Soekfunksie

  • Filter Kategorie/ë

  • Herstel

Weeklikse Nuusbrief

Category: Algemeen

/ Algemeen, Nuus

Ons hoop en vertrou dat almal ‘n heerlike wintervakansie geniet het en die spreekwoordelike batterye is herlaai sodat ons almal slaggereed is om die 3de kwartaal met ywer aan te pak. Hiermee dan reëlings vir jul kennisname rakende die heropening van skole:

  • Heropening van Laerskool asook Huppelland: Geskied Maandag, 26 Julie, en normale skooltye is van toepassing.
  • Voltooiing van eksamen: Die eksamenvak/leerarea wat vir Donderdag, 1 Julie, geskeduleer was, sal nou op Vrydag, 30 Julie, tydens die toetsperiode plaasvind.
    Gr. 4 – Geskiedenis
    Gr. 5 – Aardrykskunde
    Gr. 6 – Aardrykskunde
    Gr. 7 – SK: Kuns en Drama
  • Isolasie en eksamen/assesserings: Leerders wat eksamens/assesserings as gevolg van siekte/isolasie gemis het, sal dit vanaf Woensdag, 28 Julie, tot Dinsdag, 4 Augustus, aflê. Kommunikasie rakende watter vakke/leerareas op watter dae geskied, sal binnekort volg.
  • Rapporte: Ons poog om dit op Vrydag, 6 Augustus, aan leerders uit te deel.
  • Ouerafsprake: Geskied op Woensdag en Donderdag, 11 – 12 Augustus vanaf 13:30 – 17:00. Uitnodigings en program volg.
  • Sport- en kooroefeninge by die skool: Geen buitemuurse aktiwiteite tot verdere kennisgewing.
  • Snoepie: Alle kosbestellings gaan voort deur middel van die Karri-toep.
  • Nasorg: Heropen vanaf Maandag, 26 Julie, soos normaal.
  • Bestuur/EXCO: Die bestuurspan het reeds vanaf 22 Julie begin werk om te verseker dat die skool skoon, gereed en netjies is om effektiewe onderrig en leer te verseker.

Baie dankie vir jul dringende aandag. Ons sien baie uit om ons Jannies by die skool te ontvang en mag kwartaal 3 ‘n baie voorspoedige tydperk vir die skoolgemeenskap wees.

Bly asseblief veilig.

Vriendelike groete,

Naas Beets
SKOOLHOOF

/ Algemeen, Nuus

Die nuwe biblioteekjuffrou, Annami Gerber, is die skakelpersoon vir verlore goedere. Indien ‘n item van jou kind verlore raak, is jy meer as welkom om haar te kontak by biblioteek@jvrprim.co.za. Hiermee wil ons ‘n versoek aan ouers rig om asseblief jou kind(ers) se klere/items duidelik met hul naam en van te merk. Alle verlore goedere wat gemerk is, kan dadelik aan sy/haar eienaar terugbesorg word. Baie dankie vir jou samewerking.

/ Algemeen, Nuus

Kan julle glo Junie-maand se raklewe is amper verstreke; die helfte van die jaar het verby gesnel! Die afgelope week het die res van die grade ook met eksamen / assesserings begin en sover verloop alles klopdisselboom.

Ons skoolgemeenskap se grootste uitdaging tans is die vinnige verspreiding van Covid-19 infeksies onder ons ouers en leerders. Ons het die afgelope tyd heelwat navrae ontvang rakende die protokol vir isolasie na Covid-19 blootstelling. Daarom het ek met die hulp van dr. Barbara Kemp op Woensdag, 23 Junie 2021, vir julle ‘n brief gestuur waarin ons almal vriendelik versoek om die voorgestelde isolasie-riglyne te volg sodat ons kan verseker dat ons leerders skool toe kan kom. Ek wil beslis nie voorskriftelik wees rakende jul sosiale lewe nie, maar laat my ook toe om julle te versoek om dit ernstig te oorweeg om liewer kinderpartytjies / verjaarsdagpartytjies / as gesinne saam te kuier moontlik uit te stel totdat die 3de vlaag van die pandemie onder beheer is. Baie dankie dat julle verstaan en die veiligheid van ons skoolgemeenskap eerste stel! Verder heers daar tans groot opwinding onder die personeel aangesien die WKOD se Covid-19 inentingsprogram gister afgeskop het en ses van ons personeellede gister suksesvol ingeënt is. Soos ek in my vorige nuusbrief genoem het, is daar lig aan die einde van die pandemie-tonnel m.a.w. daar is hoop!

Op Woensdagmiddag, 23 Junie, was ons onderwysers bevoorreg om na ‘n motiveringspraatjie van dr. Gillian Arendse, ‘n bekende gasspreker, motiveringspreker, mentor en tutor te luister. Dr. Arendse het die ongelooflike vermoë om tydens uitdagende tye soos ons tans met die 3de vlaag van die Covid-19 beleef, dinge weer vir ons as onderwyskorps in perspektief te plaas. Tydens die sessie het hy ons so geïnspireer dat al was jy met die aanvang van sy praatjie op moedverloor se vlakte, sou jy na die afloop van die sessie nie eers toelaat dat Berg Everest in jou pad staan nie. Hierdie talentvolle kernfisikus het ons gou die volgende laat besef en graag deel ek dit met julle:

  • Wees altyd dankbaar- dit is nie geluk wat ons dankbaar maak nie, maar dankbaarheid wat ons gelukkig maak.
  • Jou lewe is die resultaat van jou keuses, as jy nie daarvan hou nie is dit tyd om beter keuses te maak.
  • Geluk en motivering kom van binne – dit is ‘n keuse en daarom kan jy nie ander blameer nie.
  • ‘n Mens gebruik dieselfde hoeveelheid energie om jouself gelukkig of misrabel te maak.
  • Wees die verandering wat jy graag wens om in die wêreld te sien.
  • Middelmatigheid is voorspoed se grootste vyand en dit is onsigbaar totdat passie opdaag en dit blootstel.
  • Leierskap is ‘n aksie en nie ‘n posisie nie.
  • As iets jou nie uitdaag nie, sal dit jou nie verander nie.

Graag deel ek voorlopig met julle ‘n bietjie opwindende nuus in verband met die beoogde opgradering van die seuns- en dogtersbadkamers. Laat my ook toe om Stephanie le Roux en Ria Hertzog hartlik te bedank wat so instrumenteel is om fondse vir die projek in te samel. Ons is julle twee baie dank verskuldig. Meer inligting rakende die projek sal in my volgende nuusbrief volg.

Baie dankie aan Hoërskool Jan van Riebeeck wat vir elkeen van ons Graad 7’s ‘n pragtige skryfpen kom oorhandig het om vir hulle spesiaal sterkte met die eksamen toe te wens, ons het groot waardering!

Mag julle ‘n wonderlike naweek geniet, wees asseblief veilig. Graag sluit ek af met die volgende aanhaling van Zig Zagler: “You don’t have to be great to start, but you have to start to be great”.

/ Algemeen, Nuus

Neem asseblief kennis dat die skool volgende Vrydag, 18 Junie, om 11:45 (Gr.1-3), 12:00 (Gr.4-6) en 12:30 (Gr.7) weens personeelopleiding sluit. Die bus vertrek om 12:35. Nasorg sal voortgaan.

/ Algemeen, Nuus

Ek hoop regtig en vertrou dat dit met julle en julle gesinne goed gaan en dat almal veilig is, veral met die uitbreek van die 3de vlaag van die Covid-19 pandemie in ons ikoniese moederstad. Gister se statistieke toon dat daar 64 infeksies per 100 000 Suid-Afrikaners die laaste 7 dae plaasgevind het. Ons land se infeksiesyfers soos op 10 Junie staan op 1, 712 939 en 57 310 Suid-Afrikaners is sedert die begin van die pandemie oorlede.

Die vraag is: “Is daar rede tot kommer?”. Alhoewel daar ‘n toename in die aantal infeksies is, glo ek dat indien ons waaksaam bly en die nodige Covid-19 protokol eerbiedig ons binnekort hierdie aanslag ook sal oorwin. Verskeie van ons gesinne is die afgelope week erg geraak waar van die gesinslede positief vir die virus getoets is en hulle is in isolasie van 10 dae geplaas. Wees verseker dat indien leerders as gevolg van siekte nie skool kan bywoon nie, ons nog steeds ons leerders akademies sal ondersteun. Julle hoef glad nie bekommerd te wees in terme van assesserings nie; ons sal beslis ‘n plan maak! Graag wil ek julle as ouers bedank dat julle die skool se Covid-19 protokol eerbiedig deur nie jul kinders skool toe te stuur wanneer ‘n gesinslid siek is of as ‘n lid vir ‘n Covid-toets gaan. Baie dankie dat julle verstaan dat dit moeilik is om te onderskei tussen verkoue/griep-simptome en dié van Covid-19. Ons probeer almal se belange op die hart dra en ek verstaan dat dit logistiese uitdagings vir werkende ouers bied as kinders by die huis moet bly indien hulle verkoue of griep onderlede het.

Op ‘n meer positiewe noot: Verlede Vrydag het ons leerders en personeel ‘’funky’’ sokkies gedra om spesifiek hulde te bring aan alle gesondheidspersoneel dwarsoor ons pragtige land wat in die voorste linies baklei om Suid-Afrikaners se lewens te beskerm teen die aanslag van die pandemie. Ons leerders het baie “cool” gelyk en in die proses spesiale erkenning aan gesondheidswerkers gegee.

Cape Argus is tans besig met ‘n spesiale boekinsamelingsprojek vir minderbevoorregte kinders van die ‘’Home of Hope’’. Ek het gisteroggend die voorreg gehad om Rehana Rutii, wat die opvoedkundige projek lei, te ontmoet. Ek wil graag hê dat ons as skool saam met Laerskool Milnerton by hierdie projek betrokke moet raak. Ek wil graag ‘n versoek rig om indien daar Afrikaanse en/of Engelse leesboeke (ouderdomgepas 4 – 11 jaar) by die huis rondlê, vir hierdie projek te skenk. Die boeke kan sommer direk na ons skool se biblioteek geneem word. Hierdie is ‘n wonderlke geleentheid om uit te reik en instrumenteel te wees om die sosiale en opvoedkundige probleme in behoeftige areas aan te spreek.

Dit laat my weer onwillekeurig dink dat ons dikwels vergeet om dankbaar te wees vir soveel voorregte in ons lewens wat ons daagliks as vanselfsprekend aanvaar. Navorsing toon dat mense wat dankbaar is meer opgeruimd is, beter verhoudinge koester en minder gespanne is. Ek sluit dus af met die volgende anonieme aanhaling: “Wie elke sonstraal met dankbaarheid geniet, sal ook die in die skaduwee kan oorleef.”

/ Algemeen, Nuus

Kom geniet ‘n prettige Jeugdag saam met jou Jannie-maats! Trek kleurvolle sivvies aan en doen iets GEK met jou hare!

Koste: R5, betaalbaar op die Karri-toep vanaf Maandag, 7 Junie.

Daar sal ook pouse lekkernye te koop wees en musiek om te geniet! Geld word ingesamel ten bate van die graad 7-fonds.

/ Algemeen, Nuus

Skielik het Junie-maand aangebreek en met die 3de vlaag van Covid-19 wat soos ‘n onwelkome gas opdaag, kondig die president ook aan dat die land na vlak 2 van die grendelperiode beweeg.

Ek is seker daarvan dat julle ook bewus is van die vlaag van tienerselfmoord wat die laaste paar weke in die Wes-Kaap sy kop uitgesteek het. Die pandemie met al sy drakoniese regulasies het nie net ‘n vernietigende effek op die ekonomie nie, maar ook ‘n geweldige sielkundige effek op die mensdom self. Ons kyk ons dalk vas in die sigbare en meetbare gevolge van die pandemie soos byvoorbeeld die sterftesyfer, maar die ‘verborge’ effek word dikwels nie raak gesien nie. Sommige mense wat die virus opdoen, sukkel met die stigma en is ook ‘n bydraende faktor wat tot swak geestesgesondheid lei. Sielkundiges waarsku al vir ‘n geruime tyd dat die grendelmaatreëls wat deur regerings wêreldwyd geïmplementeer is, met tyd sy tol sal eis. Dus het die ‘tikkende tydbom’ ontplof en die lewens van verskeie jong tieners in ons omgewing onnodig geëis. Ek besef dat ons net ‘n laerskool is, maar steeds wil ek ‘n ernstige beroep op julle as ouers/voogde doen om saam met ons waaksaam te wees en ons kwesbare leerders/kinders se emosionele gesondheid daagliks te monitor en by te staan waar nodig.

Op ‘n meer positiewe noot wil ek graag terugvoering gee rakende ons skool se suksesvolle gholfdag wat op 31 Mei te Pearl Valley Gholflandgoed plaasgevind het. 48 gholfspelers het aan die spesiale dag deelgeneem en was gereed om hul gholfvaardighede teen die gholfgode te toets, maar hulle moes ook die ongure winterweer trotseer. Ek was onder die indruk dat dit nie op ‘n gholfbaan reën nie, maar gelukkig was ek bevoorreg om saam met Cobus Loubser, Alet Loubser en Julia Ward die pragtige 18 putjies aan te durf en hul wonderlike geselskap terdeë te geniet. Daar is verseker nie ‘n beter plek om iemand beter te leer ken as op ‘n gholfbaan nie. Die beroemde gholfspeler, Bobby Jones, is bekend ook vir die volgende aanhaling en ek gaan dit in Engels aanhaal: “Golf is the closest game to the game we call life. You get bad breaks from good shots; you get good breaks from bad shots – but you have to play the ball where it lies.” Hierdie aanhaling is so gepas vandag met die al sy uitdagings wat die lewe asook die pandemie bied om ons daaglikse tot die uiterste te beproef. Laat my ook toe om Alet Loubser en Ria Hertzog hartlik te bedank wat die puik gholfdag gereël het. Baie geluk aan die gholfspan van Hoërskool Jan van Riebeeck wat die dag met 104 punte gewen het. Ons sien baie uit na die 2022 gholfdag waar ons beoog om heelwat meer spelers en ouers te betrek en die dag met ‘n veiling af te sluit.

Graag wil ek ook mnr. Pieter Rademeyer (Skoolhoof) en sy span van die hoërskool gelukwens en hartlik bedank dat hulle ons Woensdagaand, 2 Junie, by ‘n krieketfunksie in hul klubhuis betrek het. Die hoërskool het die dienste van die Cricket School of Excellence bekom en die eienaar, Ryan Maron, het ons krieketseuns, ouers en personeel toegespreek en sy visie om krieket in ons skoolomgewing te verbeter met ons gedeel. Ryan, ‘n voormalige WP-krieketspeler (paaltjiewagter), het vir meer as 6 jaar professionele krieket in Nederland en Denmarke gespeel. Hy was ook betrokke by internasionale krieketafrigting met die spanne van Wes-Indië en Afganistan. Keith Ingram, voormalige Lions krieketspeler (bouler) en een van die beste boulafrigters in die land, is ook deel van Ryan se afrigtingspan. Hy het ook sy agtergrond en ondervinding met ons gedeel. Keith was een van die belowenste jong boulers in die land, maar ‘n ernstige rugbesering het hom op ‘n jeugdige ouderdom van 20 jaar uit die sport gedwing. Ons is voorwaar bevoorreg dat ons hul dienste kan bekom tot voordeel van krieket by beide skole. Hierdie is weer ‘n bewys dat beide die Hoër- en Laerskool Jan van Riebeeck saam gaan werk tot voordeel van hul leerders en die breë skoolgemeenskap.

Verder wil ek ook noem dat aangesien die sportvaardighede vir die grondslagfase-leerders tydens die eksamen voortgaan, het die bestuur besluit dat graad 4 – 7-leerders ook tydens die eksamen (Maandae tot Donderdae) in skooltyd (12:00 – 12:45) sal voortgaan met sportvaardighede. ‘n Volledige program sal volg. Ek glo julle sal met my saamstem dat leerders na afloop van hul daaglikse eksamen ‘n bietjie oefening buite in die vars lug sal verwelkom. Leerders is dikwels angstig tydens eksamens en ek glo dat deur voort te gaan met basiese vaardigheidsoefeninge dit hulle sal help om die stresvlakke tydens eksamens te verlaag. Dit sal ook verder help om hul konstante aandag aan studies en eksamen tydelike weg te neem deur op iets anders te fokus.

Graag sluit ek af deur vir julle almal ‘n wonderlike en geseënde naweek toe te wens.

/ Algemeen, Nuus

Ons hou eerskomende Vrydag ‘n baie spesiale sivviedag waartydens ons ons mediese personeel, spesifiek die dokters (dokkies), eer vir die werk wat hulle doen. Deur hierdie dag te vier trek ons snaakse, opwindende, prettige sokkies aan. Geen kostes is hieraan verbonde nie, want mediese personeel lewer ‘n kosbare diens en gee baie ekstra van hulself aan hul gemeenskap.

/ Algemeen, Video, Nuus

Respek is om bv. ander te behandel soos wat jy behandel wil word, aan ander se gevoelens te dink en verskillende mense se opinies in ag te neem. Kom ons moedig ons leerders aan om mooi te dink en praat van hulself, hul ouers en hul vriende, hul besittings op te pas en met respek teenoor ander mense op te tree.

Kliek op die video om te sien hoe twee van ons leerders verduidelik hoe hulle respek toon.

Kliek hieronder vir ‘n video van die leerderraad wat verduidelik hoe jy respek kan toon.

/ Algemeen, Nuus

Terwyl Mei-maand einde se kant toe staan, is Moeder natuur hard aan die werk om die heerlike herfsweer stadig maar seker aan die genade van die winter oor te laat. Ons is so geseënd met die goeie reën die afgelope tyd en moontlik het ons gou vergeet dat ons pragtige moederstad aan die einde van Februarie 2018 ‘n baie ernstige waterkrisis beleef het en amper die gevreesde ‘’Dag Zero’’ bereik het.

Wie sou kon voorspel dat na afloop van die waterkrisis in Kaapstad en die beplande beurtkrag van ESKOM ons nog ‘n krisis in die gesig sou staar met die Covid-19 pandemie wat ons daaglikse bestaan en werkswyse drasties verander. Alles wat vanselfsprekend is, het in ‘n oogwink verander. Met die 3de vlaag van Covid-19 wat haas onafwendbaar is, wil ek vir julle die versekering gee dat ons alles in ons vermoë sal doen om die veiligheid van die leerders en die skoolgemeenskap te verseker. Nuwe regulasies het ons as skool reeds die afgelope week genoodsaak om die formaat van sportoefeninge te verander asook dat kooroefeninge vanaf 24 Mei slegs in graadverband sal geskied. Ons sal dan weekliks die sport- en kooroefeninge bestuur afhangend van die erns van die 3de Covid-vlaag. Dit is vir ons belangrik dat ons leerders so lank as moontlik aktief bly en met aangepaste sport- en kultuuraktiwiteite voortgaan totdat die erns van die pandemie vir ons anders wys. Die musiekkonsert van Woensdagaand, 26 Mei, is ook vir eers uitgestel tot latere kennisgewing. Ek is van mening dat indien ons met die konsert Woensdagaand sou voortgaan, dit beslis die verkeerde boodskap na buite sou stuur.

Die pandemie het nie net ‘n vernietigende impak op die ekonomie nie, maar lei tot lewensverlies. Die onlangse afsterwe van die bekende akteur, Ben Kruger, het my opnuut weer laat besef die geweldige emosionele skade van kommer, angs, hartseer en om dan nie eers van die onsekerheid van hoe lank ons nog gebukkend onder die die virus se impak sal wees, te praat nie. Graag versoek ek julle om ook gereeld met jul kinders te gesels oor hul ervaring van die pandemie. Hou asseblief hul gemoed dop, want soveel reëls en regulasie maak net eenvoudig nie sin nie. Die enigste normaal wat hulle nou ken, is verandering. Daarom doen ek ‘n ernstige beroep op die skoolgemeenskap dat ons positief sal bly en nie sal toelaat dat die 3de vlaag ons vrese sal verteenwoordig nie, maar eerder ons vermoë om nog ‘n krisis te oorwin.

Graag sluit ek af met die volgende aanhaling: “Staying positive does not mean that things will turn out okay. Rather it is knowing that you will be okay no matter how things turn out.”

/ Algemeen, Nuus

Vanaf Maandag, 31 Mei, sal die volgende uitkomtye geld:

Gr.4 & 5
14:10 Maandag – Donderdag
14:00 Vrydae
(Normale tyd)

Gr.6 & 7
14:00 Maandag – Donderdag
13:50 Vrydae
(10 minute vroeër)

/ Algemeen, Nuus

Ons kom aan die einde van nog ‘n suksesvolle week en ons skool is baie geseënd dat alles klopdisselboom verloop. Die enigste demper die week is die afkondiging deur die Nasionale Onderwysdepartement, asook WKOD, dat alle kontaksporte met onmiddellike effek afgestel moet word as ‘n voorsorgmaatreël om die impak van die 3de Covid-vlaag hok te slaan.

Julle wonder seker waar dit ons as skool t.o.v. die sportaktiwiteite laat wat die afgelope tyd so mooi in plek geval het? Graag deel ek dat ons met wintersportoefeninge tot verdere kennisgewing voortgaan, maar die formaat gaan verander en die fokus tydens oefeninge verskuif na vaardigheidsontwikkeling terwyl fisiese kontak totaal vermy word. Ek glo julle stem saam dat ons nie nou al die leerders se bietjie sportervaring net eenvoudig moet bederf nie, want dit is belangrik dat ons leerders aktief en fiks bly terwyl hulle ook die vars lug buite kan geniet. Om nie eers te praat van die sosiale interaksie en vaardighede wat met wintersport gepaardgaan nie. Ongelukkig sal daar tot verdere kennisgewing geen wedstryde of sportklinieke kan geskied nie. Ons gaan egter nie die beplande sportklinieke en wedstryde net eenvoudig afstel nie, maar bloot uitstel. Ek wil graag ‘n skoolkultuur skep waar ons slegs onder uiterste omstandighede sport en/of funksies sal kanselleer. Om net eenvoudig te kanselleer kan so maklik ‘n slegte gewoonte raak.

Soos julle, wonder ek ook of die 3de vlaag van die pandemie die Wes-Kaap en Suid-Afrika so hard gaan tref en wat is die plan van die regering om die ‘beloofde’ entstofprogram vinniger uit te rol. Ons moet egter nie te selfvoldaan raak en die erns van die 3de golf onderskat nie. Dus vra ek dat ons as JvR-familie waaksaam sal wees en ten alle tye Covid-protokol sal toepas om die veiligheid van ons skoolgemeenskap, provinsie en land te verseker. Wees verseker dat ons alles in ons vermoë sal doen om die veiligheid van ons leerders, personeel en ouers te verseker.

Graag versoek ek julle as ouers/voogde se hulp t.o.v. die volgende:

Die Covid-19 inperking het ons leerders genoodsaak om baie meer van die internet, aanlynonderrig, sosiale media en kommunikasie met maats gebruik te maak. Weens die feit dat leerders minder buitemuurse programme en sosiale geleenthede gehad het, is baie tyd dus deur sosiale media opgeneem en moontlik deel van hul daaglikse lewe geword. Ek versoek graag om ‘n bietjie te loer waarmee jou kind/ers op sosiale mediaruimtes besig is. Kinders besef nie die gevare van sosiale platforms nie en besef nog minder dat hulle as gevolg van groepsdruk (om “cool” te wees) dikwels kommentaar bewustelik en onbewustelik lewer wat onvanpas is. Sosiale media gebruik kan so maklik ‘n gewoonte raak en ook so maklik ‘n verslawing. Dit op sy beurt kan lei tot geestelike en emosionele skade. Baie dankie dat julle betrokke gaan raak en duidelike grense t.o.v. sosiale media gebruik sal stel. Wees asseblief vir jou kind/ers ‘n voorbeeld om sosiale media verantwoordelik te gebruik.

Graag sluit ek af met die volgende aanhaling om vir julle ‘n wonderlike en geseënde naweek saam met familie en vriende toe te wens: “Be like sunshine that gives life to others.”

/ Algemeen, Nuus

Ek kan nie glo hoe vinnig die eerste week van die nuwe kwartaal verby gesnel het nie. Ek hoop en vertrou julle het ‘n wonderlike Moedersdag op Sondag, 9 Mei, saam met jul familie en / of gesin geniet. Mag ons nooit die belangrike rol wat moeders vertolk, vergeet nie. Ek glo moeders is die gom wat alle huishoudings bymekaar hou; moeders is die kompas wat die gesinne se kernwaardes op koers hou. Baie dankie dat julle aan die waardes bou, want dit skep geborgenheid en standvastigheid vir ons kinders.

Op Donderdag, 6 Mei, het ons Trust ‘n baie suksesvolle kleiduifskietdag by die ‘’Gun Valley Clay Target Club’’ aangebied. Kleiduifskietery behels klein (oranje) teikens wat deur die lug geskiet word om voëljag te stimuleer. 65 Persone waarvan die meeste aspirante skutte was, het aan die gewilde dag deelgeneem. Ons hoofborg vir die dag was Safari Outdoor. Baie dankie aan Stephanie le Roux, Ria Hertzog en LJ le Roux wat hard agter die skerms gewerk het om die unieke geleentheid moontlik te maak. Dankie ook aan Pieter Janse van Vuuren wat met soveel entoesiasme betrokke was. Die dag is afgesluit met ‘n klein, intieme veiling waartydens R141 000 onder die bekwame leiding van ons uitstekende afslaer, MC du Toit (ouer by Huppelland), ten bate van welwillenheid ingesamel is. Ek wil graag soos tydens my toespraak ons ouers hartlik bedank vir die feit dat hul beursies vir welwillendheid wawyd oop staan. Gelde geïn gaan direk aangewend word om twee gebalanseerde etes per dag vanuit die snoepie aan ons behoeftige leerders te voorsien. Ek het self die voorreg gehad om ook deel te neem en vinnig besef hierdie sport vereis ‘n ander vaardigheid as om bloot statiese teikens raak te skiet. Die ‘kleiduiwe’ vlieg vrek vinnig in verskillende rigtings en ek moet bieg ‘n mens ervaar emosies soos geen ander en kan ek verstaan dat dit ‘n baie self-verslawende sport kan word. Dit was lekker om te sien dat heelwat van ons mammas ook deelgeneem het en in die proses die meeste van ons pappas op hul neuse laat kyk het. Baie geluk aan Coreen Scholtz wat as die beste dames skut aangewys is.

Gisteroggend het ons die skooldag met ‘n kort vrywillige saalbyeenkoms begin om Hemelvaart te vier. Hemelvaartsdag val altyd op die 40ste dag gereken vanaf die eerste Paasdag. Op Hemelvaartsdag vier Christene wêreldwyd dat Jesus na Sy kruisiging en opstanding in die hemel opgevaar het en alomteenwoordig deur Sy gees is. Ons wens ons Christen-gemeenskap ‘n geseënde Pinkster toe.

Graag wil ons ook ons Moslem-ouers en breër Moslem-gemeenskap wat vandag die einde van Ramadan vier, ‘n geseënde dag van Eid Mubarak toewens. Mag julle as gesinne en/of families hierdie spesiale dag geniet.

Graag sluit ek af met hemelvaart, Ramadan en ons waarde vir die maand ingedagte met die volgende aanhaling: “Jy sal niks verloor deur nederig te wees nie, want ‘n nederige persoon wen die harte van mense.”

/ Algemeen, Nuus

Ek hoop en vertrou dat julle as gesinne die kort vakansie terdeë geniet het. Alhoewel die vakansie baie kort was, amper gevoel soos ‘n ‘laaang’ naweek, kon dit beslis nie op ‘n beter tydstip aangebreek het nie. Dit was ‘n lang eerste kwartaal en as ons dit aan prestasie sou koppel, het ons as skoolgemeenskap holities met vlieënde vaandels geslaag. Nou lê daar ‘n baie opwindende kwartaal 2 voor wat 10 weke en 49 skooldae insluit. Jammer vir die bietjie nuttelose inligting, maar dit is tog van belang wanneer dit kom by akademiese- en selfs persoonlike beplanning. Kwartaal 2 is die begin van wintersport en as die parmantige pandemie ons toelaat, sien ons baie uit om aan ‘n paar wedstryde of ‘n lekker sportdag deel te neem.

Op akademiese gebied, sluit kwartaal 2 ‘n assesseringsweek vir Gr. R – 3 asook die eksamen vir Graad 4 – 7 in. Wees verseker dat ons opvoeders die ekstra myl gaan loop om ons Jannies behoorlik voor te berei en toe te rus om die spreekwoordelike ‘eksamen-bul’ by die horings te pak. Die afgelope week het julle die geleentheid gehad om jou kind/ers se onderwysers te ontmoet asook hul kwartaal 1 akademiese vordering met die onderskeie opvoeders tydens ouerafsprake te bespreek. Ek is baie beïndruk met die hoeveelheid ouers wat die ouerafsprake eerbiedig het. Baie dankie dat jy kosbare tyd in jou kind se toekoms investeer. Laat my ook asseblief toe om ons bekwame opvoeders te bedank vir hul waardevolle insette tydens die belangrike ouerafsprake. Ek nooi julle as ouers/voogde uit om aktief by jou kind/ders se akademie betrokke te bly en behou gereelde kontak met hul onderskeie opvoeders.

Die veranderde Covid-maatreëls laat nou toe dat tot en met 250 persone binnenshuis mag vergader. Dit het vir ons die geleentheid gebied om op Dinsdag, 4 Mei, ‘n saalbyeenkoms vir die Graad 6- en 7-leerders te hou. Ons bekwame leerderraad het die saalbyeenkoms uitstekend gelei, ‘n verrykende boodskap gebring en dit was ongelooflik om hul in aksie te sien. Tydens die saalbyeenkoms is die Top 10 akademiese Gr. 7-leerders vir kwartaal 1 na vore geroep om erkenning vir hul harde werk en prestasie te ontvang. Ons beplan ook vir die komende weke om saalbyeenkomste vir die res van die grade te reël. Dit bied vir my die eerste keer as nuwe skoolhoof ‘n geleentheid om meer formeel met ons leerders in groter groepe te kommunikeer asook om ons leerderraad aan al ons leerders amptelik voor te stel. Covid het hierdie belangrike byeenkomste en funksies van ons vir ‘n baie lang tyd beroof.

Neem asseblief kennis dat ons waarde vir die maand ‘nederigheid’ is. Help ons asseblief as opvoeders om ons Jannies te leer om nederig te bly, nie te dink dat ons beter is as ander mense nie, maar wys genoeg om te weet dat ons mag anders wees. Ek glo natuurlik die beste manier om nederig te bly is om ander mense te dien. Graag sluit ek af met die volgende aanhaling van C.S. Lewis: “Nederigheid is nie om minder van jouself te dink nie; dit is om minder áán jousélf te dink.”

Belangrike Datums

julie 2021

19julHeeldag26Skool heropen

30julHeeldagHannes Muller (Terrein) verjaar

30julHeeldagKultuurkaskenades Gr.6 & 7

31julHeeldagSPORTFEES: Curro Hermanus Sportfees

augustus 2021

02augHeeldagKultuurkaskenades Gr.2 & 3

05augHeeldagKultuurkaskenades Gr.4 & 5

14augHeeldagNETBAL: WPNA kliniek

18augHeeldagBeulah Matthews (Snoepie) verjaar

20augHeeldagSKAAK: Paarl Skaaktoernooi

21augHeeldagSKAAK: Louwtjie "Rapid chess" (WEG)

21aug09:0012:00Eisteddfod Solosang 09:00 - 12:00

24augHeeldagBen Reynecke (Musiek) verjaar

25augHeeldagHOKKIE: Durbanville Prep O/9 Dogters Mini-toernooi (WEG)

26augHeeldagHOKKIE: Durbanville Prep O/9 Seuns Mini-toernooi (WEG)

27augHeeldagSPORTDAG: Dirkie Uys, Hokkie (TUIS)

28augHeeldagSPORTDAG: Dirkie Uys, Rugby & Netbal (TUIS)

28aug11:0013:00Klavier Eisteddfod 11:00 - 13:00

31augHeeldagPhillip Chimukuyu (Sekuriteit) verjaar

september 2021

02sepHeeldagLiezel Theron (Onderwyser) verjaar

03sepHeeldagSanna Molepo (Terrein) verjaar

04sepHeeldagPatrick Chadzuka (Terrein) verjaar

04sepHeeldagBSC 7's Rugbytoernooi

07sepHeeldagTina Fourie (Spelterapeut) verjaar

08sepHeeldagDolinda Mfulo (Nasorg) verjaar

11sepHeeldagNetbal: O/12 Paarl Gim Toernooi

16sepHeeldagEllerton Gr.7 markdag

17sepHeeldagExco-beplanningsessie

20sepHeeldagHeidre Ehlers (Onderwyser) verjaar

27sepHeeldagLucia de Jager (Onderwyser) verjaar

28sepHeeldagFrancelle Kruger (Intern) verjaar

28sepHeeldagJannies Woord-makietiedag

oktober 2021

01oktHeeldagSkool sluit

01oktHeeldagSharon Mabena (Onderwyser) verjaar

06oktHeeldagMarinda Brink (Onderwyser) verjaar

08oktHeeldagGr.6 Lead4life

09oktHeeldagChristopher Banda (Terrein) verjaar

09oktHeeldagSuzaan Burger (Onderwyser) verjaar

09oktHeeldagBibi Janse van Rensburg (Onderwyser) verjaar

09oktHeeldagKRIEKET: Louwtjie O/11 & O/13 Strand krieket (WEG)

12oktHeeldagElana Jacobs (Snoepie) verjaar

15oktHeeldag16TENNIS: Mikro Tennistoernooi

23oktHeeldagEeufees: Gala-aand

28oktHeeldagNicola Swanepoel (Onderwyser) verjaar

30oktHeeldagNetbal: WNPA kliniek

november 2021

02novHeeldagMadri Greyling (Nasorg) verjaar

05novHeeldagRazelle Hanekom (Sport) verjaar

05novHeeldagMichelle Kellerman (Onderwyser) verjaar

05novHeeldagKRIEKET: Day / Night Mini-krieket toernooi (WEG)

20novHeeldagRaché de Goede (Onderwyser) verjaar

30novHeeldagNadia Meiring (Onderwyser) verjaar

desember 2021

14desHeeldagMarius Steyn (Drywer) verjaar

15desHeeldag08Skool sluit vir leerders en onderwysers

18desHeeldagWanda van Zyl (Onderwyser) verjaar

20desHeeldagRentia van der Merwe (Onderwyser) verjaar

21desHeeldagMarianne Conradie (Onderwyser) verjaar

januarie 2022

06janHeeldagAndri Baird (Onderwyser) verjaar

14janHeeldagEstelle Slabber (Musiek) verjaar

17janHeeldagJodene le Clus-Naylor (Admin) verjaar

17janHeeldagSkool begin vir onderwysers

19janHeeldagSkool open

26janHeeldagSusan Oelofse (Nasorg) verjaar

27janHeeldagChristoff Bothma (finansies) verjaar

28janHeeldagNaas Beets (Skoolhoof) verjaar

28janHeeldagSuné Alberts (Onderwyser) verjaar

28janHeeldag100 + 1 feesvieringe

februarie 2022

04febHeeldagPutuma Mgengo (Terrein) verjaar

12febHeeldagThembela Swartbooi (Terrein) verjaar

27febHeeldagAdri Marais (Admin) verjaar

maart 2022

03mrtHeeldagEliam Kaunda (Terrein) verjaar

09mrtHeeldagMarike Badenhorst (Sielkundige) verjaar

21mrtHeeldagAnja van der Merwe (Onderwyser) verjaar

april 2022

04aprHeeldagBenita Smit (Onderwyser) verjaar

05aprHeeldagWarren Stoman (Onderwyser) verjaar

08aprHeeldagJana Nel (Onderwyser) verjaar

18aprHeeldagMardry Wright (Onderwyser) verjaar

19aprHeeldagSuné Stander (Assistent) verjaar

21aprHeeldagMarietjie de Kock (OLSO) verjaar

21aprHeeldagAnnet Wilke (Terapeut) verjaar

24aprHeeldagMarlene Jooste (Onderwyser) verjaar

mei 2022

02meiHeeldagAnnemie Gerber (Onderwyser) verjaar

03meiHeeldagUrsula Williams (Nasorg) verjaar

05meiHeeldagHelecia Groenewald (Musiek) verjaar

20meiHeeldagAnike Goliath (Assistent & Nasorg) verjaar

24meiHeeldagAndre Lourens (Onderwyser) verjaar

29meiHeeldagIzel Storm (Onderwyser) verjaar

31meiHeeldagCharlene van Rooyen (Onderwyser) verjaar

junie 2022

02junHeeldagMaricqe Coetzer (Onderwyser) verjaar

14junHeeldagMatthews Kamanga (Sekuriteit) verjaar

30junHeeldagShahnee Felix (Onderwyser) verjaar