Kategorie: Algemeen

Liewe ouers,

Jan Kas moet ongelukkig dringend ‘n voorraadopname doen en sal dus volgende week gesluit wees.

Geen items sal tydens hierdie paar dae aanlyn, of in die winkel, gekoop kan word nie. Maak asseblief seker dat jou kind alle nodige sport en winterklere het voor Dinsdag. Die laaste bestellings vir die week sal Dinsdagoggend afgelewer word.

Voorraadopname vind plaas:

Dinsdag, 20 Mei @ 08:00 – Vrydag, 23 Mei @ 10:00

Ons vra omverskoning vir enige ongerief.

Groete,
Jan Kas Span

Kristi Perez-Snyman het onlangs ’n merkwaardige mylpaal in haar hoogspringloopbaan bereik.

Tydens die Suid-Afrikaanse Nasionale Kampioenskappe het sy die vroue-hoogspringtitel verower met ’n sprong van 1.88 meter – haar persoonlike beste én ’n nuwe skoolrekord.

Haar deurlopende verbetering en onlangse nasionale titel getuig van haar toewyding en talent in hoogspring. Baie geluk aan Kristi Perez-Snyman met hierdie uitstaande prestasie!

Foto uit: judolphins.com

Nini, ’n oulike twee maande oue Fox Terrier-hondjie, is op soek na ’n liefdevolle vir altyd-huis. Sy word tans met groot sorg ge’foster’ deur die gesin van Annabel Brink (Graad 5).

Sy is regtig ’n oulike hondjie – speels, vol liefde, en altyd lus vir geselskap! Nini is ’n uitstekende stap- en drafmaat, maar verkies ’n skoot wanneer sy nie speel nie. Sy is mal oor mense en sal met haar sagte persoonlikheid enige hart vinnig steel.

As jy of iemand wat jy ken vir Nini ’n warm, veilige huis kan bied, kontak asseblief Deane Brink by brinkdeane@gmail.com of 0764558002.

Help ons om hierdie spesiale hondjie haar perfekte tuiste te gee! ????????

Ons is tans besig om al die trofees wat die leerders verlede jaar tydens die prysuitdeling ontvang het, te dokumenteer. Indien u kind verlede jaar ’n trofee ontvang het, stuur dit asseblief na die Mediasentrum, aan Juffrou Marecia van Zyl.

Baie dankie vir u hulp hiermee.

Groete,
Juffrou Marecia

Ons splinternuwe voorraad sysakkies met die nuwe embleem is nou beskikbaar in Jan Kas!
Beskikbaar in winkel én aanlyn – koop maklik van waar jy ook al is!

Koop HIER aanlyn.

‘n Groepie Jannies het verlede week aan die Nippers Surf Lewensredding SA-kampioenskappe in Gqeberha deelgeneem. Die spanlede was Alexander Weideman, Nils le Roux, Sebastian en Luc Zietsman, Lukas Loubser en Finley le Roux.

Vir drie dae lank moes ons mannetjies hul staal wys in verskeie hardloop-, swem- en Malibu-reddingsborditems en -kombinasies. Lukas het ’n bronsmedalje in die langafstandstrandresies verower, terwyl Nils medaljes in strandnaellope, vlaggies, Taplin-aflos en strandaflos ingepalm het.

Die Zietsmans, saam met Finley en Lukas, het die “Mad Dog”-toekenning ontvang deur aan álle items deel te neem. Lukas het dit selfs verder geneem deur vir nóg drie dae aan die volledige Stilwater Lewensredding-kompetisie deel te neem. Daar het hy sy persoonlike beste in die 100 m-swem met ses sekondes verbeter!

Baie geluk aan hulle met hul vasberadenheid en indrukwekkende prestasies!

Binnekort beskikbaar: ‘n gemaklike, spons-kussing – perfek vir langs die sportveld of enige skoolaktiwiteit.
Sag, lig en dra maklik – jou ideale sitmaat vir ure se ondersteuning en warmte!

Bestel nou op Karri!

Dit is weer tyd om ons moeders te bederf!

Bestel nou ‘n Moedersdag geskenkpakkie op Karri teen slegs R60.

Bestellings sluit op 7 Mei om 10:00.

Help ons om ‘n verskil te maak – gee jou ou sporttoerusting ‘n tweede lewe!

Het jy dalk ‘n bal, kolf of raket wat al ‘n rukkie stof staan en vergaar? Ons almal het daardie sporttoerusting wat net in ‘n kas weggebêre is — gaan loer gerus en kyk wat jy kan opspoor!

Ons wil graag ons buurskool, wat tans deur moeilike tye gaan, help deur bruikbare sporttoerusting aan hulle te skenk.

Wat soek ons?
Ou, maar steeds bruikbare sporttoerusting soos balle, kolwe, rakkette – en enigiets anders wat nog in ‘n goeie toestand is.

Waarheen?
Bring jou donasie na Juffrou Michelle Compion se klaskamer.

Wanneer?
Ons versamel van Maandag 5 Mei tot Vrydag 13 Mei.

Laat ons saamwerk en sport pret vir almal moontlik maak!

Ons is baie opgewonde om aan te kondig dat Peti Troskie op 6 Mei ons skool gaan besoek om met ons Graad 4 tot 7 leerders te gesels! 

Ons sien uit daarna om haar by ons skool te verwelkom!

Sien die planne van die Sportspaviljoen hier onder:

Die Waterbuffel-Burgerfees, wat op 14 Maart by ons skool, Laerskool Jan van Riebeeck, plaasgevind het, was ’n groot sukses! Ons is deur Babylonstoren uitgedaag om ’n hele waterbuffel – in die vorm van ’n burger-marathon oor twee dae – aan te pak.

Met die beste bestanddele, ruimlik deur hulle geskenk, is ons taak aansienlik vergemaklik.

Hier volg ’n paar statistieke:

• Ongeveer 1 800 patties is ontvang.

• Oor twee dae het ons altesaam 1 500 frikkadelbroodjies gaar gemaak – waarvan ons onder andere die magies van ons buurskool, Prestwich Primary, gevul het, en 1 000 in ons gemeenskap verkoop het.

Helpende hande het ingesluit:

• 80 ouers wat brood gesny en gesmeer het

• 40 kinders wat die frikkadelbroodjies gebou het

• 25 braaiers

Die gemeenskap van LJvR het heerlik gesmul, en die oorblywende 300 patties is vinnig opgeraap. Die bolletjies wat nie gebruik is nie, is aan Kaapstad Kinderhuis geskenk.

Die samesyn was wonderlik, en die vure het reeds van 16:00 af hoog gebrand. Met lekker musiek in die agtergrond is die feesmaal in volle gees geniet.

Nie net was dit ’n heerlike middag nie – ons het ook R34 860 se profyt vir die skool gemaak!

OOV-groete,

Susan

burger

Ons is ongelooflik trots op Christiaan Cronje (Freestyle, FS-O/10) wat ’n goue medalje gewen het!

Nie net het hy homself met groot waardigheid op die mat gedra nie, maar die afrigters en spanbestuurders het hom ook aangewys as Parow se Junior Stoeier van die Toernooi.

Welgedaan, Christiaan – jy is ’n inspirasie!

Help ons Graad 7-leerders om fondse in te samel deur ’n heerlike doughnut op Karri te bestel! Dis ’n lekker bederf vir ’n goeie doel – moenie uitmis nie!