|
|
|
|
|
Dagboek
Wo 16 September 2026
Do 17 September 2026
- Konsert: Optrede 4 (Grand Finale)
So 20 September 2026
- Heidré Ehlers (Onderwyser) verjaar
Ma 21 September 2026
- Skrywersbesoek - Silas en die ysbeer op Tafelberg (Annie Klopper en Zandré Coetzer)
- Beheerraad-vergadering (Goedkeuring)
Di 22 September 2026
- Koffie-en-Beskuit Konsert
Wo 23 September 2026
- Skole sluit (skoolvakansie)
Do 24 September 2026
Vr 25 September 2026
Wo 30 September 2026
- Monica Robertson (Klasassistent) Verjaar
|
|
|
|
|
|
|
|
|
|
|
|
|
|
Vandag presies 25 jaar gelede was die wêreld in skok gedompel met die grusame aanvalle van 11 September waar duisende onskuldige mense gesterf het. In die volksmond staan dit nog vandag as 9/11 bekend. Ek weet dat daar heelwat samesweringsteorieë oor die voorval nog steeds die rondte doen, maar dit was 'n gekoördineerde reeks selfmoordaanvalle wat in 2001 deur die Islamitiese terroriste-organisasie al-Kaïda teen die Verenigde State uitgevoer is. Altesaam 19 terroriste het vier passasiersvliegtuie gekaap en twee daarvan het in een van die Tweelingtorings-geboue (''Twin Towers'') van die Wêreldhandelsentrum in New York-stad vasgevlieg. Die derde vliegtuig het teen die Pentagon – die hoofkwartier van die Amerikaanse Departement van Verdediging in Arlington County, Virginië – gebots. Die vierde vliegtuig het gelukkig in 'n landelike area in Pennsilvanië neergestort, maar daar was onskuldige mense aan boord. Mag die wêreld nooit weer so 'n traumatiese gebeurtenis ervaar nie. Die rede dat hierdie insident my altyd sal bybly, is dat ek twee weke na die 9/11-insident met redelike angs en onsekerheid op 'n vliegtuig vanaf Kaapstad na Berlyn (Duitsland) geklim het vir opleiding wat deur die WKOD geïnisieer was. Ek dink baie mense het vir 'n geruime tyd na afloop van 9/11 verkies om eerder nie te vlieg nie.
|
Ek hoop en vertrou dat almal die heerlike sonskynweer van die afgelope tyd geniet, veral na die stormwinde wat op baie plekke groot skade aangerig het. Ek glo ook dat julle sal saamstem dat met die koms van meer sonnige dae baie goed vir almal se gemoedere is en dit het net betyds gekom om die aanvang van ons somersportoefeninge te komplimenteer. Ons het skaars met 'n suksesvolle wintersportseisoen afgesluit en ons het die afgelope week sommer onmiddellik met die somersportprogram afgeskop. Dit was ongelukkig die laaste week van sport vir die kwartaal aangesien die fokus nou verskuif na die konsert wat volgende week (14 – 17 September) gaan plaasvind.
|
Die wintersportprogram vir 2026 was baie suksesvol en dit is vir my 'n riem onder die hart om te sien hoe ons leerders die sportaanbieding by die skool geniet – dit is veral die spanformaat wat deur wintersporte gebied word. Dit is vir my belangrik dat ons leerders aan sport moet deelneem en in die proses aktief te wees. Dit is ook nie vir my nodig om die belangrike lewenslesse wat sport bied aan julle as ouers/voogde uit te wys nie. Sport en kultuur skep wonderlike geleenthede buite die vier mure van die klaskamer om belangrike lewenslesse te leer wat eendag vir hulle so waardevol gaan wees.
|
Ons werk sedert 2022 baie hard om 'n gesonde sportkultuur by die skool te vestig en dus meer ontwikkelingsgeleenthede vir ons leerders te skep. Graag deel ek met julle 'n bietjie wintersport-statistieke (hokkie, netbal & rugby) om die vooruitgang en ontwikkeling van sport by ons skool sedert 2022 te bevestig. Ons leerders het gedurende die 2026 wintersportseisoen (Kwartale 2 en 3) aan 'n merkwaardige 1126 wedstryde deelgeneem, dit sluit natuurlik liga-wedstryde, sportdae en toernooie in. Daar is dus 'n groei in wedstrydblootstelling van 25,6% vanaf 2025 tot 2026. Daar is veral moeite gedoen om seker te maak dat ons B- en C-spanne dieselfde hoeveelheid wedstryde as die A-spanne speel. Ek dink dit is merkwaardig en 'n welverdiende kompliment aan ons sportkantoor vir hul leeue-aandeel in die verband.
|
|
Sien gerus onder die grafiese illustrasies van die aantal wintersportwedstryde per jaar wat vanaf 2022 tot 2026 plaasgevind het. Daar was dus sedert 2022 tot 2026 ‘n toename van 113,2% in die aantal wintersportwedstryde waaraan ons deelgeneem het.
|
|
|
Die toename in wintersportwedstryde beteken natuurlik dat meer leerders aan wintersporte oor die jare begin deelneem het.
|
Die groei in leerderdeelname aan netbal, rugby en hokkie (dogters en seuns) vanaf 2022 – 2026 per jaar is soos volg:
|
|
|
|
|
|
|
|
|
|
|
|
Soos julle kan sien, was daar sedert 2022 ‘n groot toename per jaar in die aantal leerders wat aan hokkie deelgeneem het, veral die seuns (114%). Ek glo ook dat die vestiging van die kunsgrasveld agter by ons skool bygedra het tot die groei en ons gesamentlike poging met Hoërskool Jan van Riebeeck om 'n astrobaan te bou, sal nog meer leerders trek om aan hokkie deel te neem.
|
|
Groei en ontwikkeling het die afgelope vyf jaar nie net by ons sportaanbieding plaasgevind nie, maar ook by kultuur, veral die toename van musiekleerders en die aantal instrumente waarvan hulle kan kies. Die groei is veral merkbaar vanaf 2024 met die aanstelling van juf. Rolene as ons nuwe Hoof van Kultuur en Musiek. Die onderstaande grafiese illustrasie toon dat ons in 2022 ‘n totaal van 80 musiekleerders gehad het en vanjaar gevorder het tot 135 leerders.
|
|
|
Tot en met 2023 kon ons leerders net onderrig in klavier, blokfluit, kitaar en viool ontvang. Vanaf 2025 word daar onderrig in nege musiekinstrumente met die volgende instrumente wat ook bygekom het: saksofoon, klarinet, tjello, dwarsfluit en marimba. Verder steel die senior- en junior koor spreekwoordelik orals die kollig waar hulle optree. Puik kwartaallikse musiekkonserte, uitstekende uitslae van ons Eisteddfod-deelnames en redenaars is amper tasbare bewyse dat ons hard aan die werk is om kultuur en musiek sy regmatige plek by ons skool te vestig. Baie geluk aan ons junior koor met hul puik optrede op Dinsdagmiddag, 08 September 2026, tydens die Kaapse Afrikaanse Eisteddfod by Laerskool Simon van der Stel. Baie geluk, juf. Bea en mnr. Ben, met hul puik optrede en baie dankie vir jul harde werk en toewyding om ook 'n koorkultuur by ons skool te vestig.
|
Vanmiddag neem ons senior robotika- en koderingspan (Kohl Kushner, Rafa Lamprect en Liam du Plessis), wat silwer medaljes tydens die streekkompetisie van die World Robotics Olimpiad gewen het, deel aan die nasionale kompetisie wat in Pretoria plaasvind. Ons is baie trots op ons 3-manspan onder leiding van juf. Suné dat hulle vir die nasionale kompetisie gekwalifiseer het – dit is voorwaar 'n merkwaardige prestasie! Ons hou styf duimvas en mag jul die ongelooflike blootstelling en ervaring terdeë geniet.
|
Hoe mooi is ons kosbare taal, Afrikaans, wat so ryk aan kleurryke idiome en gesegdes is daarom hou ek aan om nog bekende Afrikaanse uitdrukkings/idiome en die betekenis daarvan met julle te deel in ‘n poging om ons pragtige taal verder te promoveer, deel gerus met jou kind/ers:
|
Die uitdrukking beteken dat iemand sommer net voor 'n etenstyd by familie of vriende opdaag, net om te eet en dan direk daarna te vertrek sonder om eers 'n bietjie te kuier.
|
Die konsertkoors vir volgende week se konsertweek loop alreeds hoog en ons kan nie wag vir die afskop van die glanskonsert nie. Maak asb seker dat jy die konsertinligtingskrywe deeglik bestudeer.
|
Ek sluit dan week agt af en mag die Bokke weer môreaand om 23:00 die All Blacks in Baltimore (VSA) wys waar Dawid die wortels gegrawe het. Geniet ‘n wonderlike naweek saam met jul gesinne, vriende en familie.
|
|
|
|
|
|
VIR AANDAG
|
|
Neem kennis van die volgende belangrike aankondigings en gebeure:
|
|
|
|
|
|
|
|
|
|
|
|
|
|
|
Die Junior Koor verwelkom nuwe lede om aan die begin van kwartaal 4 by die junior koor aan te sluit! Daar lê opwindende geleenthede in kwartaal 4 vir die Junior Koor voor, soos ’n “Choir Mingle” saam met St Cyprian’s en die Kerskonsert wat jaarliks ’n hoogtepunt op ons kalender is.
Juf Bea doen oudisies vanaf Maandag, 14 September, tot Vrydag, 18 September. Ons sal deur die loop van die week by die klasse om gaan en belangstellende leerders uitnooi vir die oudisie!
Kontak gerus vir juf Bea met enige verdere vrae.
bea.musiek@jvrprim.co.za
|
|
|
|
|
|
|
|
Ons stryk- en houtblaasensembles gaan Saterdag, 12 September, aan ’n orkeswerkswinkel saam met leerders van Somerset House deelneem. Daar sal ook van ons senior musiekleerders by marimbagroepe vir die oggend inskakel. Dit beloof om ’n heerlike oggend van saam musiek maak te wees!
Hier volg meer spesifieke reëlings:
09h30 - 10h15: Sessie 1
10h30 - 11h15: Sessie 2
12h00 - 13h00: Konsert
Datum: Saterdag, 12 September
Tyd: 09h30 - 13h00
Plek: Somerset House Preparatory School
Ouers, familie, en vriende is BAIE welkom om die konsert by te woon, 12h00 - 13h00.
Daar sal busvervoer wees. Die bus vertrek stiptelik om 08h15 vanaf die skool en sal na afloop van die konsert weer terug kom skool toe.
Kontak gerus vir juf. Rolene met enige verdere vrae.
|
|
|
|
SPORT
|
|
|
|
|
|
|
|
|
Het jou kind nodig om iets te print? Moenie bekommerd wees nie, ons help jou graag by die skool!
|
- Swart & wit: R5 per bladsy
- Kleur: R10 per bladsy
- Gaan betaal eers by tannie Adri (ontvangs)
- Sy sal vir jou 'n papiertjie gee met bewys van betaling
- Stuur die drukwerk in PDF-formaat aan juffrou Marecia by marecia@jvrprim.co.za
- Drukwerk moet minstens 24 uur voor die tyd gestuur word.
- Geen onmiddellike drukwerk sal gedoen word nie.
|
|
|
|
TERUGVOER
|
|
Die jongste sportuitslae, toekennings, prestasies en ander resultate:
|
|
|
|
|
|
JANNIE VAN DIE WEEK
|
|
|
|
|
SPORTJANNIE VAN DIE WEEK
|
|
|
|
SPORT
|
|
|
|
|
Baie geluk aan ons skaakspan met hul uitstekende prestasies!
|
Tydens die skaakkompetisie op 5 en 6 September het ons o.9-span ’n uitstekende 5de plek in die Wes-Kaap behaal, terwyl die o.11 span ’n 12de plek in die Wes-Kaap behaal het.
|
|
Ons is baie trots op ons skaakspelers en hul harde werk, fokus en deursettingsvermoë!
|
|
|
|
|
|
INDIVIDUEEL
|
|
|
Baie geluk aan Bella Malan (Graad 6) wat onlangs haar WP-kleure in gimnastiek (WAG) verwerf het!
|
Bella sal die Wes-Kaap by die 2026 Nasionale Gimnastiekkampioenskappe in Pretoria verteenwoordig, wat van 24 tot 27 September 2026 plaasvind.
|
|
Ons is ongelooflik trots op Bella en wens haar alle sterkte toe met hierdie besondere geleentheid!
|
|
|
|
|
|
OUD-JANNIES
|
|
|
Baie geluk aan Emma Snijders (huidige graad 9-leerder) wat tydens die Marius Schoeman-netbaltoernooi aangewys is as die o.15 Speler van die Toernooi!
|
Emma se passie, toewyding en liefde vir die spel is ’n ware inspirasie. Ons is ongelooflik trots op jou en hierdie besondere prestasie, Emma!
|
|
Baie geluk – ons is trots op jou!
|
|
|
|
|
|
|
|
|
|
|
|
|
|
|
|
Klik HIER vir advertensies van die week
|
|
|
|
|
|
|
|
|
|
|
|
 
|
|
Jy ontvang hierdie nuusbrief
|
|
omdat jy 'n ouer of ondersteuner van Laerskool Jan van Riebeeck is.
|
|
|
|
|
Laerskool Jan van Riebeeck, Kloofstraat 52, Tuine, Kaapstad
|
|
|
|
|
|
|
|
