietye. Navorsing toon dat kinders hoër punte behaal waar ouers/voogde by hul studie en opvoeding betrokke is. Indien jy as ouer/voog ook angstig raak tydens eksamen, doen bietjie introspeksie. Besin dalk oor jou eie ervaring sodat jy nie jou onverwerkte angs onbewustelik aan jou kind/ers oordra nie. Dit was ‘n moeilike jaar na die geweldige impak van die 3de vlaag van Covid-19 infeksies en daarom kan leerders moontlik meer angstig wees vir die komende eksamen as voorheen. Help gerus jou kind om betyds ‘n studierooster op te stel en sodoende eksamenstres te bekamp. Maak hulle veral rustig met die wete dat ‘n eksamen eintlik maar net ‘n groot toets is, iets waarmee hulle baie bekend is.

Verlede Vrydag het ons Holderstebolderdag gevier en leerders kon vir R5 enige iets snaaks aantrek. Hierdie fondse geïn gaan vir die Gr. 7-fonds. Natuurlik het die Jannies nie op hulle laat wag nie en met kleurryke kleredrag en kostuums by die skool opgedaag.

Baie dankie aan al die ouers wat die jaarlikse begrotingsvergadering op Maandag, 08 November 2021, om 18:00 in die saal bygewoon het. Die 2022 skoolbegroting asook die verhoging van die 2022 skoolfooie met 8%, is goedgekeur. Graag wil ek ons Tesourier, Marili Thomson, hartlk bedank vir die deeglike voorbereiding en aanbieding aan ons ouers. Laat my ook toe om die finansiële komitee ook te bedank vir die doeltreffende, effektiewe en deursigtige bestuur van die skoolfondse asook die aanwending van die skoolbegroting gedurende 2021 om effektiewe onderrig en leer dwarsdeur die jaar te bevorder.

Die afgelope week het ons weer ‘n saalbyeenkoms met al die Grondslagfase-leerders gehou en wat dit hierdie keer so spesiaal gemaak het, was die teenwoordigheid van die Gr. R-leerders van Huppelland. Die Graad R’e het so ‘n voorsmakie van die ‘groot’ skool gekry en hulle het net so lekker die eeufeeslied saamgesing. Op Woensdag, 10 November 2021, was dit natuurlik fotodag waartydens die jaarlikse sportfoto’s geneem is. Opwinding onder die leerders was groot. Baie dankie aan juffrou Ischké vir die puik reëlings asook meneer André wat gehelp het met die logistieke bestuur daarvan.

Graag wil ek ook al ons ouers/voogde hartlik bedank vir die voltooiïng van die meningspeiling wat ons aan julle gestuur is. Baie dankie dat julle tyd geneem het om dit sorgvuldig te voltooi en hiermee wil ek julle verseker dat julle opinie waardevol is sodat ons as ‘n skoolgemeenskap die terugvoering kan gebruik om die skool na hoër hoogtes te lei. Vandag vanaf 08:30 – 17:30 hou die Beheerraad ‘n belangrike strategiese sessie waartydens onder andere die terugvoering van die meningspeiling in detail bespreek gaan word. Ek wens hulle sterkte toe en wil hulle persoonlik bedank vir hul waardevolle insette, kosbare tyd en toegewydheid die afgelope jaar.

Verder sien ek baie uit om al ons ouers/voogde en leerders vanaand vanaf 18:00 by die Conradieveld te ontvang waar ons lekker sosiaal gaan verkeer en heerlik saam kuier om die vure. Kom geniet die bring-en-braai of bring sommer net jou piekniekmandjie saam en word deel van die lekker JvR-samesyn. Ek glo dat ons as ‘n skoolgemeenskap uitgehonger is vir ‘n lekker saam kuier wat vir ons nie die afgelope tyd beskore was nie.

Graag sluit ek dan week 5 met die volgende aanhaling deur Natalie Goldberg af en ek wens julle ‘n wonderlike naweek toe:

“Stress is an ignorant state.
It believes that everything is an emergency.
Nothing is that important!”

Ek glo almal het die meevallertjie van ‘n lekker langnaweek geniet en getrou jul merkie op die munisipale verkiesingsdag, 1 November, in jul onderskeie kiesafdelings gemaak. Ek hoop en vertrou dat julle darem nie te lank in rye gestaan het nie. Die Kaapse weer bring maar altyd ‘n bietjie van ‘n uitdaging wanneer ‘n mens buite in lang rye moet staan. Ek en my vrou het geduldig in ‘n lang ry by Laerskool Tamboerskloof gestaan en was verlig om na 1 uur 10 minute ons kruisie te kon trek. Heelwat ouers het ook hul jong kinders saamgebring om die proses te ervaar. Dit was lekker om vir Isabella en Elisabet saam met hul ouers Esri en Albertus in die lang ry te sien en ons kon mekaar darem vertroos dat dit darem nie te lank gaan duur nie.

Op Dinsdag, 2 November 2021, het ek as skoolhoof ook die wonderlike voorreg gehad om vir die eerste keer sedert my aanstelling met die hele Intersenfase (Gr. 4 – 7 leerders en opvoeders) ‘n formele saalbyeenkoms te hou. Marinda het vir ons Jannies ‘n pragtige boodskap gebring waartydens sy hulle verseker het dat hulle nooit hul waarde as Jannies moet onderskat nie. Sy het haar potloodsakkie met die inhoud gebruik om haar boodskap prakties te verduidelik. Die rooi pen het net so ‘n belangrike funksie soos die uitveër. Of jy nou ‘n liniaal of ‘n skerpmaker is, elkeen speel ‘n rol en vervul ‘n baie belangrike funksie. Sy het die leerders verseker dat jy nie net ‘n top akademiese leerder of ‘n uitstekende atleet hoef te wees om waarde vir die skool toe te voeg nie. Elke Jannie voeg op sy of haar unieke wyse waarde toe tot ons puik skool. Baie dankie Marinda dat jy elke Jannie die versekering gee dat hul elkeen geag word en ons as personeel vir hulle baie omgee. Ons senior koor het ook opgetree met die sing van ons pragtige Feeslied. Baie dankie Helecia en Ben wat so mooi na ons kore omsien! Besoek gerus JvR-Kiek vir die video-opname.

Tydens die bogenoemde saalbyeenkoms het ek die voorreg gehad om ses sertifikate en ‘n medalje te oorhandig. Die WKOD se jaarlikse kunsuitstalling het, soos verlede jaar, aanlyn in samewerking met die Nelson Mandela Universiteit plaasgevind. Hierdie nasionale kunskompetisie is gemik op Gr. 7 – 12-leerders en ondersoek die raakpunte tussen Kuns en Wiskunde. Hierdie jaar se tema was Beautiful Mathematics en leerders is uitgedaag om oorspronklike kunswerke te maak wat Wiskunde op ‘n kreatiewe manier met die tema verbind. Baie geluk aan die volgende drie Gr. 7-leerders wat finaliste was en elkeen het ‘n spesiale sertifikaat vir hul prestasie ontvang: Elle Nortje vir haar werk Natuurlike Perfeksie; Lara Pieterse vir Ballet Time en Mia Schreuder vir haar werk, Math Cruise. Ons is baie trots op julle.

Die Lions Klub bied ook jaarliks ‘n internasionale kunskompetisie vir leerders tussen die ouderdomme van 11 -13 jaar aan. Vanjaar se tema was We are all connected. Elke klub mag 5 werke instuur waaruit een gekies word om die distrik te verteenwoordig en daarna ‘n nasionale keuse om op internasionale vlak die land te verteenwoordig. Baie geluk aan die volgende leerders wat elk ‘n spesiale sertifikaat en geldprys ontvang het: Emke van Wyk, Markus de Ridder asook Susan Burger wie se werk gekies is as die distrikwenner. Haar werk gaan dus deur na die volgende rondte van die kompetisie. Julle maak ons baie trots. Dan laaste, maar nie die minste nie, het ek ‘n medalje aan Adan Eksteen (Gr. 6-leerder) oorhandig wat die “Cape Town Cycle Tour” in tandem saam met sy pa vir die 2de keer met ‘n ongelooflike tyd van 4uur en 33 minute voltooi het. Dit is ‘n merkwaardige prestasie vir ‘n 12 jarige. Welgedaan, Adan, ons is baie trots op jou.

Laat my ook toe om om die nuwe hoof van Huppelland aan julle bekend te stel, naamlik Louise Neser. Louise was voorheen ‘n opvoeder by Huppelland en ons is baie opgewonde om haar terug by Huppelland vanaf 1 Januarie 2022 te verwelkom. Louise het vir ‘n ruk lank in Londen (VK) gewerk waar sy ook haar Meestersgraad in vroeë-kindontwikkeling verwerf het. Sy is tans ‘n departementshoof by die privaatskool St. John’s College in Johannesburg. Ons beste wense vergesel haar en mag haar nuwe tuiste in die Moederstad vir haar baie vreugde bring.

Graag sluit ek dan met die volgende aanhaling deur Aristole af en ek wens julle ‘n wonderlike langnaweek toe:

“We are what we repeatedly do.
Excellence then is not an act,
but a habit.”

Gr.3-7 leerders moet asb. hul swemklere en swemkeppies vir die week van 8 – 12 November vir LO skool toe bring.

Leerders wat gedurende die jaar besondere prestasies in sport en kultuur behaal het en dalk in aanmerking kan kom vir spesiale pryse, het die week vorms ontvang wat hulle moet voltooi. Hierdie vorms moet voor of op 12 November 2021 by juf. R. Hanekom ingehandig word. Die vorm is aangeheg indien jou kind nie ‘n vorm geneem het nie. Slegs leerders wie se vorms betyds ingehandig word, sal ‘n kans staan om ‘n spesiale toekenning te ontvang.

Kliek HIER vir die WORD weergawe indien jy dit elektronies wou invul, of laai hierdie PDF af:

Ons gaan vroeg in volgende week ‘n Google Form aan al die Gr.4-7-ouers uitstuur sodat jy kan aandui of jy en jou kind(ers) op 13 November saam met ‘n paar onderwysers ‘n roete in Cecilia Forest wil gaan stap. Dagboek solank die datum en kyk uit vir die vorm volgende week!

So bereik ons die einde van die mooiste, mooiste maand met November wat sy afwagting wil maak. In die Moederstadkonteks is die koms van November eintlik soos die aanbreek van die langverwagte Lente. Die weer is besig om te verander met heerlike sonskyndae wat gekomplimenteer word met betowerende blomme- en fynbosgeure.

Hierdie naweek is dan ook ‘n ‘onbeplande’ langnaweek met die Suid-Afrikaanse munisipale verkiesing wat op Maandag, 1 November, geskied. Dus is Maandag, 1 November 2021, in die Staatskoerant as ‘n publieke vakansiedag gepubliseer. Gaan maak gerus jou kruisie om ‘n verskil te maak.

Verlede Saterdag is die tennis te Ceres noodgedwonge uitgestel na die Sondag as gevolg van die ongure weer wat die tennispret op Saterdag kom bederf het. Ons o/13 seuns- en dogterspan is na Ceres vergesel deur ouers, naamlik Ria Hertzog en Karien Zulch, en het hul puik van hulle taak as spanbestuurders gekwyt. Ons dogterspan het brons tydens die toernooi verower deur Laerskool Gene Louw vir 3de en 4de plek te klop. Welgedaan dogters en baie dankie Ria en Karien vir julle waardevolle leiding.

Verlede Vrydag het ons ook ons skool se nuwe unieke sosiale platform, naamlik JvR-Kiek, bekend gestel. Baie dankie aan Marié Cruywagen, die meesterbrein en skepper van die spesiale platform. Opvoeders gaan foto’s en/of video’s van wat alles op ‘n daaglikse basis by die skool plaasvind, daarop plaas. Toegang is net vir JvR-ouers/voogde en daarom nooi ek julle uit om dit daagliks te besoek sodat julle ook kan deel in die daaglikse opwinding. Volg gerus die volgende skakel en word deel van die betowerende JvR-skoolwêreld.

Op Dinsdag, 26 Oktober 2021, het ek as skoolhoof die wonderlike voorreg gehad om vir die eerste keer sedert my aanstelling met die hele Grondslagfase (Gr. 1 – 3 leerders en opvoeders) ‘n formele saalbyeenkoms te hou. Ons leerderraad het ‘n pragtige boodskap rakende ons waarde van die maand, naamlik eerlikheid, deur middel van rolspel aangebied. Die hoogtepunt van die saal was natuurlik die junior koor wat opgetree het met die sing van onder andere ons pragtige Feeslied. Dit was vir ons almal in die saal so ‘n trotse en kosbare oomblik wat ons vir ‘n lang tyd sal omarm. Baie dankie Helecia en Ben wat so mooi na ons kore omsien!

Graag deel ek met julle die wonderlike nuus wat die nuutste Staatskoerant aandui dat die skoolhoofde persone nou amptelik vir bepaalde geleenthede of aktiwiteite op die skoolterrein kan toelaat. Dit moet egter nog steeds onder streng Covid-19 veiligheidsmaatreëls geskied. Die goeie nuus behels dat julle as ouers/voogde nou weer sportoefeninge, wedstryde, sportbyeenkomste en kultuuroptredes as toeskouers kan bywoon. Dinsdagmiddag het ons o/13-krieketspan weg teen Laerskool Kampsbaai gespeel. Ongelukkig het ons verloor, maar waardevolle lesse is geleer. ‘n Mens leer ongelukkig baie meer as jy verloor en ek weet dit is nie altyd lekker nie, maar partykeer moet ‘n mens eers verloor om te verbeter. Dit was egter lekker om weer opgewonde ouers langs die krieketveld te sien en lekker om met hulle te kon gesels. Terwyl ek met Alet Loubser en Myrtle Joubert op die pawiljoen gesels en verduidelik wat met my enkel gebeur het, slaan ‘n speler van Laerskool Kampsbaai ‘n massiewe ses lopies in ons rigting. Die bal tref ongelukkig vir Myrtle op haar kuit en sy neem een vir die span of sal ek sê een vir die skoolhoof aangesien die krieketballe my die laaste tyd onwillekeurig volg. Sterkte Myrtle, ek hoop dit is nie meer pynlik nie! Baie geluk aan ons o/11-krieketspan wat hul wedstryd weg teen Laerskool Van Riebeeckstrand met 5 paaltjies gewen het. Baie dankie juffrounes, Ischké en Razelle, wat hulle vergesel het.

Op Woensdag, 27 Oktober 2021, het die gewilde Spelfees in die saal plaasgevind. Ek het probeer om by elke graad in te sit. Ek was so verras en beïndruk met veral die Graad 3’s se spelvernuf. Die spelfees werk d.m.v. uitklopbasis en die beoordeelaars het amper uit woordopsies gehardloop om die finale wenner te bepaal. Die Gr. 3-wenner is na ‘n lang strydbyl tussen Katryn Silvis en Amelie van der Walt beslis met Amelie wat as die wenner uit die stryd getree het. Wees verseker ons Jannies sal ons as volwassenes heel moontlik op ons neuse laat kyk wanneer dit kom by spelling van ons kosbare taal.

Vanaf Maandag, 25 Oktober, mag ons Jannies soggens voor skool in hul somerdrag weer buite op die skoolterrein speel sodra hulle eerste ding klaar hul Covid-sifting in hul onderskeie klaskamers gehad het. Ek glo hulle geniet terdeë die nuwe reëling, want hulle mag nou na ‘n baie lang tyd weer buite op die skoolperseel speel. Soggens klink dit beslis weer soos ‘n tipiese skoologgend voor Covid. Luidkeelse stemme wat al die maatjies verwelkom en sommer om net lekker te jubel, kind te wees, saam te kom speel en mekaar se verbeelding te stimuleer terwyl hulle die vars oggendlug buite geniet. Ons probeer om skool toe te kom weer vir hulle lekker te maak.

Soos julle bewus is, kan kinders en tieners tussen die ouderdom van 12 en 17 jaar oud teen Covid-19 ingeënt word en het hulle nie die toestemming van hul ouers/voogde nodig om die entstof te ontvang nie. Ek kan julle verseker dat die proses nie deur die skole van stapel gestuur is nie. Ek is bewus dat dit ‘n baie omstrede saak is en JvR gaan beslis nie ‘n opinie hieroor uitspreek nie. Dit is elke ouer en gesin se prerogatief om te besluit wat die beste vir hulle is en dankie dat almal dit sal respekteer.

Laat my ook toe om al die 2021 matrikulante namens ons skoolgemeenskap sterkte en voorspoed vir die matriekeksamen toe te wens. Altesaam 73 866 kandidate is vanjaar vir die nasionale seniorsertifikaateksamen in die Wes-Kaap ingeskryf. Ons beste wense vergesel hulle vir die belangrikste eksamen van hul skoolloopbaan.

Graag sluit ek dan met die volgende aanhaling deur Maya Angelou af en ek wens julle ‘n wonderlike langnaweek toe:

“I’ve learned that people will forget what you said,
People will forget what you did,
but people will never forget how you made them feel.”