Kategorie: Algemeen

29 Augustus, 2025 / Algemeen, Nuus

Van ons Jannies het op 22 Augustus aan die distriksrondte van die WOW-spelfees deelgeneem. Hulle het baie goed gevaar. Die top 4 in elke graad gaan deur na die provinsiale rondte wat op 13 September in Wellington plaasvind.

Graad 1: Joshua du Toit (1ste) en Frannie Samuel (2de)
Graad 2: Izak Steyn (3de) en Mary-Anne du Toit (4de)
Graad 3: Charles Thompson (1ste) en Petronella Gouws (2de)
Graad 4: Mika van der Walt (1ste), Mateo Pereira (2de) en Benjie Ntloko (3de)
Graad 5: Dirk de Jager (2de), Jacob Venter (3de) en Noah Karusseit (4de)
Graad 6: Ghia Pereira (1ste) en Ella van der Walt (2de)

Welgedaan, Jannies! Julle maak ons trots.

Boodskap van Merwe Scholtz, Beheerraadvoorsitter

29 Augustus, 2025 / Algemeen, Nuus

Beste JvR-ouers,

Koöpteer van beheerraadslede

Ek glo dat dit goed met julle en jul kinders gaan en dat julle die skool geniet.

Daar is van ons beheerraadslede wie se termyn in die komende maande tot ‘n einde kom. Daar is vele strategiese kwessies op die horison, insluitend ingrypende wysigings tot die skolewet. Ter selfde tyd moet ons vir Naas en sy span die nodige ruimte skep om voort te gaan met die uitstekende werk wat hulle doen en ons unieke skoolomgewing met sy wees jouself-manier van doen te handhaaf en verder uit te bou. Dit midde die toenemende finansiële voetwerk wat nodig is om in ‘n openbare skool die boeke te laat klop.

Ek doen ‘n beroep op minstens twee van ons ouers wat volgende jaar kinders in graad R, 1, 2 of 3 het wat belangstel en bereid is om betrokke te raak. Kontak my (mscholtz@genfin.co.za). Ons het spesifiek ‘n behoefte aan finansiële kundigheid en breër bestuursvaardighede.

Dit is nodig om ouers wat kinders het wat minstens nog 5 jaar by ons op skool is tot die beheerraad te verkies, sodat hulle twee termyne kan dien en so die nodige kontinuïteit kan verskaf.

Stuur asseblief ook aan ander ouers wat julle voel kan help.

Groetnis,

Merwe

082 783 8795

Ouersportdag 2025 – Slegs 1 span oor!

29 Augustus, 2025 / Algemeen, Nuus

Maak reg vir pret, spanpoging en sportgees!

Saterdag, 29 November 2025, van 08:30 tot 17:30 bied ons die opwindende Ouersportdag aan.

Kom wys jou vaardighede in:

Netbal
7’s Raakrugby
8’s Hokkie
Aflosswem
Tennis
Skaak

Daar is nog slegs plek vir 1 span, bestaande uit 16–20 lede. Moenie uitmis nie – dit beloof ’n dag vol lag, kompetisie en lekker saamwees.

???? Skakel of WhatsApp Danielle le Clus-Rossouw by 082 923 5903 om meer inligting te kry en jou span se plek te bevestig.

Mediasentrum nou oop tydens tweede pouse!

29 Augustus, 2025 / Algemeen, Nuus

Ons is opgewonde om aan te kondig dat die mediasentrum vanaf 2 September gedurende tweede pouses oop sal wees.

Kom loer in en neem ’n boek uit – daar wag iets vir elke smaak en belangstelling!

Skoollied

28 Augustus, 2025 / Algemeen, Nuus

Waar Suidoos se spierwit pluime
oor ou Tafelberg afval,
en teen Vlaeberg se hange die
kanonskoot twaalfuur knal:

waar die see se blinkblou branders
teen ou Tafelbaai aanspoel,
staan ons skool, die Jan van
Riebeeck, met ‘n groot en edel doel.

Vas en stewig soos die berge is ons
moedertaal geplant,
liefde daarvoor sal ons uitdra oor
ons hele vaderland.

In ons werk en in ons lewe streef
ons al wat goed is na,
want ons skool sal van ons altyd net
die allerbeste vra.

Woorde: Alba Bouwer
Musiek: H. Pieter v.d. Westhuizen

Trotse oomblik vir die Conradies by die Silverskerm Filmfees

21 Augustus, 2025 / Algemeen, Nuus

Woensdag het Gerhard saam met sy suster, Chrystal, die Silverskerm Filmfees bygewoon. Hul film, Alma Oppad, het die fees geopen en die gehoor betower! ????❤

Jannies blink uit by wiskundeolimpiade

21 Augustus, 2025 / Algemeen, Nuus

Baie geluk aan die volgende Jannies wat die Top 100 in die land tydens die Horizon wiskundeolimpiade behaal het! Hier volg hul posisies uit 25 000 inskrywings.

Jamie Jordaan (Gr.6) – 28ste
Ruben de Ridder (Gr.7) – 70ste
Katryn Silvis (Gr.7) – 5de

Welgedaan Jannies! Ons is vreeslik trots op julle!

Kom geniet ‘n Roomys!

21 Augustus, 2025 / Algemeen, Nuus

Ondersteun die skool deur jou MySchool-kaart te gebruik

21 Augustus, 2025 / Algemeen, Nuus

Wat is ‘n MySchool-kaart?

Die MySchool-kaart is ’n maklike manier om jou skool te ondersteun sonder dat dit jou iets ekstra kos. Elke keer as jy met jou kaart by deelnemende winkels betaal, skenk die winkel ’n persentasie van jou aankoop direk aan ons skool. Jy dra dus by tot waardevolle projekte en hulpbronne, eenvoudig deur jou alledaagse inkopies te doen.

Registreer by hierdie skakel: Registreer: MySchool

Christien Neser kom gesels: “Help, my kind is anders!”

15 Augustus, 2025 / Algemeen, Nuus

U word hartlik uitgenooi na ‘n gesprek met Christien Neser, waar sy gaan gesels oor kinders wat “anders” is.

Die gesprek sal in die ZenDen plaasvind vanaf 18:00-19:00.
Kliek asseblief op die skakel om te registreer vir die aand: https://forms.gle/xaTC9jdvt1Hec4u8A

100 jaar Afrikaans! 104 jaar LS Jan van Riebeeck!

15 Augustus, 2025 / Algemeen, Nuus

Marinda Brink – 27 Julie 2025

Ek lees ‘n eeu oue verhaal

van lewenswel en -weë, soos Laurika sing

waar Japie Louw en Trudie de Waal

Afrikaans as Moedertaal spoke jaag

om ons taal amptelik te bewaar.

En waarheen al die woorde is,

sal net Jannies kan verklaar.

Afrikaans, ons taal – groei en vernuwe

om nog ‘n 100 jaar amptelik te bly staan.

Japie, ons is jou dankbaar wat voet-by-stuk

gehou het dat ‘n Jan van Riebeeck-kultuur

fier en vors trots kan staan om liefde vir ons mooie

taal met die ander elf Tale te deel.

LS JvR jou waardes geëets teen Tafelberg, Leeukop en Seinheuwel

Respek

Eerlikheid

Verantwoordelikheid

Omgee

Lig omhoog jou heilsaamheid

om kinders in wêreldburgers te omskep.

Voorwaarts vir Afrikaans –

ons mooie taal vir nog eeue om te vier.

Taberna Boekuitstalling: 25-27 Augustus 2025

8 Augustus, 2025 / Algemeen, Nuus

Kom maak ‘n draai by die boekuitstalling op 25-27 Augustus in die mediasentrum. Ouers is ook welkom om na skool saam met hul kinders te kom inloer.

Christiaan Cronje presteer in stoei

8 Augustus, 2025 / Algemeen, Nuus

Christiaan het die afgelope naweek Pretoria toe gereis vir die Johnny Reitz Big 5-stoeitoernooi – die grootste van die jaar met 834 deelnemers. Hy het vier wedstryde gestoei, waarvan hy drie oortuigend gewen het sonder dat sy teenstanders enige punte kon aanteken – een selfs binne 27 sekondes!

Sy laaste wedstryd was eers na 20:00 en het tot die laaste sekonde vol spanning gebly. Alhoewel hy op punte verloor het, het hy ’n welverdiende silwer medalje huis toe gebring.

Met hierdie prestasie het Christiaan se jaarlike totaal nou op drie goue en drie silwer medaljes te staan gekom. Baie geluk – jou harde werk en deursettingsvermoë is ’n inspirasie!

Pieter sing by Talento-sangkompetisie

1 Augustus, 2025 / Algemeen, Nuus

Pieter Rademeyer het die afgelope naweek aan die finale ronde van die jaarlikse Talento-sangkompetisie deelgeneem.

Sowat 800 leerders van regoor die Wes-Kaap het vanjaar in talle rondes van dié provinsiale kompetisie deelgeneem en uiteindelik het die top 200-deelnemers die afgelope naweek sake uitgespook vir ‘n plek in die top 3 in elke afdeling.

Pieter is uitgenooi na die spoggalageleentheid in Augustus as ‘n top 3-kategoriewenner in die musiekblyspel-afdeling.

JvR Ballerinas skitter by Cape Ballet Centre

31 Julie, 2025 / Algemeen, Nuus

Veels geluk aan die JvR-ballerinas met hul uitsonderlike prestasies! Hierdie talentvolle dansers het onlangs hul Royal Academy of Dance-balleteksamens met groot sukses voltooi by die Cape Ballet Centre.

Hul uitslae weerspieël maande se toewyding, dissipline en liefde vir die kuns van ballet. Wel gedaan, pragtige ballerinas!