Ek hoop en vertrou dat julle ook die afgelope langnaweek terdeë saam met jul gesinne, familie en/of vriende geniet het.

Verlede Vrydag, 07 Augustus, het agt van ons Jannies vir die eerste keer aan die ‘World Robot Olympiad’ te Curro Durbanville deelgeneem. Daar was 18 spanne in hul kategorie ingeskryf en graag wil ons die onderstaande spanne hartlik gelukwens met hul deelname en prestasie:

  • Span 1: Kohl Kushner, Rafa Lamprecht en Liam du Plessis – baie geluk met die puik algemene 2de plek en silwermedalje!
  • Span 2: Maia du Toit, Bella Malan en Leah Jacobzs.
  • Span 3: Gert van der Linde en Samuel Smit.

Ons is ongelooflik trots op al ons Robotika-leerders en graag wil ek van die geleentheid gebruik maak om juf. Suné hartlik geluk te wens met alles wat sy in terme van kodering en robotika by ons skool alreeds in ’n kort tydjie vermag het.

Op Dinsdag, 11 Augustus, is die saalboodskap deur ons 2026 Hoofdogter en Hoofseun, Mila Malan en Dane Botha, gelewer. Dit was ook hul eerste amptelike optrede as die nuwe hoofseun en -dogter en het hulle hul puik van hul taak gekwyt. Hul inspirerende boodskap het gehandel oor die belangrikheid van spanwerk in die skoolomgewing en hoe ons as leerders en personeel mekaar te alle tye moet ondersteun en help deur dik en dun, maak nie saak hoe moeilik dit partykeer is nie.

Hulle het ook onder andere verwys na Rassie Erasmus en die Springbokke wat die afgelope jare baie suksesvol is omdat hulle veral fokus op die span se beste belange en nie op individue nie. Rassie en die Springbokke is ware rolmodelle en hulle bly altyd nederig al wen hulle baie wedstryde, toernooie en wêreldbekers terwyl hulle voortgaan om nog steeds elke dag harder te werk as die dag vantevore om hul derde opeenvolgende wêreldbekerdroom na te jaag.

Mila en Dane het ook in hul boodskap verwys dat ek as skoolhoof spreekwoordelik die Rassie-rol by die skool vertolk, die onderwysers verteenwoordig al die hulpafrigters en ondersteuningspan terwyl die leerders die Springbokke is. Ek is beslis nie in Rassie se klas nie, maar wat ’n wonderlike vergelyking met ’n besondere boodskap dat met spanwerk en omgee ons soveel meer kan bereik. Die leerders en personeel het behoorlik aan die hoofleiers se lippe gehang. My beste wense vergesel ons hoofleiers vir die groot taak wat op hulle wag.

Verskeie van ons leerders het vanaf 03–07 Augustus aan die JanArte Kunstefees wat deur Hoërskool Jan van Riebeeck aangebied is, deelgeneem. Hierdie is hul eie Eisteddfod-inisiatief en ons is dankbaar dat ons deel daarvan kon wees. Baie geluk aan al ons leerders wat deelgeneem het, julle het puik presteer. Die volgende leerders is genooi om tydens die JanArte-prysuitdeling op Dinsdag, 18 Augustus, op te tree:

  • Antjie Samuel (Gedig) – Die Heks met die Aërosolkan

  • Chris Derksen (Gedig) – Ril Restaurant

  • Coreen Scholtz (Gedig) – Is jy die Mooiste?

  • Alexander Styan – Elektriese Kitaar

  • Jack Theron – Tromstel (Een item)

  • Pieter Rademeyer – Baskitaar

  • Deon de Kock – Saksofoon

  • Benjie Ntloko – Klarinet

Hierdie naweek speel ons hokkie, netbal en rugby tuis teen Laerskool Dirkie Uys as deel van Hoërskool Jan van Riebeeck se interskole teen Hoërskool Dirkie Uys. Neem asseblief weer kennis dat dit nie ons interskole is nie, want ons interskole geskied vanaf 2026 teen Laerskool Welgemoed tuis oor die naweek van 28 en 29 Augustus.

Ons o.10A- tot o.13A-netbalspanne speel Saterdag, 15 Augustus, nie teen Laerskool Dirkie Uys nie, aangesien hulle gaan uitspeel tydens die distrik-topskoletoernooi. Ons o.10- tot o.13B- en C-spanne gaan teen Laerskool Dirkie Uys se A- en B-spanne speel. Vir seker gaan dit baie sterk opposisie wees, maar dit gee geleentheid vir ons B-, C- en D-spanne om meer as een wedstryd op die dag te speel asook om blootstelling op ’n hoër vlak te kry terwyl dit ook as goeie voorbereiding vir die interskole teen Laerskool Welgemoed dien. Sterkte en beste wense aan ons o.10A-, o.11A-, o.12A- en o.13A-spanne wat môre aan die distrik-topskole-uitspeeltoernooi deelneem – ons hou styf duimvas!

Afrikaans is so ryk aan kleurryke idiome en gesegdes en daarom hou ek aan om nog bekende Afrikaanse uitdrukkings/idiome en die betekenis daarvan met julle te deel in ’n poging om ons pragtige taal verder te promoveer, deel gerus met jou kind/ers:

“As jy ’n hond wil slaan, kry jy altyd ’n stok.”

Die uitdrukking beteken dat as jy iemand kwaad wil aandoen of te na kom, jy altyd ’n rede sal vind of ’n geleentheid kry.

Ek sluit dan week vier af en mag julle ’n wonderlike naweek van sport teen Laerskool Dirkie Uys geniet.

Groetnis

Naas Beets
SKOOLHOOF